Ko Te ʼAtamai Mālama ʼAē ʼe Haʼu Mai Te ʼAtua ʼe Ina Tali Ki Te ʼu Tuʼuga Fehuʼi
1 ʼI muʼa ʼo takotou maʼu ia te ʼatamai mālama ʼo te moʼoni, lagi neʼe lahi hakotou ʼu fehuʼi ʼo ʼuhiga mo te maʼuli neʼe mole koutou maʼu hona ʼu tali. ʼE mahino papau ia, neʼe koutou fiafia ʼi takotou maʼu ʼi te Tohi-Tapu te ʼu tali ki te ʼu fehuʼi ʼaia! ʼI te temi ʼaenī kua feala ke koutou tokoni ki te hahaʼi ke nātou maʼu te ʼu tali ʼaia. (Vakaʼi ia 2 Timoteo 2:2.) ʼE feala hakotou vaevae mo nātou te ʼatamai mālama ʼo ʼuhiga mo te ʼAtua ʼaē ʼe ina taki ki te maʼuli heʼegata. (Soane 17:3) Kae ʼe lava feafeaʼi hakotou tokoni ki he tahi ke mahino ki te maʼuhiga ʼo te ʼatamai mālama ʼaia? Koutou manatuʼi te ʼu fehuʼi ʼaē neʼe tali e te moʼoni maʼa koutou. Koteā te ʼu meʼa ʼaē ʼe fia ʼiloʼi e te hahaʼi ʼaē ʼe nātou kumi te moʼoni? Kapau ʼe koutou manatuʼi te ʼu faʼahi ʼaia, pea ʼe feala anai ke koutou fakahā te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te ʼu manatu ʼaē ʼe hoa mai, ʼe feala ke tokoni kia koutou mokā koutou teuteuʼi takotou fagonogono lolotoga te māhina ʼo Sūnio.
2 Mai tona ʼaluʼaga ʼaē ʼe tokolahi te hahaʼi ʼe nātou feʼekeʼaki pe koʼe ʼe lahi ʼaupito te ʼu mamahi ʼi te malamanei, ko te ʼu faʼahiga palalau ʼaenī ʼe lagi feala ke tupu ʼaki ai he fia logo:
◼ “Ka hoko he tuʼutāmaki peʼe tuputupu te ʼu fai fakapō pea mo te agamālohi, ʼe tautau fehuʼi e te hahaʼi pe koʼe ʼe hoko te ʼu meʼa fakamataku ʼaia. Koteā tau manatu ʼo ʼuhiga mo te faʼahi ʼaia?” Koutou tuku ke ina tali atu ke koutou ʼiloʼi ai pe koteā tana manatu. Pea koutou fuli age te kapite 8 ʼi te tohi Te ʼAtamai Mālama, pea koutou fakahā age te manatu ʼaē ʼe tuʼu ʼi te palakalafe 2. Koutou fakamahino age ko te tohi ʼaia ʼe ina fakahā mai te fakamahino ʼa te Tohi-Tapu, pe koʼe ʼe hoko te ʼu meʼa kovi ʼaia, pea koutou tuku ki ai te tohi ki te 150.
3 Mokā koutou liliu ʼo ʼaʼahi ia ia ʼaē neʼe koutou tuku ki ai te tohi “Te ʼAtamai Mālama,” ʼe feala ke koutou ʼui age:
◼ “ ʼE ʼau fia ʼiloʼi pe koteā tau manatu ʼo ʼuhiga mo te ʼu tuʼuga mamahi ʼaē ʼe hoko ʼi te malamanei. ʼE ke manatu tahi koa mo te tali ʼa te Tohi-Tapu ohage ko tona tuʼu ʼi te tohi ʼaenī?” Koutou tuku ke fai atu hana tali. Koutou lau te palakalafe 17 ʼo te pasina 77 ʼi te tohi Te ʼAtamai Mālama, pea koutou lau age ia Loma 9:14 ʼi tana Tohi-Tapu. Pea koutou ʼui age: “Koʼeni te logo lelei ʼaē ʼe mātou tala, ʼe mole ko te ʼAtua ʼaē ʼe tupu ai te ʼu mamahi. Neʼe ina fakapapau mai ʼe ina foaki mai anai te maʼuli heʼegata ʼi te tokalelei pea mo te fiafia. Ko te ʼuluaki kapite ʼo te tohi ʼaenī ʼe ko tona kupu tāfito ʼaenī ‘ ʼE Feala Hakotou Maʼu He Ka Haʼu Fīmālie!’ ʼE ʼau fia fakamahino atu peʼe lava hoko feafeaʼi te faʼahi ʼaia kia koe pea mo te ʼu hahaʼi ʼaē ʼe ke ʼofa mamahi ai.” Koutou fuli age te kapite 1, pea mo koutou fakahā peʼe feafeaʼi tatatou ako te tohi. Koutou fai te kapite ʼo mulimuli ki tona ʼu ʼaluʼaga.
4 ʼE feala hakotou fakaʼaogaʼi te ʼu ʼuluaki palalau ʼaē ʼe tuʼu ʼi te pasina 14 ʼo te tohi “Comment raisonner,” ʼi te kupu tāfito “Matuʼa/Mate”:
◼ “Neʼe mole heʼeki ke fai koa la te fehuʼi ʼaenī, ‘Ko te mate ʼe ko te fakaʼosi koa ʼo meʼa fuli? Peʼe ʼi ai koa he tahi age meʼa ʼi te ʼosi ʼo te mate?’ [Koutou tuku ke fai atu hana tali.] ʼE fakamahino mai e te Tohi-Tapu te fehuʼi fuli ʼaē ʼe feala ke tou fai ʼo ʼuhiga mo te mate. [Tou lau ia Tagata Tānaki 9:5, 10.] ʼE ina toe fakahā mai foki ʼe ʼi ai te ʼamanaki moʼoni ʼe maʼu e nātou ʼaē ʼe tui. [Koutou fuli age te pasina 84 ʼi te palakalafe 13 ʼi te tohi Te ʼAtamai Mālama, ʼo koutou lau pea mo koutou fakamahino age te ʼu palalau ʼa Sesu ʼaē ʼe tuʼu ia Soane 11:25.] Ko te kapite katoa ʼaia ʼe tali ki te fehuʼi ʼaenī, Koteā Te Meʼa ʼe Hoko Ki Te ʼu Mate ʼAē ʼe Tou ʼOʼofa Mamahi Ai? ʼE ʼau fia tuku atu te tohi ʼaenī ki te 150.”
5 Mokā koutou liliu ʼo fai te ʼaʼahi, ʼe feala ke koutou ʼui age ki ai:
◼ “ ʼI taku haʼu talu mai neʼe tā palalau ʼo ʼuhiga mo te meʼa ʼaē ʼe hoko mokā mate he tahi. Tokolahi ʼo te hahaʼi ʼe nātou tui ʼe ʼi ai he tahi age maʼuli ʼi te ʼosi ʼo te mate peʼe ʼi te lagi peʼe ʼi ʼifeli. Kae neʼe kua ke fakakaukauʼi koa te fealagia ʼaē ke toe maʼuʼuli te kau mate ʼi te kele? [Koutou tuku ke fai atu hana tali.] ʼO mulimuli ki te Tohi-Tapu, ko te hahaʼi ʼaē ka fakatuʼuake, ʼe nātou kau anai ʼi te hahaʼi agavaivai ʼaē ka nātou maʼu te kele. [Lau ia Pesalemo 37:11, 29, pea koutou fai palalau ki te palakalafe 20 ʼi te pasina 88 ʼi te tohi Te ʼAtamai Mālama.] Ko te ʼamanaki ʼaia neʼe ina foaki te fakaloto fīmālie ki te toko lauʼi miliona hahaʼi neʼe matataku ki te mate. Ko te tohi ʼaenī ʼe tokoni anai kia koe ke ke mahino lelei ki te faʼahi ʼaia. ʼE ʼau fia fakahā atu peʼe feafeaʼi tona fakaʼaogaʼi.”
6 Kapau ʼe koutou loto ke faigafua takotou ʼu palalau, ʼe feala ke koutou ʼahiʼahi te ʼu palalau ʼaenī:
◼ “ ʼE ʼau fia fakahā atu he paki ʼi te tohi ʼaenī, Te ʼAtamai Mālama ʼAē ʼe Ina Taki Ki Te Maʼuli Heʼegata. ʼE mole matalelei koa la te paki ʼaenī?” Tou avahi te tohi ʼo tou fakahā age ki ai te pasina 4 ki te 5. Koutou tuku ke fai atu hana tali. Pea koutou lau age te ʼu palalau ʼaē ʼe tuʼu ʼi te pasina 5. Fakaʼosi takotou palalau ʼo koutou ʼui age: “ ʼE feala ke ʼau tuku atu te tohi ʼaenī ke ke lau, pea ko tona totogi fakaʼofa ʼe ko te 150.” Koutou fakatuʼutuʼu ke koutou ʼiloʼi te temi ʼaē ʼe lelei ke koutou toe liliu ai ʼo hoko atu te fai palalau.
7 ʼE tou maʼu te ʼatamai mālama ʼaē ʼe haʼu mai te ʼAtua pea ʼe ina tali ki te ʼu fehuʼi maʼuhiga ʼo totatou maʼuli. Koutou teuteu fakalelei, pea ʼe tapuakina anai e Sehova takotou ʼu faiga ke koutou vaevae te logo ʼaē ʼe ina foaki te maʼuli kia nātou fuli ʼaē ʼe nātou kumi te moʼoni.