“ ʼE Lahi Te Gāue Ke Fai ʼi Te Gāue Ki Te ʼAliki”
1 ʼE mahino papau ia ʼe lahi tatatou maʼumaʼua ʼi te ʼu gāue faka teokalatike lolotoga te ʼu māhina ʼo ʼApelili pea mo Maio! ʼI te ʼaho 14 ʼo ʼApelili ʼe tou fai anai te Fakamanatu ʼo te mate ʼa Kilisito! Kapau ko he meʼa ʼe feala, pea ʼe tonu anai ke fakaafe te tokolahi ke nātou ʼōmai ʼi te lakaga maʼuhiga ʼaia: ko te hahaʼi ʼe tou ʼiloʼi ʼi te gāue, mo te ʼu kāiga ʼe mole nātou tui kia Sehova, mo te ʼu kaugā ako, mo te hahaʼi foʼou ʼe nātou fia logo, pea mo te kau ako faka Tohi-Tapu. Fai he lisi ʼo nātou ʼaē ʼe koutou fakatuʼutuʼu ke koutou fakaafe ke ʼaua naʼa galo he tahi.
2 ʼI te vāhaʼa ʼe hoa mai ki te ʼaho ʼaia, ʼe tou fakaloto mālohiʼi anai ia nātou fuli ʼaē neʼe nātou kau ki te Fakamanatu ke nātou ʼōmai ʼo fakalogo ki te akonaki makehe ʼaē ka fai ʼi te ʼaho 23 ʼo ʼApelili, pea koʼeni tona kupu tāfito “Ko Te Fakaʼauha ʼo Te Lotu Loi Kua Ōvi Mai.” ʼE tou fakaʼamu ki te tokolahi ʼo nātou ʼaē ʼe nātou fia ʼiloʼi ʼaē ka nātou logo ki te logo fakahagatonu ʼaia, ke nātou sisio ki te ʼaoga ʼaē ke fakatahi tuʼumaʼu mo te ʼu kokelekasio, ʼo mole gata pe ʼi te ʼu lakaga makehe.
3 Ko Te Fakahā ʼo Te ʼu Logo ʼo Te Puleʼaga: Ko he puani maʼuhiga ʼo te fono ʼo te ʼaho 23 ʼo ʼApelili, ko te fakahā ifo anai ʼo te pepa ʼe pasina fā ʼe tō tonu mo te temi ʼaenī, ko te ʼu Logo ʼo Te Puleʼaga Numelo 34, pea ʼe tufa fakalahi anai ʼo aʼu ki te ʼaho 24 ʼo Maio. ʼE mole koutou ʼio koa la ʼe ‘lahi anai te gāue ʼaē ka fai ʼi te gāue ki te ʼAliki’ lolotoga te temi ʼo te Fakamanatu?—1 Ko. 15:58.
4 Ko he ʼu kalato ʼo te ʼu Logo ʼo Te Puleʼaga ʼe ʼave anai ki te ʼu kokelekasio fuli. ʼE tonu anai ke tānaki fakalelei te ʼu kalato ʼaia ʼi he faʼahi ʼe hoki avahi pe anai ʼi te fakaʼosi ʼo te fono ʼo te ʼaho 23 ʼo ʼApelili. ʼI te temi ʼaia, ʼe hoki feala he tufa ʼo te ʼu Logo ʼo Te Puleʼaga ki te ʼu tēhina ʼo feiā mo tona tufa ki te hahaʼi. ʼI te ʼosi ʼo te ʼu fono ʼo te kokelekasio ʼi te ʼaho 23 ʼo ʼApelili, ko nātou ʼaē neʼe kau ki te fono ʼe nātou maʼu anai hanatou pepa ke nātou ʼiloʼi te ʼu meʼa ʼaē ʼe tuʼu ai pea ke nātou lava teuteuʼi ki te temi ʼaē ka tufa ai.
5 ʼE Lahi Anai Te Gāue ʼa Te Kau Tagata ʼĀfea: ʼI te kamataʼaga ʼo te māhina ʼaenī, ʼe tonu anai ke fono te kolesi ʼo te kau tagata ʼāfea ke nātou palalau ki he ʼu kiʼi puani ʼo te fakatuʼutuʼu makehe ʼaia ki te faka mafola. ʼE tonu anai ke faigaʼi e te ʼu kokelekasio ke nātou gāue fuli tonatou telituale. ʼI muʼa ʼo te fakaʼosi ʼo te fakatuʼutuʼu makehe ʼaia ʼo te faka mafola, ʼe fai anai te ʼu faiga makehe ke feala hatatou felāveʼi mo te hahaʼi ʼo te ʼu telituale ʼaia ʼaē neʼe heʼeki fai talu mai fualoa. ʼI tatatou tokagaʼi te maʼuhiga ʼo te gāue, ʼe tou fia fakatuʼutuʼu anai he temi lahi ki te minisitelio. ʼE mahino ia, ʼo laka age ʼi tona fai māhani, ʼe tokolahi anai te kau fai faka mafola ʼe nātou pionie vaeluaʼi temi. ʼE toe mahino foki ko te tokolahi ʼi te kau ako faka Tohi-Tapu ʼe nātou fia kau mai anai kia tatou ʼo nātou liliu ko he kau fai faka mafola foʼou mole heʼeki papitema. ʼE tou maʼu anai he temi fiafia ʼi tatatou gāue fakatahi ʼi te gāue ʼo te ʼAliki!
6 ʼE tonu anai ke fai he ʼu fakatuʼutuʼu kua tukuʼaki e te ʼu tēhina ʼe nātou takitaki te ʼu Ako Tohi ʼo te kokelekasio, moʼo fai he faka mafola ʼi te ʼu Moeaki pea mo te ʼu ʼAhotapu. ʼE tonu anai ke tou faiga fuli ke tou kau mālohi ki te gāue ʼaia. ʼE mole gata ʼaki pe anai te faka mafola ʼi te fakaʼosi vāhaʼa, kae ʼe tonu anai ke fakatuʼutuʼu he gāue faka mafola ke hage ke tuʼa tahi ʼi te vāhaʼa lolotoga te fakatuʼutuʼu makehe ʼaia. Ko ʼihi e lagi nātou fia faka mafola ʼi te hili ako ke fealagia kia nātou ʼaē ʼe kei ako ʼaē ʼe nātou loto kiai, ke nātou fai he tahi gāue.
7 ʼE tonu anai ke fai te ʼu fono ki te gāue faka mafola, ke fealagia ki te kau fai faka mafola pea mo te kau pionie ke nātou kamata tautonu te minisitelio ʼi te ʼaho fuli. ʼE tonu anai ke nounou te ʼu fono ʼaia. ʼE tonu anai ki te ʼu fono fuli ʼaia ke fakahā he faʼahiga palalau faigafua ʼo ʼuhiga mo te ʼu Logo ʼo Te Puleʼaga. ʼE feala ke fakapipiki ki te ʼu fono gāue ʼo te hili hoʼatā he manatu e tahi peʼe lua ʼo ʼuhiga mo te fai ʼo te ʼu ʼaʼahi kia nātou ʼaē neʼe nātou tali te ʼu Logo ʼo Te Puleʼaga. Kae, ʼe lagi leleiʼia age anai e ʼihi kau faka mafola ke nātou tufa te ʼu Logo ʼo Te Puleʼaga ʼi te uhu pea mo te hili hoʼatā. ʼO ʼuhiga mo te potu ʼaia, ʼe tonu anai ki te taupau ki te gāue ke tokaga fakalelei ke feʼauga te telituale. ʼE tonu anai ke tohi te higoa pea mo te tuʼasila ʼo nātou fuli ʼaē ʼe nātou fia logo anai, ki te kiʼi pepa ʼaē ʼe tohi ai te ʼu ʼapi. ʼE feala ke tohi ʼi te kiʼi pepa ʼaia te ʼu puani tāfito ʼo te fai palalau fakanounou ʼaia. Ko te faʼahi ʼaia ʼe ina faka fealagia anai te faʼahiga fai ʼo te ʼaʼahi ʼi he tahi temi ʼo te vāhaʼa peʼe ko te māhina.
8 Ko ʼihi kau fai faka mafola e lagi nātou fia tokoni ki he kokelekasio ʼi te vao peʼe ko te ʼu motu ki te gāueʼi ʼo ʼihi faʼahi ʼo te telituale, tāfito la mo kapau ʼe nātou palalau ki te lea ʼo te koga meʼa ʼaia, pea mo tali ia nātou ʼi te ʼu koga meʼa ʼe tapu ai te gāue ʼi te ʼu ʼapi. Lagi ko ʼihi kau fai faka mafola ʼe nātou toʼo anai honatou mālōlō ʼo nātou ʼolo ʼo gāue ʼi Vanuatu peʼe ko Uvea mo Futuna. ʼE nātou felogoi anai mo te kolesi ʼo te kau tagata ʼāfea ʼo tanatou kokelekasio totonu, ʼaē ʼe hoki felogoi mo te filiale. ʼE tonu anai ke tuku te ʼu higoa pea mo te tuʼasila ʼo te hahaʼi ʼaē ʼe nātou fia logo ki te kokelekasio ʼaē ʼe gāue ki te telituale ʼaia.
9 ʼU mātuʼa, ʼe faiga koa takotou fānau ke nātou tuputupu ke nātou liliu ko he kau fai faka mafola ʼe mole heʼeki papitema? ʼE fakatokagaʼi ʼi ʼihi kokelekasio, ko te ʼu tamaliki ʼe aga fakapotopoto ʼe nātou kaugā gāue mo ʼanatou ʼu mātuʼa ʼaē kua papitema ʼi te minisitelio lolotoga te ʼu taʼu, pea ʼe lelei tanatou gāue, kae ko nātou ʼaia ʼe mole heʼeki nātou liliu ko he kau fai faka mafola ʼo te logo lelei. ʼE tonu ai ki te ʼu mātuʼa ke nātou vakavakaʼi fakalelei peʼe feala moʼoni koa ke fakahoko e tanatou ʼu tamaliki te pilivilesio ʼaia. ʼE feala ke palalau he ʼu tagata ʼāfea e lua ki te ʼu faʼahi fuli ʼaia mo te pule ʼo te famili pea mo vakaʼi peʼe kua feala ke liliu te tamasiʼi ko he fai faka mafola mole heʼeki papitema.—om ʼi te ʼu pasina 99 ki te 100.
10 ʼE ʼi ai koa he kau fai faka mafola ʼi tokotou kokelekasio ʼe mole kei nātou mōlaga he sakilifisio ʼo te fakavikiviki kia Sehova? (Hep. 13:15) E lagi ko ʼihi kua nātou tuku tanatou fai faka mafola ʼuhi ko he lotovaivai peʼe ko te ʼu tuʼania ʼo te maʼuli, logope tana haga pipiki ki te ʼu lekula ʼo te Tohi-Tapu ʼo ʼuhiga mo te aga ʼaē ʼe tonu ke fai. Ko he ʼaʼahi fakakaumeʼa ʼo he tahi ʼi te ʼu tagata ʼāfea ʼe feala pe ke uga ai nātou ke nātou toe liliu ʼo kau tuʼumaʼu mo te kokelekasio, pea ʼi tona lakaga kua fakatotonu, ʼo toe toʼo te gāue ʼi te minisitelio.
11 Ko Nātou Fuli ʼAē Kua Nātou Lavaʼi ʼe Feala Hanatou Kau Ki Te Gāue Fakafiafia ʼAia: ʼE koutou faigataʼaʼia koa, e koutou fānau peʼe ko koutou kau tūpulaga, te kau ʼaē ki te faka mafola ʼi te ʼu ʼapi? Kae feafeaʼi kia koutou ʼaē ʼe foʼofoʼou ʼi te faka mafola ʼe mole heʼeki koutou māhani? ʼE koutou fakatokagaʼi anai ko te gāue lolotoga te fakatuʼutuʼu makehe ʼaia ki te tufa ʼo te ʼu Logo ʼo Te Puleʼaga ko he lakaga fakafiafia! Ko te meʼa ʼe ʼaoga, ko te fai ʼo he palalau ʼe faigafua.
ʼE feala pe ke koutou fai he ʼu palalau ohage ko te ʼu palalau ʼaenī:
◼ “ ʼI te māhina ʼaenī ʼe mātou tufa he logo maʼuhiga ʼi te ʼu fenua e 232 ʼi te kele katoa. Ko te logo ʼe maʼuhiga, koteʼuhi ʼe ina foaki mai kia tatou he ʼu tupuʼaga mālohi ke tou tui ʼe ʼi ai te puleʼaki ki te ʼu fihifihia fuli ʼaē ʼe tou felāveʼi mo ia ia ʼaho nei. ʼE mātou loto ai ke mātou tuku atu hakotou pepa ʼa koutou totonu.”
Peʼe lagi feala ke koutou ʼahiʼahi te fai ʼo te palalau ʼaenī:
◼ “ ʼI te māhina ʼaenī, teitei pe ko te toko nima miliona kau faka mafola ʼe nātou foaki tonatou temi, ʼe nātou tufa te logo maʼuhiga ʼi te ʼu lea kehekehe. Neʼe teuteuʼi maʼa te hahaʼi ʼaē ʼe nātou fia sio ki te fakaʼosi ʼo te ʼu fihifihia ʼe tou felāveʼi mo ia ʼi te temi nei. Koʼeni te pepa maʼa koutou.”
E lagi koutou mata feʼauga anai te faʼahiga palalau faigafua ʼaenī:
◼ “ ʼE mātou fakaloto mālohiʼi te hahaʼi fuli ke nātou lau te logo maʼuhiga ʼaenī, pea koʼeni tona kupu tāfito [koutou lau te kupu tāfito ʼo te ʼu Logo ʼo Te Puleʼaga]. Koutou fakatokagaʼi te meʼa ʼaenī ʼe tala ʼi te pasina 2 ʼo ʼuhiga mo te ʼu fihifihia ʼaē ʼe tuputupu ʼo te . . . [koutou lau he palalau kua koutou fili ʼe toʼo mai te ʼu Logo ʼo Te Puleʼaga]. ʼE mātou ʼiloʼi papau ʼe koutou fia lau anai te koga ʼaē ʼo te logo ʼaenī ʼe tō tonu mo te temi ʼaenī. Koʼeni takotou pepa.”
12 Koutou tokakaga lelei ki te hahaʼi fuli ʼaē ʼe nātou tali te ʼu Logo ʼo Te Puleʼaga. Koutou palalau māmālie pea ke matala takotou ʼu palalau; ʼe mole he ʼuhiga ʼo te fakatevili ʼo takotou fai palalau. ʼE tou fia gāueʼi tatatou telituale katoa pea mo sio ki te hahaʼi fuli ʼaē ʼe nātou fia lau te ʼu Logo ʼo Te Puleʼaga, tatau aipe peʼe tonu ke tou tuku kia nātou takitokotahi ʼo he famili e tahi. Mokā ʼe mole ʼi ai he tahi ʼi te ʼapi, koutou tohi fakalelei ʼi takotou pepa ʼaē ʼe tohi ai te ʼu ʼapi ke feala ai hakotou toe liliu mai kiai ʼi he tahi lakaga ʼe lelei age moʼo tuku age he ʼu Logo ʼo Te Puleʼaga kia ia ʼo te ʼapi. ʼE feala ke fakaʼaogaʼi te ʼu Logo ʼo Te Puleʼaga ʼi te faka mafola ʼi te ala mokā tou fakatokagaʼi he tahi ʼe ina fia lau te pepa ʼaia. ʼE mole tonu anai ke hoko tufa te ʼu pepa ʼaia ohage he ʼu pepa fakaafe. Kae koutou fakaōvi ki te hahaʼi ʼaē ʼe fakalaka, pea koutou fakamahino te maʼuhiga ʼo te logo ʼaē ʼe fakahā ai. Koutou fakaʼaogaʼi te ʼu Logo ʼo Te Puleʼaga ʼi te fagonogono faigamālie, ohage la ko te lolotoga ʼo he folau peʼe koutou fagonogono ki ʼakotou ʼu kaugā gāue lolotoga te temi kai. Ko nātou ʼaē ʼe takokoto mahahaki peʼe mole nātou lava kau ki te gāue ʼaia ʼuhi ko te ʼu faʼahiga ʼaluʼaga, ʼe feala ke nātou tuku he ʼu pepa feiā ki te hahaʼi ʼe nātou ʼōmai ʼo ʼaʼahi nātou, te ʼu tōketā pea mo te ʼu afilimie, mo te kau fakatau koloā, pea mo ʼihi ʼe nātou ʼōmai ki tonatou ʼapi.
13 Ko ʼaʼahi e fia ʼe tou fai anai lolotoga te fakatuʼutuʼu makehe ʼaia ki te gāue faka mafola? ʼE mahino ia ʼe lahi anai, koteʼuhi ʼe tonu anai ke toe ʼaʼahi ia nātou fuli ʼaē neʼe nātou fakahā he fia lau ʼo te ʼu Logo ʼo Te Puleʼaga. ʼI te ʼuluaki ʼaʼahi, ʼe lelei ke fakahā age pe te ʼu Logo ʼo Te Puleʼaga. Pea, ka koutou toe liliu ʼo ʼaʼahi, koutou fai he ʼu fakamatala nounou ʼo ʼuhiga mo te ʼaoga lelei ʼo te ʼu Logo ʼo Te Puleʼaga. Koutou fakalogo lelei kia ia ʼaē ʼe palalau mo koutou mokā ina fakahā atu tana manatu ʼo ʼuhiga mo te meʼa ʼaē neʼe ina lau. Ko tana ʼu palalau ʼe tokoni anai kia koutou ke koutou ʼiloʼi te meʼa ʼaē ʼe fakahā age anai ʼi te ʼu nusipepa fakamuli pea lagi mo te faʼahiga teuteu ʼe tonu ke fai ki he tahi ʼu fai palalau. Kapau ʼe tali lelei te ʼu ʼaʼahi, koutou faigaʼi ke koutou kamata he ako faka Tohi-Tapu.—1 Ko. 3:6, 7.
14 “Ko Takotou Gāue ʼe Mole Vaʼiganoa”: ʼE ʼaoga anai koa te ʼu gāue fuli ʼaia? Neʼe fakaloto mālohiʼi fēnei e Paulo te kau Kolonito: “Ko takotou gāue ʼe mole vaʼiganoa ʼo ʼuhiga mo te ʼAliki.” (1 Ko. 15:58) Lolotoga te ʼu taʼu, ko ʼatatou ʼu faiga ʼo ʼuhiga mo te tufa ʼo te ʼu Logo ʼo Te Puleʼaga neʼe tapuakina lahi. Neʼe maʼu e te taumatuʼa neʼe nā hiki ki te koga fale kua lāvaki, te pepa ʼāfea ʼo te ʼu Logo ʼo Te Puleʼaga ʼi te puha toho. Neʼe ko te meʼa pe ʼaia e tahi neʼe kei toe ʼi te koga fale nofo. ʼI tanā ʼosi lau te pepa, neʼe nā faka felogoi mo te kokelekasio ʼo te koga meʼa pea neʼe nā fakaʼui he ako faka Tohi-Tapu. Neʼe nā kamata kau ki te ʼu fono fuli pea ki muli age neʼe nā fakahā tanā fia papitema. Lagi ʼe iku feiā pe anai te pepa ʼaē ka koutou tufa anai!—km 2/75 ʼi te pasina 1; vakaʼi mo te Réveillez-vous! ʼo te ʼaho 22 ʼo Fepualio 1977, ʼi te pasina 15.
15 ʼE ʼi ai tatatou gāue lahi. Ko tatatou fakatuʼutuʼu ke gāueʼi e te ʼu kokelekasio fuli tanatou ʼu telituale katoa ʼi muʼa ʼo te ʼaho 14 ʼo Maio peʼe ki muli age ʼi te fakaʼosi ʼo te māhina mo kapau ʼe ʼaoga anai he temi loaloaga moʼo tufa ʼo te ʼu Logo ʼo Te Puleʼaga. Neʼe fai te ʼu fakatuʼutuʼu ke maʼu e te kau pionie vaeluaʼi temi pea mo katoa te ʼu pepa e 250 takitahi ʼo te ʼu Logo ʼo Te Puleʼaga. ʼE feala pe ke maʼu e te tagata fai faka mafola e tahi tana ʼu pepa e 50. ʼE tali pe anai e te kau fai faka mafola pea mo te kau pionie te uta pe ʼaē ʼe ina lava tufa anai, kae ina toe liufaki te toe ʼo te ʼu pepa ke fakaʼaogaʼi e niʼihi. Ko te faifaitahi ʼi te faʼahi ʼaia ʼe ina faka fealagia anai he tufa lahi age ʼo te logo maʼuhiga ʼaia.
16 ʼE fakamaʼua anai he pipiki mālohi kia Sehova mokā tou ʼolo ʼo fakahoko tatatou gāue. (Kol. 3:23) ʼE nofo te maʼuli ʼa te hahaʼi ʼi te tuʼutāmaki. ʼE mole feala ia ke fakaʼaoʼaoganoa te hahaʼi ki te ʼuhiga ʼo te ʼu ʼaluʼaga ʼo te temi nei. ʼE haʼele ki muʼa te temi. ʼE tonu ke nātou sio fakahagatonu, ʼe mole maʼu e te tagata te puleʼaki ki te ʼu fihifihia ʼo te mālama ʼaenī. Kae ʼe maʼu ia e te ʼAtua te puleʼaki ʼaia. Ko nātou ʼaē ʼe nātou fia maʼu te tapuakina ʼa te ʼAtua ʼe mole tonu ke nātou fakatuatuai, kae ʼe tonu ke fai he tonu ʼe ʼalutahi mo te ʼu meʼa ʼaē ʼe ina fakamaʼua mai.
17 ʼI te fakaʼosi ʼo te fakatuʼutuʼu makehe ki te gāue faka mafola ʼi te ʼaho 14 ʼo Maio, ʼe tou fakamāmālie anai tatatou gāue faka mafola? Kailoa! ʼE tou haga nofo maʼumaʼua anai ʼo mulimuli ki te tokoni ʼa Paulo, ʼaē ʼe haʼu mai te ʼAtua.