Koteā ʼAē ʼe Feala Ke Tou Fai Ke Lelei ʼAupito Te Māhina ʼo ʼApelili 2000?
1 Ko te Feliafā afiafi ʼo te ʼaho 19 ʼo ʼApelili, ʼe maʼuhiga anai te ʼaho ʼaia ʼi tatatou taʼu gāue. ʼI te ʼaho ʼaia, ʼi te tō māmālie ʼo te laʼā ʼi te kele katoa, ko te ʼu kokelekasio fuli pea mo te ʼu kiʼi kūtuga fuli ʼa te kau Fakamoʼoni ʼa Sehova ʼi te malamanei katoa, ʼe nātou fai anai te Fakamanatu ʼo te mate ʼo Kilisito. Tatau aipe pe kofea te fenua ʼaē ʼe tou nonofo ai, kae ko te fakamanatuʼi ʼo te sakilifisio ʼo Sesu Kilisito ʼe ko te meʼa ʼaē ka maʼuhiga tāfito anai ʼi te taʼu ʼaenī. ʼE tohi fakalelei te ʼaho ʼo te Fakamanatu ʼi te māhina ʼo ʼApelili ʼi te Kaletalio ʼo te kau Fakamoʼoni ʼa Sehova ʼo te taʼu 2000.
2 ʼI ʼApelili, ʼe tou maʼu anai te faigamālie ʼaē ke tou fakahā ʼaki totatou loto katoa, tatatou loto fakafetaʼi ki te ʼofa makehe ʼo Sehova ʼaē neʼe ina fakahā ʼaki te sakilifisio ʼo tona ʼAlo. ʼE tou fakahā feafeaʼi anai? Neʼe tohi fēnei e te ʼapositolo ko Paulo: “E pulei matou e te ofa o Kilisito, i te manatu aeni, nee puluhia te tokotahi o uhiga mo te tagata fuape, he nee kua mate te tagata fuli. Nee puluhia ia o uhiga mo te tagata fuape koteuhi ke aua naa mauli te hahai mauli kia natou’pe, kae kia ia ae nee puluhia pea nee tuuake o uhiga mo natou.” (2 Ko. 5:14, 15) Ei, lolotoga te māhina ʼo ʼApelili, ʼe feala ke tou fakahā ʼe mole tou maʼuʼuli maʼa tatou, kae maʼa ia ʼaē neʼe mate maʼa tatou, ʼo tou fai ke lelei ʼaupito te māhina ʼaia ʼi totatou ʼuhiga kau minisi ʼo te Puleʼaga!
3 Koutou Tohi Ke Koutou Pionie Vaeluaʼi Temi ʼi ʼApelili: Neʼe tuku mai e te ʼapositolo ko Paulo te faʼifaʼitaki fakaloto mālohi kia tatou ʼi tana ʼui fēnei: “Kae mole ʼau tokaga ki toku maʼuli ohage ia ko he meʼa ʼe maʼuhiga ʼaupito kia te ʼau, kehe pe ke ʼau fakaʼosi taku lele pea mo te minisitelio ʼaē neʼe foaki mai kia te ʼau e te ʼAliki ko Sesu: ʼaē ko te fakamoʼoni ʼaki te loto katoa ki te logo lelei ʼo te ʼofa makehe ʼa te ʼAtua.” (Gaue 20:24, MN) ʼE tou maʼu mo tatou te pilivilesio ʼaia ke tou fakamoʼoni ʼo ʼuhiga mo Sehova ʼAtua. Moʼo fakahoko te faʼahi ʼaia, ʼe tou fia fai anai ke lelei ʼaupito te māhina ʼo ʼApelili, ʼo tou pionie vaeluaʼi temi.
4 ʼUhi ko ʼana ʼu vāhaʼa e nima, ʼe tokolahi te kau pionie ʼe nātou gāue lelei anai ʼi te māhina ʼo ʼApelili 2000. ʼI Malesio 1997, neʼe tou maʼu te tupu makehe ʼo te kau pionie vaeluaʼi temi ʼi te ʼu fenua e tolu, ʼi Niu-Kaletonia, mo Vanuatu, pea mo Uvea mo Futuna, neʼe ko te toko 310, ʼo fakafuafua ai neʼe pionie te toko 17 ʼi te teau ʼo te toko 1 772 ʼu kaugā fai faka mafola fuli. Hili kiai taʼu e tolu, neʼe tuputupu te kaugamālie ʼo te ʼu kaugā fai faka mafola. Koia, ʼe feala ai ke tou hikihiki te tuputupu ʼo te kau pionie vaeluaʼi temi ʼaē neʼe maʼu ʼi muʼa atu. Tahi ʼaē meʼa, neʼe fakahifo te ʼu hola ʼaē ʼe tonu ke fai, ʼo feala ai ki te tokolahi ʼi te kokelekasio ke nātou toʼo te selevisi. Ko te ʼu kaugā fai faka mafola fuli ʼaē kua papitema, ʼe tonu ke nātou vakavakaʼi ʼi te faikole peʼe feala ke nātou pionie vaeluaʼi temi ʼi te māhina ʼo ʼApelili ʼaenī.
5 Koutou fakaʼaogaʼi te māhina ʼo ʼApelili ʼaē ʼe tuʼu ʼi te Kaletalio ʼo te taʼu 2000, moʼo fai hakotou fakatuʼutuʼu ʼi te temi nei ki te māhina ʼaē ka haʼu. Koutou fai he tonu ki te ʼu ʼaho ʼaē ka feala ai ke koutou fai faka mafola, pea koutou hilifaki kiai te ʼu hola fuli ʼaē ʼe koutou manatu, ʼe koutou fai anai ʼi te gāue fai faka mafola ʼo te māhina. Pea fakakau kiai te temi ʼaē ka koutou fai faka mafola ai ki te hahaʼi pea mo fai fagonogono faigamālie. ʼE katoa anai koa takotou ʼu hola e 50 ʼaē ʼe fakamaʼua ki te kau pionie vaeluaʼi temi? Kapau ʼe kei toe hakotou ʼu hola, pea ʼe feala koa ke koutou fai he ʼu fetogi ʼi takotou polokalama ke koutou fakaʼaogaʼi he temi ki te pionie vaeluaʼi temi? ʼE tonu pe ke koutou fai te hola e tahi mo minuta e 40 ʼi te ʼaho fuli, moʼo fakaaʼu ki te ʼu hola e 50 ʼo te māhina.
6 Neʼe toe fakahifo mo te ʼu hola ʼaē ʼe fakamaʼua ki te kau pionie katoa, koia neʼe koutou fakakaukauʼi koa ke koutou kau ki te minisitelio temi katoa? ʼE tonu koa ke koutou talitali ki te temi māfana ke koutou kamata ai te selevisi ʼaia? ʼI te temi momoko ʼaenī, ko te māhina ʼo ʼApelili ʼe ko he māhina lelei ʼaia moʼo kamata ai! Kapau ʼe koutou lotolotolua ʼo ʼuhiga mo takotou lava fai te ʼu hola e 70 ʼaē ʼe fakamaʼua ki te kau pionie, he koʼe koa ʼe mole koutou pionie vaeluaʼi temi ʼi ʼApelili pea mo koutou faiga ke koutou fai te ʼu hola e 70? Kapau ʼe koutou sio ʼe feala, pea ʼe lagi koutou foimo kole anai ke koutou pionie katoa.—Vakaʼi te tohi Notre ministère, ʼi te pasina 113 ki te 114.
7 Tou Kau Lahi Ki Te Faka Mafola ʼo Te Logo Lelei: Kia tatou fuli, ʼu kaugā fai faka mafola ʼo feiā mo te kau pionie, ko tatatou ʼofa lahi ki te ʼAtua pea mo tatatou ʼu kāiga ʼe ina uga tatou ke tou fai ʼaki totatou loto katoa, ia meʼa fuli ʼi totatou tauhi kia Sehova, ʼo mulimuli ki totatou ʼu ʼaluʼaga takitokotahi. (Lu. 10:27) Koia, ʼe tou fakahā “e tou gaue mamahi mo fetau ki te mea aeni, kua tou tuku tatatou falala ki te Atua mauli, iaʼia e ko te Fakamauli o te tagata fuape, tafito te hahai tui.” (1 Tim. 4:10) Koia la ʼaē ʼe tonu ke tou ʼamanaki ai ʼe kau katoa anai te kokelekasio ki te gāue fai faka mafola ʼi ʼApelili.
8 ʼAua naʼa galo kia tatou te tokoni ʼaenī ʼa Sesu: “Io, e Lahi te taukai, kae e lavaki te kau gaue. Koia, koutou faikole ki te Aliki o te taukai, ke ina fekaui mai he kau gaue ki tana taukai.” ʼI te ʼosi pe ʼo tana fai te ʼu palalau ʼaia, neʼe pāuiʼi e Sesu tana kau ʼapositolo e toko 12 ʼo ina fekauʼi nātou ke nātou fai faka mafola. (Mat. 9:37, 38; 10:1, 5, 7) Hili te teitei taʼu katoa, ʼi te ʼosi akoako lelei ʼa te toko 12 te gāue fai faka mafola, neʼe “hinoʼi [e Sesu] te tahi ʼu tisipulo e toko fitugofulu ʼo ina fekauʼi” nātou, ʼo ina fai pe kia nātou te fakatotonu ʼaenī: “Ko te taʼukai ʼe lahi . . . Koia ke koutou kole ki te Pule ʼo te taʼukai ke ina fekauʼi mai he kau gāue ki tana taʼukai.” (Lu. 10:1, 2, MN) ʼE fakamatala mai e te tohi ʼo Gaue pe neʼe tali feafeaʼi e Sehova te ʼu faikole ʼaia. ʼI te Penikosite ʼo te taʼu 33 ʼo totatou temi, neʼe ʼāsili kaugamālie te kau tisipulo ʼo nātou liliu ko te toko 120. Pea neʼe tuputupu tanatou kaugamālie ʼo aʼu ki te toko 3 000 pea mo te toko 5 000 kau tisipulo. (Gaue 1:15; 2:41; 4:4) Hili ʼaia, pea “nee tupulaki o kaugamalie aupito te kau tisipulo i Selusalemi.” (Gaue 6:7) ʼO toe feiā pe ʼi totatou temi, ʼe tonu ke tou haga kole ki te ʼAliki ke lahi age te kau fai faka mafola ʼo te Puleʼaga! ʼO mulimuli ki tatatou ʼu faikole, ko te ʼu kaugā fai faka mafola fuli ʼo te ʼu kokelekasio, ʼe tonu ke nātou fai he ʼu fakatuʼutuʼu ke nātou kau ki te minisitelio ʼi te māhina fuli pe.
9 Koutou vakaʼi fakalelei te māhina ʼo ʼApelili ʼi te Kaletalio ʼo te taʼu 2000. Mai tona ʼaluʼaga ʼaē ko te ʼu ʼuluaki ʼaho ʼo te māhina ʼe ko te Moeaki pea mo te ʼAhotapu, koia ʼe feala koa ke koutou fakatuʼutuʼu ke koutou kau ki te gāue ʼi te fakaʼosi vāhaʼa ʼaia, ke kamata lelei ai te māhina? ʼE feala koa hakotou lagolago ki takotou kokelekasio ʼi te ʼu ʼaho fuli ʼo te māhina ʼaē ka fai ai te ʼu “ ʼAho Tufa Nusipepa”? ʼE feala koa hakotou kau ʼi he hola katoa peʼe laka atu ʼi te minisitelio ʼi te ʼAhotapu? ʼE feala koa hakotou fai he ʼu fakatuʼutuʼu ke koutou kau ki te fai faka mafola ʼi te afiafi? Pea ʼaua naʼa galo ke koutou fakaʼaogaʼi te ʼu faigamālie fuli ki te fagonogono faigamālie ʼi te fale gāue, ʼi te faleako, peʼe mokā koutou fai hakotou tahi ʼu gāue. Koutou fakaʼiloga te ʼu ʼaho ʼaē ʼe feala ai ke koutou fai he ʼu hola ʼi te fai faka mafola, pea koutou fakaʼaogaʼi te kaletalio moʼo tohi ai takotou ʼu hola gāue ʼo te māhina.
10 ʼI ʼApelili, ʼe ko he faigamālie ʼaia kia nātou fuli ʼaē kua feala pea kua fakagafua e te kau tagata ʼāfea, ke nātou liliu ko he ʼu kaugā fagona. Kapau ʼe koutou fai te ako Tohi-Tapu ʼa he tahi, kua feʼauga koa tana tuputupu fakalaumālie ke feala hana ʼalu ki te taupau pelesita ʼo kole age ʼe fia liliu ko he kaugā fagona ʼo te logo lelei? Kapau ʼe ʼi ai hakotou fānau mole heʼeki papitema, neʼe koutou fai palalau koa mo te ʼu tagata ʼāfea ʼo ʼuhiga mo tanatou tuputupu ʼi te faʼahi fakalaumālie? ʼE mole ko te temi lelei koa ʼaenī ke nātou kamata fai faka mafola ai?—Vakaʼi te tohi Notre ministère, ʼi te pasina 98 ki te 101.
11 ʼI tatatou faiga ʼaē ke lelei ʼaupito te māhina ʼo ʼApelili 2000, ʼe tonu ke tou kau fuli ki te minisitelio pea mo tou fakaliliu tatatou kiʼi pepa tānaki gāue ʼi te fakaʼosi māhina. (Vakaʼi ia Maleko 6:30.) ʼE tonu ke fakaloto mālohiʼi te ʼu kaugā fagona foʼou ke nātou tohi tautonu te ʼu kiʼi pepa gāue ʼaia. ʼI tatatou lagolago kiai, ʼe feala ke tou tokoni lelei ki te tānaki gāue ʼo ʼApelili, pea mo te fakavikiviki lahi ʼaē ka fai anai kia Sehova ʼi tatatou ʼu faiga ʼi te fai faka mafola.
12 Koutou Fakaafe Te Hahaʼi Ki Te Fakamanatu: ʼE mole tou fiafia anai koa mokā tou sio ki he tuputupu foʼou ʼo te hahaʼi ʼaē ʼe ʼōmai ki te ʼAho Fakamanatu ʼo te mate ʼo Kilisito ʼi te taʼu 2000? Ei! Ko tona faka ʼuhiga anai ko te hahaʼi tokolahi neʼe nātou fakatahitahi moʼo fakahā tanatou loto fakafetaʼi ki te ʼofa lahi tokotahi ʼaē neʼe fakahā e Sehova ʼAtua pea mo Sesu Kilisito kia tatou! (Soa. 3:16; 15:13) Koutou fai te ʼu fakatuʼutuʼu fuli ʼaē ʼe ʼaoga ke mole he meʼa ʼe ina tāʼofi koutou pea mo takotou famili ke koutou kau ki te Fakamanatu.
13 ʼI te temi ʼaenī tou kamata fakaafe te hahaʼi ki te Fakamanatu. Koutou fai he lisi ʼo nātou fuli ʼaē ʼe koutou loto ke ʼōmai ki te ʼaho ʼaia. Koutou tohi ia nātou fuli ʼaē neʼe nātou ako te Tohi-Tapu ʼi muʼa atu, mo nātou fuli ʼaē ʼe lolotoga ako nei, pea mo takotou ʼu ʼaʼahi fuli. Koutou tohi ʼi takotou lisi ia nātou ʼaē ʼe koutou ʼiloʼi ʼi te gāue, mo te faleako, pea mo takotou vāhaʼa fale, mo he tahi pe ʼe koutou talaga gāue mo ia. Koutou manatuʼi mo takotou ʼu feʼilo pea mo takotou famili. ʼI takotou ʼosi fai takotou lisi, koutou kamata fakaafe ia nātou takitokotahi ʼaia. Koutou fakahā lelei age te ʼaho pea mo te faʼahi ʼaē ka fai ai te Fakamanatu. Ka ōvi mai te ʼaho 19 ʼo ʼApelili, pea koutou toe fakamanatuʼi te ʼaho ʼaia kia nātou ʼaē ʼe tuʼu ʼi takotou lisi, ʼo koutou ʼolo kia nātou takitokotahi peʼe koutou fai telefoni. Koutou fakahā age ʼe feala ke nātou kaugā ʼōmai mo koutou ki te Fakamanatu ʼi te po ʼaia.
14 ʼO mulimuli ki te fakatuʼutuʼu ʼaia ʼa te Sosiete, ʼe fai anai e te komite ʼo te kau tagata ʼāfea he faiga makehe moʼo fakaloto mālohi te ʼu kaugā fagona fuli ʼo te telituale ʼaē mole kei fai faka mafola, ke nātou ʼōmai ki te Fakamanatu. (Mat. 18:12-14) ʼE fia vakavakaʼi anai e te kau tagata ʼāfea te tohi ʼo te ʼaho 2 ʼo Fepualio 1999 ʼaē neʼe momoli mai e te Sosiete. ʼE fai anai e te sikalaipe ʼo te kokelekasio he lisi ʼo te ʼu kaugā fagona fuli ʼaē mole kei fai faka mafola, pea ʼe hinoʼi anai e te tēhina taupau ki te gāue he ʼu tagata ʼāfea ke nātou ʼaʼahi nātou pea mo fakaafe ki te Fakamanatu. Kapau ʼe ʼaʼahi fakatomuʼa nātou e te kau tagata ʼāfea pea mo fakaloto mālohi nātou, pea ʼe lagi feala anai ke nātou toe fai faka mafola, ʼi te māhina ʼo ʼApelili. ʼE ko he fakaloto mālohi anai kia nātou mo kapau ʼe fakaafe ke fai faka mafola mo he kaugā fagona kua māhani ʼi te gāue ʼaia.
15 Koutou Fakaloto Mālohi Ke Fai He Lagolago Lelei ʼi ʼApelili! ʼE tonu anai ke fakatuʼutuʼu lelei te ʼu gāue ʼo te kau tagata ʼāfea, mo te ʼu tagata faifekau faka minisitelio, pea mo te ʼu pule famili ke lelei ʼaupito te māhina ʼo ʼApelili 2000. ʼE gāue lelei anai te kau tagata ʼāfea moʼo fakatuʼutuʼu lelei ia meʼa fuli, pea mo tuku he faʼifaʼitaki ʼi te fai faka mafola. (Hep. 13:7) ʼE tonu ke fai he ʼu fakatuʼutuʼu ʼe ʼaoga anai ki te ʼu fono fai faka mafola ʼo te vāhaʼa pea mo te ʼu fakaʼosi vāhaʼa. ʼE feala ke fakatuʼutuʼu te tahi ʼu fono ki te fai faka mafola ʼi te ʼu afiafi. ʼE tonu ke fakatuʼu ʼi muli ia te polokalama katoa ʼo te ʼu fakatuʼutuʼu fuli ʼaē neʼe fai ki te māhina ʼo ʼApelili. ʼE tonu anai ke hinoʼi he tahi ke ina fai te ʼu fono ʼo te faka mafola. ʼE tonu ke feʼauga te telituale maʼa nātou fuli ʼaē ka fai faka mafola.
16 ʼI te māhina ʼo ʼApelili, ʼe tufa anai Te Tule Leʼo pea mo te Réveillez-vous ! ʼE tou faiga anai ke tou kamata he ʼu ako Tohi-Tapu, koia ʼe tufa anai mo te kaupepa Fakamaʼua ki te hahaʼi ʼaē ʼe nātou fia lau. Koia, ʼe tonu anai ke fakaʼui lahi te ʼu nusipepa pea mo te ʼu kaupepa.
17 ʼI te fakaʼosi māhina, ko te ʼu tēhina fuli ʼaē ʼe nātou takitaki te ʼu ako tohi pea mo te ʼu tēhina ʼaē ʼe tokoni kia nātou, ʼe nātou fakaloto mālohiʼi anai ia nātou fuli ʼo tanatou ako tohi ke nātou fakaliliu tanatou pepa tānaki gāue ʼi te fakaʼosi pe ʼo te māhina. ʼE lagi feala ke fai te faʼahi ʼaia ʼi te ʼAhotapu, ʼaho 30 ʼo ʼApelili. Pea ka vakavakaʼi e te sikalaipe te ʼu pepa tānaki gāue, kapau ʼe ina fakatokagaʼi ko ʼihi ʼu kaugā fagona neʼe mole heʼeki nātou fakaliliu tanatou pepa, pea ʼe feala ke ina fakamanatuʼi fakalelei age kia nātou, ke nātou fai te faʼahi ʼaia ʼi muʼa ʼo te ʼaho 6 ʼo Maio, te ʼaho ʼaē ʼe tonu ke ina foaki ai te tānaki gāue ʼo te kokelekasio ki te Sosiete. ʼE feala ke ina kole ki te ʼu tēhina ʼaē ʼe nātou takitaki te ʼu ako tohi ke nātou tokoni ki ai moʼo fakaʼui te ʼu kiʼi pepa tānaki gāue ʼa te ʼu kaugā fagona takitokotahi.
18 Ko te māhina ʼaē ʼe fai ai te Fakamanatu, ʼe ko he māhina maʼuhiga ʼaia maʼa te hahaʼi ʼa te ʼAtua. ʼE tonu ai ke tou maʼumaʼua fuli ʼi te tauhi kia Sehova. ʼE hoko feiā anai mo kapau ʼe hahaʼi ia nātou ʼaē ka liliu ko he ʼu kaugā fagona, mo kapau ko ʼihi ʼe nātou fakaʼui anai ke nātou pionie vaeluaʼi temi, pea kapau ʼe tou faiga fakamalotoloto anai ke tou ʼōmai mo ni ʼu hahaʼi ki te Fakamanatu ʼo te mate ʼo Kilisito. Tou faikole fakamalotoloto ke tapuakina tatou e Sehova, ʼi tatatou faiga ʼaē ke lelei ʼaupito te māhina ʼo ʼApelili 2000, ʼo tou fai ia meʼa fuli moʼo fakavikiviki pea mo faka kolōlia ki te ʼAtua!—Hep. 13:15.
[Talanoa ʼo te pasina 3]
Te ʼu Pionie Vaeluaʼi Temi
Tatatou ʼu Tupu Makehe:
Niu-Kaletonia: 259
(Malesio 1997)
Vanuatu: 59
(Malesio 1997)
Uvea mo Futuna: 10
(Maio 1999)
[Talanoa ʼo te pasina 4]
Te Kau Fai Faka Mafola
Tatatou ʼu Tupu Makehe:
Niu-Kaletonia: 1 688
(ʼAukusito 1997)
Vanuatu: 280
(ʼApelili 1999)
Uvea mo Futuna: 46
(ʼAukusito 1999)
[Talanoa ʼo te pasina 5]
Te Hahaʼi ʼAē Neʼe Kau Ki Te Fakamanatu
Tatatou ʼu Tupu Makehe:
Niu-Kaletonia: 4 398 (1997)
Vanuatu: 1 583 (1997)
Uvea mo Futuna: 197 (1999)