Ke Taupau
He ʼu Palalau Ki Te Fai Faka Mafola
Te ʼu faʼahiga palalau moʼo fakahā ia te tufa ʼo te māhina.
Approchez-vous de Jéhovah (Fakafalani)
“ ʼE lahi te hahaʼi ʼaē ʼe tui ki te ʼAtua ʼe nātou fia fakaōvi kiā te ia. ʼE ke ʼiloʼi koa ʼe fakaafe koe e te ʼAtua ke ke fakaōvi age kiā te ia? [Lau age ia Sakopo 4:8.] Ko te tohi ʼaenī neʼe fai moʼo tokoni ki te hahaʼi ke nātou fakaʼaogaʼi ia tanatou Tohi-Tapu moʼo fakaōvi ki te ʼAtua.” Lau age ia te palakalafe 1 ʼo te pasina 16.
“Ia ʼaho nei ʼe lahi ʼaupito ia te heʼe faitotonu. Pea ʼe fakamoʼoni kiai ia te Tohi-Tapu. [Lau age ia Tagata Tānaki 8:9b.] Tokolahi ʼe nātou feʼekeʼaki peʼe tokaga moʼoni mai ia te ʼAtua. [Lau age ia te kamataʼaga ʼo te palakalafe 4 ʼo te pasina 119.] Ko te kapite ʼaenī ʼe ina fakamahino mai pe koʼe neʼe fakagafua e te ʼAtua ia te heʼe faitotonu ʼi he temi fualoa.”
Écoute le grand Enseignant (Fakafalani)
“ ʼI tau manatu, ko te malamanei ʼe lelei age anai koa mo kanapaula neʼe maʼuliʼi e te hahaʼi ia te folafola ʼaenī? [Lau age ia Mateo 7:12a. Pea tuku ke fai mai hana tali.] ʼE tou maʼu ʼi te tohi ʼaenī ia te ʼu tuʼuga ako mai te tagata faiako lahi ʼo te malamanei.” Fakahā age ia te ʼu pāki pea mo te ʼu palalau ʼi te lalo pāki ʼo te kapite 17.
“Ia ʼaho nei, tokolahi ia te ʼu mātuʼa ʼe nātou akoʼi ia te ʼu pelesepeto maʼuhiga ki ʼanatou fānau. ʼI tau manatu ʼe maʼuhiga koa ia te faʼahi ʼaia? [Tuku ke fai mai hana tali. Pea lau age ia Tāʼaga Lea 22:6.] Fakatokagaʼi ʼe fakaloto mālohiʼi ia te ʼu mātuʼa ke nātou kamata tautonu ia te akoʼi ʼo tanatou fānau. Neʼe tā ia te tohi ʼaenī moʼo tokoni kiā nātou ke nātou fai ia te faʼahi ʼaia.” Fakahā age ia te ʼu pāki pea mo te ʼu palalau ʼi lalo ʼo te pāki ʼo te kapite 15 peʼe 18.
“ ʼI te agamāhani ʼe punamaʼuli ia te ʼu mātuʼa ki te ʼu fehuʼi ʼaē ʼe fai age e ʼanatou fānau. ʼE faigataʼa te tali ki ʼanatou ʼihi fehuʼi, kaeā koa la? [Tuku ke fai mai hana tali. Pea lau age ia Efeso 6:4.] Ko te tohi ʼaenī ʼe feala ke tokoni ki te ʼu mātuʼa ke nātou tali ki te ʼu fehuʼi ʼa tanatou ʼu fānau ia ʼaho nei.” Fakahā age ia he ʼu pāki pea mo te ʼu palalau ʼaē ʼe tuʼu ʼi lalo ʼo te pāki ʼo te ʼu kapite 11 pea mo 12, peʼe 34 ki te 36.
Koteā ʼAē ʼe Fakamaʼua Mai e Te ʼAtua Kia Tatou?
“ ʼI tau manatu, ko te finegalo ʼo te ʼAtua ke tou māʼuʼuli fēnei ia ʼaho nei? [Tuku ke fai mai hana tali. Pea lau age ia Mateo 6:10.] ʼI tau manatu e feafeaʼi ia te Puleʼaga ʼo te ʼAtua?” Fuli age te ako 6, pea lau age te ʼu fehuʼi ʼaē ʼe tuʼu ʼi te kamataʼaga ʼo te ako. Kamata he fai palalau ʼo te ako, peʼe tou fakatuʼutuʼu ke tou fai ʼi he tahi age ʼaʼahi.
“Logola te ʼu faigamālie ʼo te temi nei, kae ʼe lahi te mamahi ʼo te malamanei ʼuhi ko te mahaki pea mo te mate. ʼE ke ʼiloʼi koa ia te meʼa ʼaē ka fai anai e Sesu ki te mahaki, te mātutuʼa, pea mo te mate?” Tuku ke fai mai hana tali. Kapau ʼe ina fia ʼiloʼi te tali ki te fehuʼi ʼaia, avahi age te ako 5, pea lau age ia te ʼu fehuʼi ʼo te ʼu palakalafe 5 mo te 6. Fakamahino age ia te ʼu palakalafe, peʼe tou fakatuʼutuʼu ke tou fai ʼi he tahi age ʼaʼahi.
Koutou Atolasio Ki Te ʼAtua Moʼoni Pe e Tahi
“ ʼI tau manatu kofea ia te tokoni ʼaē ʼe lelei moʼo tauʼi te ʼu fihifihia ʼo te maʼuli? [Tuku ke fai mai hana tali. Pea lau age ia Loma 15:4.] Fakatokagaʼi ʼe foaki mai ʼi te Tohi-Tapu te ako, mo te fakafimālie, mo te falala, ʼaē ʼe feala ke ina fakaloto mālohiʼi tatou ke tou ʼutakiʼi ia te ʼu fihifihia. Ko te tohi ʼaenī ʼe ina foaki mai ia te ʼu tokoni ʼaoga ke tou maʼu ia te ʼu fua ʼo tatatou lau ia te Tohi-Tapu.” Faka maʼuhigaʼi te ʼu puani e fā ʼo te pasina 30.
“Talu mai te temi ʼaē neʼe maʼuli ai Sesu ʼi te kele, tokolahi ia te hahaʼi neʼe nātou faikole ʼo ʼuhiga mo te Puleʼaga ʼo te ʼAtua. ʼI tau manatu koteā anai ia te faka ʼuhiga ʼo te haʼu ʼo te Puleʼaga ki te malamanei? [Tuku ke fai mai hana tali. Pea lau age ia Taniela 2:44.] Ko te tohi ʼaenī ʼe ina fakamahino mai pe koteā te Puleʼaga ʼo te ʼAtua, pea mo te gāue ʼaē ka ina fakahoko. ʼE ina toe fakahā mai ia te ʼu meʼa ʼaē ʼe tonu ke tou fai ke feala hatatou kau ʼi te hahaʼi ʼaē ka nātou fakalogo anai ki tona pule faitotonu.” Fakahā age ia te pāki ʼo te pasina 92 mo te 93.
Koutou Tokagaʼi Te Lea Faka Polofeta ʼa Taniela!
ʼE teitei pe ki te hahaʼi fuli ʼe nātou fakamoʼoni anai ʼe tou māʼuʼuli nei ʼi te ʼu temi faigataʼa. ʼI te ʼaho fuli, ʼe tou logo ki te ʼu logo fakamataku, ʼo tou mahino ai ko te malamanei ʼe ʼāsili age tona ʼu tokakovi. ʼI tau manatu, ʼe ʼi ai anai koa he puleʼaki ki te ʼu fihifihia ʼaia? [Tuku ke fai mai hana tali. Pea lau age ia Taniela 2:44.] Ko te tohi ʼaenī ʼe ina fakaloto mālohiʼi anai tau tui ki te ʼu fakapapau ʼa te ʼAtua, pea mo tokoni atu ke ke falala ko te ʼAtua kua vave anai ia tana fakahoko tana fakatuʼutuʼu ʼaē ke ina tapuakinaʼi te malamanei pea mo fakaliliu ia te kele ko he palatiso.
La Bible : Parole de Dieu ou des hommes ? (Fakafalani)
“ ʼE tou māʼuʼuli nei ʼi te temi ʼe tou tau fuli ai mo te ʼu fihifihia lahi. Tokolahi ʼe nātou kumi tokoni ki te ʼu hahaʼi kehekehe. Ko ʼihi ʼe nātou kumi tokoni ki te hahaʼi gaohi meʼa fakatemonio. ʼI tau manatu, kofea koa ʼaē ʼe tou maʼu ai anai ia te tokoni lelei? [Tuku ke fai mai hana tali.] Ko te Tohi-Tapu ʼe ina foaki mai ia te tokoni ʼe ʼaoga kiā tatou fuli. [Lau age ia 2 Timoteo 3:16. Pea avahi age ʼi te pasina 187, pea lau age ia te palakalafe 9.] Ko te tohi ʼaenī ʼe tokoni atu anai ke ke mahino ʼe fua lelei tuʼumaʼu ia te ʼu akonaki faka Tohi-Tapu.”
La Révélation : le grand dénouement est proche ! (Fakafalani)
“Lagi kua koutou logo ʼo ʼuhiga mo [talanoa ki he meʼa neʼe hoko]. Ka mate fakafokifā he tahi ʼi he ʼaluʼaga fakaʼofaʼofa, ʼe tokolahi te hahaʼi ʼe nātou feʼekeʼaki peʼe feafeaʼi he fakafimālieʼi ʼo te famili ʼaia. Koteā la tau manatu ki te faʼahi ʼaia?” [Tuku ke fai mai hana tali. Pea avahi age te pasina 299, pea fakahā age ia te fakatuʼuake ʼaē ʼe tuʼu ʼi te pāki.] Tou toe ʼui age: “Tokolahi te hahaʼi ʼe nātou punamaʼuli mokā fakahā age kiā nātou, ʼe fakatuʼuake anai te hahaʼi faitotonu pea mo heʼe faitotonu ke nātou māuʼuli ʼi te Palatiso ʼi te kele. [Lau age ia Gaue 24:15 ohage ko tona tuʼu ʼi te palakalafe 9 ʼo te pasina 297, pea fakahā age ia tona fakamahino ʼi te palakalafe 10.] Ko te tohi ʼaenī ʼe ina fakahā mai ia te tahi ʼu ʼaluʼaga fakaofoofo ʼo ʼuhiga mo te fakatuʼutuʼu ʼa te ʼAtua ki te ka haʼu.”
La vie : comment est-elle apparue ? Évolution ou création ? (Fakafalani)
“ ʼE tou tuʼaniaʼi fuli te aga fai fakapō pea mo te agamālohi ʼaē ʼe hoko ʼi totatou fenua. ʼI tau manatu ʼe lava fakatokatoka koa e he tahi ia te ʼu fihifihia ʼaia? [Tuku ke fai mai hana tali.] ʼE ʼi ai te puleʼaki ʼa te ʼAtua.” Fuli age te pasina 196, lau age pea mo fakamahinohino age ia Tāʼaga Lea 2:21, 22 ʼi te palakalafe 19. Fakahā age te kupu tāfito ʼo te kapite 16, pea tuku age te tohi.
L’humanité à la recherche de Dieu (Fakafalani)
“Kua lahi ia te ʼu lotu ʼi te temi nei, pea ʼi tau manatu ko te lotu fea ʼaē ʼe tali e te ʼAtua?” ʼI tana ʼosi tali mai, fakahā age ia te pasina 377. Fakahā age te puani nūmelo 7, pea fehuʼi age peʼe ʼio koa ki te ʼui ʼaē ko te lotu moʼoni ʼe tonu ke ina faka logo tahiʼi ia te ʼu lanu kehekehe. Lau age he vaega ʼe tuʼu ai, pea kapau ʼe maʼu he temi, talanoa ki he tahi puani ʼi te lisi ʼaia. Kapau ʼe tou sio ʼe fia logo moʼoni ki te ʼu meʼa ʼaē ʼe tou talanoa kiai, tou tuku age ia te tohi. ʼI te temi ʼaē ʼe tou mavae ai, ʼe tou lava lagaʼi ia te fehuʼi ʼaenī: “ ʼE tonu ke malave feafeaʼi ia te lotu moʼoni ki te maʼuli ʼo tana hahaʼi?” Tou fakatuʼutuʼu ke tou toe liliu mai ʼo tali ki te fehuʼi ʼaia.
Te ʼAtamai Mālama ʼAē ʼe Ina Taki Ki Te Maʼuli Heʼegata
“Kapau ʼe fakaafe koe ke ke maʼuli ʼi he ʼu ʼaluʼaga taulekaleka ohage ko tona tuʼu ʼi te pāki ʼaenī, ʼe ke tali anai koa ia te fakaafe ʼaia? [Fakahā age ia te pāki ʼo te pasina 4 mo te 5, pea tuku ke fai mai hana tali.] Fakahā age ko te Folafola ʼa te ʼAtua ʼe ko te kalavī ʼaia ke maʼu ia te maʼuli heʼegata. [Lau age ia Soane 17:3.] Ko te tohi ʼaenī ʼe tokoni atu anai ke ke maʼu ia te ʼatamai mālama ʼaē ʼe ina taki ki te maʼuli heʼegata.” ʼI he tahi ʼaʼahi koutou fakatuʼutuʼu ke koutou palalau ki te ʼu palakalafe e nima ʼo te ʼuluaki kapite.
Koutou avahi ʼi te pasina 188 pea mo te 189, pea koutou talanoa ki te ʼu palalau ʼaē ʼi te lalo pāki, fai age ia te fehuʼi ʼaenī: “ ʼE ke fia maʼuli anai koa ʼi te Palatiso mokā fonu anai te kele ʼi te ʼatamai mālama ʼo ʼuhiga mo te ʼAtua? [Tuku ke fai mai hana tali. Pea lau age ia Isaia 11:9.] Ko te tohi ʼaenī ʼe tokoni atu anai ke ke mahino ki te meʼa ʼaē ʼe ʼui ʼi te Tohi-Tapu ʼo ʼuhiga mo te Palatiso pea mo te meʼa ʼaē ke tou fai ke kita kau ai.” ʼI he tahi ʼaʼahi koutou fakatuʼutuʼu ke koutou palalau ki te ʼu palakalafe 11 ki te 16 ʼo te ʼuluaki kapite.
Te tagata ʼaē ʼe lahi tokotahi ʼo te ʼu temi fuli
“Tokolahi ʼi te Po Tapu ʼe nātou manatuʼi ia Sesu. Kae ʼaki te ʼu meʼa ʼaē ʼe hoko ʼi te malamanei, ko ʼihi ʼe nātou feʼekeʼaki peʼe tokaga moʼoni ia te ʼAtua kiā tatou. Koteā tau manatu?” Tuku ke fai mai hana tali. Fuli age te kapite 24, pea tou talanoa fakanounou pe koʼe neʼe haʼu Sesu ki te kele. Pea lau age ia Soane 15:13, ʼo tou fakahā age ia te ʼofa lahi ʼo Sesu ki te hahaʼi.
“Ka palalau te hahaʼi ʼo ʼuhiga mo Sesu Kilisito, tokolahi ʼe nātou manatu ki ai ohage ko he tamasiʼi peʼe ko he tagata neʼe fakamamahiʼi ʼe ʼamanaki mate. ʼE gata pe tanatou sio kiā Sesu, ʼi tana kei veliveli pea mo tona mate. Ko te ʼu meʼa taulekaleka ʼaē neʼe talanoa kiai pea mo ina fai lolotoga tona maʼuli, ʼe tahitahiga tanatou palalau kiai. Kae ko te meʼa ʼaē neʼe ina fakahoko ʼe malave ia ki te hahaʼi fuli. Koia la ʼaē ʼe maʼuhiga ai ke tou ako te ʼu meʼa taulekaleka ʼaē neʼe ina fai maʼa tatou.” Lau age ia Soane 17:3. Fuli age te ʼuluaki pasina ʼo te ʼuluaki palalau, pea mo lau age te fā palakalafe.
Te Tohi ʼo Te ʼu Hisitolia Faka Tohi-Tapu
“Mālo te maʼuli, ʼe mātou ʼaʼahi te hahaʼi ia ʼaho nei, moʼo tokoni kiā nātou ke nātou mahino pe koʼe neʼe tohi ia te Tohi-Tapu. Koteā tau manatu ki te faʼahi ʼaia? [Tuku ke fai mai hana tali.] ʼUluaki, ko ʼihi ʼe mole nātou ʼiloʼi pe koʼe neʼe tohi ia te Tohi-Tapu kae neʼe fai ia te faʼahi ʼaia moʼo fakatokagaʼi ia te hahaʼi. ʼE tou maʼu te manatu ʼaia ia 1 Kolonito 10:11. [Lau age.] Ko te ʼu fakatokaga ʼa te ʼAtua ʼe mole fakamataku, kae ʼe ina uga ia te hahaʼi ke nātou kumi ia te hāofaki, pea ko te lua tupuʼaga ʼaia ʼo te tohi ʼo te Tohi-Tapu. ʼI te koga tohi ʼo 2 Timoteo 3:15, ʼe fakahā mai ai ko te kau tūpulaga pea mo te kau mātutuʼa ʼe ʼaoga tatau kiā nātou ia te ʼu Folafola Taputapu ke nātou maʼu ia te hāofaki. [Lau age.] ʼE au fia fakahā atu ia te faʼahiga hāofaki neʼe fakakikite e te tagata fai Tohi-Tapu ko Isaia, ʼi te hisitolia ʼaenī ʼo Te Tohi ʼo Te ʼu Hisitolia Faka Tohi-Tapu.” Fuli age te Hisitolia 71 pea lau age te ʼuluaki palakalafe pea mo te palakalafe fakaʼosi. Tuku age ia te tohi.
Ka ʼosi he ʼuluaki palalau lelei, ʼe feala ke tou ʼui age: “ ʼI tau manatu, ʼe mole tou maʼuʼuli koa la ʼi te ʼu ʼaluʼaga ʼi te temi nei ʼe tupu ai tatatou tuʼaniaʼi te ka haʼu? [Tuku he faigamālie ke fai mai hana tali pea fakahā age he ʼu faʼifaʼitaki.] ʼI tau manatu ʼe ʼi ai anai koa he puleʼaki kiai, pea ko te hahaʼi ʼe lava maʼuʼuli anai koa ʼi te kele ʼi te tokalelei pea mo te fīmālie? [Tuku ke fai mai hana tali.] Fakatokagaʼi te fakapapau ʼo te ʼu meʼa lelei ʼaē ʼe talanoa kiai ʼi te Tohi-Tapu ia 2 Petelo 3:13. [Lau age, pea fai palalau ki te vaega.] ʼE fakapapauʼi mai e te ʼAtua ia te ‘kele foʼou.’ ʼI tau manatu, koteā te ‘kele foʼou’ ʼaē ʼe talanoa kiai te ʼAtua? Ko tona faka ʼuhiga koa ʼe ina fakatuʼu anai he tahi kele, ʼo ina fakahigoaʼi ko te ‘kele foou’? ʼE ʼaoga koa kiā tatou he kele foʼou, he ʼu moʼuga foʼou, he ʼu vaitafe foʼou pea mo he ʼu fuʼu ʼakau foʼou? Fakatokagaʼi ʼe ʼui ʼi te vaega ‘ ʼe nofo anai ia te faitotonu’ ʼi te ‘kele foʼou.’ Ko te faitotonu ʼe ko te kalitātē ʼaē ʼe tonu ke hā ʼi te hahaʼi ʼaē ʼe nātou fai ia te meʼa ʼe lelei, koia ʼaē ko te kupusiga palalau ‘kele foʼou,’ ʼe faka ʼuhiga ki te hahaʼi ʼaē kua fetogi tanatou aga pea ʼe nātou faitotonu, pea ʼe nātou māʼuʼuli anai ʼi te tokalelei pea mo te logo tahi mo te hahaʼi fuli. ʼE mole ko he kele foʼou ʼaē ʼe ʼaoga kiā tatou, kae ko te hahaʼi ʼaē ʼe tonu ke nātou fetogi.” Kapau ʼe tou fai palalau pe ki he vaega faka Tohi-Tapu e tahi, pea ʼe feala leva ke tou fakaʼosi ia te fai palalau ʼaki te Hisitolia 115 ʼo Te Tohi ʼo Te ʼu Hisitolia Faka Tohi-Tapu, pea tou fakahā age te pāki ʼo te ʼu ʼaluʼaga ʼo te “kele foou.” Tuku age ia te tohi.
Veillez ! (Fakafalani)
“ ʼE lahi te hahaʼi ʼe nātou tau mo te ʼu fihifihia lahi pea mo te ʼu meʼa fakamataku ʼe hoko ki te hahaʼi fuli ʼo te temi nei. [Fakahā age ia he ʼaluʼaga neʼe hoko ʼi tokotou fenua.] ʼE ke ʼiloʼi koa ko te ʼu meʼa ʼaia ʼe pipiki ki te fakaʼiloga ʼaē ʼe fakahā ai kua vave hoko mai te temi ʼaē ka fakatokatoka ai e te puleʼaga ʼo te ʼAtua ia te ʼu tokakovi ʼaē ʼe hoko ʼi te kele? [Tuku ke fai mai hana tali. Pea koutou lau age ia he vaega faka Tohi-Tapu, ohage ko Mateo 24:3, 7, 8; Luka 21:7, 10, 11; 2 Timoteo 3:1-5.] Ko te kaupepa ʼaenī ʼe ina fakahā mai pe koʼe ʼe ʼaoga tāfito ʼi totatou temi ke tou nofo tokaga ki te maʼuhiga ʼo te ʼu meʼa ʼaia ʼe hoko.”
“Tokolahi ia ʼaho nei ʼe nātou māʼuʼuli tuʼania ʼuhi ko te ʼu meʼa fakamataku ʼaē ʼe hoko peʼe ko te ʼu fihifihia ʼaē ʼe tau mo nātou. Ko ʼihi ʼe nātou feʼekeʼaki pe koʼe ʼe mole fakagata e te ʼAtua ia te ʼu meʼa ʼaia. ʼI te Tohi-Tapu ʼe tou maʼu ai ia te fakapapau ko te ʼAtua ʼe kua ina vave pulihi anai ia te ʼu mamahi ʼo te malamanei. [Lau age ia Apokalipesi 14:6, 7.] Fakahā age peʼe faka ʼuhiga feafeaʼi anai ia te tautea ʼa te ʼAtua ki te malamanei. [Lau age ia 2 Petelo 3:10, 13.] Ko te kaupepa ʼaenī ʼe ina fakamahino mai ia te faʼahi maʼuhiga ʼaia.”
Y a-t-il un Créateur qui se soucie de vous? (Fakafalani)
“ ʼE ke fia ʼiloʼi koa: ‘Pe ʼi ai he ʼAtua ʼe ina pulihi anai te mamahi pea mo te heʼe faitotonu ʼaē ʼe maʼu ʼi te malamanei?’ [Tuku ke fai mai hana tali. Pea lau age ia Apokalipesi 21:3, 4.] Ko te tohi ʼaenī ʼe ina fakamahino mai te meʼa ʼaē ka fai anai e te ʼAtua moʼo fakamaʼamaʼa ia te mamahi pea mo pulihi ia te tupuʼaga ʼo te mamahi ʼaia.” Fakahā age ia te kapite 10.