ʼE Feafeaʼi Tatatou Tufa Te Tohi Te Ako Mai Te Tohi-Tapu
ʼI te pepa ʼaenī ʼe maʼu ai te ʼu tuʼuga manatu moʼo fakahā te tohi Te Ako Mai Te Tohi-Tapu. Ke fua manuʼia ia te gāue ʼaia, koutou fakaʼaogaʼi takotou ʼu faʼahiga palalau ʼa koutou, koutou fai he ʼu palalau ʼe ʼalutahi anai mo te ʼu meʼa ʼaē ʼe ʼaoga ki te hahaʼi ʼo tokotou telituale, pea koutou ʼiloʼi lelei te ʼu manatu ʼo te tohi ʼaē ʼe feala ke koutou fai palalau kiai. ʼE feala hakotou toe fakaʼaogaʼi he tahi faʼahiga fai ʼe tāu mo tokotou telituale.—Vakaʼi Te Minisitelio ʼo Te Puleʼaga ʼo Sānualio 2005, p. 8.
Halamaketone
◼ “Ka logo te hahaʼi ki te kupu ‘Halamaketone,’ tokolahi ʼe nātou manatu ʼe ko he fakaʼauha ʼo te kele kātoa. ʼE lagi ke punamaʼuli anai mo kapau ʼe au ʼui atu ko Halamaketone ʼe ko he ʼaluʼaga ʼe tou fakatalitali ke hoko mai? [Tuku ke fai mai hana tali. Pea koutou lau age ia Apokalipesi 16:14, 16.] Koutou tokagaʼi te fakamatala ʼaenī, ʼe fakahā ai peʼe feafeaʼi anai ia te maʼuli ʼi te hili ʼo Halamaketone.” Fuli age te pasina 82 ki te 84, pea mo koutou lau te palakalafe 21.
He Nofoʼaga
◼ “ ʼE lahi te ʼu fenua, kua faigataʼa te maʼu ʼo he nofoʼaga ʼe lelei pea mo totogi lelei. ʼE ke manatu koa, ʼe feala anai ʼi he ʼaho ke maʼu e te hahaʼi fuli honatou nofoʼaga lelei? [Tuku ke fai mai hana tali. Pea koutou lau age ia Isaia 65:21, 22 pea mo te palakalafe 20 ʼi te pasina 34.] ʼE fakamahino ʼi te tohi ʼaenī peʼe koteā ʼaē ka fai anai e te ʼAtua moʼo fakahoko tana fakapapau ʼaia.”
Ia Sehova ʼAtua
◼ “Tokolahi ʼaē ʼe nātou tui ki te ʼAtua, ʼe nātou fia fakaōvi lelei kiā te ia. ʼE ke ʼiloʼi koa ʼe fakaafe tatou ʼi te Tohi-Tapu ke tou fakaōvi kiā te ia? [Tuku ke fai mai hana tali. Pea koutou lau age ia Sakopo 4:8a pea mo te palakalafe 20 ʼi te pasina 16.] Ko te tohi ʼaenī neʼe fai moʼo tokoni ki te hahaʼi ke nātou fakaʼaogaʼi tanatou ʼu Tohi-Tapu moʼo akoako ke nātou ʼiloʼi lelei age ia te ʼAtua.” Koutou fakahā age te ʼu ʼuluaki fehuʼi ʼi te pasina 8.
◼ “Tokolahi ʼe nātou faikole ke tapuhā te huafa ʼo te ʼAtua. Neʼe mole heʼeki ke feʼekeʼaki koa pe koteā te huafa ʼaia? [Tuku ke fai mai hana tali. Pea koutou lau age ia Pesalemo 83:18 pea mo te palakalafe 2 ki te 3 ʼi te pasina 195.] ʼE fakamahino ʼi te tohi ʼaenī te meʼa ʼaē ʼe ako moʼoni mai ʼi te Tohi-Tapu ʼo ʼuhiga mo Sehova ʼAtua pea mo tana fakatuʼutuʼu ki te malamanei.”
Ia Sesu Kilisito
◼ “ ʼE ʼiloa ia Sesu Kilisito ʼi te malamanei kātoa. ʼE ʼui e ʼihi neʼe ko he tagata makehe. Ko ʼihi ʼe nātou ʼatolasioʼi ia ia ohage ko te ʼAtua Māfimāfi. ʼE ke manatu koa ʼe maʼuhiga te ʼu meʼa ʼaē ʼe tou tui kiai ʼo ʼuhiga mo Sesu Kilisito?” Tuku ke fai mai hana tali. Pea koutou lau age ia Soane 17:3 pea mo te palakalafe 3 ʼi te pasina 37 mo te 38. Koutou fakahā age te ʼu ʼuluaki fehuʼi ʼaē ʼe tuʼu ʼi te kamata ʼo te kapite ʼaia.
Te Faikole
◼ “Neʼe mole heʼeki ke feʼekeʼaki koa peʼe tali feafeaʼi e te ʼAtua ki te ʼu faikole? [Koutou tuku ke fai mai hana tali. Pea koutou lau age ia 1 Soane 5:14, 15 pea mo te palakalafe 16 ki te 18 ʼi te pasina 170 ki te 172.] ʼE toe fakamahino ʼi te kapite ʼaia pe koʼe ʼe tonu ke tou faikole ki te ʼAtua pea koteā ʼaē ʼe tonu ke tou fai ke fagono te ʼAtua ki ʼatatou faikole.”
Te Famili
◼ “Ko tatou fuli ʼe tou loto ke maʼuli fiafia totatou famili. ʼE ke loto koa ke feiā te maʼuli ʼo tou famili? [Tuku ke ina fai mai hana tali.] ʼE fakamatala ʼi te Tohi-Tapu te faʼahi ʼe feala ke tahi fai e te famili kātoa ke feala he fiafia ʼo tonatou maʼuli faka famili—ko te faʼifaʼitakiʼi ia te ʼAtua ʼo fakahā te ʼofa.” Lau ia Efeso 5:1, 2 pea mo te palakalafe 4 ʼi te pasina 135.
Te Lotu
◼ “Tokolahi kua nātou manatu ʼe lahi age ia te ʼu fihifihia ʼaē ʼe fakatupu e te ʼu lotu ʼi te ʼu puleʼaki lelei ʼaē ʼe nātou fai. ʼE ke manatu koa ko te lotu ʼe ina takitaki te hahaʼi ki te ala ʼaē ʼe totonu? [Tuku ke fai mai hana tali. Pea koutou lau age ia Mateo 7:13, 14 pea mo te palakalafe 5 ʼi te pasina 146.] ʼI te kapite ʼaia, ʼe vakaʼi ai te ʼu manatu e ono ke tou ʼiloʼi ai te lotu ʼaē ʼe tali e te ʼAtua.” Koutou fakahā age te lisi ʼi te pasina 147.
Te Mate/Te Fakatuʼuake
◼ “Tokolahi ʼe nātou fia ʼiloʼi peʼe toe hoko atu koa totatou maʼuli mokā tou mamate. ʼI tau manatu, ʼe feala koa ke tou ʼiloʼi ia te faʼahi ʼaia? [Koutou tuku ke fai mai hana tali. Pea koutou lau age ia Tagata Tānaki 9:5, pea mo te palakalafe 5 mo te 6 ʼi te pasina 58 mo te 59.] ʼE toe fakamahino ʼi te tohi ʼaenī te faka ʼuhiga ʼo te fakapapau faka Tohi-Tapu ʼo te fakatuʼuake kiā nātou ʼaē kua mamate.” Koutou fakahā age te pāki ʼi te pasina 75.
◼ “Ka mate he tahi neʼe tou ʼofa mamahi ai, ʼe tou fakaʼamu age ke tou toe sisio kiā ia. ʼE mole feiā koa la tau fakaʼamu? [Koutou tuku ke fai mai hana tali.] Tokolahi neʼe nātou maʼu he loto fīmālie ʼi te fakapapau faka Tohi-Tapu ʼaenī ʼo ʼuhiga mo te fakatuʼuake. [Lau ia Soane 5:28, 29 pea mo te palakalafe 16 mo te 17 ʼi te pasina 72.] Ko te kapite ʼaenī ʼe ina toe tali ki te ʼu fehuʼi ʼaenī.” Koutou fakahā age te ʼu ʼuluaki fehuʼi ʼaē ʼe tuʼu ʼi te pasina 66.
Te Maʼuli Heʼegata
◼ “Tokolahi ʼe nātou fakaʼamu ke nātou haohaoa mai te mahaki pea mo nātou fakaʼamu ki te maʼuli heʼegata. Kae kapau ʼe feala, ʼe ke fia maʼuli koa ʼo heʼegata? [Koutou tuku ke ina fai mai hana tali. Pea koutou lau age ia Apokalipesi 21:3, 4 pea mo te palakalafe 17 ʼi te pasina 53 mo te 54.] ʼE fakamahino ʼi te tohi ʼaenī peʼe feafeaʼi hatatou maʼu ia te maʼuli heʼegata pea mo feafeaʼi anai te maʼuli mokā hoko ia te fakapapau ʼaia.”
Te Tau/Te Tokalelei
◼ “Ko te hahaʼi ʼi te malamanei kātoa ʼe nātou loto ki te tokalelei. ʼE ke manatu koa ko te ʼamanaki ki te tokalelei ʼo te kele ʼe ko he moemisi pe ia? [Tuku ke fai mai hana tali. Pea koutou lau age ia Pesalemo 46:8, 9.] ʼE fakahā ʼi te tohi ʼaenī peʼe fakahoko feafeaʼi anai e te ʼAtua tana fakapapau pea mo fakatuʼu te tokalelei ʼi te kele kātoa.” Koutou fakahā age te pāki ʼi te pasina 35, pea mo vakaʼi te ʼu palakalafe 17 ki te 21 ʼi te pasina 34 ki te 36.
Te Tohi-Tapu
◼ “ ʼE tau ʼui e te hahaʼi ko te Tohi-Tapu ʼe ko te Folafola ʼa te ʼAtua. Neʼe mole heʼeki ke feʼekeʼaki koa pe koʼe ʼe fakahigoaʼi ʼe ko te Folafola ʼa te ʼAtua he tohi neʼe fai e ni ʼu tagata? [Tuku ke fai mai hana tali. Pea koutou lau age ia 2 Petelo 1:21 pea mo te palakalafe 5 ʼi te pasina 19.] ʼE maʼu ʼi te tohi ʼaenī te ʼu tali faka Tohi-Tapu ki te ʼu fehuʼi ʼaenī.” Koutou fakahā age te ʼu fehuʼi ʼi te pasina 6.
◼ “ ʼE lahi age te ʼu logo ʼaē ʼe maʼu e te hahaʼi ʼi te temi nei ʼi te temi muʼa. Kae ʼi tau manatu, ʼe feala koa ke tou maʼu ʼifea he ʼu tokoni lelei ke tou maʼuli fiafia ai? [Tuku ke fai mai hana tali. Pea koutou lau age ia 2 Timoteo 3:16, 17, pea mo palakalafe 12 ʼi te pasina 22 mo te 23.] ʼE fakamahino ʼi te tohi ʼaenī peʼe koteā ʼaē ʼe tou lava fai moʼo fakafiafia te ʼAtua pea mo fua manuʼia kiā tatou.” Koutou fakahā age te pasina 122 pea mo te pāki ʼi te pasina 123.
Te ʼu Tuʼutāmaki/Te Mamahi
◼ “Ka hoko he tuʼutāmaki, tokolahi ʼe nātou feʼekeʼaki peʼe tokaga moʼoni koa te ʼAtua ki te hahaʼi pea mo tonatou ʼu mamahi. Neʼe kua ke fai koa te fehuʼi ʼaia? [Tuku ke fai mai hana tali. Pea koutou lau age ia 1 Petelo 5:7 pea mo te palakalafe 11 ʼi te pasina 11.] ʼE fakamahino ʼi te tohi ʼaenī te puleʼaki ʼa Atua moʼo pulihi ia te ʼu mamahi ʼo te malamanei.” Koutou fakahā age te ʼu ʼuluaki fehuʼi ʼi te pasina 106.
[Talanoa ʼo te pasina 5]
Te ʼu Faʼahiga Tali ʼo ʼUhiga Mo Te ʼu Meʼa ʼOfa
“Kapau ʼe ke fia foaki nei he kiʼi meʼa ʼofa moʼo lagolago ki tamatou gāue ʼaē ʼe fai ʼi te malamanei kātoa, ʼe au tali fakafiafia anai.”
“Logola ʼe mole totogi tamatou ʼu tohi, kae ʼe mātou tali te ʼu kiʼi meʼa ʼofa ʼaē ʼe koutou foaki mai maʼa tamatou gāue ʼaē ʼe fai ʼi te malamanei kātoa.”
“ ʼE lagi ke feʼekeʼaki peʼe mātou lava fakahoko feafeaʼi te gāue ʼaenī. ʼE feala te gāue ʼaenī heʼe lagolago kiai te ʼu meʼa ʼofa ʼaē ʼe foaki mai ki tamatou gāue ʼaē ʼe fai ʼi te malamanei kātoa. Kapau ʼe ke fia foaki nei hau kiʼi meʼa ʼofa, ʼe au tali fakafiafia anai.”