Kotou Fakatuʼutuʼu ʼi Te Temi Nei Ke Lahi Age Ia Takotou Gāue ʼi Te Minisitelio
1. ʼE tou fakaʼuhiga feafeaʼi anai ia te temi ʼo te ʼAho Fakamanatu, pea ʼe feafeaʼi hatatou teuteu kiai?
1 ʼI te taʼu fuli, ʼi te temi ʼo te ʼAho Fakamanatu ʼe tou maʼu ai ia te ʼu faigamālie foʼou moʼo ‘fakavikiviki lahi kiā Sehova.’ (Pes. 109:30) ʼE lahi age anai koa ia takotou minisitelio ʼi te māhina ʼo Malesio moʼo fakahā ia takotou loto fakafetaʼi kiā ia ʼaē neʼe ina Foaki ia te totogi? Koia, ʼi te temi nei ʼe lelei ke tou foimo fai ia he ʼu fakatuʼutuʼu.—Taag. 21:5.
2. ʼI te māhina ʼo ʼApelili ʼo te taʼu ʼaenī kua hili atu, neʼe kotou fakaʼuhiga feafeaʼi ʼo fēia mo ʼihi atu, ia te fealagia ʼaē ke hifo ia te ʼu hola ʼo he pioniē vaeluaʼi temi?
2 Te Pioniē Vaeluaʼi Temi: ʼI te taʼu kua hili, neʼe fiafia ʼaupitō ia te ʼu kōkelekāsio ʼi tanatou ʼiloʼi ʼaē ʼe feala ke natou pioniē vaeluaʼi temi ʼi te māhina ʼo ʼApelili ʼuhi ko te fakahifo ʼo te ʼu hola. Neʼe ʼui fēnei e te tehina: “ ʼE kei au ako, pea heʼeki au maʼu ia te fealagia ʼaē ke au pioniē kātoa. Kae, ʼe au fai anai te ʼu hola e 30 pea ʼe au faiga anai ke laka atu ʼo kaku ki te ʼu hola e 50, ʼi te māhina ʼo ʼApelili.” Neʼe ʼui fēnei e te tuagaʼane ʼe gāue temi kātoa: “Ko ni hola e tolugofulu—ʼe feala ʼosi pe ia!” ʼI te temi ʼaē neʼe tala ia te fealagia ʼaia, ko te tuagaʼane neʼe pioniē kātoa ʼi muʼa atu, kua taʼu 80 nei, neʼe ina ʼui fēnei: “Ko te temi ʼaia neʼe au talitali kiai! ʼE ʼiloʼi e Sehova ko te temi maʼuhiga ʼo toku maʼuli, neʼe ko te ʼu taʼu ʼaē neʼe au toʼo ai te pioniē ʼaia!” Ko ʼihi neʼe mole feala ke natou pioniē vaeluaʼi temi, kae neʼe natou fakatuʼutuʼu ke lahi age ia tanatou gāue ʼi te minisitelio.
3. He koʼē ʼe lelei ke tou fakatuʼutuʼu ke tou pioniē vaeluaʼi temi ʼi te ʼu māhina ʼo Malesio, mo ʼApelili, pea mo Maio?
3 Ko Malesio ʼe ko he māhina lelei anai ke tou pioniē vaeluaʼi temi ai, koteʼuhi ʼe toe feala anai hatatou filifili ke tou fai ni hola e 30 peʼe 50. Tahi ʼaē meʼa, ʼo kamata atu ʼi te Moeaki ʼaho 17 ʼo Malesio, ʼe tou kau anai ki te tufa makehe ʼo tou fakaafe ia te hahaʼi ke natou ʼomai ʼo kau fakatahi mo tātou ki te ʼAho Fakamanatu ʼi te ʼaho 5 ʼo ʼApelili. Tokolahi, ʼe natou fiafia anai ʼi te lahi ʼo tanatou lagolago ki te minisitelio ʼo natou fakaʼamu ke natou toe pioniē vaeluaʼi temi ʼi te ʼu māhina ʼo ʼApelili pea mo Maio ʼo natou fai ia hola 50.
4. ʼE tou lava fakalahi feafeaʼi ia tatatou lagolago ki te minisitelio, pea koteā anai tona fua?
4 ʼI takotou Tauhi Fakafāmili ʼaē kā hoa mai, ʼaē ʼe fai anai ʼi te afiafi, he koʼē ʼe mole kotou fai palalau mo tokotou fāmili peʼe lava feafeaʼi he lahi age ʼo tanatou gāue ʼi te temi ʼo te ʼAho Fakamanatu? (Taag. 15:22) Kotou kole kiā Sehova ke ina tapuakina ʼakotou faiga. (1 Soa. 3:22) ʼI te lahi age ʼo takotou lagolago ki te minisitelio, ʼe lahi age anai takotou fakavikiviki ʼaē kiā Sehova pea ʼe toe lahi anai mo tokotou fiafia.—2 Ko. 9:6.