Ke Fakafiafia Te Temi ʼo Te Fakamanatu!
1. Kotea ʼae ʼe feala ke tou fai ke toe lahi age totatou fiafia ʼi te temi ʼo te Fakamanatu?
1 ʼE ke loto koa ke toe lahi age tou fiafia ʼi te ʼu mahina ʼo Malesio, mo Apelili pea mo Maio? ʼE feala anai mo kapau ʼe lahi age tau faifakamafola, pea ʼo fakalogo ki ʼou fealagia, mo kapau ʼe ke pionie vaelua ʼi temi. ʼE toe lahi feafeaʼi age anai tou fiafia?
2. ʼE toe lahi feafeaʼi age totatou fiafia mo kapau ʼe lahi tatatou faifakamafola?
2 Ke Lahi Age Totatou Fiafia: Neʼe fakatupu tatou e Sehova ke tou fiafia ʼaki tatatou tauhi kia te ia pea mo maʼu te ʼu meʼa ʼae ʼe ʼaoga kia tatou ʼi te faʼahi fakalaumalie. (Mat. 5:3) Neʼe ina toe fakatuʼutuʼu ke tou fiafia moka tou lotofoaki. (Gaue 20:35) ʼE tou maʼu te ʼu faʼahi ʼaia ʼi tatatou faifakamafola, heʼe tou tauhi ai ki te ʼAtua pea mo tou tokoni ki te hahaʼi. Koia, kapau ʼe lahi tatatou faifakamafola pea ʼe toe lahi age ai mo totatou fiafia. Pea ka lahi tatatou faifakamafola ʼe toe lahi age anai mo totatou faiva. Ko tatatou liliu ʼaia ʼo faiva, ʼe tou maʼu ai te lotofalala kaʼe siʼisiʼi totatou mataku. ʼE toe lahi age ai mo te ʼu faigamalie ke tou faifakamafola pea mo kamata ni ako Tohi-Tapu. ʼAki te ʼu faʼahi fuli ʼaia, ʼe tou toe leleiʼia lahi age ai tatatou minisitelio.
3. He ko ʼe ʼe lelei ia te ʼu mahina ʼo Malesio mo Apelili ke tou pionie vaelua ʼi temi ai?
3 ʼE lelei te ʼu mahina ʼo Malesio mo Apelili ke tou pionie vaelua ʼi temi ai, tafitō la heʼe feala ke tou filifili peʼe tou fai anai hola ʼe 30 peʼe 50. Pea, ʼo kamata ʼi te Moeaki, ʼaho 22 ʼo Malesio ʼo kaku ki te ʼAho Fakamanatu, ʼi te Monite ʼaho 14 ʼo Apelili, ʼe tou tufa anai te ʼu pepa fakaafe ki te ʼAho Fakamanatu. ʼE fiafia ʼaupito anai te ʼu kokelekasio koteʼuhi ʼe tokolahi ia natou ʼae ka gaue “i he loto e tahi” moʼo fai te ʼu telituale fuli ʼi te ʼu vahaʼa ʼaia.—Sofo. 3:9.
4. Kapau ʼe tou fia pionie vaelua ʼi temi, kotea ʼae ʼe tonu ke tou fai?
4 Tou Kamata Teuteu ʼi Te Temi Nei: Kapau ʼe heʼeki ke fai te faʼahi ʼaia, pea toʼo hou temi ke ke toe vakaʼi tau polokalama. Lagi feala ke ke fai he ʼu fetogi ke lahi age tau faifakamafola ʼi he mahina katoa peʼe laka atu. Faikole ʼo ʼuhiga mo te faʼahi ʼaia. (Sakp. 1:5) Palalau ki te faʼahi ʼaia mo tou famili pea mo ʼihi atu ʼi te kokelekasio. (Taag. 15:22) ʼE lagi ke tokagaʼi anai, logo la tau mahamahaki peʼe ko tau maʼumaʼua gaue, kaʼe ʼe feala ke ke toe fiafia mo koe ʼuhi ko tau toʼo te selevisi pionie vaelua ʼi temi.
5. Kotea anai ʼona fua mo kapau ʼe lahi age tatatou faifakamafola ʼi te temi ʼo te Fakamanatu?
5 ʼE loto e Sehova ke fiafia ʼana kaugana. (Pes. 32:11) Kapau ʼe tou faiga ke lahi age tatatou faifakamafola ʼi te temi ʼo te Fakamanatu, pea ʼe toe lahi age anai totatou fiafia pea ʼe toe fiafia ai foki mo tatatou Tamai ʼae ʼe ʼi selo.—Taag. 23:24; 27:11.