Kua Lahi Te ʼu Faigamalie Ke Tou Fakavikiviki Ai Kia Sehova
1. Ko te fakatuʼutuʼu foʼou fea ʼae ka tokoni mai anai ke tou fakavikiviki kia Sehova?
1 ʼI te mahina ʼo Malesio ʼaeni kua hili atu, neʼe fai ia te fakatuʼutuʼu foʼou, moʼo fakafealagia ki te kau faifakamafola ke natou pionie vaelua ʼi temi ʼo fai ni hola ʼe 30 ʼi Malesio mo ʼApelili pea mo te mahina ʼae ʼe fai ai te vahaʼa makehe. Kapau ʼe kamata te vahaʼa makehe ʼi te fakaʼosi ʼo te mahina ʼo kaku ki te ʼuluaki vahaʼa ʼo te mahina ʼae ʼe hoa mai ki ai, ʼe feala ki te kau faifakamafola ʼae ʼe natou fai ni hola ʼe 30, ke natou filifili he mahina ʼi te ʼu mahina ʼaia ʼe lua ke natou pionie vaelua ʼi temi ai. ʼE feala ki te kau pionie vaelua ʼi temi fuli ke natou kau ki te fono katoa ʼae ʼe fai mo te kau pionie katoa pea mo te kau pionie makehe. Ko tona fakaʼuhiga, kapau ʼe mole feala hatatou fai te ʼu hola ʼe 50, kaʼe ʼe feala pe anai hatatou fakavikiviki kia Sehova ʼo tou pionie vaelua ʼi temi tuʼa fa ʼi te taʼu, heʼe fakamaʼua pe ki ai ia hola ʼe 30!—Pes. 109:30; 119:171.
2. Kotea ʼae ka fiafia ai anai ia natou ʼae ka pionie vaelua ʼi temi lolotoga te vahaʼa makehe?
2 Lolotoga Te Vahaʼa Makehe: ʼI te temi nei, kua feala ki te tokolahi ke natou pionie vaelua ʼi temi lolotoga te vahaʼa makehe pea ʼe natou fiafia ʼi te maʼu ʼo he fakalotomalohi ʼi tanatou gaue mo te taupau ʼo te siliko. (Loma 1:11, 12) ʼE toʼo anai e te tokolahi ʼo te kau pionie vaelua ʼi temi honatou ʼaho malolō ʼi te vahaʼa moʼo gaue mo te taupau ʼo te siliko. Pea kia natou ʼae ʼe gaue lolotoga te vahaʼa, ʼe feala ke natou kole ki te taupau ʼo te siliko pe ʼe feala anai ke natou gaue fakatahi ʼi te Moeaki peʼe ko te ʼAhotapu. Pea tahi ʼae, ʼe ko he aluʼaga fakalotomalohi anai ki te kau pionie vaelua ʼi temi tanatou kau ki te fono ʼae ʼe fai mo te kau pionie katoa pea mo te kau pionie makehe!
3. He ko ʼe ʼe lelei te ʼu mahina ʼaia ke kotou pionie vaelua ʼi temi?
3 ʼI Te ʼu Mahina ʼo Malesio Mo ʼApelili: Ko natou ʼae neʼe pionie vaelua i temi, ʼo natou fai ni hola ʼe 30 ʼi te ʼu mahina ʼaia, kua feala nei ke natou fai tuʼa lua tanatou “sakilifisio o te fakavikiviki”! (Hep. 13:15) ʼE lelei ia te ʼu mahina ʼo Malesio mo ʼApelili moʼo fakalahi ai tatatou minisitelio. ʼI te taʼu fuli, lolotoga te ʼu mahina ʼaia, ʼe tou kau ki te gaue fakafiafia ʼae ko te tufa ʼo te ʼu pepa fakaafe ki te hahaʼi ke natou ʼomai ki te ʼAho Fakamanatu. Pea tahi ʼae, ʼe feala ke tou gaue mo te ʼu tehina mo tuagaʼane koteʼuhi ʼe tokolahi ia natou ʼae ʼe natou fakalahi tanatou gaue faifakamafola ʼi te temi ʼo te ʼAho Fakamanatu. ʼI te ʼosi ʼo te ʼAho Fakamanatu, ʼe tou olo anai ki te hahaʼi ʼae neʼe ʼomai ki te toʼotoʼoga ʼaia pea mo tou fakalotomalohiʼi natou ke natou ʼomai ki te akonaki makehe. ʼE kotou fia fakaʼaogaʼi anai koa te ʼu faigamalie ʼaia ke kotou pionie vaelua ʼi temi ai?—Luka 6:45.