ʼE Kotou Pionie Vaelua ʼi Temi Anai Koa?
1. He ko ʼe ʼe lelei te temi ʼo te ʼAho Fakamanatu ke tou fakalahi ai tatatou minisitelio?
1 ʼE lelei te temi ʼo te ʼAho Fakamanatu ke tou fakalahi ai tatatou minisitelio. ʼE ko he temi ʼe tou fakakaukauʼi ai te toe ʼofa lahi ʼae ʼo Sehova ʼi tana foaki tona ʼAlo ko he sakilifisio. (Soa. 3:16) ʼE tou loto fakafetaʼi ai kia te ia, ʼo tou fia palalau ai ki te hahaʼi ʼo ʼuhiga mo Sehova pea mo te ʼu faʼahi ʼae ʼe ina fakahoko maʼa te malamanei. (Esa. 12:4, 5; Luka 6:45) ʼI te temi ʼaia ʼe tou toe kau ki te tufa makehe ʼo te ʼu pepa fakaafe ki ʼotatou feʼilo pea mo te hahaʼi ʼi te telituale ke natou kau ki te ʼAho Fakamanatu. ʼOsi ʼaia, pea ʼe tou faiga ke tou taupau te fia logo ʼo natou ʼae neʼe kau ki ai. ʼE kotou fakalahi anai koa takotou minisitelio ʼo kotou pionie vaelua ʼi temi ʼi te ʼu mahina ʼo Malesio, Apelili pe Maio?
2. He ko ʼe ʼe lelei tafitō te mahina ʼo Malesio ke kotou pionie vaelua ʼi temi ai?
2 Ke Makehe Te Mahina ʼo Malesio: Ko Malesio ʼe ko he mahina ʼe lelei tafitō anai ke kotou pionie vaelua ʼi temi ai. Ko natou ʼae ka pionie ʼe feala ke natou filifili ʼi te ʼu hola ʼae ʼe fakamaʼua ki ai pe ko hola ʼe 30 pe 50 ʼae ka natou fai anai. Kapau ʼe hoko te ʼaʼahi ʼa te taupau ʼo te siliko ʼi te mahina ʼo Malesio, pea ʼe feala ki te kau pionie vaelua ʼi temi ke natou kau ki te fono katoa ʼae ʼe ina fai mo te kau pionie katoa pea mo te kau pionie makehe. Ko te tufa ʼo te ʼu pepa fakaafe ki te ʼAho Fakamanatu, ʼae ʼe fai anai ʼi te Feliatolu, ʼaho 26 ʼo Malesio, 2013, kua loaloaga age ʼi te ʼu taʼu ʼaeni kua hili pea ʼe kamata anai ʼi te ʼaho 1 ʼo Malesio. Pea tahi ʼae, ko te mahina ʼo Malesio ʼe ʼi ai ʼona fakaʼosi vahaʼa ʼe nima. Ko ia he ko ʼe koa ʼe mole kotou vakavakaʼi fakalelei pe feala hakotou kau ki te fakaliliu ʼo te mahina ʼo Malesio ke makehe age?
3. ʼE feafeaʼi hatatou fai ni fakatuʼutuʼu ke tou fakalahi ai tatatou minisitelio?
3 Kotou Foimo Fai Ni Fakatuʼutuʼu: Kotou vakavakaʼi ʼi te temi nei takotou polokalama pea mo vakaʼi te ʼu fetogi ʼae ʼe ʼaoga ke feala ai hakotou pionie. Ko te felagolagoʼaki ʼa he famili ʼe maʼuhiga anai, ko ia kotou toʼo he temi lolotoga takotou Ako Fakafamili ʼi te afiafi moʼo fai palalau ai ki te ʼu fakatuʼutuʼu ʼo tokotou famili pea mo fai hakotou polokalama. (Taag. 15:22) Kapau ʼe mole feala ke kotou pionie vaelua ʼi temi, pea ʼaua naʼa kotou lotovaivai ai. ʼE feala koa ke kotou fetogi takotou polokalama ke fuafualoa age takotou faifakamafola ʼi te ʼu ʼaho ʼae neʼe kotou fakatuʼutuʼu ki ai? ʼE feala koa ke kotou hilifaki he tahi age ʼaho ki te ʼu ʼaho ʼae ʼe kotou faifakamafola mahani ai ʼi te vahaʼa?
4. Kotea te ʼu lelei ka tou maʼu anai mai te fakalahi ʼo tatatou gaue ʼi te ʼu mahina ʼo Malesio, mo Apelili mo Maio?
4 Kapau ʼe lahi tatatou gaue ʼi te ʼu mahina ʼo Malesio, mo Apelili mo Maio, pea ʼe lahi anai mo tatatou fiafia ʼae ʼe tou maʼu mai tatatou tauhi ʼae kia Sehova pea mo tatatou foaki ki ʼihi. (Soa. 4:34; Gaue 20:35) Pea ko te faʼahi ʼae ʼe maʼuhiga age, ko tatatou fakafiafia ia Sehova ʼi tatatou fai ni sakilifisio.—Taag. 27:11.