Tou Taupau Te Fia Logo ʼa Te Hahaʼi ʼAē Neʼe Palalau Mo Tatou
1 ʼI tatatou gāue ʼi te ʼu ʼapi, ʼe tou tautau faka tuʼakoi te lahi ʼo totatou temi mokā tou palalau mo he tahi ʼe fia logo. ʼE lahi te ʼu faʼahi, ko te gāue moʼo ako ʼo te hahaʼi ʼe fakahoko mokā tou fai te ʼu ʼaʼahi pea mo te ʼu ako faka Tohi-Tapu. (Mat. 28:19, 20) Ke lelei tatatou faiako ʼi tatatou fai te ʼu ʼaʼahi, ʼe ʼaoga ke tou toe fakakaukauʼi te meʼa neʼe tou talanoa kiai ʼi tatatou ʼuluaki palalau pea ke tou teuteu ʼo ʼuhiga mo he tahi age fai palalau.
2 Kapau neʼe koutou talanoa ki te haʼele kovi ʼo te famili, ʼe feala hakotou fakaʼaogaʼi te alatike ʼi te kapite 29 ʼo te tohi “Mauli O Heegata.” ʼE feala hakotou ʼui age:
◼ “ ʼI tātā ʼuluaki felāveʼi, neʼe ta palalau ki te agapoto ʼo ʼuhiga mo te muliʼi ʼo te tokoni ʼa te Tohi-Tapu ke feala ai hatatou maʼu he maʼuli faka famili fiafia. Koteā takotou manatu ʼo ʼuhiga mo te kalavi ʼo te felogoi tahi ʼo te ʼu famili ia ʼaho nei?” Faka fealagia ke fai atu hana tali. Koutou talanoa ki te palakalafe 27 ʼi te pasina 247, pea koutou lau ia Kolose 3:12-14. Koutou fai he tahi age ʼu fakamatala ʼo koutou fakahā, peʼe feafeaʼi te fakatahiʼi ʼo he ʼu famili e te ʼofa moʼoni. Koutou fakamahino peʼe feafeaʼi te tokoni ʼo te ako fakalelei ʼo te tohi Mauli O Heegata ke maʼu ai he puleʼaki ʼo ʼuhiga mo te ʼu faigataʼaʼia.
3 Kapau neʼe koutou palalau ki te haʼele kovi ʼo te ʼu ʼaluʼaga ʼo te malamanei ʼi takotou ʼuluaki palalau, ʼe feala hakotou hoko atu ʼaki te palalau ʼaenī:
◼ “ ʼE ʼau ʼiloʼi papau ʼe koutou manatu tahi anai mo ʼau ʼo ʼuhiga mo te manatu ʼaē ʼe ʼaoga ke ʼi ai he ʼu fetogi lahi mokā tou fia maʼuʼuli ʼi te tokalelei ʼo talu ai. ʼE fakahā mai e te Tohi-Tapu ko ʼotatou ʼu faigataʼaʼia ʼe ʼuluaki fakatupu e Satana. Tokolahi ʼe nātou feʼuiʼaki pe koʼe neʼe fakagafua e te ʼAtua ke maʼuli ia Satana ʼo fualoa. Koteā koa takotou manatu?” Faka fealagia ke fai hana tali. Fakahā age te pasina 20, ʼi te ʼu palakalafe 14 pea mo te 15, ʼi te tohi Mauli O Heegata, pea koutou fakamahino pe koʼe ʼe mole heʼeki fakaʼauha ia Satana. ʼOsi ʼaia pea koutou lau ia Loma 16:20, ʼaē ʼe fakahā ai te meʼa ʼe feala ke tou ʼamanaki kiai ki he temi ka haʼu kua ōvi mai.
4 Kapau neʼe koutou palalau ki te ʼu tapuakina ʼaē ʼe fakahoko anai ʼi te pule ʼo te Puleʼaga, ʼi takotou toe liliu, ʼe feala hakotou ʼui age:
◼ “Ko te Puleʼaga ʼo te ʼAtua ʼe ina ʼaumai anai te ʼu tapuakina taulekaleka ki te kele pea mo te malamanei. Ko te ʼu tapuakina ʼaia ʼe fakahāhā fakalelei ʼi te ʼu pasina 12 pea mo te 13. Koteā te meʼa ʼe koutou leleiʼia ʼi te meʼa ʼaenī ʼe koutou sio kiai? [Faka fealagia ke fai hana tali.] Koutou fakakaukauʼi muʼa te agaaga ʼo te maʼuli ʼi he mālama ohage ko tona tuʼu ʼi te paki ʼaenī.” Lau te palakalafe 12. Kapau ʼe fia logo ia ia ʼaē ʼe palalau mo koutou, koutou fai te fehuʼi ʼo te palakalafe 13, pea koutou talanoa ki tona tali. Koutou fakahā ki ai ko te kapite ʼaenī ʼe lahi ai te ʼu tali ki te ʼu fehuʼi ʼo ʼuhiga mo te ʼu tapuakina ʼe tuku mai e te Puleʼaga pea ʼe koutou fia liliu mai ʼo palalau mo ia ki te ʼu meʼa ʼaia.
5 ʼE feala hakotou kamata he ako faka Tohi-Tapu ʼaki te ʼu palalau ʼaenī:
◼ “Tokolahi te hahaʼi neʼe nātou maʼu te ʼu tali ki tanatou ʼu fehuʼi faka Tohi-Tapu ʼaki tanatou fakaʼaogaʼi te tohi ʼaenī.” Koutou fakahā ki ai te tānakiʼaga ʼo te ʼu kupu tāfito ʼo te tohi, pea koutou fehuʼi ki ai: “Ko te kapite fea ʼaē ʼe lahi takotou fia ʼiloʼi?” Faka fealagia ke fai atu hana tali, pea koutou fakahā ki ai te kapite ʼaē ʼe fia talanoa kiai, pea koutou lau te ʼuluaki palakalafe. Koutou fakamahino peʼe feafeaʼi te fakaʼiloga lelei e te ʼu fehuʼi ʼaē ʼe tuʼu ʼi te lalo pasina, te ʼu puani tāfito ʼo te palakalafe fuli. Koutou fakaʼaogaʼi he palakalafe e tahi peʼe lua moʼo fai ʼaki ʼo te felogoi, pea koutou fai he fakatuʼutuʼu ke koutou toe liliu ʼo ʼaʼahi ia ia.
6 Ko te taupau ʼo te fia logo ki te tohi Mauli O Heegata ʼe ina fakahā ʼaki ai tatatou fia fakahoko katoa totatou minisitelio. (2 Tim. 4:5) E lagi feala ke tou tokoni kia nātou ʼaē ʼe fakalogo mai, ke nātou maʼu te maʼuli heʼegata.—Soane 17:3.