Ko He Fai Faka Mafola Makehe ʼe Kamata ʼi Te ʼAho 16 ʼo ʼOketopeli Ki Te ʼAho 12 ʼo Novepeli!
1 “Kua Vave Fakaʼauha Te ʼu Lotu Hala!” ʼE ko te kupu tāfito ʼaia ʼo Te ʼu Logo ʼo Te Puleʼaga N° 37, ʼaē kā tufa anai ʼi te mālamanei kātoa ʼo kamata atu ʼi te māhina ʼaē kā hoa mai. ʼI te ʼu ʼuluaki vāhaʼa e lua ʼo ʼOketopeli, ʼe tou tufa anai Te Tule Leʼo pea mo te Réveillez-vous ! ʼO kamata ʼi te Mōnite ʼaho 16 ʼo ʼOketopeli ki te ʼAhotapu ʼaho 12 ʼo Novepeli, ʼe tou kau anai ki te tufa ʼo Te ʼu Logo ʼo Te Puleʼaga N° 37. ʼI te ʼu fakaʼosi vāhaʼa ʼo te fai faka mafola makehe ʼaia, ʼe tou toe tufa fakatahi anai te kiʼi pepa lotu ʼaia pea mo te ʼu nusipepa.
2 Ko Ai ʼAē ʼe Feala Ke Kau Kiai: ʼE mahino ia, ko nātou ʼaē ʼe natou faʼafai ʼi te faka mafola ʼo te logo lelei, ʼe natou fia lagolago lelei anai kiai. ʼE feala anai ke pionie vaeluaʼi temi ʼihi. ʼE ʼi ai koa hakotou ʼu fānau peʼe ko he kau ako Tohi-Tapu ʼe natou tuputupu ʼi te faʼahi fakalaumālie? Kotou tokoni kiā nātou ke natou ʼolo ki te kau tagata ʼāfea moʼo vakaʼi peʼe feala ke natou liliu ko he ʼu kaugā fagona. ʼE tonu ke fakatuʼutuʼu e te kau tagata ʼāfea ke natou palalau mo te ʼu kaugā fagona ʼaē mole kei fai faka mafola, moʼo fakaloto mālohiʼi nātou ke natou kau ki te faka mafola makehe ʼaia, lagi feala ke natou kaugā gāue mo nātou ʼaē kua māhani ʼi te faka mafola.
3 ʼE momoli anai Te ʼu Logo ʼo Te Puleʼaga N° 37 ki te ʼu kokelekasio fuli, ke feala ke maʼu e te kau fai faka mafola pea mo te kau pionie he ʼu kiʼi pepa lotu ʼe lagi taki 50. Ko te ʼu hahaʼi ʼaē ʼe natou fia ʼiloʼi te moʼoni, kae mole heʼeki natou liliu ko he ʼu kaugā fagona, ʼe feala ke foaki age hanatou ʼu kiʼi pepa lotu e nima ke natou tufa ki tonatou famili pea mo tonatou ʼu kaumeʼa. ʼE feala ke tohi e te kau fai faka mafola fuli te lahi ʼo te ʼu kiʼi pepa lotu ʼaē neʼe natou tufa, pea mo natou tohi ʼi te tuʼa ʼo tanatou pepa tānaki gāue ʼi te fakaʼosi ʼo ʼOketopeli pea mo Novepeli. ʼE faka au anai e te tēhina taupau ki te gāue te ʼu kiʼi pepa lotu fuli ʼaē neʼe tufa e te kokelekasio, pea mo ina momoli ki te filiale ʼi te fakaʼosi ʼo te ʼu māhina takitahi ʼaia. Ko te ʼu kiʼi pepa lotu fuli ʼo Te ʼu Logo ʼo Te Puleʼaga ʼaē kā toe ʼi te ʼosi ʼo te fai faka mafola makehe ʼaia, ʼe feala anai ke fakaʼaogaʼi ʼi te minisitelio.
4 Te ʼu Palalau ʼAē ʼe Feala Ke Kotou Fai: Kapau ʼe nounou takotou ʼu palalau, pea ʼe feala anai ke lahi takotou tufa ia te kiʼi pepa lotu ʼaia. ʼE kotou lava ʼui fēnei: “ ʼE au kau ki te tufa ʼaē ʼe fai ʼi te mālamanei kātoa ʼo te logo maʼuhiga ʼaenī, moʼo tokoni ki te hahaʼi. Ko tau kiʼi pepa lotu ʼaenī pea ʼe au kole atu ke ke lau.” ʼE lagi lelei mo kapau ʼe mole kotou toʼo hakotou kato ʼi takotou fai faka mafola ʼi te ʼu api. Kotou tokaga ʼo tohi te hahaʼi fuli ʼaē neʼe fia logo.
5 Te Faʼahiga Fai ʼo Takotou Telituale: ʼE lelei age ke tou faiga lahi ke tou tufa Te ʼu Logo ʼo Te Puleʼaga ʼi te ʼu ʼapi pea mo te ʼu matani gāue, ʼi hona tufa ʼi te fagonogono faigamālie ʼi te ala. Kotou tohi te ʼu api ʼaē neʼe lāvaki pea kotou faiga ke kotou toe liliu kiai ʼi he tahi hola peʼe ʼi he tahi ʼaho ʼo te vahaʼa. ʼO kamata ʼi te Mōnite ʼaho 6 ʼo Novepeli, ʼe feala anai hakotou tuku he ʼu kiʼi pepa lotu ʼi te ʼu api ʼaē neʼe lāvaki. Kae kapau ʼe lahi te telituale ʼa te kokelekasio ʼi te temi ʼaē kā fai ai te tufa makehe, pea ʼe feala ke vakaʼi e te kau tagata ʼāfea ke tuku Te ʼu Logo ʼo Te Puleʼaga ʼi te ʼu api ʼaē ʼe lāvaki ʼi te kamata pe ʼo te fai mafola makehe ʼaia ʼo aʼu ki tona fakaʼosi.
6 Kua ōvi mai te fakaʼauha ʼo “Papiloni Lahi.” ʼE tonu ki te hahaʼi ke natou mavae mai ai ʼi muʼa ʼo tona fakaʼauha kātoa. (Apk. 14:8; 18:8) Kotou fakatuʼutuʼu ʼi te temi nei ke kotou lagolago lelei ki te fai faka mafola makehe ʼaia kā fai ʼi te mālamanei, ke ʼiloʼi e te hahaʼi fuli kua vave fakaʼauha te ʼu lotu hala!