Ko He ʼu Logo ʼo Te Puleʼaga Ke Tufa ʼi Te Malamanei Katoa ʼi Tona Lakaga Tonu
1 ʼI te ʼAhotapu, ʼaho 23 ʼo ʼApelili, ʼe fai anai he akonaki makehe ki te hahaʼi, pea koʼeni tona kupu tāfito “Ko Te Fakaʼauha ʼo Te Lotu Loi Kua Ōvi Mai.” ʼI te fakaʼosi ʼo te fono ʼaia, ʼe tufa anai te ʼu Logo ʼo Te Puleʼaga e pasina fā pea ʼe ina fakatupu ʼaki anai he fakakaukau. Ko te logo ʼaē ʼe fai ʼi tona temi tonu ʼe maʼu ʼi te pepa ʼaia, ʼe tufa anai ʼi te malamanei katoa lolotoga vāhaʼa e tolu, ʼo kamata mai te ʼaho 24 ʼo ʼApelili ʼo kaku ki te ʼaho 14 ʼo Maio.
2 ʼI te ʼu potu fuli ʼo te kele, ʼe nofo hoha te hahaʼi. ʼI te ʼu potu fuli ʼe nātou nonofo ai, ko te hahaʼi ʼe nātou felāveʼi mo te ʼu faigataʼaʼia. Ko te ʼu Logo ʼo Te Puleʼaga ʼe maʼuhiga ʼaupito anai kia nātou ʼaē ʼe nātou tuʼania moʼoni ʼo ʼuhiga mo te meʼa ʼaē ʼe lolotoga hoko, koteʼuhi ʼe ina taki anai nātou ki te Folafola ʼa te ʼAtua ʼaē ko te Matapuna ʼe mole feala ke hala, pea mo ʼaoga moʼo takitaki te tagata. (Pes. 119:105) Ko tatou fuli ʼe tou fakatalitali ke tou maʼu he pepa ʼo te ʼu Logo ʼo Te Puleʼaga ʼi te temi ʼaē ka tufa anai ʼi te ʼaho 23 ʼo ʼApelili. Lolotoga te temi ʼaia, ʼe lahi te meʼa ʼe tonu ke fai moʼo teuteuʼi te toe fakatuʼutuʼu ʼaia ki te gāue faka mafola lolotoga vāhaʼa e tolu.
3 Fakaloto Mālohiʼi Ia Nātou Fuli Ke Nātou Kau Mālohi Ki Te Faka Mafola: Ko ai ʼaē ʼe feala ke kau ki te gāue ʼaia? ʼE mahino ia ko nātou fuli ʼaē kua kau ki te faka mafola ʼe nātou holi mālohi anai ke nātou fai te faʼahi ʼaia! Kae e feafeaʼi ʼo ʼuhiga mo nātou ʼaē ʼe nātou ako te Tohi-Tapu pea mo nātou kau tuʼumaʼu ki te ʼu fono ʼo te kokelekasio? Ko ʼihi, mole heʼeki faʼa fualoa, ʼe fakatahi mo tatou pea ʼe haʼele ki muʼa tanatou ako. Kapau ʼe nātou maʼuliʼi te ʼu fakatuʼutuʼu ʼa te Tohi-Tapu, kua feala koa hanatou kau ki te faka mafola ʼo te Puleʼaga? ʼE feala kia ia ʼaē ʼe ina fai te ako faka Tohi-Tapu ke palalau ki te faʼahi ʼaia mo ia ʼaē ʼe ako, pea kapau ʼe fia kau ki te gāue faka mafola, ʼe vakaʼi fakatahi anai e te ʼu tagata ʼāfea e lua pea mo ia te ʼu puani ʼaē ʼe tuʼu ʼi te pasina 99 ʼo te tohi Organisés pour bien remplir notre ministère. ʼE tonu anai ke foimo fai te faʼahi ʼaia ke feala kia nātou ʼaē ʼe nātou lava kau ki te ʼu kaugā faka mafola kae mole heʼeki papitema ke nātou kau ki te fakatuʼutuʼu gāue ʼaia. Ki te kau ako ʼo te Tohi-Tapu ʼaē ʼe mole heʼeki nātou lava kau ki te ʼu kaugā faka mafola kae mole heʼeki papitema, ʼe kei feala he fakaloto mālohiʼi ʼo nātou ke nātou fakahā te ʼu Logo ʼo Te Puleʼaga ki te ʼu hahaʼi ʼaē ʼe nātou ʼiloʼi peʼe ko te ʼu hahaʼi ʼo tonatou famili.—Vakaʼi Te Tule Leʼo ʼo te ʼaho 15 ʼo Novepeli 1988 (fakafalani), ʼi te pasina 17, ʼi te palakalafe 8.
4 Ko te gāue ʼaia ʼe mole faigataʼa; ʼe feala ke kau fuli kiai te hahaʼi. ʼE feala ki te ʼu mātuʼa ʼi tanatou ako faka famili ʼaē ʼe fai ʼi te vāhaʼa fuli ke nātou fai he ʼu faʼifaʼitaki ʼaki te ʼu Logo ʼo Te Puleʼaga ke feala ki te famili katoa ke teuteu ki tona fakahā ʼi te ʼu ʼapi. ʼI te agamāhani, ʼe lelei age hakita fai he fakahā ʼe faigafua. ʼI te ʼosi ʼo te ʼuluaki palalau ʼaē ʼe nounou, koutou foaki age te ʼu Logo ʼo Te Puleʼaga kia ia ʼaē ʼe palalau mo koutou, pea mo koutou fakaloto mālohiʼi ia ia ke ina lau. Kapau ʼe ʼi ai niʼihi ʼe fia logo, koutou tohi ia nātou ʼaia ʼi he moʼi pepa ke feala hakotou toe liliu mai ʼo hoko atu te fai palalau. (1 Ko. 3:6, 7) Ke lava lelei te faʼahi ʼaia, ʼe tonu ke teuteuʼi lelei te faʼahiga fakahā ʼo te logo.
5 ʼE ‘lahi ʼaupito anai te ʼu gāue’ ʼi ʼApelili pea mo Maio. ʼI Te Minisitelio ʼo Te Puleʼaga ʼo te māhina ka haʼu, ʼe fakahā ai anai he tahi manatu ʼi te lua pepa ʼaē ko tona kupu tāfito “ ʼE lahi ʼaupito te ʼu gāue ʼi te ʼAliki.”—1 Ko. 15:58.