Tou Fakahā Te ʼAtamai Mālama ʼAē ʼe Ina Taki Ki Te Maʼuli Heʼegata
1 Ko Sehova ʼe “ko Ia ʼaē ʼe ina akoʼi ki te tagata ia te ʼatamai mālama.” (Pes. 94:10) ʼE ina fakaʼaogaʼi tatou ke tou fakahā te ʼatamai mālama ʼaē ʼe ina foaki te maʼuli, pea mo tou fakahā te ʼatamai mālama ʼaia kia nātou fuli ʼaē ʼe mole nātou mālama ki te faʼahiga tauhi ʼaē ʼe tonu ke fai kia te ia. Ko te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe ko he tohi lelei moʼo akoʼi te hahaʼi ʼaē ʼe lotolelei, ke feala hanatou mālama lelei ki te ʼAtua ʼaki tana Folafola, te Tohi-Tapu. (1 Tim. 2:3, 4) Ko te tohi Te ʼAtamai Mālama ʼe matala lelei pea ʼe totonu tana ʼu manatu, pea ʼe tokoni anai ki te hahaʼi ke nātou mahino ki te meʼa ʼaē ʼe akoʼi age e Sehova kia nātou. ʼI te māhina ʼaenī ʼe tou fia palalau mo te hahaʼi ʼo tou faigaʼi ke nātou fia lau te tohi. Koʼeni te ʼu faʼahiga manatu ʼe tokoni anai kia koutou. ʼAua naʼa koutou faigaʼi ke koutou fakamaʼumaʼu loto te ʼu faʼifaʼitaki ʼaenī, kae ke koutou faiga ke koutou fakahā te ʼu manatu tāfito ʼaia ʼi takotou ʼu faʼahiga palalau pea ke koutou palalau ohage ko takotou palalau māhani.
2 Mai tona ʼaluʼaga ʼaē ʼe lahi te hahaʼi kua mate he tahi neʼe nātou ʼofa mamahi ai, koia ʼe feala ke koutou talanoa ki te ʼamanaki ʼo ʼuhiga mo te fakatuʼuake ʼo koutou fakaʼaogaʼi te ʼuluaki faʼifaʼitaki ʼaenī:
◼ “Tokolahi ia tatou kua mate he tahi neʼe tou ʼoʼofa mamahi ai. Neʼe kua ke ʼeke koa peʼe feala hau toe sio anai kia nātou ʼaia ʼi he ʼaho? [Tuku ke fai mai hana tali.] Ko te mate neʼe mole kau ia ki te fakatuʼutuʼu ʼa te ʼAtua ʼo ʼuhiga mo te tagata. Neʼe fakamoʼoni e Sesu ko tatatou ʼu hahaʼi ʼaē kua mamate, ʼe feala ke nātou toe tutuʼuake mai te mate. [Lau ia Soane 11:11, 25, 44.] Logope la neʼe fai te ʼu palalau ʼaia kua hili kiai ni ʼu sēkulō, kae ʼe hā ai te meʼa ʼaē neʼe fakapapau e te ʼAtua, ka ina fai anai maʼa tatou. [Avahi te tohi Te ʼAtamai Mālama ʼi te paki ʼo te pasina 85 pea lau te talanoa ʼaē ʼe tuʼu ʼi te paki. ʼOsi ʼaia pea koutou fakahā age te paki ʼo te pasina 86 pea koutou fakamahino age te paki ʼaia.] Kapau ʼe ke fia ʼiloʼi he tahi ʼu manatu ʼo ʼuhiga mo te ʼamanaki fakaloto mālohi ʼaia ʼo te fakatuʼuake, ʼe ʼau tuku atu anai te tohi ʼaenī ke ke lau, ko tona totogi fakaʼofa ko te 150.”
3 ʼI te hili ʼo takotou ʼuluaki fai palalau ʼo ʼuhiga mo te ʼamanaki ʼo te fakatuʼuake, ʼe lagi feala ke kamata fēnei takotou fai palalau mo ia pe ʼaia ʼi hakotou tahi ʼaʼahi:
◼ “ ʼE lagi kei ke manatuʼi taku ʼui atu ʼaē ko te mate neʼe mole kau ia ʼi te fakatuʼutuʼu ʼa te ʼAtua ʼo ʼuhiga mo te tagata. Kapau ʼe moʼoni te faʼahi ʼaia, he koʼe koa ʼe tou matutuʼa pea mo tou mamate? ʼE maʼuli te tahi ʼu fonu ia taʼu e 100 tupu, pea ʼe ʼi ai te ʼu fuʼu ʼakau ʼe maʼuli ia taʼu ʼe lauʼi afe. He koʼe ʼe gata pe te maʼuli ʼo te tagata ia taʼu e 70 peʼe ko taʼu e 80? [Tuku ke fai mai hana tali.] ʼE tou mamate ʼuhi ko te talagataʼa ʼa te ʼuluaki taumatuʼa ki te ʼAtua.” Lau ia Loma 5:12. Tou fuli ake te pasina 53 ʼi te tohi Te ʼAtamai Mālama pea tou lau te kupu tāfito ʼo te kapite. Tou vakaʼi te ʼu ʼuluaki palakalafe e tolu, ʼo tou faka maʼuhigaʼi te ʼu tali ki te ʼu fehuʼi ʼaē ʼe tuʼu ʼi ai. Tou fai he fakatuʼutuʼu ke tou toe liliu mai ʼo hoko atu te fai palalau ʼo ʼuhiga mo te tahi ʼu manatu ʼo te kapite. Tou fakaloto mālohiʼi ia ia ke ina lau fuli te tohi.
4 Kapau ʼe koutou palalau mo he tahi ʼe tauhi lotu, ʼe feala ke koutou ʼui age:
◼ “Ia ʼaho nei ʼe lau ko te ʼu lotu kehekehe ʼe lauʼi teau. ʼE lahi te ʼu akonaki kehekehe ʼe nātou akoʼi ki te hahaʼi te ʼu manatu ʼe fefakafeagaiʼaki. ʼE ʼui e ʼihi ko te ʼu lotu fuli ʼe lelei pea ʼe tatau fuli te ʼu meʼa ʼaē ʼe nātou tui kiai. Koteā tau manatu? [Tuku ke fai mai hana tali.] Neʼe akoʼi e Sesu te lotu moʼoni pea neʼe ina fakahā ko te tahi ʼu faʼahiga tauhi ʼe mole leleiʼia e te ʼAtua. [Lau ia Mateo 7:21-23.] Kapau ʼe tou loto ke leleiʼia tatou e te ʼAtua, pea ʼe tonu ke tou tauhi kia te ia ʼo mulimuli ki tona finegalo.” Tou avahi te tohi Te ʼAtamai Mālama ʼi te kapite 5, ʼo tou lau te kupu tāfito ʼo te kapite, pea mo tou faka maʼuhigaʼi te ʼu kupu tāfito ʼo te ʼu palakalafe. Tou fakamahino age ko te ʼu manatu ʼaia ʼe tokoni anai ki he tahi ke ina ʼiloʼi pe koteā te meʼa ʼaē ʼe tonu ke ina fai ke leleiʼia ia ia e te ʼAtua. Tou tuku age te tohi mo kapau ʼe ina fia lau ki tona kiʼi meʼa ʼofa pe ko te falā 150.
5 ʼI te kua lahi ʼaupito ʼo te ʼu lotu, ʼe mole kei ʼiloʼi e te hahaʼi pe ko te lotu fea ʼaē ʼe moʼoni, koia ʼe nātou leleiʼia anai te tali ki te fehuʼi ʼaia ʼi hakotou tahi ʼaʼahi:
◼ “ ʼI te kua lahi ʼaupito ʼo te ʼu lotu ʼi te temi nei, ʼe lava feafeaʼi hatatou ʼiloʼi papau te lotu ʼaē ʼe lelei? ʼE lava feafeaʼi hau ʼiloʼi ia te lotu ʼaē ʼe moʼoni? [Tuku ke fai mai hana tali.] Neʼe ʼui mai e Sesu kia tatou peʼe feafeaʼi hatatou ʼiloʼi tana kau atolasio moʼoni.” Lau ia Soane 13:35. Tou vakaʼi te palakalafe 18 pea mo te 19 ʼi te kapite 5 ʼo te tohi Te ʼAtamai Mālama. Kapau ʼe tou fakaʼaogaʼi he ʼu vaega faka Tohi-Tapu moʼo talanoa ʼo ʼuhiga mo te ʼu lotu, ʼe feala anai ke ina ʼiloʼi pe kofea te lotu moʼoni. Tou fakahā age ki ai ʼe ʼiloʼi ʼi te malamanei katoa, ko te kau Fakamoʼoni ʼa Sehova ʼe nātou maʼu te ʼofa moʼoni pea ʼe nātou fakaʼapaʼapa ʼaupito ki te ʼu lao ʼo ʼuhiga mo te aga ʼaē ʼe tonu ke fai. Tou fakamahino age ko he ako ʼo te Tohi-Tapu, ʼaki te tohi Te ʼAtamai Mālama, ʼe tokoni anai kia ia ke ina ʼiloʼi te faʼahiga tauhi ʼaē ʼe leleiʼia e te ʼAtua.
6 Kapau ʼe koutou felāveʼi mo he tāmai peʼe ko he faʼe, ʼe lagi lelei anai takotou fakaʼaogaʼi te faʼifaʼitaki ʼaenī:
◼ “ ʼI te ʼaho fuli pe, ʼe tou logo ki te ʼu fakamatala ʼo ʼuhiga mo te ʼu aga fakalialia ʼa te kau tūpulaga, pea kua hage ʼe mole kei ʼi ai he ʼu aga lelei ʼe nātou fai. Ko ʼihi hahaʼi lalahi ʼe nātou tukugakoviʼi te faleako ʼi tana mole ako ki te tamaliki te kehekehe ʼo te meʼa ʼaē ʼe lelei pea mo te meʼa ʼaē ʼe kovi. ʼI tau manatu ko ai koa ʼaē ʼe tonu ke ina fai te ako ʼaia? [Tuku ke fai mai hana tali.] Koʼeni te manatu ʼa te Tohi-Tapu ʼo ʼuhiga mo te fehuʼi ʼaia. [Lau ia Efesi 6:4.] ʼE ina fakahā mai ko te akoʼi ki te tamaliki te ʼu aga ʼaē ʼe lelei, ʼe ko te maʼua ʼaia ʼo te ʼu mātuʼa.” Avahi te tohi Te ʼAtamai Mālama ʼi te pasina 145, ʼo koutou lau te palakalafe 16, pea mo koutou fakamahino te ʼu paki ʼi te pasina 147. Fakamahino age ko te tohi ʼaia neʼe fai ke ako e te famili katoa. Koutou fakaʼaogaʼi te palakalafe 17 pea mo te 18 ʼi te pasina 146, ʼo koutou fakahā age peʼe feafeaʼi hatatou fai te ʼu ako Tohi-Tapu mo te ʼu famili.
7 Kapau neʼe koutou kamata he ako Tohi-Tapu ʼi takotou ʼuluaki palalau mo he tāmai peʼe ko he faʼe ʼe nofo ʼi te tuʼania, ʼe feala ke hoko atu te ako ʼi takotou toe liliu ʼo ʼaʼahi ia ia ʼo koutou ʼui age fēnei:
◼ “ ʼI te temi nei, ʼe lahi te ʼu fakahala ʼe fai e te malamanei ki tatatou kau tūpulaga. Ko te tupuʼaga la ʼaia ʼo te faigataʼa ai tanatou manavasiʼi ki te ʼAtua ʼi tonatou lahilahi ake. ʼE lagi kei ke manatuʼi ʼi tatā palalau fakamuli, neʼe tā talanoa ki te ʼu manatu e lua. Mai tona ʼaluʼaga ʼaē ko tatou ko te ʼu mātuʼa ʼe aga faka lotu, koia ʼe tonu ai ke tou foaki he faʼifaʼitaki lelei ki ʼatatou tamaliki, pea ʼe tonu ke tou fakahā tuʼumaʼu totatou ʼofa kia nātou. ʼE ʼi ai te tahi meʼa ʼe ʼui e te Tohi-Tapu ʼe tonu ke foaki e te ʼu mātuʼa ki tanatou fānau.” Lau ia Tāʼaga Lea 1:8. Tou fuli age te pasina 148 ʼi te tohi Te ʼAtamai Mālama pea ke hoko atu tatatou ako, ʼo fai ʼi te palakalafe 19 ki te 23. Koutou ʼui age ʼe koutou toe liliu mai anai ʼo fai he ako mo te famili katoa, ʼo kamata ʼi te kapite 1.