Koutou Fai He ʼu ʼAʼahi Moʼo Hāofaki ʼo Te Hahaʼi
1 Ko te finegalo ʼo te ʼAtua ʼaē “ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Tim. 2:4) Koteā ʼaē ʼe feala ke tou fai moʼo tokoni ki te hahaʼi ʼaia? Ko te fai ʼo he ʼu ʼaʼahi ʼaki te fakatuʼutuʼu ʼaē ke akoʼi kia nātou te moʼoni. Koteā anai te ʼu palalau ʼaē ka koutou fai? Ko te ʼu faʼifaʼitaki ʼaenī ʼe tokoni anai kia koutou.
2 Ka koutou toe liliu ʼo ʼaʼahi he tahi neʼe ina tali te kaupepa “Fai ʼo Te Finegalo ʼo Te ʼAtua,” ʼe feala ke koutou fakaʼaogaʼi te paki ʼo te pasina 5 pea mo fehuʼi age ki ai:
◼ “ ʼI taku ʼuluaki ʼaʼahi mai ia koe, neʼe tā palalau ʼo ʼuhiga mo te maʼuhiga ʼaē ke tala e te kau Kilisitiano te logo lelei ʼo te Puleʼaga, pea neʼe tā lagaʼi te fehuʼi ʼaenī, pe koʼe ʼe maʼuhiga te logo lelei ʼaia. ʼE maʼuhiga kia tatou ke tou nofo teuteu ki te temi ka haʼu, heʼe tou maʼuʼuli nei ʼi te ʼu ʼaho fakamuli ʼo te tuʼu agakovi ʼaenī. ʼO ʼuhiga mo te faʼahi ʼaia, ʼe feala ke ʼau haʼu ki tou ʼapi ke tā palalau ki te Tohi-Tapu ʼaki te kaupepa ʼaē neʼe ʼau tuku atu. Kapau ʼe feala, ʼe ʼau fia fakahā fakanounou atu pe, peʼe feafeaʼi te faʼahiga fai ʼo te ʼu ako faka Tohi-Tapu faka famili ʼi te ʼu fenua e 200 tupu.” Kapau ʼe maʼu he temi, koutou fakaʼaogaʼi te manatu ʼo te pasina 4 moʼo fakahā peʼe feafeaʼi te fai ʼo he ako.
3 Kapau neʼe koutou tuku ki he tahi te fehuʼi ʼaē ʼo ʼuhiga mo te fakagafua e te ʼAtua te agakovi, koutou liliu ʼo hoko atu te fai palalau ʼo koutou ʼui fēnei:
◼ “Neʼe ʼau fiafia ʼi tata felogoi ʼaē ʼi taku ʼuluaki haʼu, pea neʼe ʼau fia liliu mai ʼo vakaʼi pe koteā tau manatu ʼo ʼuhiga mo te fakagafua e te ʼAtua te maveuveu pea mo te agamālohi ke hoko ʼi te malamanei ia ʼaho nei. [Tuku ke fai hana tali. Koutou fuli ki te pasina 4, pea mo lau te palakalafe 3 ʼo te faʼahi 4 ʼo te kaupepa ʼE Tokaga Moʼoni Koa Te ʼAtua Kia Tatou?, ʼo lau mo te vaega ʼo Sosue 23:14.] Fakatokagaʼi te ʼu fehuʼi ʼo te palakalafe ʼaē ka hoko mai. Lagi ʼe feala ke tā felogoi ki te tali ʼo te ʼu fehuʼi ʼaia mokā ʼau toe liliu mai.”
4 ʼE feala ke koutou toe ʼaʼahi ia nātou ʼaē neʼe tuku ki ai te kaupepa “Puleaga” peʼe ko te kaupepa “Mauli Heegata Ite Kele” ʼaki te faʼifaʼitaki ʼaenī:
◼ “ ʼI tau fakasiosio te kaupepa ʼaē neʼe ʼau tuku atu pea mo tau fakakaukauʼi te fakapapau ʼa te ʼAtua ʼo ʼuhiga mo he palatiso ʼi te kele, koteā ʼaē ʼe ke logoʼi ʼi tou loto ʼo ʼuhiga mo te ʼu fakapapau taulekaleka ʼaē neʼe fai e te ʼAtua maʼa te malamanei?” ʼI tana ʼosi fakahā atu tana manatu, pea mo koutou fai he tali fakanounou ʼo ʼuhiga mo te faʼahi ʼaia, ʼe feala ke koutou fakatokagaʼi age te pasina 4, pea mo vakaʼi pe koʼe ʼe mole feala ki te tagata pea mo te ʼu lotu ke nātou fakatuʼu te tokalelei pea mo te fīmālie.
5 Koutou manatuʼi ko te fakatuʼutuʼu ʼaē ʼe tou fai ai te ʼu ʼaʼahi: ko te kamata ʼo he ʼu ako faka Tohi-Tapu. Ko te tohi foʼou, Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe fai tāfito moʼo fai ʼo he ʼu ako faka Tohi-Tapu. Ka tou ʼaʼahi ia nātou ʼaē neʼe tou tuku ki ai he ʼu kaupepa, ʼe feala ke tou kamata he ʼu ako ʼaki te ʼu kaupepa ʼaia, pea ʼe ko he meʼa lelei anai hatatou fakahā te tohi foʼou ʼaia. ʼE tou maʼu anai he fiafia lahi mokā ako ʼe nātou ʼaē ʼe tou akoʼi ke nātou fetapā kia Sehova ʼo ʼuhiga mo tonatou fakamaʼuli.—Gāue 2:21.