Ke Lahi Tatatou Tufa Te ʼu Logo ʼo Te Puleʼaga N°35
1 ʼI ʼOketopeli pea mo Novepeli ʼe ko he ʼu māhina ʼaia ʼe tou maʼumaʼua fuli ai anai. Lolotoga te ʼu ʼuluaki ʼaho e 11 ʼo ʼOketopeli, ʼe tou tufa anai Te Tule Leʼo pea mo te Réveillez-vous! Pea ʼo kamata ʼi te ʼAhotapu, ʼaho 12 ʼo ʼOketopeli, ʼo aʼu ki te ʼAhotapu, ʼaho 16 ʼo Novepeli, ʼe tou kau anai ki te tufa ʼo Te ʼu Logo ʼo Te Puleʼaga N° 35 ʼi te malamanei katoa. ʼE tou maʼu anai te pilivilesio ʼaē ko te fakahā ʼo te logo maʼuhiga ʼaia ki te hahaʼi fuli ʼo totatou kolo. Ko te logo ʼaia ʼe ina tali ki te fehuʼi ʼaenī, “ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?” Lolotoga te tufa makehe ʼaia, ʼe tou tufa anai Te ʼu Logo ʼo Te Puleʼaga N° 35 ʼi te lolotoga vāhaʼa. ʼI te fakaʼosi vāhaʼa, ʼe tou fakahā Te ʼu Logo ʼo Te Puleʼaga, pea mo te ʼu nusipepa foʼou.
2 Ko Ai Koa ʼAē ʼe Feala Ke Kau Kiai? Ohage pe ko te agamāhani, ko te ʼu tagata ʼāfea ʼe nātou takitaki anai te gāue fai faka mafola. Ko tatou fuli ʼe tou leleiʼia anai te tufa ʼo Te ʼu Logo ʼo Te Puleʼaga, pea ʼe mahino papau ia ʼe lahi anai te ʼu kaugā fai faka mafola ʼe pionie vaeluaʼi temi ʼi he māhina e tahi peʼe lua ʼaē ʼe fai ai te tufa makehe ʼaia. Ko ʼihi ʼu kaugā fai faka mafola ʼe nātou loto anai ke lahi age te temi ʼaē ʼe nātou fakaʼaogaʼi ʼi te minisitelio.
3 ʼE ʼi ai koa he tahi ʼe ako Tohi-Tapu mo koutou ʼe haʼele ki muʼa tana ako ʼi te tohi Te ʼAtamai Mālama pea kua vave pe tana maʼu te fealagia ʼaē ko te kau ki te gāue ʼaia? ʼAki te temi, lagi ʼe feala ke liliu ko he kaugā fai faka mafola ʼo feala ai tana kau ki te tufa ʼo Te ʼu Logo ʼo Te Puleʼaga. ʼE tonu ke fai he palalau ʼe faigafua moʼo fakahā ʼo te pepa lotu. Ohage la, ʼe feala ke ʼui fēnei e he tahi: “Ko te logo ʼaenī ʼe maʼuhiga ʼaupito koia ʼe tufa ai ʼi te malamanei katoa ʼi te māhina ʼaenī ʼi te ʼu lea e 169. ʼE ʼau fia tuku atu hau pepa lotu.” ʼO feiā aipe mo takotou tamaliki ʼe feala tanatou kau ki te gāue fakafiafia ʼaia.
4 Ko te ʼu tēhina ʼaē ʼe nātou takitaki te ʼu ako tohi, ʼe tonu ke nātou fakaloto mālohiʼi te ʼu kaugā fai faka mafola ke nātou kau ki te tufa ʼo Te ʼu Logo ʼo Te Puleʼaga N° 35. ʼE lagi toe ʼi ai foki mo te ʼu kaugā fai faka mafola ʼaē ʼe mole kei fai faka mafola, kae ʼe feala ke nātou toe kau ki te gāue mo kapau ʼe fakaloto mālohiʼi nātou. ʼI muʼa ʼo te tufa ʼo Te ʼu Logo ʼo Te Puleʼaga N° 35, ʼe tonu ke ʼaʼahi e te ʼu tagata ʼāfea ia nātou ʼaia ke feala ai hanatou vakaʼi te meʼa ʼaē ʼe feala ke fai, ke nātou kaugā gāue mo he ʼu kaugā fai faka mafola faiva ʼi te minisitelio.
5 Ko Te Temi Fea ʼAē ʼe Tou Fakatahitahi Ai Ki Te Fai Faka Mafola? Ko te gāue katoa ʼaia ʼe fakamaʼua anai he ʼu fakatuʼutuʼu lelei pea mo ʼaoga ʼo ʼuhiga mo te fai faka mafola. Mo kapau ʼe feala, ʼe tonu ke fakatuʼutuʼu te fono ki te gāue fai faka mafola ʼi te vāhaʼa fuli, ʼi te ʼu fakaʼosi vāhaʼa, pea mo te ʼu afiafi. ʼE tonu ke fai te ʼu fono ʼaia ʼi te ʼu temi ʼaē ʼe faka fealagia ai ki te ʼu kaugā fai faka mafola pea mo te ʼu pionie ke nātou kau katoa ai ki te gāue. ʼE feala foki ke fai te ʼu fakatuʼutuʼu ʼi te ʼu hili hoʼatā ke fua lelei ki te tamaliki ako, kia nātou ʼaē ʼe gāue, pea mo ʼihi age. ʼE tonu ke tokaga te tagata taupau ki te gāue ke lahi te ʼu ʼapi pea mo he ʼu telituale ke feala ai te kau ʼa te ʼu kaugā faka mafola fuli ki te gāue. ʼI te potu ʼaē ʼe lahi ai te ʼu kaugā fai faka mafola, ʼe tonu anai ke tokaga ki te lahi ʼo nātou ʼaē ka gāue ʼi te telituale ʼaē ʼe foaki age, ke mole tokagaʼi fau nātou e te hahaʼi.
6 ʼE Feafeaʼi Anai Te ʼu ʼApi ʼAē ʼe Lāvaki? ʼE tou fia palalau mo te hahaʼi fuli ʼo fakamahino kia nātou pe koʼe ʼe tonu ke nātou lau Te ʼu Logo ʼo Te Puleʼaga N° 35. Kapau ʼe mole he tahi ʼi te ʼapi ʼaē ʼe koutou fisifisi, koutou tohi tona tuʼasila pea koutou toe ʼaʼahi ia ia ʼi he tahi lakaga ʼo te ʼaho ʼaia. Kapau ʼi te vāhaʼa fakaʼosi ʼo te tufa ʼaia ʼe mole he fua ʼo takotou ʼu faiga, ʼe feala ke koutou tuku Te ʼu Logo ʼo Te Puleʼaga ʼi te matapā, ʼi he potu ʼe mole hā ki te hahaʼi ʼaē ʼe feʼoloʼaki. ʼI te ʼu kolo ʼaē ʼe nofoʼi, koutou tufa Te ʼu Logo ʼo Te Puleʼaga ki te ʼu hahaʼi ʼaē ʼe haʼele ʼi te ala. Kapau ʼe tou faka mafola ʼi te vao, pea kapau ʼe mole feala hatatou fai liuliuga tatatou telituale lolotoga te fai faka mafola ʼaia, pea ʼe feala anai ke tou tuku Te ʼu Logo ʼo Te Puleʼaga ʼi te ʼu ʼapi ʼaē ʼe lāvaki.
7 Koteā Koa Tatatou Fakatuʼutuʼu? ʼE tonu ke faiga te ʼu kokelekasio ke nātou fakaʼaoga Te ʼu Logo ʼo Te Puleʼaga ʼo tufa ki te hahaʼi fuli ʼi tonatou telituale ia muʼa ʼo te fakaʼosi ʼo te tufa ʼaia ʼi te ʼaho 16 ʼo Novepeli. Kapau ʼe lahi te telituale ʼo tokotou kokelekasio ʼaē neʼe foaki atu pea kapau ʼe feala hakotou gāue tokotahi ʼi te telituale ʼaia, ʼe feala ke koutou tokagaʼi ʼe ʼaoga ke koutou fai te faʼahi ʼaia. Ko te faʼahi ʼaia ʼe faka fealagia ai kia koutou ke koutou fakahā te logo lelei ki te hahaʼi fuli. (Mateo 10:11) ʼE lelei takotou toʼo te ʼu pepa lotu ʼi tokotou nima pea mo koutou ʼai te Tohi-Tapu ki tokotou tagaʼi kofu, ʼi hakotou fakaʼaogaʼi ʼo he kato. Koutou tokakaga ʼo tohi fakalelei te ʼu higoa ʼo nātou fuli ʼaē neʼe nātou fakahā atu tanatou fia logo ki te moʼoni.
8 Kua Koutou Teuteu Koa Ke Koutou Kamata Ia Te Gāue? ʼE tonu ke ʼiloʼi fakatomuʼa e te ʼu tagata ʼāfea pe ko nusipepa ʼe fia ʼe ʼaoga anai ki te kokelekasio pea ʼe tonu anai ke fakaʼui ʼo mulimuli ki te faʼahi ʼaia. ʼE mole ʼaoga ke fakaʼui Te ʼu Logo ʼo Te Puleʼaga N° 35, koteʼuhi ʼe fakamomoli te ʼu pepa lotu ʼaia ki te ʼu kokelekasio fuli. Ko te ʼu pionie makehe, mo te ʼu pionie katoa, pea mo te ʼu pionie vaeluaʼi temi ʼe nātou tufa anai te ʼu pepa e 250 takitokotahi, kae ko te ʼu kaugā faka mafola fuli ʼe nātou tufa anai te ʼu pepa lotu e 50 takitokotahi. Kua hinoʼi mai kia tatou te gāue ke tou fai. ʼE koutou holi koa ke koutou kau ki te fai ʼo te gāue taulekaleka ʼaia? ʼE mahino ia. Ke lahi ʼaupito tatatou faka maʼuhigaʼi te logo maʼuhiga ʼaē ʼe fakatafito ki te Tohi-Tapu ʼaē ʼe tuʼu ʼi Te ʼu Logo ʼo Te Puleʼaga N° 35!