Tou “Fakamalotoloto Ki Te Fai ʼo Te ʼu Gāue Lelei” ʼi ʼApelili!
1 ʼI te taʼu ʼaenī kua ʼosi, neʼe fai he fagonogono mālohi ʼi te tufa ʼo te lauʼi miliona pepa lotu ʼo te ʼu Logo ʼo Te Puleʼaga N° 34 ʼi te malamanei katoa. Tatau aipe mo te ʼu kaugā fai faka mafola pea mo te kau pionie ʼo te kokelekasio, neʼe nātou faiva ʼi te fai ʼo te gāue fakaloto mālohi ʼaia. Neʼe koutou kau koa ia nātou ʼaia? Kapau neʼe koutou kau kiai, ʼe mahino papau ia neʼe ko he meʼa fakafiafia kia koutou hakotou kau ki te gāue taulekaleka ʼaia. ʼI te temi nei ʼe lagi koutou feʼekeʼaki, pe koteā koa te ‘gāue lelei’ ka tou fai anai ʼi te taʼu ʼaenī?—Tito 2:14.
2 ʼI ʼApelili pea mo te kamata ʼo Maio, ʼe tou tufa anai te ʼu numelo ʼo Te Tule Leʼo ʼo ʼApelili. ʼE nātou fakahā lelei ko Sehova ʼAtua ʼe maʼuli moʼoni pea ʼe nātou fakamahino peʼe lava ʼiloʼi feafeaʼi tana kau atolasio moʼoni. Kapau ʼe fia lau e te hahaʼi tatatou ʼu nusipepa ʼi te lea Fakafalani, ʼe feala foki ke tou fakaʼaogaʼi te Réveillez-vous! makehe, ʼo te ʼaho 22 ʼo ʼApelili, ʼo tou fakahā age te alatike ʼaē “Quand les guerres auront disparu.”
3 Ko Tatatou Fakatuʼutuʼu—Ko Te Gāue Mo Te ʼu Kaugā Fai Faka Mafola Fuli: ʼE ko he meʼa fakaloto mālohi moʼoni anai, mo kapau ko te ʼu kaugā fai faka mafola fuli ʼi te fenua ʼaenī ʼe kau ki te gāue fai faka mafola ʼi ʼApelili. ʼI te hoki ʼosi atu pe ʼo te ʼAho Fakamanatu ʼo te mate ʼo Kilisito, ʼe tou fia fakahā lelei anai tatatou loto fakafetaʼi ʼo ʼuhiga mo te agalelei ʼa te ʼAtua ʼo tou foaki “he sakilifisio fakavikiviki” ʼi te minisitelio.—Hep. 13:15.
4 ʼE tonu ke tou faiga mālohi ke tou ʼiloʼi te ʼu meʼa ʼaē ʼe ʼaoga kia nātou fuli ʼi te kokelekasio, ke feala hanatou kau fakamalotoloto ki te minisitelio ʼi ʼApelili. (Loma 15:1) Ko te ʼu tēhina ʼaē ʼe nātou fai te ʼu ako tohi, ʼe tonu anai ke nātou ʼiloʼi tāfito te ʼu ʼaluʼaga ʼo nātou fuli ʼaē ʼe kau ki te ako tohi, pea mo foaki kia nātou ʼaia he ʼu tokoni ʼe lelei mo kapau ʼe ʼaoga. ʼE ʼi ai koa he tahi ʼe fihifihia ʼi te meʼa feʼaluʼaki? Ko ai koa ʼaē ʼe feala ke tokoni ki ai ʼo ʼuhiga mo te faʼahi ʼaia? ʼE ʼi ai koa niʼihi ʼe ufiufi peʼe umiuminoa? ʼE feala koa ke kaugā gāue he ʼu kaugā fai faka mafola kua māhani mo nātou ʼi te fai faka mafola? Kae e feafeaʼi ia nātou ʼaē ʼe māʼimoa peʼe ko nātou ʼaē ʼe mahaki? ʼE feala koa hanatou fakaʼaogaʼi te telefoni moʼo fai fagonogono, mo nātou faitohi, peʼe ko he tahi age faʼahiga gāue ʼe ʼi ai hona ʼu fua lelei?
5 Ko ʼihi ʼe mole kei ʼolo ʼo fai faka mafola pea ʼe ʼaoga ke foaki tuʼumaʼu kia nātou he ʼu tokoni fakaloto mālohi ʼi te faʼahi fakalaumālie, pea ʼe feala ke uga ai nātou ke nātou toe kau ki te gāue fai faka mafola. Ko te tufa ʼo te Réveillez-vous! makehe ʼaia, ʼe ina foaki anai kia nātou he fealagia lelei ke nātou toe liliu ʼo mālohi ʼi te fai faka mafola.
6 Akoʼi Te Kau Tūpulaga Ke Nātou Kau Ki Te Fai Faka Mafola: ʼE tokolahi te ʼu tamaliki ʼa te kau Fakamoʼoni ʼa Sehova ʼe nātou kaugā ʼolo mo tanatou ʼu mātuʼa ʼi te fai faka mafola ʼi te ʼu ʼapi lolotoga ni ʼu taʼu, logope la tanatou mole heʼeki liliu ko he ʼu kaugā fagona. Kua feala koa ke nātou liliu ko he ʼu kaugā fagona? ʼE uga koa nātou ʼe tonatou loto pea kua nātou tokalelei koa ke nātou kau ki te gāue fai faka mafola ʼi te ʼu ʼapi? ʼE tonu ke fakaʼaogaʼi e te pule famili he temi lolotoga tanatou ako Tohi-Tapu faka famili, moʼo tokoni ki tanatou tamaliki ke nātou teuteu he faʼifaʼitaki ʼe ʼaoga ʼo mulimuli ki tonatou taʼu pea mo tanatou fealagia. Ko nātou ʼaē kua lalahi ʼe feala ke nātou fili he fehuʼi ʼe lagaʼi ai te fia logo ʼa ia ʼaē ʼe nā fai palalau, pea mo ina fakahā age te tali ʼi te nusipepa. Ko te ʼu tamaliki ʼaē kei liliki ʼe feala hanatou fai he fagonogono ʼe lelei, ʼaki pe he ʼu palalau nounou. Ohage la, ʼe feala ke ina fakaloto mālohi ia ia ʼaē ʼe nā palalau ke ina “lau te nusipepa makehe ʼaē ʼe tou tufa ʼi te māhina ʼaenī.” ʼI takotou ako faka famili, koutou tokakaga ʼo fakahā he ʼu manatu ʼe feala ai ke nātou tali ki te ʼu fehuʼi māhani ʼaē ʼe lagaʼi e te hahaʼi mokā tou fai faka mafola. ʼE koutou maʼu anai he ʼu manatu lelei ʼi te tohi Comment raisonner. ʼI te ʼu temi kai pea mo te tahi ʼu lakaga lelei, koutou fakaloto mālohi te famili ke nātou fakamatala pe neʼe feafeaʼi tanatou fai faka mafola.
7 Ko Te Kau Ako Tohi-Tapu ʼAē Kua Faiva ʼe Nātou Hoko Atu Te Gāue ʼAē Neʼe Fai e Sesu: Neʼe mole gata pe te faʼahiga ako ʼaē neʼe fai e Sesu ʼaki tana ʼu fai akonaki. Neʼe kaugā ʼolo mo tana kau ako ʼi te minisitelio pea mo ina ako kia nātou peʼe feafeaʼi te fai faka mafola. (Luka 8:1; 10:1-11) E feafeaʼi koa ia ʼaho nei? Ko te ʼu ako Tohi-Tapu e 1 500 tupu ʼe fai ʼi Niu Kaletonia pea ko te 16 ʼi Uvea mo Futuna. ʼE mahino ia, ʼaki he ʼu manatu fakaloto mālohi ko te tokolahi ʼi te kau ako ʼaia, ʼe feala ke nātou tuputupu ʼi tanatou ako, pea ʼe feala anai hanatou liliu ko he ʼu kaugā fagona ʼi ʼApelili.
8 Kapau ʼe koutou lolotoga fai nei he ako Tohi-Tapu, koutou vakaʼi te ʼu fehuʼi ʼaenī: ʼE tuputupu koa ia ia ʼaē ʼe ako, ʼo mulimuli ki tona taʼu pea mo tona fealagia? Kua kamata palalau koa ʼo ʼuhiga mo tana tui ki niʼihi ʼi he fagonogono faigamālie? Kua ina kofuʼi koa “te ʼuhigaʼi tagata foʼou”? (Kol. 3:10) Kua ina fakahoko koa te ʼu meʼa ʼaē ʼe ʼaoga ke liliu ai ko he kaugā fagona, ʼaē ʼe fakahā ʼi te pasina 98 pea mo te pasina 99 ʼo tatatou tohi Notre ministère? Kapau ʼi takotou manatu kua feala ke liliu ko he kaugā fagona, he koʼe ʼe mole koutou palalau mo ia ki te faʼahi ʼaia? Ko ʼihi kau ako ʼe ʼaoga ke fakaafe fakahagatonu ia nātou ke nātou kau ki te gāue fai faka mafola. ʼE mahino ia, kapau ʼe lotolelei ia ia ʼaē ʼe ako, ʼe tonu anai ke ʼuluaki fakatuʼutuʼu e te tagata taupau pelesita te faʼahi ʼaia mo he ʼu tagata ʼāfea e toko lua. ʼI te tahi faʼahi, ʼe lagi ʼi ai he meʼa ʼe ina tāʼofi ia ia ʼaē ʼe ako ke fia liliu ko he kaugā fagona. E lagi feala ke kaugā ʼolo he tagata ʼāfea mo koutou ki te ako Tohi-Tapu, pea ke ina faka palalauʼi ia ia ʼaē ʼe ako ki te ʼu meʼa ʼe ina logoʼi ʼi tona loto ʼo ʼuhiga mo te moʼoni. ʼI te ʼosi fakahā atu anai e ia ʼaē ʼe ako te meʼa ʼi tona loto, ʼe feala anai ke vakaʼi e te tagata ʼāfea ke ina foaki he ʼu manatu ʼe ʼaoga, ʼaki te tokoni ʼa te Tohi-Tapu.
9 Koutou ‘Totogi Maʼa Koutou Te Temi’ Ke Feala Hakotou Pionie Vaeluaʼi Temi: ʼI te taʼu fuli ʼi te temi ʼo te ʼAho Fakamanatu, ko te loto fakafetaʼi ki te totogi ʼe ina uga te lauʼi afe hahaʼi ke nātou ‘totogi’ te temi ke feala ai hanatou pionie vaeluaʼi temi. (Ef. 5:15-17) Logope la ʼe mole ko he meʼa faigafua, kae ʼe lahi te ʼu lelei ʼaē ʼe tou maʼu ai. ʼE lahi te kau tūpulaga ʼe nātou fakaʼaogaʼi tonatou temi mālōlō ʼo nātou pionie vaeluaʼi temi. Ko te hahaʼi lalahi ʼaē ʼe gāue ʼi te ʼaho katoa ʼe nātou fakaʼaogaʼi te ʼu afiafi pea mo te ʼu fakaʼosi vāhaʼa ke nātou kau katoa ai ki te gāue ʼaia. Tahi ʼaē, ko te ʼu famili katoa ʼe nātou fakaʼaogaʼi te faigamālie ʼaia ke feala hanatou pionie vaeluaʼi temi fakatahi! ʼI ʼihi ʼu kokelekasio ʼe lahi te ʼu tagata ʼāfea pea mo te ʼu tagata faifekau faka minisitelio pea mo tonatou ʼohoana ʼe nātou toʼo te selevisi pionie vaeluaʼi temi. ʼAki tanatou faʼifaʼitaki fakaloto mālohi ʼaia, neʼe uga ai ʼihi ke nātou mulimuli ki tanatou faʼifaʼitaki, koia ʼe feala ke lahi ai te hahaʼi ʼi te kokelekasio ʼe nātou gāue pionie vaeluaʼi temi ʼi ʼApelili.
10 Tatau aipe peʼe feala hakotou pionie vaeluaʼi temi peʼe kailoa, koutou kumi he ʼu faʼahi ʼe feala ke fakatuputupu ai takotou gāue ʼi te fai faka mafola ʼi ʼApelili. Koutou fai hakotou fakatuʼutuʼu, pea ke koutou faiga mālohi anai ʼo hoko atu takotou fakatuʼutuʼu ʼaia mokā ʼe feala. Ko takotou fia ‘kau katoa’ ʼi te gāue ʼa Sehova, ʼo mulimuli ki takotou ʼu fealagia takitokotahi, ʼe tapuakina anai.—2 Ko. 12:15.
11 Ko Te ʼu Fono Ki Te Gāue Fai Faka Mafola: Ko te ʼu fono ki te gāue fai faka mafola, ʼe tonu ke fai ʼi te ʼaho fuli ʼo ʼuhiga mo te tufa ʼo Te Tule Leʼo pea mo te Réveillez-vous! ʼi he temi ʼe feala ke kamata tautonu ai te minisitelio. ʼE tonu foki ke fai he fakatuʼutuʼu ʼo ʼuhiga mo te fagonogono ʼi te afiafi. ʼE lahi te ʼu kaugā fai faka mafola ʼe kau anai ki te gāue fai faka mafola ʼi te ʼu fakaʼosi vāhaʼa, koia ʼe tonu ai ke fakatuʼutuʼu e te ʼu kokelekasio he ʼu fono fai faka mafola ʼi te ʼu Moeaki uhu pea mo te hoʼatā, ke feala ai te tufa ʼo te ʼu nusipepa makehe ʼaia.
12 Ko nātou ʼaē ʼe nātou fai te ʼu fono fai faka mafola ʼe tonu ke nātou tokakaga ke ʼi ai he telituale. Ko te ʼu telituale ʼaē neʼe kua fualoa tona fai ʼe tonu anai ke ʼuluaki fai.
13 Ko Te ʼu Nusipepa ʼe Fia ʼAē Ka Koutou Tufa Anai? Ko te fehuʼi ʼaia ʼe ʼa tatou takitokotahi tona tali kiai. Moʼo fakatuʼutuʼu peʼe ko te ʼu nusipepa ʼe fia ʼe feala ke koutou tufa lolotoga te tufa makehe ʼaia, koutou vakaʼi te faʼahiga telituale ʼaē ka koutou gāue ai, koutou tokagaʼi tokotou taʼu, koutou vakaʼi peʼe koutou mahamahaki, te temi ʼaē ʼe feala ke koutou fakaʼaogaʼi ki te gāue fai faka mafola, pea mo ʼihi age ʼu meʼa. Kae, koutou fakatokagaʼi te fakamanatu ʼaē ʼe tuʼu ʼi te alatike ʼo Te Tule Leʼo ʼo te ʼaho 1 ʼo Sanualio 1994: “ ʼE lagi fakatuʼutuʼu anai e he kaugā fai faka mafola ke ina tuku he ʼu nusipepa e 10 ʼi te māhina, ʼo mulimuli pe ki tonatou ʼu ʼaluʼaga; ʼe feala ke fakatuʼutuʼu e te kau pionie ke nātou tuku he ʼu nusipepa e 90.” ʼE feala koa hakotou fai te fakatuʼutuʼu ʼaia?
14 Ko Te ʼu Tagata ʼĀfea—ʼe ʼAoga Ke Nātou Fai He Fakatuʼutuʼu Lelei: Kapau ʼe feala, ʼe ʼaoga ke tokakaga te ʼu tagata ʼāfea ke gāueʼi te telituale katoa ʼo te kokelekasio ʼaki te tufa ʼo te alatike makehe ʼo te ʼu nusipepa. ʼE tonu ke tou tokakaga fakalelei ʼo gāueʼi te telituale ʼaē ʼe tuʼu ai te ʼu matani gāue, ʼaē neʼe hinoʼi ki te kokelekasio. Ko nātou ʼaē ʼe fai faka mafola ai ʼe tonu ke nātou teuteu fakalelei pea ke lelei tonatou ʼu mutuʼi meʼa. ʼE mole tonu anai ke faigataʼa fau takotou fakahā te nusipepa. Ka koutou fakaōvi ki he tahi ʼe gāue, ʼe feala ke koutou ʼui age ʼe tahitahiga takotou maʼu atu te hahaʼi gāue ki tonatou ʼu ʼapi, koia ʼe koutou ʼōmai ki te fale gāue, ʼo fakahā kia ia te alatike ʼe lagi ʼe ina fia lau anai. ʼOsi ʼaia pea koutou fakahā fakanounou age he puani tāfito ʼi te nusipepa. Ko te fagonogono faigamālie ʼaki te ʼu nusipepa, ʼe tonu ke fakatuʼutuʼu lelei ʼi te telituale ʼo tokotou kokelekasio. Mai tona ʼaluʼaga ʼaē ʼe sioʼi anai koutou e te hahaʼi, koia ʼe tonu ke mahino kia koutou ʼe ʼaoga ke lelei takotou ʼu mutuʼi meʼa. E lagi ko ʼihi koga meʼa ʼo tokotou telituale ʼe feala ke fai ai te gāue lolotoga te tufa makehe, ohage la ko te malaʼe vakalele, te ʼu fale mahaki, te ʼu tauʼaga motokā, te ʼu lotoʼā matalelei, pea mo te ʼu ʼapi ʼe nonofo ai te hahaʼi vaivai. Ko te kolesi ʼo te ʼu tagata ʼāfea ʼe tonu ke ina fakasiosio te ʼu fakatuʼutuʼu ʼaē ʼe feala ke fai, ʼo ʼuhiga mo te fai faka mafola ʼi te ʼu koga meʼa ʼaia ʼi te telituale ʼo tokotou kokelekasio.
15 Ko Sehova ʼe faʼa gāue. (Soane 5:17) Neʼe ina faʼu te lagi mo te kele, pea mo te ʼu fuʼu ʼakau pea mo te ʼu manu; kae neʼe hoko atu tana gāue ʼo aʼu ki tana fakahoko tana gāue lahi ʼi te kele—te tagata. ʼE tou maʼu te maʼuli he neʼe fia gāue te ʼAtua. ʼI totatou ʼuhiga “kau faʼifaʼitaki ʼo te ʼAtua,” ʼe tonu ke uga tatou ʼe totatou ʼofa kia te ia, ke tou “fakamalotoloto ki te fai ʼo te ʼu gāue lelei.” (Ef. 5:1; Tito 2:14) Mai tona ʼaluʼaga ʼaē ʼe tāu mo Sehova ke ina maʼu tatatou faiga pea mai tona ʼuhiga ʼaē ko ia ʼaē ʼe faʼa gāue ʼe ina fia sio ki tona ʼu fua, koia ʼe tonu ai ke tou faiga ke lelei age tatatou gāue ʼi te minisitelio. ʼE mahino ia, ʼe leleiʼia e Sehova te ʼu sakilifisio ʼaē ʼe tou fai kia te ia, pea ko tatatou gāue ʼe mole vaʼiganoa. (1 Ko. 15:58) Koia, ʼaki he loto fakafetaʼi, tou fakatuʼutuʼu ke tou gāue mālohi ʼi ʼApelili, ʼo tou falala ki te ʼofa ʼa Sehova, pea mo tana tapuakina pea mo te ʼu fua lelei ʼaupito ʼaē ka ina foaki mai!