“Ke Fakakatoa Te Fagonogono o Te Folafola a Te Atua”

¹ Ka koutou loto fakafetaʼi he neʼe foaki atu he meʼa lelei, pea ʼe mole koutou fia fakahā koa ʼi takotou aga pea mo takotou ʼu gāue? ʼE mahino ia! ʼO ʼuhiga mo te agalelei pea mo te manavaʼofa ʼaē neʼe fakahā e Sehova ki te malamanei, koutou tokagaʼi pe neʼe tali feafeaʼi e te ʼapositolo ko Paulo. Neʼe ina ʼui fēnei: “Fakafetai ki te Atua o uhiga mo tona meaofa e mole hona fakafuafua.” Koteā te “meaofa” ʼaia? Ko “te [“manavaʼofa,”] fakaofolele . . . [ʼa] te Atua” ʼaē neʼe ina fakahā kia tatou, tāfito ʼi tana foaki mai tona ʼAlo totonu moʼo totogi ʼatatou ʼu agahala.—2 Ko. 9:14, 15; Soa. 3:16.

² Neʼe gata pe koa te fakafetaʼi ʼa Paulo ʼi tana ʼu palalau? Kailoa ia! Neʼe lahi te ʼu ʼaluʼaga neʼe ina fakahā ai tana loto fakafetaʼi lahi. Neʼe tuʼania ʼaupito ki tona ʼu tēhina ʼi te faʼahi fakalaumālie pea neʼe fia tokoni lahi kia nātou, ke nātou maʼu te ʼu fua lelei fuli ʼo te manavaʼofa ʼa te ʼAtua. ʼO ʼuhiga mo nātou ʼaia, neʼe ʼui fēnei e Paulo: “I tomatou ofa kia koutou, nee mole gata’pe mo tamatou leleiʼia ke tuku atu kia koutou te Evaselio a te Atua, pea mo omatou mauli foki, koteuhi kua koutou liliu ko omatou ofaʼaga.” (1 Tes. 2:8) Neʼe mole tokoni pe Paulo kia nātou ʼaē neʼe kua kau ki te kokelekasio ke nātou lava maʼu te fakamaʼuli, kae neʼe toe fai faka mafola mālohi, ʼo folau ia lauʼi kilometa ʼi te ʼu fenua pea mo te tai, moʼo maʼu ia nātou ʼaē “neʼe lotolelei ki te maʼuli heʼegata.” (Gaue 13:48, MN ) Ko te loto fakafetaʼi lahi ʼa Paulo ki te ʼu meʼa fuli ʼaē neʼe fai e Sehova maʼa ia, neʼe ina uga ia ia ke ina “fakakatoa te fagonogono o te Folafola a te Atua.”—Kol. 1:25.

³ Ko tatatou loto fakafetaʼi kia meʼa fuli ʼaē neʼe fai e Sehova maʼa tatou, ʼe mole ina uga koa la tatou ke tou foaki te tokoni fakalaumālie kia nātou ʼaē ʼe ʼaoga kiai ʼi te kokelekasio? (Kal. 6:10) Pea ʼe mole ina uga koa tatou ke tou kau lahi age ki te faka mafola ʼo te logo lelei ʼo te Puleʼaga ʼi tatatou telituale?—Mat. 24:14.

⁴ Ko He Faigamālie Moʼo Fakahā Ia Tatatou Loto Fakafetaʼi: ʼI te taʼu fuli, ko te ʼAho Fakamanatu ʼo te mate ʼa Kilisito ʼe ina foaki mai te faigamālie makehe, ke tou fakahā ai te loto fakafetaʼi ki te ʼu meʼa ʼaē neʼe fai e Sehova pea mo Sesu maʼa tatou. ʼE mole hage ko hatatou fono māhani peʼe ko he fakamanatu pe ʼo he meʼa neʼe hoko. Neʼe ʼui fēnei e Sesu: “Koutou fai te mea aeni mo oku fakamanatu.” (Lu. 22:19) Ko te ʼAho Fakamanatu ʼo te mate ʼa Kilisito ʼe ko he lakaga ʼaia ke tou metitasio ki te ʼulugaaga ʼo Sesu. Ko he temi ke tou fakamoʼoni ai kua maʼuli ia ʼaho nei pea ʼe gāue, ʼaki te kolōlia pea mo te tuʼulaga hau ʼaē neʼe foaki age kia te ia, ʼuhi ko tana maʼuli agatonu pea mo tana sakilifisio. Ko te lakaga ʼaia ke tou toe fakahā mo tatatou fakalogo ki te pule ʼa Kilisito ʼi tana takitaki te ʼu gāue ʼo te kokelekasio. (Kol. 1:17-20) ʼE tonu ki te hahaʼi fuli ʼa te ʼAtua ke nātou kau ʼaki he fakaʼapaʼapa lahi ki te ʼAho Fakamanatu ʼo te mate ʼa Kilisito. ʼE fai anai ʼi te taʼu ʼaenī ʼi te Feliaono ʼaho 28 ʼo Malesio 2002, ʼi te ʼosi tō ʼo te laʼā.

⁵ ʼAki te faiga lahi ʼaē neʼe fai tāfito ʼi te ʼAho Fakamanatu ʼo te taʼu ʼaenī kua hili, neʼe kau ki te ʼaho ʼaia te toko 4 373 ʼi Niu Kaletonia, mo te toko 1 052 ʼi Vanuatu, pea mo te tuputupu foʼou ʼi Uvea mo Futuna neʼe ko te toko 344. Ko te tokofia anai ka ʼōmai ʼi te taʼu ʼaenī? ʼE fakalogo tāfito te faʼahi ʼaia ki tatatou “gaue mamahi mo fetau,” ʼo tou tokoni ki te tokolahi ke nātou kau kiai.—1 Tim. 4:10.

⁶ ʼO hilifaki ki tatatou kau ki te Taumafa ʼo te ʼAliki, ʼe toe feala foki ke lahi age tatatou gāue fai faka mafola. ʼE mahino papau ia, ko te toko hogofulu afe tupu ʼu tēhina mo tuagaʼane ʼe nātou pionie vaeluaʼi temi anai ʼi te māhina e tahi peʼe laka atu. ʼI te ʼu taʼu fuli e tolu ʼaē kua hili, neʼe ko te toko 141 pionie vaeluaʼi temi ʼi Niu Kaletonia, mo te toko 19 ʼi Vanuatu pea mo te toko 7 ʼi Uvea mo Futuna ʼi te temi ʼo te ʼAho Fakamanatu, mai Malesio ki Maio. ʼE feala koa hakotou fai he ʼu fakatuʼutuʼu ke koutou pionie vaeluaʼi temi ʼi te taʼu ʼaenī? ʼE ko he ʼaluʼaga lelei anai ʼaia moʼo fakahā takotou loto fakafetaʼi moʼoni ki te meʼa ʼofa mai te ʼAtua, ia te sakilifisio ʼa Kilisito. Koutou ʼiloʼi papau ʼe tapuakina anai koutou e Sehova, ohage ko tona fakahā e te ʼu meʼa ʼaenī neʼe hoko.

⁷ Ko te tuagaʼane neʼe gāue temi katoa, neʼe faitohi ʼo ʼuhiga mo tana selevisi pionie vaeluaʼi temi ʼi Malesio ʼo te taʼu ʼaenī kua hili: “Ko Te Minisitelio ʼo Te Puleʼaga ʼo Fepualio 2001 neʼe ina fakaloto mālohiʼi nātou fuli ʼaē neʼe feala ke nātou pionie vaeluaʼi temi ʼi te temi ʼo te ʼAho Fakamanatu. Mai tona ʼaluʼaga ʼaē neʼe ko Moeaki e nima ʼi te māhina ʼo Malesio, koia neʼe tō lelei ai mo taku polokalama. Koia neʼe ʼau fakatotonu ai ke ʼau tohi haku pepa pionie.” ʼI te kamata ʼo te māhina, neʼe ina fai te fakatuʼutuʼu ʼaē ke ina kamata he ako Tohi-Tapu. Neʼe ina lavaʼi koa? Ei, ʼi te ʼu hola e 52 ʼaē neʼe fai faka mafola ai ʼi te māhina ʼaia! Neʼe koteā tana manatu? “ ʼE tou maʼu he ʼu tapuakina lahi mokā tou faiga lahi.”

⁸ Koteā te ʼu lelei ʼaē ʼe maʼu e he famili mokā nātou pionie fuli? Ko te famili ʼe nātou toko fā neʼe nātou pionie ʼi te māhina ʼo ʼApelili ʼaē kua hili, pea neʼe nātou ʼui ʼe mole galo anai kia nātou te māhina ʼaia. Neʼe ʼui fēnei e te faʼe: “Neʼe mātou fiafia ʼi te ʼaho fuli, he neʼe mātou gāue fakatahi ʼi te minisitelio! Neʼe fakafiafia te ʼu afiafi ʼaē neʼe mātou kakai ai, he neʼe mātou fakamatala te ʼu gāue ʼaē neʼe mātou fai ʼi te ʼaho.” Neʼe ʼui fēnei e te tama: “Neʼe ʼau fiafia ʼi te fai faka mafola mo taku tāmai ʼi te vāhaʼa, heʼe ʼi te agamāhani neʼe gāue ia ʼi te ʼu temi ʼaia.” Neʼe toe ʼui fēnei e te tāmai: “ ʼI toku ʼuhiga pule famili, neʼe ʼau fiafia ʼi taku ʼiloʼi ʼaē neʼe mātou kau fakatahi ki te gāue ʼaē ʼe maʼuhiga ʼaupito ʼi totatou temi.” ʼE feala koa ke pionie tokotou famili? He koʼe koa ʼe mole koutou fai palalau faka famili, pea mo vakaʼi peʼe feala ki te loto fale katoa ke pionie vaeluaʼi temi ʼi te temi ʼo te ʼAho Fakamanatu?

⁹ ʼE Feala Koa Ke Liliu Te Māhina ʼo Malesio Ko Tatatou Māhina Lelei ʼAupito? ʼI te kamata ʼo te taʼu 2000, neʼe fai te fehuʼi ʼaenī ʼi Te Minisitelio ʼo Te Puleʼaga: “Koteā ʼAē ʼe Feala Ke Tou Fai Ke Lelei ʼAupito Te Māhina ʼo ʼApelili 2000?” Neʼe koteā ʼaē neʼe hoko? Neʼe lahi te ʼu tuputupu foʼou. ʼI te māhina ʼaia, neʼe ʼi ai te ʼu pionie vaeluaʼi temi e 323 ʼi Niu-Kaletonia, ko te toko 11 pionie vaeluaʼi temi ʼi Uvea mo Futuna, pea neʼe hoko te tuputupu foʼou. Neʼe toe fakaofoofo mo te toko 41 pionie vaeluaʼi temi ʼo Vanuatu, kae neʼe mole ko he tuputupu foʼou. ʼI ʼihi koga meʼa, neʼe ʼi ai te ʼu tuputupu foʼou ʼi te tufa ʼo te ʼu nusipepa, pea mo te ʼu ʼaʼahi. ʼE kei koutou manatuʼi koa te fiafia ʼaē neʼe hoko ʼi takotou kokelekasio, ʼaki te gāue fakalaumālie neʼe fai ʼi te māhina makehe ʼaia? ʼE feala koa ke toe hoko te faʼahi ʼaia peʼe laka atu ʼi te taʼu ʼaenī? Kapau ʼe tou faiga fuli, pea ʼe feala ke liliu te māhina ʼo Malesio 2002 “Ko Tatatou Māhina Lelei ʼAupito.” He koʼe ʼe filifili te māhina ʼo Malesio?

¹⁰ ʼE ko tupuʼaga ʼe lua ʼaē ʼe tonu ai ke makehe age tatatou gāue ʼi te māhina ʼo Malesio. ʼUluaki, ʼe fai anai te ʼAho Fakamanatu ʼi te fakaʼosi ʼo Malesio, ʼo feala ai ke tou fakaafe he tokolahi ʼi te kamata ʼo te māhina ki te ʼaho ʼaia. Lua, ʼi Malesio ʼo te taʼu ʼaenī ʼe ko fakaʼosi vāhaʼa e nima, ʼo faigafua ai kia nātou ʼaē ʼe gāue faka mālama peʼe kei ako, ke nātou pionie vaeluaʼi temi. He koʼe koa ʼe mole koutou heheka muʼa pea mo fakatuʼutuʼu hakotou polokalama lelei, ʼo fakaʼaogaʼi te kaletalio ʼaē neʼe tā ʼi te pepa ʼaenī. ʼE lagi faigafua anai kia koutou takotou pionie vaeluaʼi temi. Ohage la, kapau ʼe koutou fai faka mafola ia hola e 8 ʼi te ʼu vāhaʼa fuli e nima, pea ʼe ʼaoga pe anai ke koutou fai he tahi ʼu hola e 10 ʼi te ʼu ʼaho kei toe ʼo te māhina moʼo fakaʼosi ʼo takotou ʼu hola e 50.

¹¹ Koteā ʼaē ʼe feala ke fai e te kau tagata ʼāfea moʼo tokoni kia nātou fuli ʼi te kokelekasio ke nātou “fakakatoa te fagonogono o te Folafola a te Atua”? Koutou fakatupu te fiafia ʼo te kokelekasio ʼi takotou ʼu akonaki peʼe ʼi takotou ʼu fai palalau. Ko te ʼu tēhina ʼo te ʼu Ako Tohi pea mo nātou ʼaē ʼe tokoni kia nātou, ʼe feala ke nātou palalau mo nātou takitokotahi ʼo tanatou ako pea mo foaki he tokoni kia nātou takitokotahi. ʼE lagi ʼaoga pe ke fai he ʼu palalau fakaloto mālohi peʼe ko he ʼu tokoni ʼaoga. (Taag. 25:11) Tokolahi ʼe nātou tokagaʼi anai, kapau ʼe nātou fai he ʼu kiʼi fetogi veliveli pe ʼi tanatou polokalama, pea ʼe feala ke nātou maʼu te pilivilesio ke nātou pionie vaeluaʼi temi. Neʼe lahi te ʼu kokelekasio ʼaē neʼe tokolahi ai te ʼu tagata ʼāfea peʼe ko nātou fuli, ʼo feiā mo te ʼu tēhina faifekau faka minisitelio mo tonatou ʼohoana, neʼe nātou tuku he faʼifaʼitaki lelei ʼo nātou pionie vaeluaʼi temi ʼi te temi ʼo te ʼAho Fakamanatu. Neʼe fakaloto mālohiʼi e te faʼahi ʼaia te ʼu tēhina mo tuagaʼane ʼe tokolahi ke nātou pionie mo nātou. ʼUhi ko te mahaki peʼe ko he tahi ʼu ʼaluʼaga, ʼe mole feala ki ʼihi kau fai faka mafola ke nātou pionie, kae ʼe feala ke fakaloto mālohiʼi nātou ke nātou fakahā tanatou loto fakafetaʼi ʼo nātou fai ʼaki te kokelekasio te meʼa ʼaē ʼe nātou lavaʼi ʼi te minisitelio.

¹² ʼE fua lelei anai mo kapau ʼe tokaga te kau tagata ʼāfea ʼo fai he ʼu fakatuʼutuʼu. ʼE tonu ke fai te ʼu fono ki te fai faka mafola ʼi te ʼu hola ʼaē ʼe lelei ʼi te vāhaʼa. Kapau ʼe feala, pea ʼe hinoʼi fakatomuʼa anai e te tēhina taupau ki te selevisi he ʼu tēhina ke nātou fai te ʼu fono fai faka mafola fuli. ʼE fakamaʼua anai ke teuteuʼi lelei te ʼu fono ʼaia ke mole fakalaka ia minuta e 10 peʼe 15, kua vaevae te ʼu kaugā fagona, kua tufa te ʼu telituale, pea mo fai mo te faikole. (Vakaʼi Te Tali Ki ʼAkotou ʼu Fehuʼi ʼi Te Minisitelio ʼo Te Puleʼaga ʼo Sepetepeli 2001) ʼE tonu anai ke fakamahino lelei ki te kokelekasio te polokalama ki te fai faka mafola ʼi te māhina, pea mo fakatuʼu ʼi muli.

¹³ ʼE tonu ke feʼauga te ʼu telituale. ʼE tonu ke vakaʼi fakatahi e te tēhina taupau ki te selevisi pea mo te tēhina ʼaē ʼe tokaga ki te ʼu telituale, ke fai he ʼu fakatuʼutuʼu ke gāueʼi te ʼu telituale ʼaē ʼe mole fai tuʼumaʼu. ʼE tonu ke faka maʼuhigaʼi te fai faka mafola ʼi te ʼu ʼapi, mo te fai faka mafola ʼi te ala pea ʼi te ʼu fale koloā, pea mo te fai faka mafola ʼi te afiafi. ʼI te ʼu koga meʼa ʼaē ʼe feala ai, ʼe feala ke tokoni ki he ʼu kaugā fagona ke fai faka mafola ʼi te telefoni.

¹⁴ Tou Tokoni Kia Nātou Ke Nātou Toe Kau Ki Te Fai Faka Mafola: ʼE ʼi ai koa ʼihi ʼi te telituale ʼo tokotou kokelekasio ʼe mole kei kau ki te faka mafola ʼo te logo lelei? ʼE kei nātou kau ki te kokelekasio pea ʼe ʼaoga ke tokoni kia nātou. (Pes. 119:176) Mai tona ʼaluʼaga ʼaē kua ōvi mai te fakaʼosi ʼo te mālama ʼāfea ʼaenī pea mo te kua vave fakatuʼu ʼo te mālama foʼou, ʼe uga ai tatou ke tou faiga lahi moʼo tokoni kia nātou ʼaē ʼe mole kei fai faka mafola. (Loma 13:11, 12) ʼI te ʼu taʼu e nima kua hili, ko te toko 26 500 hahaʼi ʼi te taʼu fuli neʼe nātou tali te tokoni pea mo nātou toe kau ki te fai faka mafola. Koteā ʼaē ʼe feala ke tou fai moʼo tokoni ki te tokolahi ke nātou toe maʼu te ʼofa pea mo te falala ʼaē neʼe nātou maʼu ʼi te kamata?—Hep. 3:12-14.

¹⁵ Ko te kolesi ʼa te kau tagata ʼāfea ʼe nātou fia vakaʼi fakatahi anai, peʼe lava feafeaʼi hanatou tokoni kia nātou ʼaē mole kei fai faka mafola ʼi te ʼu taʼu ʼaenī kua hili. (Mat. 18:12-14) ʼE tonu anai ke vakaʼi e te sikalaipe te ʼu kate Fai Faka Mafola pea mo tohi te ʼu higoa ʼo nātou fuli ʼaē mole kei fai faka mafola. ʼE tonu ke fai tāfito he ʼu fakatuʼutuʼu ʼo ʼuhiga mo te ʼu ʼaʼahi faka tauhi ōvi moʼo foaki he ʼu tokoni. ʼE lagi feala ki he tagata ʼāfea ke ina ʼaʼahi he kaugā fai faka mafola he neʼe nā feʼiloʼiʼaki ʼi muʼa atu pe neʼe nā gāue fakatahi, peʼe feala ke kole ki he tahi ʼu kaugā fagona ke nātou fai te tokoni ʼaia. Neʼe lagi nātou fai te ako ʼo ia ʼaē ʼe mole kei fai faka mafola, pea ʼe nātou fiafia anai ʼi te fealagia ʼaē ke nātou tokoni ʼi te temi ʼaē ʼe ʼaoga ai. ʼE tou fakaʼamu ke uga ia te tokolahi ʼaē mole kei gāue ke nātou toe kamata faka mafola te folafola ʼa te ʼAtua. Kapau kua feala, pea ko te temi lelei ʼaē ke nātou kamata fai faka mafola ai ʼi te māhina ʼo te ʼAho Fakamanatu!—Kapau ʼe koutou fia maʼu he tahi ʼu manatu, koutou vakaʼi Te Tali Ki ʼAkotou ʼu Fehuʼi ʼi Te Minisitelio ʼo Te Puleʼaga ʼo Novepeli 2000.

¹⁶ ʼE ʼi Ai Koa ʼIhi ʼe Feala Ke Nātou Fai Faka Mafola? ʼE haga tapuakina e Sehova tana hahaʼi ʼo ina ʼaumai “te ʼu meʼa ʼaē ʼe manakoʼia ʼo te ʼu puleʼaga fuli.” (Asea 2:7) ʼI te taʼu fuli ko te lauʼi afe hahaʼi ʼe nātou liliu ko he ʼu kaugā fagona mole heʼeki papitema. Ko ai koa ia nātou? Ko te ʼu fānau ʼa te kau Fakamoʼoni ʼa Sehova pea mo te kau ako Tohi-Tapu ʼaē ʼe tuputupu. ʼE tou ʼiloʼi feafeaʼi kua feala ke nātou faka mafola te logo lelei?

¹⁷ Te Fānau ʼa Te Kau Fakamoʼoni ʼa Sehova: Tokolahi te ʼu fānau ʼe nātou kaugā ʼolo mo tanatou ʼu mātuʼa ʼi te ʼu ʼapi lolotoga ni ʼu taʼu, kae mole ko he ʼu kaugā fagona. ʼE lelei te māhina ʼo Malesio ke nātou kamata ai. ʼE koutou lava ʼiloʼi feafeaʼi peʼe kua feala ke liliu takotou fānau ko he kaugā fagona? ʼI te pasina 100 ʼo te tohi Organisés pour bien remplir notre ministère, ʼe ʼui ai ʼe ko “te temi ʼaē ʼe tuku ai e te tamasiʼi he faʼifaʼitaki lelei ʼi tana aga pea, ʼaki te uga ʼo tona loto ʼe ina fakahā tana tui ʼo palalau ki te hahaʼi ʼo ʼuhiga mo te logo lelei.” Kapau ʼe koutou manatu kua feala ki takotou tamasiʼi, pea koutou palalau mo he tahi ʼi te ʼu tagata ʼāfea ʼo te Komite Gāue ʼo te Kokelekasio.

¹⁸ He Kau Ako Tohi-Tapu Kua Lava Fai Faka Mafola: Kapau ko he tahi ʼe ako kua ina maʼu te ʼatamai mālama pea kua kau ki te ʼu fono, ʼe lagi fia liliu ko he kaugā fagona ʼo te Puleʼaga. Kapau ʼe koutou fai te ako ʼa he tahi ʼe feiā, koutou vakaʼi te ʼu fehuʼi ʼaenī: ʼE haʼele koa ki muʼa, ʼo mulimuli ki tona taʼu pea mo tana ʼu fealagia? Kua palalau koa ki te hahaʼi ʼo ʼuhiga mo tana tui? Kua ina kofuʼi koa “te ʼuhigaʼi tagata foʼou”? (Kol. 3:10, MN ) ʼE mulimuli koa ki te ʼu manatu ʼaē ʼe tuʼu ʼi te ʼu pasina 98 ki te 99 ʼo te tohi Notre ministère, ʼaē ʼe fai kia nātou ʼaē ʼe fia liliu ko he ʼu kaugā fagona? Kapau koia, pea ʼe tonu ke koutou palalau ki te Komite Gāue ʼo te Kokelekasio, ke fai he ʼu fakatuʼutuʼu mo te ʼu tagata ʼāfea e toko lua ke fai palalau mo koutou pea mo ia ʼaē ʼe ako. Kapau kua feala ke fai faka mafola, pea ʼe fakahā anai kia ia e te ʼu tagata ʼāfea e toko lua ʼe feala ke kamata kau ki te fai faka mafola.

¹⁹ E Feafeaʼi Ki ʼApelili Pea Mo Maio? ʼI te ʼu māhina makehe ʼaia ʼe lahi anai tatatou fai faka mafola. Tokolahi te kau pionie ʼo Malesio ʼe lagi feala ke nātou toe pionie ʼi ʼApelili pea mo Maio, peʼe ʼi te māhina e tahi. ʼI ʼApelili pea mo Maio, ʼe tou faka maʼuhigaʼi anai te tufa ʼi te faka mafola, te ʼu nusipepa ʼo Te Tule Leʼo pea mo te Réveillez-vous ! Neʼe fua lelei te ʼu nusipepa ʼaia ki te maʼuli ʼo nātou ʼaē neʼe nātou lau! Neʼe tokoni lahi te ʼu nusipepa ʼaia ki te tuputupu fakaofoofo ʼaē neʼe hoko ʼi te malamanei katoa. ʼE tou faiga lahi anai ʼi ʼApelili pea mo Maio ke tou tufa te ʼu nusipepa ki he ʼu hahaʼi tokolahi. Koutou fakatuʼutuʼu ʼi te temi nei ke koutou kau lahi ki te gāue ʼaia.

²⁰ ʼAki te fai faka mafola lahi ʼaē kua fakatuʼutuʼu, ʼe ʼaoga koa ke lahi age takotou ʼu nusipepa ʼaē ʼe koutou toʼo ʼi te kokelekasio? ʼI te taʼu gāue katoa, ʼe tou tufa Te Tule Leʼo pea mo te Réveillez-vous ! ʼi te ʼu Moeaki fuli, mo totatou ʼAho Tufa Nusipepa. Kae ʼuhi ʼaē ko te tokolahi ʼe nātou toʼo anai te selevisi pionie vaeluaʼi temi pea ko tatou fuli ʼe tou tufa lahi anai te ʼu nusipepa ʼi te ʼu māhina ʼaia ʼe lua, koia ʼe lagi tonu anai ke lahi age te ʼu nusipepa ʼaē ʼe koutou fakaʼui ʼi te kokelekasio. Kapau ʼe tonu ke fai te faʼahi ʼaia, pea koutou foimo fakahā ki te tēhina ʼaē ʼe tokaga ki te ʼu nusipepa. Pea ʼe tonu foki ke vakaʼi e te tēhina ʼaē ʼe tokaga ki te ʼu tohi ke feʼauga mo te ʼu kiʼi pepa lotu Aimeriez-vous en savoir plus sur la Bible ?

²¹ Tokolahi ʼe nātou fakafetaʼi ki te talanoa ʼaē ʼe tuʼu ʼi Te Minisitelio ʼo Te Puleʼaga ʼaē ko tona kupu tāfito: “He ʼu Manatu ʼo ʼUhiga Mo Te ʼu Nusipepa.” Neʼe kua koutou fakaʼaogaʼi koa te fakatuʼutuʼu ʼaia, ʼo koutou ako te ʼu palalau faigafua ʼaia moʼo fakahā he nusipepa? He koʼe, ʼi takotou ako Tohi-Tapu faka famili ʼaē ʼe fai ʼi te vāhaʼa fuli, ʼe mole koutou toʼo he temi ke koutou akoako te ʼu palalau ʼaia?

²² Koutou Fakaʼaogaʼi Lelei Te Temi ʼAenī ʼo Te ʼAho Fakamanatu: Ohage ko te ʼapositolo ko Paulo, tou fakahā kia Sehova ʼe tou leleiʼia ʼaupito “tona meaofa e mole hona fakafuafua,” ʼo tou kau lahi ki te ʼu gāue fakalaumālie ʼaē neʼe fakatuʼutuʼu ki te ʼAho Fakamanatu ʼaenī ka hoko mai. ʼE kau ki te ʼu gāue ʼaia (1) te kau ki te ʼaho maʼuhiga tokotahi ʼo te taʼu, te toʼotoʼoga ʼo te Taumafa ʼo te ʼAliki, ʼi te Felianima, ʼaho 28 ʼo Malesio 2002; (2) te tokoni kia nātou ʼaē mole kei fai faka mafola ke nātou toe maʼu “te ʼofa ʼaē neʼe [nātou] maʼu ʼi te kamata.” (Apk. 2:4, MN; Loma 12:11); (3) te tokoni ki tatatou fānau pea mo nātou ʼaē ʼe ako Tohi-Tapu ke feala hanatou liliu ko he ʼu kaugā fagona mole heʼeki papitema; pea (4) ke lahi tatatou kau ki te gāue ʼaē ko te faka mafola ʼo te evaselio, ʼo mulimuli ki tatatou fealagia, ʼo lagi tou pionie ʼi Malesio pea mo te tahi ʼu māhina.—2 Tim. 4:5.

²³ ʼE tou faikole ke tou kau fuli ki te faka mafola ʼo te logo lelei ʼo te Puleʼaga ʼi te temi ʼo te ʼAho Fakamanatu, ke tou fakahā ai tatatou loto fakafetaʼi lahi kia meʼa fuli pe ʼaē neʼe fai e Sehova maʼa tatou.

[Talanoa ʼo te pasina 6]

Taku Polokalama Gāue Ki Te Māhina ʼo Malesio 2002

ʼAhotapu Mōnite Feliatolu Feliafā Felianima Feliaono Moeaki

ʼAho Tufa Nusipepa

ʼAho Tufa Nusipepa

ʼAho Tufa Nusipepa

ʼAho Tufa Nusipepa

ʼAho Tufa Nusipepa

ʼAHO FAKAMANATU ʼI TE ʼOSI TŌ ʼO TE LAʼĀ

ʼE Koutou lava fai koa hola e 50 ki te pionie vaeluaʼi temi ʼi Malesio?