Koutou Haga Tala Te ʼu Gāue Fakaofoofo ʼa Sehova
1. Koteā te ʼu gāue fakaofoofo ʼa Sehova ʼaē ʼe koutou leleiʼia tāfito?
1 ʼE mole he tahi ʼe tatau mo totatou ʼAtua lahi ko Sehova! Neʼe tohi fēnei e Tavite: “Neʼe lahi te ʼu gāue neʼe ke fai e koe totonu, Ê Sehova toku ʼAtua, ei, tau ʼu gāue fakaofoofo pea mo tau ʼu manatu kia mātou; ʼe mole he tahi ʼe tatau mo koe.” (Pes. 40:5) ʼI te ʼu gāue fakaofoofo ʼa te ʼAtua, ʼe kau ai te fakatupu ʼo te ʼatulaulau, te Puleʼaga Faka Mesianike, te ʼu gāue faka lotoʼofa ki tana hahaʼi, pea mo te fai faka mafola ʼi te malamanei katoa. (Pes. 17:7, 8; 139:14; Tan. 2:44; Mat. 24:14) Ko te ʼofa kia Sehova pea mo te loto fakafetaʼi kia meʼa fuli ʼaē neʼe ina fai maʼa tatou, ʼe ina uga tatou ke tou palalau ki te hahaʼi ʼo ʼuhiga mo ia. (Pes. 145:5-7) Lolotoga te ʼu māhina ʼo Malesio, ʼApelili, pea mo Maio, ʼe tou maʼu anai te faigamālie ke tou fai lahi age ia te faʼahi ʼaia.
2. Koteā te ʼu lelei ʼe tou maʼu takitokotahi ʼi te selevisi pionie vaeluaʼi temi?
2 Tou Pionie Vaeluaʼi Temi: ʼE feala koa hakotou fakatuʼutuʼu ʼi te ʼu māhina makehe ʼaia ʼo te gāue, ke koutou fakaʼaogaʼi he ʼu hola e 50 ʼi te minisitelio, lolotoga he māhina katoa peʼe laka age? ʼE mahino ia ʼe ko he meʼa lelei anai ke koutou fai he ʼu fetogi ʼi te ʼu meʼa ʼaē ʼe koutou fai māhani. (Ef. 5:16) Ko te tokolahi neʼe nātou fakatokagaʼi, ko te selevisi pionie vaeluaʼi temi ʼe tokoni kia nātou ke toe lelei age tonatou minisitelio. ʼE mole kei nātou matataku ʼi te ʼu matapā, pea ʼe nātou fakaʼaogaʼi lahi ia te Tohi-Tapu. Ko te fakaʼaogaʼi lahi ʼo te temi ʼi te minisitelio, ʼe ina faka faigafua hanatou haga tokoni ki te hahaʼi ʼaē neʼe nātou fia logo ki te fai faka mafola, pea ko ʼihi ʼaē neʼe mole hanatou ʼu ako Tohi-Tapu, neʼe nātou maʼu hanatou ako ʼi tanatou selevisi pionie vaeluaʼi temi. ʼE ko he gāue fakafiafia te selevisi pionie vaeluaʼi temi, koteʼuhi ʼe kita faiga mālohi moʼo tokoni ki te hahaʼi.—Gaue 20:35.
3. Koteā ʼaē neʼe fai e ʼihi ke feala hanatou pionie vaeluaʼi temi logola tonatou ʼu ʼaluʼaga faigataʼa?
3 ʼAua naʼa koutou foimo ʼui ʼe mole feala hakotou pionie ʼuhi ko takotou ʼu ʼaluʼaga takitokotahi. Ko te tagata ʼāfea neʼe pionie vaeluaʼi temi ʼi te taʼu kua ʼosi, kae ʼe gāue temi katoa pea ʼe ʼi ai tana ʼu fānau e toko lua. Neʼe fakahoko feafeaʼi e te tēhina tana selevisi? ʼE gāue lolotoga te vāhaʼa, koia neʼe ina fakatuʼutuʼu ke fai faka mafola fualoa ʼi te ʼu fakaʼosi vāhaʼa, ʼo kamata fai faka mafola ʼi te ala ʼi te ʼu Moeaki, ʼi te hola 7 uhu. Ko te tokolahi neʼe nātou hage ko te tēhina, neʼe nātou toʼo mo nātou te selevisi pionie, pea neʼe nātou felagolagoʼaki pea mo fefakaloto mālohi ʼaki. ʼI te tahi kokelekasio, ko te tuagaʼane finematuʼa ʼe taʼu 99 neʼe pionie ʼi te māhina ʼo Maio, he neʼe fakaafe ia ia e tana taʼahine ke nā pionie fakatahi. Ko ʼihi ʼi te kokelekasio, neʼe nātou tokoni ki te tuagaʼane finematuʼa ʼaia ʼo toho ia ia ʼi tona hekaʼaga toho, ʼi te fai faka mafola ʼi te ʼu ʼapi pea mo te fai ʼo te ʼu ako Tohi-Tapu. Neʼe ina fai mo te fai faka mafola ʼi te telefoni, ʼi te ala, pea mo faitohi. ʼE faka tui papau e te tuagaʼane ʼaia, neʼe mole ina fai te gāue ʼaia ʼaki tona mālohi ʼoʼona, kae ʼaki pe te lagolago ʼa Sehova.—Isa. 40:29-31.
4. Koteā te ʼu faʼahi ʼaē ʼe tonu ke tou vakaʼi mokā tou fai he polokalama ke tou pionie vaeluaʼi temi?
4 Koutou vakaʼi te polokalama ʼaē ʼe lelei kia koutou, ʼo mulimuli ki tokotou ʼu ʼaluʼaga. Ko te ʼu polokalama faigafua ʼaē ʼe tuʼu ʼi te pepa ʼaenī ʼe lagi tokoni anai kia koutou. ʼE koutou gāue temi katoa koa, peʼe kei koutou ako? E lagi lelei age ke koutou fai tāfito he polokalama ki te ʼu fakaʼosi vāhaʼa. Kapau ʼe koutou mahamahaki pea ʼe mole feala hakotou fai he ʼu ʼaho loaloaga ʼi te minisitelio, pea e lagi lelei age ke koutou fai he polokalama ke koutou fai he ʼu kiʼi temi nounou ʼi te ʼaho fuli. Koutou palalau mo ʼihi ki takotou fia pionie vaeluaʼi temi, heʼe lagi feala anai mo nātou ke nātou fai te fakatuʼutuʼu ʼaia.
5. Koteā te ʼu fakatuʼutuʼu ʼaē ʼe lava fai e te kau tūpulaga ki te ʼu māhina ʼo Malesio, ʼApelili pea mo Maio?
5 ʼE Feala Mo Te Kau Tūpulaga Ke Nātou Pionie Vaeluaʼi Temi: ʼE fiafia ia Sehova mokā palalau te kau tūpulaga ki tana ʼu gāue fakaofoofo. (Pes. 71:17; Mat. 21:16) Kapau ʼe kei koutou tūpulaga pea kua koutou papitema, e lagi feala hakotou pionie vaeluaʼi temi lolotoga he māhina, ʼi he māhina ʼe ʼi ai he temi mālōlō ʼo te ako. Kapau ʼe mole feala hakotou pionie vaeluaʼi temi, pea ʼe feala koa hakotou fai he ʼu fakatuʼutuʼu makehe moʼo fakalahi pea mo hikihiki takotou kau ki te minisitelio lolotoga te ʼu māhina ʼaia? Kapau ʼe mole heʼeki koutou kaugā fagona, kae ʼe koutou kaugā ʼolo mo takotou ʼu mātuʼa ki te fai faka mafola, pea ʼe lagi ko he temi lelei ʼaia ke koutou faigaʼi ki te faʼahi ʼaia. ʼAua naʼa koutou manatu ʼe tonu ke koutou popoto ʼosi ʼi te tali ki te ʼu fehuʼi faka Tohi-Tapu, peʼe tonu ke koutou popoto ohage ko te hahaʼi lalahi ʼaē kua papitema. ʼE koutou mahino koa ki te ʼu akonaki tāfito ʼo te Tohi-Tapu? ʼE koutou mulimuli koa ki te ʼu pelesepeto ʼa te Tohi-Tapu ʼo ʼuhiga mo te ʼu aga ʼaē ʼe tonu ke fai? ʼE koutou fia liliu koa ko he Fakamoʼoni ʼa Sehova? Kapau koia, pea koutou palalau mo takotou ʼu mātuʼa ʼo ʼuhiga mo te faʼahi ʼaia, ke nātou kole age ki te kau tagata ʼāfea ke nātou palalau mo koutou peʼe ʼalutahi tokotou maʼuli mo te ʼu fakamaʼua ʼa te Tohi-Tapu.—Vakaʼi te tohi Notre ministère, ʼi te pasina 98 ki te 99.
6. ʼE tou lava tokoni feafeaʼi ki te kau ako Tohi-Tapu ke nātou liliu ko he kau fai faka mafola ʼo te logo lelei?
6 Tou Tokoni Ki ʼIhi Ke Nātou Fai Faka Mafola: Ko te kau ako Tohi-Tapu ʼaē ʼe tuputupu, ʼe feala hanatou faiga ke feala hanatou kau mo tatou ki te fai faka mafola ʼi te ʼu māhina ka hoko mai ki te gāue makehe. Kapau ʼe ʼi ai hakotou ako Tohi-Tapu ʼe tuputupu lelei, pea koutou kumi tokoni ki te tagata taupau ʼo takotou ako tohi, peʼe ko te tagata taupau ki te gāue. ʼE feala ki he tahi ia nāua ke kaugā fai mo koutou te ako, ke feala hana sio peʼe kua tuputupu feafeaʼi te ako Tohi-Tapu. Kapau ko ia ʼaē ʼe koutou akoʼi kua ʼalutahi tona maʼuli mo te ʼu fakamaʼua ʼa te Tohi-Tapu, pea ʼe fia liliu ko he kaugā fagona, pea ʼe fakatuʼutuʼu anai e te tagata taupau pelesita ke ʼolo atu he ʼu tagata ʼāfea e lua ʼo fai palalau mo koutou pea mo takotou ako. (Vakaʼi Te Tule Leʼo Fakafalani ʼo te ʼaho 15 ʼo Novepeli 1988, ʼi te pasina 17.) Kapau kua tali ke kaugā fagona, pea koutou akoako ia ia ki te gāue ʼi te minisitelio.
7. Koteā ʼaē ʼe feala ke fai moʼo tokoni kia nātou ʼaē ʼe mole kei faka mafola pea mo nātou ʼaē neʼe mole fai faka mafola ʼi he ʼu māhina?
7 ʼE faiga tāfito anai e te kau tagata taupau ʼo te ʼu ako tohi ke nātou vakaʼi peʼe ko ai ʼi tanatou ako tohi ʼe mole kei fai faka mafola, peʼe tahitahiga tana kau ki te fai faka mafola ʼi he ʼu māhina. Koutou fakaafe nātou ke koutou kaugā gāue mo nātou ʼi te minisitelio. Kapau kua fualoa tanatou mole kei fai faka mafola, pea ʼe lelei age ke ʼuluaki palalau muʼa he ʼu tagata ʼāfea e lua mo nātou, ke nātou ʼiloʼi peʼe kei feala peʼe kailoa ke nātou kau ki te gāue. (Vakaʼi Te Tali Ki ʼAkotou ʼu Fehuʼi, ʼi Te Minisitelio ʼo Te Puleʼaga ʼo Novepeli 2000.) Ko te loto faʼafai ʼo te kokelekasio lolotoga te ʼu māhina ʼaia ʼo te gāue makehe, ʼe ina fakaloto mālohiʼi anai ia nātou ʼaia ke nātou toe kau tuʼumaʼu ki te minisitelio.
8, 9. Koteā ʼaē ʼe lava fai e te kau tagata ʼāfea moʼo fakatupu he fakaloto mālohi ki te gāue makehe?
8 Koutou Teuteu Atu ʼi Te Temi Nei Ke Fakatuputupu Takotou Gāue: Kau tagata ʼāfea, koutou teuteu atu ʼi te ʼu ʼaho ʼaenī ke koutou fakaloto mālohiʼi tokotou kokelekasio ki te selevisi pionie vaeluaʼi temi. ʼO ʼuhiga mo te faʼahi ʼaia, ʼe feala hakotou fai he ʼu palalau fakaloto mālohi pea mo koutou tuku he faʼifaʼitaki lelei. (1 Pet. 5:3) Neʼe tokofia te kau pionie vaeluaʼi temi ʼo tokotou kokelekasio ʼi te ʼu taʼu ʼaenī kua ʼosi? ʼE feala koa ke toe tuputupu age ʼi te taʼu ʼaenī? Ko te ʼu tagata taupau ʼo te ʼu ako tohi pea mo tanatou kau lagolago, ʼe tonu ke nātou kumi he ʼu ʼaluʼaga ke nātou fakaloto mālohiʼi ai te kūtuga katoa ke nātou fakatuputupu tanatou gāue. Ko te ʼu tagata taupau ki te gāue ʼe nātou fai anai he ʼu fakatuʼutuʼu ke fai he tahi ʼu fono fai faka mafola ʼi te vāhaʼa. Koutou tala fakatomuʼa ki te kokelekasio te ʼu fakatuʼutuʼu ʼaē ka fai. Koutou vakaʼi ke takitaki e he ʼu tēhina faiva ia te ʼu fono fai faka mafola ʼaia, pea ke kamata ʼi tonatou temi totonu pea mo ʼosi tautonu. (Vakaʼi Te Tali Ki ʼAkotou ʼu Fehuʼi ʼo Te Minisitelio ʼo Te Puleʼaga ʼo Sepetepeli 2001.) ʼE toe maʼua foki ki te tagata taupau ki te gāue ke ina vakaʼi ke feʼauga te telituale, mo te ʼu nusipepa pea mo te ʼu tohi.
9 ʼI te taʼu ʼaenī kua ʼosi, ko te kau tagata ʼāfea ʼo te kokelekasio, neʼe nātou kamata talanoa fakatomuʼa ʼaki he loto fiafia pea mo he fakaloto mālohi, ki te selevisi pionie vaeluaʼi temi, pea tokolahi ia nātou neʼe nātou tohi tanatou pepa pionie. Neʼe nātou fakatuʼutuʼu te tahi ʼu fono ki te fai faka mafola—ko te tahi ʼi te hola 5 vaelua uhu, ki te fai faka mafola ʼi te ala, ko te lua ʼi te hola 3 hili hoʼatā, maʼa nātou ʼaē ʼe ʼosi mai te ako, pea ko te tolu ʼi te hola 6 afiafi, maʼa nātou ʼaē ʼe ʼosi mai tanatou gāue. Neʼe hilifaki kiai mo te tahi ʼu fono fai faka mafola e tolu, ʼi te ʼu Moeaki. Pea neʼe maʼu ai ʼi te kokelekasio te ʼu pionie vaeluaʼi temi e 66 ʼi ʼApelili.
10. Koteā ʼaē ʼe lava fai e te famili moʼo fakalahi age tanatou gāue?
10 He koʼe koa ʼe mole koutou vakaʼi he temi ʼi takotou ako faka famili, ke koutou fai he ʼu fakatuʼutuʼu ʼe fealagia, ki te ʼu māhina ʼaē ka hoko mai? ʼAki he felagolagoʼaki pea mo he fakatuʼutuʼu lelei, ʼe feala anai ki ʼihi peʼe ko te famili katoa, ke nātou pionie vaeluaʼi temi. Kapau ʼe mole feala te faʼahi ʼaia, pea koutou fai he ʼu fakatuʼutuʼu ke koutou fakatuputupu takotou gāue, ʼo fakalahi age takotou temi fai faka mafola, peʼe koutou ʼolo ʼo fai faka mafola ʼi te tahi ʼu lakaga. Koutou vakaʼi faka famili ia te faʼahi ʼaia ʼi te faikole, pea koutou falala ko Sehova ʼe ina tapuakina anai takotou ʼu faiga.—1 Soa. 3:22.
11. (a) Koteā te ʼu meʼa fakaofoofo ʼaē neʼe faka fealagia e te sakilifisio ʼo Kilisito? (b) Ko te hola fia pea mo te fale fono fea ʼaē ka fai ai te ʼAho Fakamanatu ʼo tokotou kokelekasio?
11 Te Gāue Fakaofoofo Tāfito ʼa Sehova: Ko te meʼa ʼofa lahi tāfito ʼa Sehova, ʼe ko te totogi ʼaē neʼe fai ʼaki te sakilifisio ʼo tona ʼAlo maʼa tatou. (1 Soa. 4:9, 10) Ko te totogi ʼaia ʼaki te sakilifisio, ʼe ko he fakatuʼutuʼu ʼe totonu moʼo hāofaki te malamanei mai te agahala pea mo te mate. (Loma 3:23, 24) Ko te toto ʼaē neʼe liligi e Sesu, neʼe ko he fakamoʼoni ʼaia ki te fuakava foʼou, ʼo feala ai ki te hahaʼi heʼe haohaoa ke nātou liliu ko he ʼu foha ʼo te ʼAtua, ʼaki te ʼamanaki ʼaē ke nātou hau ʼi te Puleʼaga ʼaē ʼi selo. (Sel. 31:31-34; Mko. 14:24) Ko te meʼa ʼaē ʼe maʼuhiga tāfito, ko te tāpuhā ʼo te huafa ʼo Sehova ʼaki te fakalogo katoa ʼa Sesu. (Teu. 32:4; Taag. 27:11) ʼI te ʼAhotapu ʼaho 4 ʼo ʼApelili, ʼi te ʼosi tō ʼo te laʼā, ʼe fai anai ʼi te malamanei katoa, te ʼAho Fakamanatu ʼo te mate ʼo Kilisito.
12. Ko tatatou kau ki te Taumafa ʼo te ʼAliki, ʼe fua lelei feafeaʼi anai kia nātou foʼou?
12 Ko te fai ʼo te toʼotoʼoga ʼo te Taumafa ʼo te ʼAliki, ʼe ina fakavikiviki te ʼu gāue fakaofoofo ʼa Sehova. Ko te akonaki ʼe ina fakatupu ia tatou he loto fakafetaʼi ki te ʼu gāue ʼaē neʼe fai e Sehova, ʼi tana foaki mai te totogi. Ko nātou ʼaē ka ʼōmai ʼi te ʼaho ʼaia ʼe nātou sio anai ki te tahi ʼu gāue fakaofoofo ʼa te ʼAtua, heʼe nātou sio anai ki te logo tahi pea mo te ʼofa ʼaē neʼe akoʼi e Sehova ki tana hahaʼi ke nātou maʼu. (Ef. 4:16, 22-24; Skp. 3:17, 18) Ko tatatou kau ki te lakaga maʼuhiga ʼaia ʼe malave moʼoni anai ki te fakakaukau ʼa he tahi, koia ʼe tou faiga anai ohage ko te tokolahi, ke tou ʼōmai ki te ʼaho ʼaia.—2 Ko. 5:14, 15.
13, 14. Ko ai ʼaē ʼe tonu ke tou fakaafe ki te ʼAho Fakamanatu, pea ʼe tou fai feafeaʼi anai te faʼahi ʼaia?
13 Tou Fakaafe ʼIhi Ke Nātou ’Ōmai ʼi Te ʼAho ʼAia: ʼUluaki, koutou fai muʼa he lisi ʼo te hahaʼi ʼaē ka koutou fakaafe. Koutou tohi ai te ʼu higoa ʼo tokotou ʼu famili ʼaē ʼe mole ʼi te moʼoni, tokotou ʼu vāhaʼa fale, takotou ʼu feʼilo ʼi te gāue peʼe ko te faleako, te ʼu hahaʼi ʼaē neʼe ako mo koutou ki muʼa atu, pea mo nātou ʼaē ʼe koutou ako ʼi te temi nei, pea mo takotou ʼu ʼaʼahi fuli. Ko te kau tagata taupau ʼo te ʼu ako tohi, ʼe nātou tohi anai mo te ʼu higoa ʼo nātou ʼaē ʼe mole kei fai faka mafola.
14 Koutou fakaʼaogaʼi te ʼu kiʼi pepa fakaafe ki te ʼAho Fakamanatu, pea mo tā masini peʼe koutou tohi nima fakalelei ʼi te ʼu kiʼi pepa ʼaia te hola pea mo te fale ʼaē ʼe fai ai te toʼotoʼoga ʼaia. Peʼe lagi koutou fia fakaʼaogaʼi anai te fakaafe ʼi te tuʼa pasina fakaʼosi ʼo Te Tule Leʼo ʼo te ʼaho 15 ʼo Malesio 2004, peʼe ko te Réveillez-vous ! ʼo te ʼaho 22 ʼo Malesio 2004. ʼI te fakaōvi mai ʼo te ʼaho 4 ʼo ʼApelili, koutou ʼolo ki takotou kau fakaafe ʼo fakamanatuʼi age te toʼotoʼoga ʼaia peʼe koutou telefoni kia nātou.
15. ʼE tou lava fakahā feafeaʼi te tali kāiga ʼi te afiafi ʼo te ʼAho Fakamanatu?
15 ʼI Te ʼAho Fakamanatu: Koutou faigaʼi ke koutou ʼōmai fakatomuʼa ʼi te afiafi ʼo te ʼAho Fakamanatu. Koutou tali kāiga ki te hahaʼi foʼou. (Loma 12:13) ʼE ʼi ai takotou maʼua makehe ki te hahaʼi ʼaē neʼe koutou fakaafe. Koutou faigaʼi ke nātou loto māfana, pea mo koutou fakahā age ia nātou ki te tahi ʼu tēhina mo tuagaʼane ʼo te kokelekasio. ʼE lagi feala hakotou tāʼofi hanatou hekaʼaga ke koutou heheka fakatahi. Pea kapau ʼe mole ʼi ai hanatou Tohi-Tapu peʼe ko hanatou katiko, pea koutou fakaōvi age kia nātou mo takotou katiko, peʼe ko he tahi kehe. ʼI te hili ʼo te toʼotoʼoga, koutou kole age peʼe ʼi ai hanatou ʼu fehuʼi ʼo ʼuhiga mo te afiafi. Kapau ko ʼihi ko tanatou ʼuluaki ʼōmai ʼaē, koutou fakalavelave age peʼe nātou fia ako he tahi ʼu meʼa ʼo ʼuhiga mo te Folafola ʼa te ʼAtua pea mo tona finegalo. Koutou ʼui age ʼe feala hakotou fai hanatou ako Tohi-Tapu.
16. Koteā ʼaē ʼe koutou lava fai moʼo tokoni kia nātou ʼaē neʼe ʼōmai ki te ʼAho Fakamanatu ke nātou tuputupu ʼi te faʼahi fakalaumālie?
16 Koutou Haga Tokoni Kia Nātou ʼAē Neʼe ’Ōmai Ki Te Fakamanatu: ʼI te ʼu vāhaʼa ʼaē ʼe hoa atu ki te ʼAho Fakamanatu, ʼe tonu anai ke tou tokoni kia nātou ʼaē neʼe ʼōmai ki te toʼotoʼoga ʼaia. Ohage ko nātou ʼaē neʼe ʼōmai tuʼumaʼu ki te ʼu fono ki muʼa atu, kae kua tahitahiga tanatou ʼōmai ʼi te temi nei. ʼE tokaga anai te ʼu tagata ʼāfea ke mole galoʼi te ʼu hahaʼi ʼaia, ʼo nātou vakaʼi pe koʼe ʼe mole kei nātou tuputupu ʼi te faʼahi fakalaumālie, pea mo nātou fakahā age te maʼuhiga ʼo totatou temi. (1 Pet. 4:7) Koutou tokoni kia nātou fuli ke nātou mahino ki te ʼaoga ʼaē ke nātou fakalogo ki te fakaloto mālohi faka Tohi-Tapu, ke tou fakatahi tuʼumaʼu mo te hahaʼi ʼa te ʼAtua.—Hep. 10:24, 25.
17. He koʼe ʼe tonu ke tou haga tala te ʼu gāue fakaofoofo ʼa Sehova?
17 Ko te ʼu gāue ʼa Sehova ʼe fakaofoofo fau maʼa tatou, ʼo mole feala ke tou mahino fuli kiai tatau aipe peʼe tou maʼuʼuli ʼo heʼegata. (Sopo 42:2, 3; Tnk. 3:11) Koia, ʼe tou maʼu tuʼumaʼu pe anai he ʼu meʼa ke tou fakavikiviki ai kia te ia. ʼI te temi ʼaenī ʼo te ʼAho Fakamanatu, ʼe tou lava fakahā ai ʼe tou loto fakafetaʼi ki te ʼu gāue fakaofoofo ʼa Sehova, ʼo tou fai he ʼu faiga makehe ke tou fakalahi totatou minisitelio.
[Mape ʼi te pasina 5]
(Vakaʼi te Minisitelio totonu)