Kua Avahi Mai Te Matapā Lahi Ki Te Gāue
1 ʼI tona ʼuhiga kaugā fai faka mafola faiva ʼo te logo lelei, neʼe faiga ia Paulo ke ina maʼu te ʼu telituale ʼaē ʼe lahi ai te gāue ke fai, pea ʼi te ʼu telituale ʼaia neʼe kau ai te kolo ko Efesi. ʼI te fua lelei ʼo tana fai faka mafola ʼi ai neʼe ina tohi fēnei ki tona ʼu kaugā gāue Kilisitiano: “Kua avahi mai kia ʼau te matapā lahi ki te gāue.” (1 Ko. 16:9) Neʼe hoko atu te gāue ʼa Paulo ʼi te telituale ʼaia pea neʼe tokoni ki te tokolahi ʼo te kau Efesi ke nātou liliu ko te kau Kilisitiano.—Gāue 19:1-20, 26.
2 Ia ʼaho nei, ko he matapā lahi ki te gāue kua avahi mai kia tatou. ʼE fakaafe tatou ke tou tokoni ki te hahaʼi ʼi te ʼu potu ʼaē ʼe mole ʼi ai he ʼu kaugā fai faka mafola, peʼe tokosiʼi ai te ʼu kaugā fai faka mafola. Koia ko tatatou ʼu faiga ʼe feala ke ʼaoga ki te ʼu koga meʼa ʼaē ʼe ʼaoga ki ai.—Vakaʼi ia 2 Kolonito 8:13-15.
3 ʼE Feala Koa Hakotou Gāue ʼi Te Telituale ʼAē ʼe Lahi Ai Te Gāue? Kapau ʼe koutou nonofo ʼi Niu-Kaletonia, kua koutou fakakaukauʼi koa ʼi te faikole peʼe feala takotou ʼolo ʼo fai faka mafola ki te hahaʼi ʼaē ʼe nonofo ʼi te ʼu potu mamaʼo, ʼaē ʼe mole ʼaʼahi tuʼumaʼu e te ʼu kaugā fai faka mafola ʼaē ʼe palalau fakaʼuvea? ʼE lahi te ʼu kaugā fai faka mafola neʼe nātou fiafia ʼi tanatou fai te faʼahi ʼaia ʼi te ʼu taʼu kua hili. ʼE feala koa ke koutou fakaʼaogaʼi takotou motokā moʼo fakahoko ʼo te faʼahi ʼaia? ʼE mahino ia, ʼe tonu ke ʼiloʼi e te ʼu tagata ʼāfea ʼo te kokelekasio te meʼa ʼe koutou loto kiai, ke feala hanatou fakatuʼutuʼu te gāue ʼaia. ʼE feala ke nātou faka felogoi mo te ʼu tagata ʼāfea ʼo te ʼu kokelekasio ʼo te vao pea mo hinoʼi he tēhina ke ina takitaki te kūtuga ʼaia. Kapau ʼe koutou nonofo ʼi Uvea peʼe ko Futuna, ʼe feala ke koutou fakatuʼutuʼu ke koutou fakalahi tokotou telituale ʼo koutou ʼaʼahi he tahi ʼe felāveʼi mo koutou, tatau aipe peʼe mole ko hokotou kāiga. ʼOsi ʼaia ʼaua naʼa koutou mataku ʼi te fakahā age ʼo te logo lelei, heʼe koutou ʼiloʼi ʼe lagolago tuʼumaʼu anai ia Sehova kia koutou.—Pes. 128:6.
4 ʼI te ʼu taʼu e hogofulu ʼaenī kua ʼosi, ko te ʼu famili Kilisitiano ʼe lauʼi afe neʼe nātou ʼolo ki te ʼu potu ʼe lahi ai te gāue ʼaē ʼe tonu ke fai. Ko te taumatuʼa neʼe nā fai te meʼa ʼaia neʼe nā ʼui fēnei: “Neʼe ma fia tauhi kia Sehova ʼi te ʼu potu ʼaē neʼe feala ke ma tokoni ai ki te hahaʼi.” ʼO toe feiā aipe, ko ʼihi ʼu kaugā fai faka mafola ʼe feala ke nātou fakatuʼutuʼu ke nātou mavae ʼi Niumea ʼo nātou ʼolo ʼo nonofo ʼi Uvea peʼe ko Futuna, pea ʼe feala ke nātou maʼu ai he ʼu fua lelei ʼi te tonu ʼaia neʼe nātou fai. Kae ko te mavae ʼi he kokelekasio ʼe mālohi ʼi te faʼahi fakalaumālie ʼe ko he puleʼaki maʼuhiga ʼe tonu ke fakakaukauʼi ʼi te faikole, kae ʼe toe maʼua foki ke toe “faka felogoi” ki te ʼu tagata ʼāfea. (Taag. 15:22) ʼI te temi muʼa, ko te ʼu kaugā fai faka mafola ʼaē neʼe ʼolo ki te tahi ʼu motu ʼo ʼave te logo lelei ki tonatou ʼu kāiga, neʼe nātou felāveʼi mo he ʼu fihifihia koteʼuhi he neʼe mole nātou ‘fakafuafua peʼe nātou lavaʼi anai peʼe kailoa.’ (Luka 14:28) Koia, kapau ʼe koutou fia fai te faʼahi ʼaia pea kapau ʼe feala hakotou fakahoko, ʼuluaki, koutou palalau mo te ʼu tagata ʼāfea ʼo tokotou kokelekasio ʼo ʼuhiga mo takotou ʼu fakatuʼutuʼu.
5 Kapau ʼe koutou fia fakalavelave ki te Sosiete pe ko te koga meʼa fea ʼaē ʼe lahi ai te gāue, koutou foaki ki te Komite Gāue ʼo te kokelekasio he tohi ʼe tuʼu ai te meʼa ʼaē ʼe koutou holi kiai. ʼE nātou fakapipiki fakatahi anai ki takotou pepa tanatou ʼu manatu pea ʼe nātou fakamomoli anai ki te Sosiete. Kae ʼe tou ʼiloʼi, kua avahi mai te matapā lahi ki te gāue, pea ʼofa pe ke hoko atu tatatou maʼumaʼua fuli ʼi te gāue ʼa Sehova.—1 Ko. 15:58.