(1) Tou Lagaʼi He Fehuʼi, (2) Tou Lau He Vaega Tohi-Tapu, Pea Mo (3) Tou Fuli He Kapite ʼi Te Tohi
Koʼeni te faʼahiga fakahā ʼe faigafua ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? (1) Koutou lagaʼi he fehuʼi ke ina fakahā atu tana manatu, (2) koutou lau age he vaega ʼe ʼalutahi mo te faʼahi ʼaē ʼe koulua palalau kiai, pea (3) koutou fuli age he kapite ʼi te tohi ʼe talanoa ki te faʼahi ʼaia, ʼo koutou lau age te ʼu ʼuluaki fehuʼi ʼo te kapite. Kapau ʼe tali lelei e he tahi ke koutou fai palalau, pea ʼe feala ke koutou fakahā age peʼe feafeaʼi te fai ʼo he ako Tohi-Tapu, ʼo koutou fakaʼaogaʼi te ʼu ʼuluaki palakalafe ʼo te kapite ʼaia. ʼE feala ke koutou fai feiā moʼo kamata he ako Tohi-Tapu ʼi takotou ʼuluaki fai palalau mo he tahi peʼe ka koutou fai he ʼaʼahi.
◼ “ ʼE ke manatu koa ʼe feala kiā tatou hahaʼi agahala ke tou ʼiloʼi totatou Tupuʼaga māʼoluga, ohage ko tona tohi ʼi henī ʼi te Tohi-Tapu?” Lau age ia Gaue 17:26, 27, pea koutou tuku ke fai mai hana tali. Pea koutou fakahā age te kapite 1.
◼ “ ʼAki te ʼu fihifihia ʼaē ʼe tou felāveʼi mo ia iā ʼaho nei, ʼe ke manatu koa ʼe feala hatatou maʼu he loto fīmālie pea mo he ʼamanaki ohage ko tona fakamatala ʼi henī?” Koutou lau age ia Loma 15:4, pea koutou tuku ke fai mai hana tali. Pea koutou fakahā age te kapite 2.
◼ “Kanapaula neʼe ke maʼu te mālohi moʼo fakahoko ia te ʼu fetogi ʼaē ʼe tuʼu ʼi te vaega ʼaenī, ʼe ke fakahoko anai koa?” Lau age ia Apokalipesi 21:4, pea koutou tuku ke fai mai hana tali. Pea koutou fakahā age te kapite 3.
◼ “ ʼE ke manatu koa ʼe feala anai ke māʼuʼuli tatatou ʼu fānau ʼi te mālama ʼaē ʼe talanoa kiai te hiva ʼāfea ʼaenī?” Koutou lau age ia Pesalemo 37:10, 11, pea koutou tuku ke fai mai hana tali. Pea koutou fakahā age te kapite 3.
◼ “ ʼE ke manatu koa ʼe hoko anai te ʼu palalau ʼaenī?” Koutou lau age ia Isaia 33:24, pea koutou tuku ke fai mai hana tali. Pea koutou fakahā age te kapite 3.
◼ “Neʼe mole heʼeki ke feʼekeʼaki koa peʼe ʼiloʼi e te kau mate te ʼu meʼa ʼaē ʼe fai e nātou ʼaē ʼe kei māʼuʼuli?” Tuku ke ina fai mai hana tali. Pea koutou lau age ia Tagata Tānaki 9:5, pea mo fakahā te kapite 6.
◼ “ ʼE ke manatu koa ʼe feala anai ʼi he ʼaho ke tou toe sisio kiā nātou ʼaē neʼe tou ʼoʼofa ai kae kua mamate, ohage ko tona ʼui e Sesu ʼi te ʼu vaega ʼaenī?” Koutou lau age ia Soane 5:28, 29, pea koutou tuku ke fai mai hana tali. Pea koutou fakahā age te kapite 7.
◼ ’“ ʼI tau manatu, ʼe lava fakahoko feafeaʼi te finegalo ʼo te ʼAtua ʼi te kele ohage ko selo, ohage ko tana ʼui ʼi te faikole ʼiloa ʼaenī?” Koutou lau age ia Mateo 6:9, 10, pea koutou tuku ke fai mai hana tali. Pea koutou fakahā age te kapite 8.
◼ “ ʼE ke manatu koa ʼe tou māʼuʼuli ʼi te temi ʼaē ʼe fakamatala ʼi te lea faka polofeta ʼaenī?” Koutou lau age ia 2 Timoteo 3:1-4, pea koutou tuku ke fai mai hana tali. Pea koutou fakahā age te kapite 9.
◼ “Tokolahi ʼe nātou feʼekeʼaki pe koʼe ʼe fakaʼāʼāsili te ʼu fihifihia ʼo te malamanei. Koteā tau manatu ki te fakamahino ʼaē ʼe tuku mai ʼi te vaega ʼaenī?” Lau age ia Apokalipesi 12:9, pea koutou tuku ke fai mai hana tali. Pea koutou fakahā age te kapite 10.
◼ “ ʼE ke fia ʼiloʼi koa te tali ki te fehuʼi ʼaenī?” Lau age ia Sopo 21:7, pea koutou tuku ke fai mai hana tali. Pea koutou fakahā age te kapite 11.
◼ “ ʼI tau manatu, ʼe maʼuli fiafia anai koa he famili mo kapau ʼe ina maʼuliʼi te tokoni ʼaenī ʼi te Tohi-Tapu?” Koutou lau age ia Efeso 5:33, pea koutou tuku ke fai mai hana tali. Pea koutou fakahā age te kapite 14.
ʼE feala ke koutou tohi he ako Tohi-Tapu ʼi takotou pepa tānaki gāue mo kapau neʼe fai tuʼa lua te ako ʼi takotou ʼosi fakahā age peʼe feafeaʼi te fai ʼo he ako Tohi-Tapu, pea mo kapau ʼe koutou manatu ʼe hoko atu anai te ako Tohi-Tapu ʼaia.