Tou “Fakamoʼoni Kātoa Ki Te Logo Lelei”
1. Ko te ʼu logo lelei fea ʼaē ʼe tonu ke tou vaevae mo te hahaʼi?
1 ʼI te mālama ʼaē kua tahitahiga ai te maʼu ʼo he ʼu logo lelei, ʼe tou maʼu te pilivilēsio ʼaē ke tou “fakamoʼoni kātoa ki te logo lelei ʼo te ʼofa makehe ʼo te ʼAtua.” (Gāue 20:24) ʼE kau kiai ia te fakahā ki te hahaʼi kua vave fetogi anai “te ʼu ʼaho fakamuli” ʼaki he mālama foʼou mo faitotonu ʼa Sehova, ʼaē ‘kā pulihi ai anai te ʼu meʼa ʼāfea.’ (2 Tim. 3:1-5; Fakh. 21:4) ʼI te temi ʼaia, ʼe mole kei toe ʼi ai anai he mahaki. (Isa. 33:24) Ko te hahaʼi ʼaē neʼe tou ʼoʼofa mamahi ai kae kua mamate, ʼe natou hū mai anai ki tuʼa mai te ʼu falemaka fakamanatu ʼo natou toe felāveʼi mo tonatou ʼu fāmili pea mo tonatou ʼu kaumeʼa. (Soa. 5:28, 29) Ko te kele kātoa ʼe fakaliliu anai ko he palatiso taulekaleka. (Isa. 65:21-23) ʼE ko he ʼu faʼifaʼitaki ʼaia ʼo te ʼu logo lelei ʼaē ʼe tonu ke tou vaevae mo te hahaʼi!
2. He koʼē ko he ʼu faigamālie ʼi te temi ʼo te ʼAho Fakamanatu moʼo fakamafola ia te logo lelei?
2 ʼI te ʼu māhina ʼo Malesio, mo ʼApelili pea mo Maio ʼe tou maʼu ai anai te ʼu faigamālie ke tou tala ia te ʼu logo lelei ʼaia. ʼI te ʼu māhina ʼaia, ʼe lau lelei te lagi pea mo loaloaga te ʼu ʼaho ʼi te ʼatu ʼu koga meʼa ʼo te kele, ʼo feala ai ke lahi age tatatou kau ki te minisitelio. Tahi ʼaē meʼa, ko te ʼAho Fakamanatu ʼaē ko te toʼotoʼoga maʼuhiga ʼaupitō ʼaia ʼo te taʼu, ʼe fai anai ʼi te mālamanei kātoa ʼi te ʼosi tō ʼo te laʼā ʼi te Moeaki, ʼaho 22 ʼo Malesio. ʼE ko te temi nei ʼaē ke tou kamata fai he ʼu fakatuʼutuʼu ke lahi age tatatou gāue.
3. Koteā ʼaē kā tokoni mai anai ke lahi age te gāue ʼo totatou fāmili?
3 Te Selevisi Pioniē Vaeluaʼi Temi: ʼE feala koa ke kotou fakatuʼutuʼu ʼi takotou polokalama ke kotou toʼo te selevisi pioniē vaeluaʼi temi ʼi he māhina e tahi peʼe lua, peʼe ʼi te ʼu māhina ʼaia e tolu? He koʼē ʼe mole kotou fakaʼaogaʼi he temi ʼi takotou ako fakafāmili, ke kotou vakavakaʼi ia te faʼahi ʼaia? Kapau ʼe felagolagoleleiʼaki te fāmili, pea ko te toko tahi ʼi te fāmili peʼe laka atu ʼe feala ke natou toʼo te selevisi pioniē vaeluaʼi temi. (Taag. 15:22) Kotou palalau ki te faʼahi ʼaia ʼi te faikole, pea kotou sisio ai anai pe tapuakinaʼi feafeaʼi e Sehova takotou ʼu faiga. (Taag. 16:3) Tatau aipē mo kapau ʼe mole feala ke toʼo e he tahi ʼi te fāmili ia te selevisi pioniē vaeluaʼi temi, kae ko te fāmili kātoa ʼe feala ke natou fakatuʼutuʼu ke lahi age tanatou kau ki te minisitelio, ʼo natou kaugā gāue mo nātou ʼaē ʼe pioniē.
4. Kapau ʼe tou gāue ʼaho kātoa, ko te ʼu fakatuʼutuʼu fea ʼaē ʼe feala ke tou toʼo te selevisi pioniē vaeluaʼi temi?
4 Kapau ʼe kotou gāue ʼaho kātoa, ʼe feala pē hakotou toʼo te selevisi pioniē vaeluaʼi temi mo kapau ʼe kotou fai he polokalama ʼe lelei. ʼE lagi feala ke kotou fakaʼaogaʼi tokotou temi kai ke kotou fai fakamafola ai. Peʼe feala ke kotou kole hakotou telituale ʼe ovi atu ki tokotou ʼapi peʼe ki takotou fale gāue, pea kotou kau ai ki te minisitelio ʼi he hola kātoa peʼe laka atu ʼi muʼa pe ʼi te hili ʼo takotou gāue. ʼE lagi feala ke hilifaki he tahi temi ki takotou polokalama, mo kapau ʼe kotou tuku te ʼu gāue ʼaē ʼe mole faʼa maʼuhiga ki he tahi age māhina, pea mo kotou kau ki te minisitelio ʼaho kātoa ʼi te ʼu fakaʼosi vāhaʼa. ʼE feala ki ʼihi ke natou toʼo honatou ʼaho mālōlō e tahi peʼe lua moʼo fai fakamafola.
5. ʼE kotou lava tokoni feafeaʼi ki he tahi kua matuʼa peʼe māʼimoa ke ina toʼo te selevisi pioniē vaeluaʼi temi?
5 Kapau kua koutou mātutuʼa, māʼimoa peʼe vaivavai, ʼe feala ke kotou toʼo te selevisi pioniē vaeluaʼi temi mo kapau ʼi te ʼaho fuli ʼe kotou fai fakamafola ʼi he kiʼi temi nounou. Kotou kole kiā Sehova ke ina foaki atu ia “te mālohi ʼaē ʼe fakalaka ʼi te mālohi māhani.” (2 Ko. 4:7) Neʼe feala ki te tuagaʼane ke ina toʼo te selevisi pioniē vaeluaʼi temi ʼi tona taʼu 106! ʼAki te tokoni ʼo tona fāmili fakakilisitiano pea mo ʼihi age ʼi te kōkelekāsio, neʼe fai fakamafola ʼi te ʼu ʼapi, mo fai ʼaʼahi, pea mo kau ki te ʼu ako Tohi-Tapu, pea mo te tahi atu ʼu faʼahi ʼo te minisitelio. Neʼe tokoni ki te ʼu hahaʼi e toko hogofulu ke kamata hanatou ʼu ako fakatohi-tapu. ʼE ina ʼui fēnei: “ ʼI taku manatuʼi te pilivilēsio taulekaleka ʼaē neʼe au maʼu ke au toʼo te selevisi pioniē vaeluaʼi temi, ʼe fonu toku loto ʼi te ʼofa pea mo he lotofakafetaʼi kiā Sehova, mo tona ʼAlo, pea mo Tona kautahi ʼofa. ʼE au fia ʼui moʼoni ‘mālo Sehova!’ ”
6. ʼE lava feafeaʼi ki he kau tūpulaga kua papitema kae kei natou ako ke natou toʼo te selevisi pioniē vaeluaʼi temi?
6 Kapau ko koe ko he tūpulaga kua ke papitema kae kei ke ako, ʼe toe feala mo koe ke ke toʼo te selevisi pioniē vaeluaʼi temi. Ohagē ko nātou ʼaē ʼe gāue ʼaho kātoa, ʼe mahino ia ʼe ke ʼuluaki fakatuʼutuʼu anai ke ke fakaʼaogaʼi te ʼu fakaʼosi vāhaʼa ke ke kau ki te minisitelio. ʼE lagi toe feala ke ke fai fakamafola ʼi he hola kātoa peʼe laka atu ʼi ʼihi ʼaho, ʼi tau ʼosi ako. ʼE ʼi ai koa he ʼu ʼaho mālōlō ʼe feala ke ke fakaʼaogaʼi ke ke kau ai ki te minisitelio? Kapau ʼe ke fia toʼo te selevisi pioniē vaeluaʼi temi, palalau ki tau ʼu mātuʼa ʼo ʼuhiga mo te faʼahi ʼaia.
7. Koteā ʼaē ʼe lagi feala ke fai e te kau tagata ʼāfea, moʼo fakatuputupu ia te fiafia ʼi te minisitelio lolotoga ia te temi ʼo te ʼAho Fakamanatu?
7 Fakatuputupu Ia Te Fiafia: ʼE feala ke fakatuputupu e te kau tagata ʼāfea ia te fiafia ʼi te kōkelekāsio ʼaki tanatou faʼifaʼitaki. (1 Pet. 5:2, 3) ʼE lagi natou fakatuʼutuʼu he tahi ʼu fono ki te fai fakamafola maʼa nātou ʼaē ʼe kamata uhuuhu tanatou minisitelio, peʼe ʼi te hili ʼo te ako peʼe ko te gāue. ʼE tokaga anai ia te taupau ki te gāue ke ina hinoʼi he ʼu tehina ʼe fakapotopoto moʼo fai te ʼu fono ʼaia pea ke feʼauga mo te ʼu telituale, te ʼu nusipepa pea mo te ʼu tohi ki te ʼu māhina ʼaia ʼaē kā fai ai te gāue makehe.
8. Koteā te ako ʼe tou maʼu mai te ʼu fakatuʼutuʼu neʼe fai ʼi te tahi kōkelekāsio?
8 ʼI te tahi kōkelekāsio, ʼi ni ʼu māhina ki muʼa atu, neʼe kamata fakalotomālohiʼi e te kau tagata ʼāfea ia te ʼu tehina mo tuagaʼane, ke natou toʼo ia te selevisi pioniē vaeluaʼi temi. ʼI te vāhaʼa fuli, neʼe natou fakahā ki te kōkelekāsio pe ko te kau fai fakamafola ʼe tokofia ʼaē neʼe natou toʼo ia te selevisi pioniē vaeluaʼi temi. Ko nātou ʼaē neʼe natou fia fakatuputupu ia tanatou kau ki te minisitelio, neʼe natou falala ai ʼe lahi anai tanatou gāue mo te kau pioniē. Neʼe fakatuʼutuʼu te tahi ʼu fono ki te fai fakamafola ʼi te kei hegihegi pea mo te afiafi. Ko te toko 53 neʼe natou toʼo te selevisi pioniē vaeluaʼi temi ʼi ʼApelili, ʼe ko te teitei vaelua pē ʼo te kōkelekāsio!
9. He koʼē ko te temi ʼo te ʼAho Fakamanatu ʼe lelei maʼa nātou ʼaē kua feala ke natou kamata fakamafola ia te logo lelei?
9 Tou Tokoni Ki ʼIhi Ke Natou Fai Fakamafola: Kā kua feala ki te ʼu hahaʼi ʼaē kei foʼou pea mo te kau tūpulaga ke natou liliu ʼo kaugā fagona, pea ʼe feala hanatou kaugā gāue mo he kau fai fakamafola kua natou māhani ʼi te minisitelio. ʼE feala ke hoko ia te faʼahi ʼaia lolotoga te temi ʼo te ʼAho Fakamanatu, ʼi te temi ʼaē kā lahi age anai ia te gāue ʼa te tokolahi ʼi te kōkelekāsio. ʼE ʼi ai koa hakotou ako fakatohi-tapu ʼe tuputupu lelei, kua ina fakaʼalutahi tona maʼuli mo te ʼu lēkula faitotonu ʼa Sehova? ʼE ʼi ai koa hakotou ʼu fānau ʼe natou tuku he faʼifaʼitaki ʼe lelei, mo tuputupu lelei kae ʼe mole heʼeki kaugā fagona? Kapau kua natou fakahā atu ia tanatou kua fia kaugā fagona pea ʼi takotou fakasiosio kua natou fealagia ki te gāue ʼaia, pea kotou fakahā ki he tagata ʼāfea. Ko te taupau pelesitā ʼe ina hinoʼi anai he ʼu tagata ʼāfea e toko lua ke nā felōgoi ki te faʼahi ʼaia mo koutou pea mo takotou tamasiʼi peʼe ko ia ʼaē ʼe ako.
10. Koteā ʼaē ʼe feala ke fai e te ʼu tagata ʼāfea moʼo tokoni kiā nātou ʼaē ʼe mole kei kau ki te ʼu gāue ʼo te kōkelekāsio?
10 Ko te ʼu māhina kā hoko mai, ʼe toe lelei foki maʼa nātou ʼaē ʼe mole kei kau ki te ʼu gāue ʼo te kōkelekāsio, ke natou toe kau kiai. ʼE tonu ki te ʼu taupau ki te ʼu Ako Tohi pea mo ʼihi age tagata ʼāfea ke natou faiga lahi ke natou ʼaʼahi ia nātou ʼaia, pea mo natou fakaafe ke natou gāue mo nātou ʼi te minisitelio. Kapau kua fualoa tanatou mole kei kau ki te ʼu gāue ʼo te kōkelekāsio, pea ʼe fai palalau anai ia te ʼu tagata ʼāfea e toko lua mo nātou ʼaia moʼo vakaʼi pe kei natou mulimuli ki te ʼu lēkula ʼo ʼuhiga mo te fai fakamafola.—km 11/00 p. 3.
11. Neʼe fakahā feafeaʼi e te ʼAtua tona “ ʼofa makehe”?
11 Tou Teuteu Ki Te ʼAho Fakamanatu: Ko te totogi ʼaē neʼe foaki e Kilisito, ʼe ko te fakahā lahi ʼaia ʼo “te ʼofa makehe ʼo te ʼAtua.” (Gāue 20:24) Ko te ʼu toko lauʼi miliona hahaʼi loto fakafetaʼi ʼi te mālamanei kātoa ʼe natou fakatahi anai moʼo Fakamanatu ia te mate ʼo Kilisito ʼi te Moeaki, ʼaho 22 ʼo Malesio, ʼi te ʼosi tō ʼo te laʼā. ʼE tou fia fakaafe pea mo tokoni ki te hahaʼi loto fakamālotoloto ke natou kau ki te toʼotoʼoga maʼuhiga ʼaia, ʼaē kā fakamoʼoni ai ki te ʼofa makehe ʼo Sehova ki te mālamanei.
12. Ko ai ʼaē ʼe tonu ke kotou fakaafe ki te ʼAho Fakamanatu?
12 Kotou fai he lisi ʼo tohi kiai te ʼu higoa ʼo nātou ʼaē ʼe kotou fia fakaafe. ʼE mahino ia ʼe kau anai kiai tokotou ʼu kāiga, mo tokotou ʼu vāhaʼa fale, tokotou ʼu feʼilo ʼi te fale gāue peʼe ʼi te faleako, ia nātou ʼaē neʼe ako mo koutou ʼi te temi muʼa pea mo nātou ʼi te temi nei, pea mo nātou ʼaē ʼe kotou ʼaʼahi tuʼumaʼu. Kapau ʼe faifehuʼi atu ʼihi kau fakaafe ʼo ʼuhiga mo te ʼAho Fakamanatu, ʼe lagi ʼaoga anai moʼo tali kiai ia te ʼalatike ia Te Taumafa ʼo Te ʼAliki ʼaē ʼe tuʼu ʼi te kupu tāfito Te Tahi ʼu Fakamahino, ʼi te pāsina 206 ki te 208 ʼo te tohi Te Ako Mai Te Tohi-Tapu. ʼE feala ai anai he kamata ʼo he ako fakatohi-tapu, heʼe kotou maʼu ai te faigamālie ke kotou fakahā age te tohi ʼaē ʼe kotou fakaʼaogaʼi moʼo fai te ʼu ako fakatohi-tapu.
13. Neʼe tapuakinaʼi feafeaʼi e Sehova ia te ʼu faiga ʼa te ʼu fai fakamafola e toko lua ʼi tanā fakatuʼutuʼu ke nā fakaafe niʼihi ki te ʼAho Fakamanatu?
13 Ko te tuagaʼane neʼe ina fai te lisi ʼo ina tohi kiai te ʼu higoa e 48 ʼo tona ʼu kāiga ʼaē kā ina fakaafe. ʼI tana kua ʼosi fakaafe nātou, neʼe ina haluʼi tonatou ʼu higoa pea mo ina tohi ia te ʼaho ʼaē neʼe ina fakaafe ai ia nātou. ʼI meʼa fakafiafia kiā ia ʼi hana sio neʼe ʼomai ki te ʼAho Fakamanatu ia te toko 26 hahaʼi neʼe ina fakaafe! Ko te tehina ʼe ʼi ai tona fale koloa, neʼe ina fakaafe te tagata neʼe pātele ki muʼa atu, pea neʼe gāue maʼa ia. Neʼe kau te tagata ki te ʼAho Fakamanatu pea neʼe ina ʼui fēnei ki muli age: “Neʼe lahi age te ʼu meʼa ʼaē neʼe au ako ʼo ʼuhiga mo te Tohi-Tapu ʼi he hola kātoa, ʼi te ʼu taʼu e 30 ʼaē neʼe au Lotu Katolika ai.” ʼI te hili pē ʼo te ʼAho Fakamanatu, neʼe ina tali ke fai hana ako ʼaki te tohi Te Ako Mai Te Tohi-Tapu.
14. Koteā te tufa fakamālamanei kā kamata anai ʼi te ʼaho 1 ʼo Malesio?
14 Te Tufa ʼo Te Pepa Fakaafe: ʼO kamata atu ʼi te Moeaki, ʼaho 1 ʼo Malesio ʼo aʼu ki te ʼaho 22 ʼo Malesio, ʼe tufa anai ʼi te mālamanei kātoa ia te pepa fakaafe makehe ki te ʼAho Fakamanatu. ʼE tou fia kau fuli anai ki te tufa maʼuhiga ʼaia. ʼE lelei age hatatou foaki ia te pepa fakaafe kiā ia ʼo te ʼapi ʼi hatatou tuku ʼi te lalo matapā. Kae kapau ʼe lahi tokotou telituale, ʼe lagi fai anai e te ʼu tagata ʼāfea te tonu ʼaē ke tuku te ʼu pepa fakaafe ʼi te ʼu ʼapi ʼaē ʼe lāvaki, kae ʼaua naʼa tokagaʼi fau e te hahaʼi. ʼI te ʼu fakaʼosi vāhaʼa ʼe tou toe tufa anai mo te ʼu nusipepa.
15. ʼE tou lava fakahā feafeaʼi ia te pepa fakaafe ki te ʼAho Fakamanatu?
15 Mai tona ʼaluʼaga ʼaē ʼe fakatuʼakoi ia te temi ʼaē ke tou tufa ai te ʼu pepa fakaafe, ʼe lelei ke nounou tatatou ʼu ʼuluaki palalau. Kotou aga fakakaumeʼa pea mo loto fiafia. ʼE feala hakotou ʼui fēnei: “ ʼE matou fia fakaafe koe, mo tou fāmili, pea mo tou ʼu kaumeʼa ki te toʼotoʼoga maʼuhiga kā fai anai ʼi te ʼaho 22 ʼo Malesio. Koʼenī tou pepa fakaafe. ʼE ke maʼu ai anai te tahi ʼu fakamahino ki te fakaafe ʼaē ʼe matou fai atu.” ʼE lagi fia fai ʼe ia ʼo te ʼapi hana ʼu fehuʼi. Peʼe lagi ʼe ina tali ia te fakaafe pea mo ina ʼui atu ʼe haʼu anai ki te ʼAho Fakamanatu. Kotou tohi ia tona higoa pea kotou fakatuʼutuʼu ke kotou ʼaʼahi ia ia.
16. Koteā te meʼa ʼaē neʼe hoko ʼo hā mai ia te maʼuhiga ʼo te tufa ki te hahaʼi ʼo te telituale ia te pepa fakaafe ki te ʼAho Fakamanatu?
16 ʼI te taʼu ʼaenī kua hili atu, ko te tagata sōlia neʼe ina maʼu ʼi tona muʼa matapā ia te pepa fakaafe ki te ʼAho Fakamanatu. Neʼe fakatuʼutuʼu ke kau kiai kae neʼe tonu ke fakagafua age muʼa ʼe tona ofisie pule. ʼI tana fakahā age ia te pepa fakaafe ki te ofisie pule, neʼe mole gū ia te ofisie pule pea neʼe ina ʼui leva, ko tana ʼu mātuʼa ko te ʼu Fakamoʼoni ʼa Sehova pea neʼe ko he agamāhani kiā ia tana ʼalu mo nāua ki te ʼu fono. Neʼe fakagafua age e te ofisie pule ke ʼalu ia te tagata sōlia ki te ʼAho Fakamanatu, pea neʼe toe ʼalu mo ia ki te fakaafe ʼaia.
17. ʼE tou fakahā feafeaʼi neʼe mole ʼalunoa tatatou tali ia te ʼofa makehe ʼo te ʼAtua?
17 Tou Loto Fakafetaʼi: ʼI te kua fakaovi mai ʼo te temi ʼo te ʼAho Fakamanatu, ʼofa pē ke tou tahi fakakaukauʼi ia te ʼofa makehe ʼo Sehova ʼaē kiā tātou. Neʼe tohi fēnei e te ʼapositolo ko Paulo: “ ʼE matou toe kole mamahi atu kiā koutou ke ʼaua naʼa ʼalunoa takotou tali ia te ʼofa makehe ʼo te ʼAtua.” (2 Ko. 6:1) ʼE feafeaʼi hatatou fakahā ʼe mole ʼalunoa tatatou tali ia te ʼofa makehe ʼo te ʼAtua? Neʼe tohi fēnei e Paulo: “Kae, ia meʼa fuli ʼe matou fakahā ko mātou ko te ʼu minisi ʼo te ʼAtua.” (2 Ko. 6:4) Koia, ʼe tou fakahā tatatou loto fakafetaʼi ki te meʼa ʼofa ʼo Sehova ʼaki hatatou fai he aga ʼe lelei pea mo tou faʼafai ʼi te fakamafola ʼo te logo lelei. ʼE tou maʼu anai ʼi te temi ʼo te ʼAho Fakamanatu ʼaenī, te faigamālie ke lahi age tatatou gāue, ʼo tou fakamoʼoni kātoa ai ki te logo lelei.
[Talanoa ʼo te pasina 3]
Ko Ai ʼAē ʼe Feala Ke Ina Toʼo Te Selevisi Pioniē Vaeluaʼi Temi?
◼ Te ʼu fāmili.
◼ Nātou ʼaē ʼe gāue temi kātoa ʼi te mālama.
◼ Nātou ʼaē kua mātutuʼa pea mo māʼimoa.
◼ Nātou ʼaē ʼe kei ako.
[Talanoa ʼo te pasina 4]
Kā Kotou Tufa Ia Te ʼu Pepa Fakaafe ʼo Te ʼAho Fakamanatu:
◼ Ke nounou takotou ʼu palalau; kotou palalau ʼaki he loto fiafia.
◼ Kotou tohi te higoa ʼo he tahi neʼe fia logo pea kotou ʼaʼahi ia ia.
◼ Kotou tufa ia te ʼu nusipepa ʼi te ʼu fakaʼosi vāhaʼa.