“Te ʼu Taʼu Foʼou e Afe—Koteā ʼAē Ka Hoko Kia Koutou ʼi Te Ka Haʼu?”
1 ʼE fai te fehuʼi ʼaia e te hahaʼi ʼi te malamanei katoa. Logola te ʼu tuʼuga meʼa ʼaē neʼe fakahoko e te tagata lolotoga te ʼu sēkulō, kae ʼe mole kei maʼu e te hahaʼi he ʼamanaki, heʼe kei nātou tauʼi pe te ʼu fihifihia tāfito ʼaē neʼe hoko ki te malamanei katoa lolotoga ni ʼu taʼu e afe. (Sopo 14:1; Pes. 90:10) Kofea te faʼahi ʼaē ʼe feala ke maʼu ai e te malamanei he fīmālie?
2 Lolotoga te ʼu māhina ʼo ʼOketopeli pea mo Novepeli, ʼe tou maʼu anai he faigamālie makehe ke tou foaki ki te hahaʼi te tali ki te fehuʼi ʼaia. ʼO feafeaʼi? ʼAki te tufa ʼo te kiʼi pepa lotu Te ʼu Logo ʼo Te Puleʼaga N° 36. ʼE ko tona kupu tāfito ʼaenī: “Te ʼu Taʼu Foʼou e Afe—Koteā ʼAē Ka Hoko Kia Koutou ʼi Te Ka Haʼu?” Lolotoga te ʼu ʼuluaki vāhaʼa e lua ʼo ʼOketopeli, ʼe tou tufa anai te ʼu nusipepa Te Tule Leʼo pea mo te Réveillez-vous ! Pea ʼo kamata ʼi te Mōnite, ʼaho 16 ʼo ʼOketopeli ki te Feliaono, ʼaho 17 ʼo Novepeli, ʼe tou fakahoko anai te tufa lahi ʼo Te ʼu Logo ʼo Te Puleʼaga N° 36. Lolotoga te gāue ʼaia, ʼe tou tokakaga tāfito anai ʼo tuku ʼi te ʼaho fuli ʼo te vāhaʼa Te ʼu Logo ʼo Te Puleʼaga N° 36. ʼI te ʼu fakaʼosi vāhaʼa, ʼe tou tufa anai te kiʼi pepa lotu ʼaia mo te ʼu nusipepa.
3 ʼE Koutou Kau Lahi Anai Koa Kiai? Ko te ʼu tagata ʼāfea, mo te ʼu tēhina faifekau faka minisitelio, pea mo te kau pionie ʼe nātou tuku anai he faʼifaʼitaki ʼi te gāue ʼaia, he ko nātou ʼaē ʼe tonu ke nātou takimuʼa ʼi te gāue. Neʼe fai e te ʼu kaugā fai faka mafola e tokolahi te ʼu fetogi ke nātou pionie vaeluaʼi temi lolotoga te māhina katoa peʼe ko te ʼu māhina e lua ʼaē ʼe fai ai te tufa. Ko ʼihi neʼe nātou fakatuʼutuʼu ke lahi age ʼi te agamāhani te temi ʼaē ka nātou kau ai ki te minisitelio.
4 Ko te ʼu tēhina takitaki ʼo te ʼu ako tohi ʼe feala ke nātou fakaloto mālohiʼi ia nātou fuli ʼo tanatou ako tohi ke nātou kau lahi ki te tufa ʼo Te ʼu Logo ʼo Te Puleʼaga N° 36. ʼE lagi ʼi ai ʼihi kaugā fai faka mafola mole kei nātou kau ki te gāue fai faka mafola. ʼE tonu ke ʼaʼahi nātou e te kau tagata ʼāfea moʼo vakaʼi te meʼa ʼaē ʼe feala ke fai moʼo tokoni kia nātou. ʼE lagi feala ke fai he ʼu fakatuʼutuʼu mo he tēhina peʼe ko he tuagaʼane kua māhani ʼi te fai faka mafola ke kaugā gāue lolotoga te ʼu māhina ʼaia mo nātou takitahi ʼaē ʼe mole kei faka mafola. ʼI tanatou kau ʼaē ki te tufa ʼo te kiʼi pepa lotu Te ʼu Logo ʼo Te Puleʼaga N° 36, ʼe lagi feala ai hanatou toe kau ki te gāue.
5 Pea kia nātou ʼaē ʼe haʼele lelei tanatou ako ʼaki te tohi Te ʼAtamai Mālama pea kua feala hanatou liliu ko he ʼu kaugā fagona, ʼe ko he faigamālie anai kia nātou ke nātou kamata kau ʼi te minisitelio. ʼO feiā mo te kau tūpulaga, ʼe feala ke nātou kau lahi ki te gāue fakafiafia ʼaia.
6 ʼE mole ʼaoga he ʼu palalau faigataʼa. ʼE feala ke koutou ʼui fēnei:
◼ “ ʼE ʼau haʼu ʼi te ʼaho ʼaenī moʼo tufa ʼo te kiʼi pepa lotu maʼuhiga ʼaenī ki te ʼu famili fuli ʼo [koutou fakahā te higoa ʼo te kolo]. Koʼeni tau kiʼi pepa lotu, ʼe ʼau fia tuku atu ke ke lau.” ʼE lagi lelei ke mole koutou toʼo hakotou kato mokā koutou tufa Te ʼu Logo ʼo Te Puleʼaga N° 36.
7 Ke Fakatuʼutuʼu Lelei Te ʼu Fono Fai Faka Mafola: ʼE tonu ke vakaʼi e te kau tagata ʼāfea te faʼahi ʼaia, ke feala ke lelei pea mo ʼaoga te ʼu fakatuʼutuʼu ki te fai faka mafola. Ko te tēhina tāfito ʼaē ʼe taupau ki te gāue ʼe tonu ke tokaga ke ʼi ai he ʼu telituale, ke feala ai ki te kokelekasio ke nātou kau lahi ki te gāue. Kapau ʼe feala, pea ʼe tonu ke fakatuʼutuʼu he ʼu fono fai faka mafola ʼi te ʼaho fuli ʼo te vāhaʼa, mo te fakaʼosi vāhaʼa, pea mo te ʼu afiafi. ʼE feala ke fakatuʼutuʼu ke fai he ʼu fono ʼi te ʼu afiafi maʼa nātou ʼaē ʼe ako, mo nātou ʼaē ʼe gāue, pea mo ʼihi atu.
8 E Feafeaʼi Ki Te ʼu ʼApi ʼAē ʼe Lāvaki: ʼE tou fakatuʼutuʼu anai ke tou palalau mo he ʼu hahaʼi tokolahi. Kapau ʼe lāvaki te ʼapi, pea koutou tohi tona tuʼasila pea mo koutou toe liliu ki ai ʼi he tahi age hola. Kapau ʼi te vāhaʼa fakaʼosi ʼo te gāue neʼe mole koutou lava maʼu te hahaʼi ʼo te ʼapi, pea ʼe feala ke koutou tuku he kiʼi pepa lotu ʼo Te ʼu Logo ʼo Te Puleʼaga N° 36 ʼi he faʼahi ʼe mole tokagaʼi e nātou ʼaē ʼe fakalaka. ʼE feala ke fakatotonu e te kau tagata ʼāfea ke tuku ʼi te ʼu ʼapi ʼaē ʼe lāvaki he kiʼi pepa lotu ʼo Te ʼu Logo ʼo Te Puleʼaga N° 36 mokā ʼuluaki fai he telituale, heʼe lagi faigataʼa takita ʼalu ki te koga meʼa ʼaia peʼe lahi ʼaupito te ʼu telituale ʼaē ʼe tonu ke fai ʼi te ʼu māhina gāue ʼaia.
9 Ke Lahi Tatatou Gāue! ʼE tonu ke faigaʼi e te ʼu kokelekasio ke nātou gāueʼi katoa tanatou telituale ʼi muʼa ʼo te fakaʼosi ʼo te tufa ʼaia ʼi te ʼaho 17 ʼo Novepeli. Kapau ʼe lahi ʼaupito takotou telituale, pea ʼe feala ke gāue takitokotahi he ʼu kaugā fai faka mafola ʼi te ʼu faʼahi ʼaē ʼe faigafua takita ʼalu kiai pea mole feala ke hoko ai he tuʼutāmaki. ʼAki te fakatuʼutuʼu ʼaia, ʼe faigafua age anai te maʼu ʼo he ʼu hahaʼi tokolahi ʼe nātou tali anai te kiʼi pepa lotu ʼaia. Koutou tokaga ʼo taupau lelei te ʼu nota ʼaē neʼe koutou tohi fakalelei ai te hahaʼi ʼaē neʼe fia logo ki te moʼoni.
10 ʼE tonu ke ʼiloʼi fakatomuʼa e te ʼu tagata ʼāfea pe ko nusipepa e fia ʼaē ka ʼaoga anai ki te kokelekasio pea ʼe tonu anai ke fakaʼui ʼo mulimuli ki te faʼahi ʼaia. ʼE mole ʼaoga ke fakaʼui Te ʼu Logo ʼo Te Puleʼaga N° 36, koteʼuhi ʼe momoli te ʼu pepa lotu ʼaia ki te ʼu kokelekasio fuli. ʼE maʼu anai e te kau pionie makehe, mo te ʼu pionie katoa, pea mo te ʼu pionie vaeluaʼi temi te ʼu pepa e 80 takitahi ke nātou tufa, kae ko te ʼu kaugā fagona fuli ʼe nātou tufa anai te ʼu pepa e 30 peʼe 40 takitahi. ʼE momoli anai he tahi ʼu pepa lotu ki ʼihi kokelekasio ʼo mulimuli ki te lahi ʼo tanatou telituale. Kua koutou teuteu koa pea mo koutou holi ke lahi takotou kau ki te gāue makehe ʼaia? ʼE ko he pilivilesio maʼa tatou ke tou fakahā ki te hahaʼi te meʼa ʼaē neʼe fakapapau mai e te ʼAtua ki te ka haʼu ʼaē kua ōvi mai!