Tou Fai Faka Mafola ʼAki Te Fakasiosio Tonu
1 Ke tou maʼu te fakasiosio tonu, ʼe tonu ke tou mahino ki te hahaʼi ʼaē ʼe tou fai faka mafola ki ai. Koteā tona tupuʼaga? Koteʼuhi ʼe hoki feala anai ke lave ki te loto ʼo te hahaʼi mo kapau ʼe tou popoto ʼi te fakahā ʼo te logo ʼo te Puleʼaga ke tupu ai hanatou fia logo. Lolotoga te māhina ʼo Sanualio, ʼe tou fakahā anai te kaupepa lahi ʼaē Fai ʼo Te Finegalo ʼo Te ʼAtua, peʼe ko he tahi ʼu kaupepa ʼi te lea fakaʼuvea ʼe maʼu e te kokelekasio. Ko te ʼu faʼifaʼitaki ʼaenī ʼe tokoni anai kia koutou.
2 Kapau ʼe tou fia fakahā te kaupepa “Fai ʼo Te Finegalo ʼo Te ʼAtua,” ʼe feala ke tou ʼui fēnei:
◼ “Ko te tokolahi ʼe nātou fia ʼiloʼi pe koʼe ʼe mātou ʼaʼahi tuʼumaʼu te hahaʼi. Neʼe foaki e Sesu te fakatotonu ki tana ʼu tisipulo ke nātou fai faka mafola pea mo fai he ʼu tisipulo. [Lau ia Mateo 28:19-20.] ʼI te ʼuluaki sēkulō, neʼe ʼiloa te kau Kilisitiano ko te kau fai faka mafola lotomālohi ʼa te ʼAtua. [Fakahā age te ʼuluaki paki ʼo te pasina 7.] Neʼe fakakikite e Sesu, ʼi totatou temi ko te kau Kilisitiano, ʼe nātou fakahoko anai he gāue ʼi te malamanei katoa. [Lau ia Mat. 24:14 ʼaē ʼe tuʼu ʼi te tuʼa pasina fakaʼosi pea mo fakahā te ʼu paki.] Ko ai ʼaē ʼe ina fai te meʼa ʼaia ia ʼaho nei? Ko te hahaʼi ʼi te ʼu fenua fuli ʼe nātou ʼiloʼi ko te kau Fakamoʼoni ʼa Sehova ʼe nātou tatuʼu ʼo ʼaʼahi ia nātou. ʼE ke ʼiloʼi koa ko te faʼahi ʼaia ʼe ina fakahoko te lea faka polofeta ʼa Sesu? [Tuku ke fai hana tali.] Ko te kaupepa ʼaenī ʼe ina fakamahino atu pe koʼe ʼe maʼuhiga te gāue ʼaia, pea koteā te ‘logo lelei’ ʼaia ʼaē ʼe mātou fia fakahā atu.” ʼOsi ʼaia pea koutou tuku age te kaupepa.
3 Ko te tahi faʼahiga fai ʼe feala ke fakaʼaogaʼi ʼaki te kaupepa “ ʼE Tokaga Moʼoni Koa Te ʼAtua Kia Tatou?” ʼe kamata ʼaki te fehuʼi ʼaenī:
◼ “ ʼE tui te tokolahi ia ʼaho nei, ko te ʼAtua ʼe mole tokaga moʼoni kia tatou ʼi te kele, pea ʼe mole ina fai he meʼa moʼo fakatokatoka totatou ʼu fihifihia. ʼE koutou manatu feiā koa la? [Tuku ke fai hana tali.] ʼE ʼau fia lau atu te meʼa ʼaē ʼe ʼui mai e te kaupepa ʼaenī, ʼo ʼuhiga mo te meʼa ʼaē ʼe fakatuʼutuʼu e te ʼAtua maʼa te tagata pea mo te kele. [Lau te ʼu manatu ʼo te palakalafe 3 pea mo te ʼuluaki palakalafe ʼo te fahaʼi 2 ʼi te pasina 3.] ʼE mahino papau ia, ʼe ʼi ai te tupuʼaga tāfito ʼo te tuku ʼaē e te ʼAtua ke hoko te ʼu fihifihia ʼi te kele. Kapau ʼe koutou lotolelei ke koutou ʼiloʼi pe koteā tona tupuʼaga, koutou lau te kaupepa ʼaenī, ʼaē ko tona kupu tāfito ʼE Tokaga Moʼoni Koa Te ʼAtua Kia Tatou?”
4 Peʼe feala, ʼi te ʼosi ʼo takotou fakamālo, ke koutou ʼui age:
◼ “Koteā tau manatu ki te ʼu fakapapau ʼa te tagata, ʼaē ke ina foaki mai te tokalelei ki te malamanei? [Koutou tuku ke fai hana tali.] Koʼeni te meʼa ʼaē ʼe ʼui e te Tohi-Tapu ʼo ʼuhiga mo te ʼu fealagia ʼo te tagata ʼo ʼuhiga mo te faʼahi ʼaia. [Lau ia Selemia 10:23.] Lolotoga ʼo te ʼu sēkulō, neʼe fakamoʼoni e te tagata ʼe mole feala ke ina taki ia ia totonu. Kae, tou fakatokagaʼi te fakapapau ʼa te ʼAtua ʼaē ka hoko moʼoni anai. [Lau ia 2 Petelo 3:13.] Ko te fakapapau moʼoni ʼaē ʼa te ʼAtua ʼo ʼuhiga mo he kele foʼou ʼe hoko moʼoni anai ia.” Koia ʼe feala ke tou fakaloto mālohiʼi ia ia ʼaē ʼe tou faka mafola ki ai ke ina toʼo he kaupepa ʼi tatatou ʼu kaupepa. Ka tou fakahā age te kaupepa lahi ʼo te Puleaga, ʼe feala ke tou fakatokagaʼi age te meʼa ʼaē ʼe ʼui ʼi te ʼuluaki palakalafe ʼo te pasina 3. Ko te paki ʼo te takafi ʼo te kaupepa lahi Mauli Heegata Ite Kele! ʼe lelei ʼaupito pea ʼe tau mo te fai palalau.
5 Ko te fakasiosio tonu ʼe tokoni anai kia tatou ke tou mahino ki te ʼu meʼa ʼaē ʼe ʼaoga pea mo loto kiai te hahaʼi ʼaē ʼe tou felāveʼi mo nātou. Koʼeni te meʼa ʼaē ʼe fakapapau mai kia tatou ia Tāʼaga Lea 16:23, ʼo ina ʼui fēnei: “Ko te loto ʼo te tagata poto ʼe ina akoʼi tona gutu ke fakasiosio tonu, pea ki tona ʼu laugutu ʼe ina toe tuku kiai te mālohi ʼo te fakalotoʼi.”