Tou Fakaʼamu Lahi Ke Tou Faka Mafola Te Logo Lelei
1 “E au fakaʼamu lahi ke au sio kia koutou . . . E au loto mafana ai ke au fagonogono te Evaselio kia koutou.” Ko te ʼu ʼuluaki palalau ʼaia ʼa te ʼapositolo ko Paulo ʼi tana tohi ki te ʼu tēhina ʼo Loma. He koʼe neʼe fakaʼamu lahi e Paulo ke sio kia nātou? Neʼe ina ʼui fēnei: “Ke au mau ni fua ia koutou . . . Koteuhi e mole au ufiufi i te Evaselio, he ko te Mafimafi o te Atua ki te fakamauli o te hahai tui fuape.”—Loma 1:11-16.
2 Neʼe toe fakahā e Paulo te fakaʼamu lahi ʼaia ʼi tana palalau ʼaē ki te ʼu tagata ʼāfea ʼo Efeso. Neʼe ina fakamanatuʼi age kia nātou: “Talu mai te uluaki aho nee tuu kelekele ai oku vae i Asia . . . , nee mole au fakakaka i te . . . akonaki fakahaha ia kia koutou, pea nee au fai feia i outou api. Nee au fakamooni ki te kau Sutea o feiape mo te kau Keleka.” (Gaue 20:18-21) ʼI tona telituale katoa ʼaia, neʼe tokaga Paulo ʼo faka mafola te logo lelei ʼo te fakamaʼuli pea neʼe ina maʼu ai he ʼu fua ʼo te Puleʼaga. ʼE ko he faʼifaʼitaki lelei ke tou muliʼi!
3 ʼE feala ke tou fai te ʼu fehuʼi ʼaenī: ‘ ʼE ʼau fakaʼamu lahi koa ke ʼau tala te logo lelei ki te hahaʼi ʼo toku telituale? ʼE ʼau fakaʼamu lahi koa ke ʼau vaevae te logo lelei ki te hahaʼi fuli pe, kae mole ʼau faka ʼuhiga te gāue ʼaia ohage pe ko he fakamaʼua? Neʼe ʼau fakakaukauʼi koa ʼi te faikole toku ʼaluʼaga ʼi te temi ʼaenī? Neʼe kua ʼau ʼahiʼahiʼi koa te ʼu faʼahiga faka mafola ʼaē ʼe feala ke ʼau fai ʼi te telituale, ohage ko te faka mafola ʼi te ʼu ʼapi, mo te ʼu fale koloā, ʼaki te telefoni, pea mo te fagonogono faigamālie?’
4 Tou Fakaʼamu Ke Lahi Tatatou Fai Faka Mafola ʼi ʼApelili: ʼE lelei te māhina ʼo ʼApelili ke tou kau lahi ai ki te gāue fai faka mafola. ʼAki te kua hifo ʼo te ʼu hola ʼaē ʼe fakamaʼua ki te kau pionie vaeluaʼi temi, ʼe lahi anai ia nātou ʼaē ka pionie. Ko tokotou ʼaluʼaga, ʼe lagi ina faka fealagia anai kia koutou ke koutou toʼo te selevisi pionie vaeluaʼi temi ʼi te ʼu māhina ʼo ʼApelili pea mo Maio. Peʼe lagi feala ke koutou liliu ʼo pionie katoa ʼuhi ko te fetogi ʼo te ʼu hola ʼaē ʼe fakamaʼua ki te selevisi ʼaia. Kapau ko koutou ko he kaugā fai faka mafola, ʼe feala koa ʼi te māhina ʼaenī pea mo te māhina ka haʼu, ke lahi age takotou ʼu hola fai faka mafola ʼi te ʼu hola māhani ʼaē ʼe koutou fai, ʼo koutou lagolago kia nātou ʼaē ʼe pionie? ʼE fiafia ai anai te loto ʼo Sehova!
5 Ohage ko Paulo, ʼe tonu ke haga fakahā e te ʼu kaugā fai faka mafola ʼo te Puleʼaga he fakaʼamu lahi, ʼo nātou fakatuputupu tanatou kau ki te gāue fai faka mafola. ʼE tou fiafia moʼoni anai ʼi tatatou fai ia meʼa fuli ʼaē ʼe feala ke tou fai ʼi te minisitelio. Neʼe ko te fiafia ʼaia ʼaē neʼe maʼu e Paulo ʼi tana tauhi taputapu. ʼE tau mo feʼauga ke tou muliʼi te faʼifaʼitaki lelei ʼaia.—Loma 11:13; 1 Ko. 4:16.