Te Temi ʼo Te ʼAho Fakamanatu ʼo Te Mate ʼa Sesu ʼe Ko He Faigamālie Ke Lahi Age Tatatou Gāue!
1. Koteā te ʼu tupuʼaga ke tou vakavakaʼi ai ke lahi age tatatou gāue ʼi te ʼu māhina ʼo Malesio, mo ʼApelili, pea mo Maio?
1 ʼE feala koa ke lahi age takotou gāue ʼi te minisitelio ʼi te temi ʼo te ʼAho Fakamanatu, ʼi te ʼu māhina ʼo Malesio, mo ʼApelili, pea mo Maio? Ko ʼihi kau fai fakamafola ʼe natou toʼo anai honatou ʼu ʼaho mālōlō ʼi tanatou gāue ke feala ai hanatou kau ki te minisitelio; pea kiā nātou ʼaē ʼe ako ʼe natou fakaʼaogaʼi anai tonatou temi mālōlō ki te faʼahi ʼaia. ʼO kamata ʼi te ʼaho 2 ʼo ʼApelili, ʼe tou fai anai te gāue makehe ʼo fakaafe te hahaʼi ʼaē ʼe fia logo ke natou fakatahi mai mo tātou ʼi te ʼAho Fakamanatu, ʼi te ʼaho 17 ʼo ʼApelili. Hili te ʼaho ʼaia, ʼe tou faiga anai ke tou fakatuputupu te fia logo ʼo nātou ʼaē neʼe kau kiai pea mo fakaafe ia nātou ki te akonaki makehe ʼaē kā fai anai ʼi te vāhaʼa ʼo te ʼaho 25 ʼo ʼApelili. Koia, ʼe lahi te ʼu tupuʼaga ke tou vakavakaʼi ai ke lahi age tatatou gāue ʼi te ʼu māhina ʼo Malesio, mo ʼApelili, pea mo Maio.
2. Koteā te meʼa lelei ʼe feala ke tou fai ke lahi age tatatou minisitelio?
2 Te Selevisi Pioniē Vaeluaʼi Temi: Ko te meʼa lelei ʼaē ʼe feala ke tou fai ke lahi age tatatou gāue, ʼe ko te toʼo ia te selevisi pioniē vaeluaʼi temi. Mai tona ʼaluʼaga ʼaē ʼe tou maʼumaʼua fuli, koia ʼe tonu ai ʼi te agamāhani ke tou fai he ʼu fakatuʼutuʼu fakatomuʼa pea mo fai he ʼu fetogi ʼi tatatou polokalama, ke feala hatatou toʼo te selevisi. (Taag. 21:5) ʼE lagi feala hakotou tuku ki he tahi temi ʼihi gāue ʼe mole faʼa maʼuhiga ʼi takotou polokalama. (Filp. 1:9-11) He koʼē koa ʼe mole kotou palalau mo ʼihi ʼi te kōkelekāsio ʼo ʼuhiga mo takotou fia toʼo te selevisi pioniē, ke kotou vakaʼi ai peʼe feala ke kotou toʼo fakatahi te selevisi pioniē vaeluaʼi temi?
3. Koteā te ʼu fakatuʼutuʼu ʼe feala ke fai e te ʼu fāmili ke lahi age tanatou gāue?
3 ʼI takotou Tauhi Fakafāmili ʼaē ʼe fai ʼi te afiafi, ʼe lelei anai ke kotou fai palalau ʼo ʼuhiga mo te ʼu fakatuʼutuʼu ʼe feala ke kotou fakahoko fakafāmili. (Taag. 15:22) ʼAki takotou fetokoniʼaki, ʼe lagi feala ai anai ki ʼihi ʼo te fāmili ke pioniē vaeluaʼi temi ʼi he māhina e tahi peʼe laka atu. ʼE feafeaʼi lā mo kapau ʼe kotou sio age ʼe ko he faʼahi ʼe mole feala? ʼE kei feala pē ke fakatuʼutuʼu e te fāmili ke lahi age tanatou gāue ʼaki tanatou fai fakamafola ʼi ʼihi afiafi, peʼe fuafualoa age tanatou fai fakamafola ʼi te fakaʼosi vāhaʼa.
4. Ko te ʼu lelei fea ʼaē kā tou maʼu anai mo kapau ʼe lahi age tatatou gāue ʼi te minisitelio ʼi te temi ʼo te ʼAho Fakamanatu ʼaē kā hoko mai?
4 ʼE tokagaʼi e Sehova ia meʼa fuli ʼaē ʼe tou fai moʼo tauhi kiā te ia pea ʼe fiafia ʼi te ʼu sākilifisio ʼaē ʼe tou fai. (Hep. 6:10) ʼE tou maʼu te fiafia ʼi tatatou foaki kiā Sehova pea mo te hahaʼi. (1 Fkma. 29:9; Gāue 20:35) ʼE feala koa ke lahi age takotou gāue ʼi te temi ʼo te ʼAho Fakamanatu ʼaē kā hoko mai, pea mo lahi ai tokotou fiafia pea mo lahi te ʼu lelei ʼaē kā kotou maʼu anai?