Te Tohi Mai Te Kolesi Pule

Naʼi tēhina mo tuagaʼane:

ʼE KO he meʼa fakafiafia ʼaupito hamatou faitohi atu. ʼE mātou fakafetaʼi atu ki tokotou ʼofa pea mo tokotou maʼuli faka sakilifisio. ʼI te ʼu pasina ʼo te Annuaire ʼo te taʼu ʼaenī, ʼe koutou sio anai ki te lahi ʼo te ʼu gāue lelei neʼe fai lolotoga te taʼu gāue ʼaenī kua ʼosi. Neʼe toe fakalaka te ʼu lauʼi miliale hola ʼaē neʼe fakaʼaogaʼi ki te fai faka mafola pea mo te akoʼi ʼo te hahaʼi, moʼo fakaloto mālohiʼi ke nātou fakaōvi kia Sehova. ʼE ko he pilivilesio lahi hatatou kaugā gāue mo totatou ʼAtua faka kolōlia pea mo Tāmai ʼe ʼi selo.​—1 Ko. 3:9.

Ka mātou fakasiosio ki te gāue ʼaē ka fakahoko ʼi te ka haʼu, pea ʼe mātou falala ʼe koutou hoko atu pe anai takotou faʼifaʼitakiʼi te faʼafai pea mo te tui ʼa te ʼu kaugana ʼa te ʼAtua, ohage ko tona fakamatala ʼi te Tohi-Tapu. Ohage la ko te ʼapositolo ko Paulo, neʼe ina loto ke lelei tana fakahaʼele ki muʼa ia te ʼu gāue ʼo te Puleʼaga. ʼE mahino ia, neʼe ina fai tana ʼuluaki tohi ki te kokelekasio faka Kilisitiano ʼi Kolonito lolotoga tona taʼu fakaʼosi ʼi Efeso. ʼO ʼuhiga mo tana ʼu gāue ʼaē neʼe tonu ke ina fai, neʼe ina tohi fēnei: “ ʼE ʼau nofo ʼi Efeso ʼo aʼu ki te ʼaho lahi ʼo te Penikosite; koteʼuhi kua avahi mai kia ʼau te matapā lahi ki te gāue, kae ʼe tokolahi te kau fakafeagai.”​—1 Ko. 16:​8, 9, MN.

Neʼe fakatuʼutuʼu e Paulo ke ʼalu ki Masetonia pea mo Kolonito. Kae neʼe ina fakatokagaʼi, ʼe maʼu tana faigamālie ke ina fai he gāue maʼuhiga mo kapau ʼe nofo ʼi he temi ʼi Efeso. Neʼe mulimuli Paulo ki te ʼaluʼaga ʼaia, pea neʼe ina fetogi tana ʼu fakatuʼutuʼu, he neʼe sio ki te ʼaluʼaga lelei ke ina fakatuputupu te ʼu gāue ʼo te Puleʼaga ʼi te fenua ʼaē neʼe nofo ai. Neʼe avahi age kia ia te matapā lahi ki te gāue, pea neʼe loto ʼaupito e Paulo ke ina fakaʼaogaʼi te fealagia ʼaia.

Neʼe ko he toe gāue ʼaia, he neʼe tonu ke ina faka mafola te logo lelei pea mo lagalaga te kokelekasio ʼi Efeso. Ki te ʼu tagata ʼāfea ʼo te kokelekasio ʼo te kolo ʼaia, neʼe ʼui fēnei e Paulo ki muli age: “Neʼe mole ʼau tātāʼofi ʼi te fakahā atu kia koutou te ʼu meʼa fuli ʼaē neʼe ʼaoga, peʼe ko he ako ʼo koutou ʼi muʼa ʼo te hahaʼi peʼe ʼi te ʼu ʼapi. Neʼe ʼau fagonogono ʼaki toku loto katoa ʼi muʼa ʼo te kau Sutea pea mo te kau Keleka ʼo ʼuhiga mo te fakahemala ki te ʼAtua pea mo te tui ki totatou ʼAliki ko Sesu.”​—Gaue 20:20, 21, MN.

ʼO toe feiā pe, ko te tokolahi ʼo totatou ʼu tēhina mo tuagaʼane neʼe nātou fakaʼaogaʼi te ʼu faigamālie ʼaē neʼe tuku age kia nātou. Lolotoga te taʼu gāue ʼaenī kua hili, neʼe fakafuafua ko te toko 798 938 neʼe nātou fai he ʼu fakatuʼutuʼu ke feala hanatou pionie. Ko ʼihi ia koutou neʼe koutou folau ki te ʼu potu taupotu ʼo te kele ke koutou gāue misionea ai. ʼAki he loto faʼafai, ʼe koutou faka mafola te logo lelei pea mo laga he ʼu kokelekasio. Ko ʼihi ia koutou neʼe koutou ako he tahi lea ke feala hakotou tokoni ki te hahaʼi matāpule ʼo tokotou fenua. Ko ʼihi neʼe nātou fai hanatou ʼu fakatuʼutuʼu ke nātou gāue ʼi te ʼu telituale ʼaē ʼe heʼeki gāueʼi, peʼe nātou ʼolo ʼo gāue ʼi te ʼu fenua ʼaē ʼe lahi ai te gāue. Ko ʼihi ʼe nātou fakaʼaogaʼi te fealagia ke nātou fakalahi tanatou gāue ʼi te faleako, ʼi te fale gāue, peʼe ʼi te tahi ʼu ʼaluʼaga ʼe feala ke fai ai he fagonogono lelei, ohage la ko te telefoni. ʼE lahi te ʼu faʼifaʼitaki mai te malamanei katoa ʼe nātou fakamoʼoni ai ko te hahaʼi ʼa te ʼAtua, tūpulaga pea mo matutuʼa, ʼe nātou kumi fakamalotoloto pea mo nātou maʼu te ʼu faigamālie moʼo fakahā te moʼoni ki te hahaʼi ʼi te potu fuli pe.

Koutou tui papau ko Sehova ʼe sio ifo pea ʼe fiafia ʼaupito ʼi takotou ʼu faiga. ʼE ʼui fēnei e te Tohi-Tapu: “ ʼE mole heʼe faitotonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.” (Hep. 6:​10, MN ) Koutou fakasiosio lelei te ʼu temi faigamālie ʼaē ʼe feala ai ke koutou fakahaʼele ki muʼa te tauhi maʼa. Ko ʼihi ia koutou ʼe lagi feala ke koutou fakalahi takotou minisitelio. Ko tatou fuli ʼe feala ke tou faiga ʼo toe hikihiki age totatou minisitelio.

ʼE ʼi ai te ʼu fakafeagai ʼe fai mai ki tatatou gāue fai faka mafola. Koutou manatuʼi ko Paulo ʼi tana ʼosi talanoa ʼo ʼuhiga mo te matapā lahi ʼaē neʼe avahi age ki te gāue, neʼe ina tohi fēnei: “ ʼE tokolahi te kau fakafeagai.” Maʼa Paulo, ko te kau fakafeagai ʼaia neʼe ko te kau Sutea mo te kau Senitile, ko ʼihi neʼe nātou tauʼi fakahagatonu ia ia pea ko ʼihi neʼe nātou fonofono fakafūfū moʼo fakafeagai kia ia.​—Gaue 19:24-​28; 20:18, 19.

Ia ʼaho nei, ʼe hoko kia tatou te taʼi ʼaluʼaga ʼaia. ʼI tatatou fakaōvi ki te fakaʼauha ʼo te tuʼu agakovi ʼaenī, ʼe toe ʼāsili anai te ʼu fakafeagai. Ko Satana ʼe fonu ʼi te “ ʼita lahi,” pea ko tana ʼita ʼaia ʼe ina fakatō tāfito ki te hahaʼi ʼaē ʼe nātou tauhi ki te ʼAtua. (Apk. 12:12, MN ) ʼAua naʼa galo kia tatou ko Satana “te pule ʼo te malamanei.” Neʼe tala fēnei e Sesu ki tana kau tisipulo: “Kanapaula neʼe koutou ʼi te malamanei, kanaʼauala ʼe ʼofa te malamanei ki te meʼa ʼaē ʼaʼana. Kae mai tona ʼuhiga ʼaē ʼe mole koutou kau ʼi te malamanei, ka neʼe ʼau filifili koutou mai te lotolotoiga ʼo te malamanei, ko te tupuʼaga la ʼaia ʼo te fehiʼa ʼa te malamanei kia koutou.”​—Soa. 14:30; 15:19, MN.

Kua tou fakatotonu mālohi ke mole tou tuku he tahi ke ina fakavaivai tatatou tui ki te ʼAtua, peʼe ina fakasiʼisiʼi tatatou gāue faka mafola. ʼE tou ʼiloʼi ʼe ʼi ai tuʼumaʼu anai he ʼu hahaʼi ʼe nātou tauʼi tatou pea mo fakafeagai mai kia tatou. Kae ʼe tou haga hoko atu tatatou faka mafola ia te logo lelei ʼo te Puleʼaga, ʼo tou falala ko Sesu, ʼi te temi ʼaē ka fakatotonu anai e Sehova, ʼe ina moloki anai ia Satana pea mo nātou ʼaē ʼe lagolago ki ai. Ko te kau fakafeagai neʼe mole nātou lava tāʼofi te ʼapositolo ko Paulo; pea ʼe toe feiā pe ʼo ʼuhiga mo te ʼu kaugana ʼa Sehova ia ʼaho nei. Logola te ʼita ʼa Satana pea mo te fehiʼa ʼa te malamanei, kae ko te laumālie ʼa Sehova ʼe gāue mālohi ʼi Tana hahaʼi. ʼE ko he meʼa fakafiafia hatatou ʼiloʼi te tuputupu foʼou ʼo te hahaʼi ʼaē ʼe nātou tala te logo lelei, ko te toko 6 304 645!

ʼE mātou hūfakiʼi koutou ke haga hoko atu takotou fakaʼaogaʼi ia te ʼu temi faigamālie moʼo fakatuputupu te ʼu gāue ʼo te Puleʼaga fakatalakitupua ʼa Sehova. Koutou tui papau ʼe mātou ʼofa mamahi kia koutou takitokotahi, pea ʼe mātou gāue “fakatahi” mo koutou ʼi te gāue ʼa te ʼAtua Māʼoluga, ia Sehova.​—Sofo. 3:9.

Tokotou ʼu tēhina,

Te Kolesi Pule ʼa Te Kau Fakamoʼoni ʼa Sehova