ʼI ʼApelili—Ko He Temi Ke Tou ‘Gāue Mālohi Ai Pea Mo Faiga Mālohi’
1 Ko te ʼu vāhaʼa ʼi muʼa ʼo te Fakamanatu, ʼe ko he temi metitasio ʼo te hahaʼi ʼa Sehova. ʼI te temi ʼaia ʼe tou fakakaukauʼi ai te ʼu meʼa ʼaē neʼe hoko ʼaki te mate ʼa Kilisito, pea mo tou tokagaʼi totatou ʼamanaki ʼaē ʼe foaki mai e te ʼAtua, ʼaē neʼe feala ʼaki te taʼataʼa ʼaē neʼe liligi e Sesu. Kapau ʼe koutou manatuʼi te ʼaho 19 ʼo ʼApelili ʼo te taʼu kua hili, koteā ʼaē ʼe koutou manatuʼi? ʼE feala koa hakotou manatuʼi te ʼu hahaʼi ʼaē neʼe ʼōmai ʼi te po ʼaia? te ʼaluʼaga maʼuhiga pea mo fakalaumālie ʼo te Fakamanatu? te akonaki faka Tohi-Tapu lelei pea mo te ʼu faikole fakamalotoloto? Neʼe lagi koutou fakatuʼutuʼu ke lahi age takotou fakahā takotou loto fakafetaʼi ki te ʼofa ʼaē neʼe fakahā atu e Sehova pea mo Sesu. ʼE malave feafeaʼi kia koutou ʼi te temi nei te metitasio ʼaia?
2 Ko te loto fakafetaʼi ʼa te hahaʼi ʼa Sehova, ʼe mole gata ʼaki pe tanatou ʼu palalau. (Kol. 3:15, 17) Tāfito ʼi ʼApelili ʼo te taʼu ʼaenī kua hili, neʼe tou fakahā tatatou loto fakafetaʼi ki te ʼu fakatuʼutuʼu ʼa Sehova ʼo ʼuhiga mo te fakamaʼuli, ʼo tou gāue mālohi ʼi te minisitelio faka Kilisitiano. ʼI Niu-Kaletonia, neʼe ko pionie vaeluaʼi temi e toko 323, ʼo laka ʼi te 30 ʼi te teau ʼo nātou ʼi te taʼu kua hili. Pea ʼi Uvea mo Futuna, neʼe ko pionie vaeluaʼi temi e toko 11, neʼe ko te tuputupu ʼo te 10 ʼi te teau mo kapau ʼe fakatatau ki te taʼu ki muʼa atu. ʼAki tanatou ʼu faiga ʼaia, ʼo fakatahi mo te ʼu kaugā fagona fuli ʼo te Puleʼaga, neʼe hoko ai te fakalaka foʼou ʼi te ʼu hola, mo te ʼu nusipepa ʼaē neʼe tufa, pea mo te ʼu ʼaʼahi. Neʼe tou fiafia ʼaupito ʼi tatatou sio ki te kamata ʼo te ʼu ako Tohi-Tapu foʼou, pea mo te tuputupu foʼou ʼi te hahaʼi ʼaē neʼe kau ki te Fakamanatu!
3 ʼE moʼoni, ko tatatou falala ki tatatou ʼamanaki ʼe ina uga ai tatou ke tou gāue. ʼE hage pe ko te meʼa ʼaē neʼe tohi e te ʼapositolo ko Paulo: “E tou gaue mamahi mo fetau ki te mea aeni, kua tou tuku tatatou falala ki te Atua mauli, iaʼia e ko te Fakamauli o te tagata fuape, tafito te hahai tui.”—1 Tim. 4:10.
4 ʼI te temi ʼaenī ʼo te Fakamanatu, ʼe koutou fakahā feafeaʼi anai takotou tui ki te ʼu fakatuʼutuʼu ʼaē neʼe fai e Sehova ke tou maʼu te maʼuli? ʼI ʼApelili ʼo te taʼu kua hili, neʼe tou sio ki te toko 1 534 ʼu kaugā fai faka mafola ʼo te Puleʼaga ʼi Niu Kaletonia pea mo te toko 49 ʼi Uvea mo Futuna. ʼE feala anai koa ke fakalaka te kaugamālie ʼaia ʼi ʼApelili ʼo te taʼu ʼaenī? ʼE feala ke tou fakahoko te faʼahi ʼaia. Kae ʼe tonu anai ke kau kiai te ʼu kaugā fagona fuli, peʼe kua papitema peʼe kailoa. Māʼia mo nātou foʼou ʼe feala ke nātou kau kiai. Koia ʼi takotou fakatuʼutuʼu ʼaē ke koutou gāue mālohi pea mo faiga mālohi ʼi ʼApelili ʼo te taʼu ʼaenī, koutou vakavakaʼi te ʼu ʼaluʼaga ʼaē ʼe feala ai ke koutou uga ʼihi ke nātou kaugā gāue mo koutou, ʼo kau ai nātou foʼou pea mo nātou ʼaē mole heʼeki māhani.
5 Tou Tokoni Ki ʼIhi Ke Nātou Toe Kau Ki Te Gāue: Kapau ʼe koutou ʼiloʼi ʼihi neʼe mole fai faka mafola ʼi he māhina katoa peʼe māhina ʼe lua, pea ʼe lagi feala ke koutou fakaloto mālohiʼi nātou pea mo fakaafe nātou ke nātou kaugā gāue mo koutou ʼi te gāue fai faka mafola. Kapau ko ʼihi ʼi te kokelekasio ʼe mole kei fai faka mafola, pea ʼe faiga tāfito anai te ʼu tagata ʼāfea ke nātou ʼaʼahi nātou pea mo fakaloto mālohiʼi nātou ke toe kau kiai ʼi ʼApelili.
6 Ko tatou fuli ʼe tonu ke tou haga kole ki te laumālie ʼo Sehova ke ina fakaloto mālohiʼi tatou ʼi tana gāue. (Lu. 11:13) Koteā ʼaē ʼe tonu ke tou fai ke tou maʼu te laumālie ʼaia? Tou lau te Folafola ʼa te ʼAtua. (2 Tim. 3:16, 17) Pea ʼe tonu ke tou “logo ki te mea e tala e te Laumalie ki te u [“kokelekasio,” MN ] ” ʼo tou kau ki te ʼu fono fuli e nima ʼo te vāhaʼa. (Apk. 3:6) ʼE ko te temi faigamālie ʼaenī ke tou tokoni kia nātou ʼaē ʼe tōtō ʼi te gāue ʼaia pea mo nātou ʼaē ʼe mole kei kau kiai, ke hikihiki tanatou ʼu agamāhani ʼi te ako pea ke liliu ko hanatou agamāhani te kau ki te ʼu fono. (Pes. 50:23) ʼE tou fai anai te faʼahi ʼaia pea mo tou tokakaga foki kia tatou ʼi te faʼahi fakalaumālie. Kae ʼe ʼi ai te tahi meʼa ʼe tonu ke tou fai.
7 Neʼe fakamahino e te ʼapositolo ko Petelo ʼe foaki e te ʼAtua tona laumālie maʼoniʼoni “kia natou e fakalogo kia te ia [ohage ko honatou pule].” (Gaue 5:32) ʼE kau ki te fakalogo ʼaia tatatou tokagaʼi te fakatotonu ʼaē ke tou “faka mafola ki te hahai pea mo fai fagonogono.” (Gaue 1:8; 10:42, MN ) Koia, logola ʼe moʼoni ʼe ʼaoga ke tou maʼu te laumālie ʼa te ʼAtua moʼo fakaloto mālohiʼi tatou ke tou fai faka mafola, kae ʼe toe moʼoni foki, ʼi tatatou fia fakafiafia te loto ʼo Sehova, ʼe tokoni lahi ia Sehova kia tatou. ʼAua naʼa tou meʼa noaʼi te maʼuhiga ʼaē ke tou fakalogo!
8 Tou Tokoni Ki Te Kau Tūpulaga: ʼU mātuʼa, neʼe koutou fakatokagaʼi koa te fia palalau ʼa takotou fānau ki ʼihi ʼo ʼuhiga mo te moʼoni? ʼE nātou kaugā fai faka mafola koa mo koutou? ʼE lelei koa tanatou aga? Kapau koia, he koʼe ʼe koutou fakatalitali? Koutou ʼolo ki he tahi ʼi te Komite Gāue ʼo Te Kokelekasio, pea koutou vakaʼi peʼe feala ke kau takotou tamasiʼi ʼi te ʼu kaugā fagona ʼo te māhina ʼaenī ʼo ʼApelili. (Vakaʼi te tohi Notre ministère, ʼi te pasina 99-100.) Ke mahino kia koutou ʼe feala ke lagolago lahi takotou fānau ki te vikiʼi ʼo Sehova ʼi te temi ʼaenī ʼo te Fakamanatu.—Mat. 21:15, 16.
9 Ko te faʼe Kilisitiano ʼi Georgia, ʼi Amelika, neʼe ina fakaloto mālohiʼi tuʼumaʼu tana taʼahine ke palalau ki te hahaʼi ʼo ʼuhiga mo Sehova. ʼI te taʼu ʼaenī kua hili, ʼi tana kau mo tana faʼe ki te minisitelio, neʼe tuku e te kiʼi taʼahine te kaupepa lahi Fakamaʼua ki te tagata pea mo ina fakamahino fakanounou age te tānakiʼaga ʼo te ʼu kapite. Neʼe fehuʼi age fēnei e te tagata kia ia: “ ʼE ke taʼu fia?” Neʼe ina tali fēnei: “ ʼE ʼau taʼu fitu.” Neʼe punamaʼuli te tagata ʼi tana sio ki te ʼu palalau maʼuhiga ʼaē neʼe ina fai. ʼI tana kei veliveli, neʼe ʼiloʼi e te tagata ʼaia te moʼoni kae neʼe mole fia mulimuli kiai. Mole tuai, pea neʼe kamata te ako Tohi-Tapu ʼa te tagata, mo tona ʼohoana, pea mo tona ʼofafine.
10 Tokolahi te kau tūpulaga kua nātou liliu ko he ʼu kaugā fagona, pea ʼe ko he meʼa fakafiafia hatatou kaugā gāue mo nātou ʼi te minisitelio. Ko te kau tūpulaga ʼaia ʼe feala ke nātou uga pea mo fakaloto mālohiʼi te tahi kau tūpulaga. Kae ko te māhina ʼo ʼApelili ʼe toe lelei maʼa te ʼu famili takitokotahi, ke fakamālohiʼi tanatou ʼu felogoi pea mo lagalaga nātou ʼi te faʼahi fakalaumālie ʼo nātou gāue fakatahi ʼi te tauhi taputapu. ʼE tonu ke tuku e te ʼu pule famili te faʼifaʼitaki ʼi te faʼahi ʼaia.—Taag. 24:27.
11 Tou Tokoni Kia Nātou Foʼou: E feafeaʼi ʼo ʼuhiga mo nātou foʼou ʼaē ʼe nātou ako te Tohi-Tapu? ʼE nātou lava tokoni koa ki te faiga makehe ʼi ʼApelili? Neʼe lagi nātou fakahā mai tanatou fia fakamatala ki te hahaʼi te ʼu meʼa ʼaē neʼe nātou ako, ʼi tanatou ʼosi vakaʼi te kapite 2, palakalafe 22, peʼe ko te kapite 11, palakalafe 14, ʼo te tohi Te ʼAtamai Mālama. Kapau kua vave ʼosi te tohi, koutou teuteu ke koutou palalau fakalelei mo nātou ki te faʼahi ʼaia, ʼi takotou vakaʼi te kapite 18, palakalafe 8, ʼaē ʼe ʼui fēnei ai: “E lagi ʼe koutou fia fakahā te meʼa ʼaē ʼe koutou ako ki tokotou ʼu kāiga, ki tokotou ʼu kaumeʼa, pea mo ʼihi age. ʼE mahino papau ia, neʼe kua koutou fai te faʼahi ʼaia, ohage pe ko te fakahā e Sesu te logo lelei ki te tahi ʼu hahaʼi ʼi te fagonogono ʼi te temi fuli. (Luka 10:38, 39; Soane 4:6-15) ʼI te temi nei e lagi koutou fia fai he meʼa ke lahi age.” ʼE moʼoni koa te faʼahi ʼaia ʼo ʼuhiga mo takotou kau ako?
12 ʼE tui koa ia ia ʼaē ʼe ako ki te Folafola ʼa te ʼAtua? ʼE ina maʼuliʼi koa te ʼu pelesepeto ʼa te Tohi-Tapu? Neʼe ina faka ʼalutahi koa tona maʼuli mo te ʼu lekula fakaʼatua? ʼE kau koa ki te ʼu fono ʼo te kokelekasio? ʼE fia tauhi koa kia Sehova ʼAtua? Pea he koʼe koa ʼe mole koutou fakaloto mālohiʼi ia ia ke palalau mo te kau tagata ʼāfea, ke nātou vakaʼi ai peʼe feala ke liliu ko he kaugā fai faka mafola mole heʼeki papitema pea ke gāue fakatahi mo koutou ʼi ʼApelili? (Vakaʼi te tohi Notre ministère, ʼi te pasina 98-100.) ʼE feala ai ke sio ko te kautahi ʼa Sehova ʼe tokoni kia ia, ʼi tana ʼu faiga ʼaē ke tauhi kia Sehova.
13 E moʼoni, ʼe ʼi ai ʼihi kau ako ʼe tuputupu vave age ʼi ʼihi. Koia, ʼo mulimuli ki te tokoni ʼo Te Minisitelio ʼo Te Puleʼaga ʼo Sūnio 2000, pasina 4, palakalafe 5-6, tokolahi neʼe nātou ako he lua tohi mo te hahaʼi ʼaē ʼi te kamata neʼe nātou fia ʼiloʼi, kae neʼe ʼaoga ke toe fai he tahi age tokoni ke nātou fakatahi lelei mo te kokelekasio. ʼE tou fakaʼamu tuʼumaʼu ke liliu te hahaʼi fakamalotoloto ʼaia ko he ʼu tisipulo ʼa Kilisito, “tatau aipe peʼe veliveli peʼe loaloaga te temi.” (Gaue 26:29, MN ) Kae kapau kua lahi te ʼu māhina ʼaē neʼe koutou fai ai tana ako, pea ʼe feala koa ke liliu te temi ʼaenī ʼo te Fakamanatu, ko he faigamālie ki takotou ako ke ina fakahā tana loto fakafetaʼi lahi ki te totogi ʼaē neʼe foaki e Kilisito?
14 Tou Tokoni Ke Nātou Kau Ki Te Gāue: ʼE lahi te ʼu meʼa ʼe tou ako moʼo tokoni ki te hahaʼi ke nātou kamata fai faka mafola, mo kapau ʼe tou vakavakaʼi pe neʼe ako feafeaʼi e Sesu te hahaʼi. Neʼe mole ina maʼu pe te hahaʼi pea mo ina ʼui age ki tana ʼu ʼapositolo ke nātou kamata palalau. Neʼe ina ʼuluaki fakahā lelei te maʼuhiga ʼo te gāue fai faka mafola, mo ina fakaloto mālohiʼi ke nātou faikole, pea ina fakahā age kia nātou he ʼu fakatuʼutuʼu tāfito e tolu: Ke ʼi ai honatou hoa ʼi te gāue, ke ʼi ai hanatou telituale, pea mo he logo ke nātou tala. (Mat. 9:35-38; 10:5-7; Mko. 6:7; Lu. 9:2, 6) ʼE feala ke koutou fai feiā mo koutou. Tatau aipe peʼe koutou tokoni anai ki hakotou fānau, peʼe ko he ako foʼou, peʼe ko he tahi neʼe mole fai faka mafola lolotoga he temi, kae ʼe lelei mo kapau ʼe koutou faiga tāfito ke koutou fakahoko te ʼu fakatuʼutuʼu ʼaē ʼe hoa mai.
15 Fakahā Lelei Te ʼAoga ʼo Te Gāue: Fakahā lelei kia ia te maʼuhiga ʼo te gāue fai faka mafola. Koutou maʼu he manatu ʼe lelei ʼo ʼuhiga mo te gāue. Koutou talanoa ki he ʼu faʼifaʼitaki ʼe fakahā ai te gāue ʼaē ʼe fai e te kokelekasio ʼi te minisitelio. Koutou maʼu te manatu ʼa Sesu ʼaē ʼe fakahā ia Mateo 9:36-38. Koutou fakaloto mālohi ia ia ʼaē ʼe feala ke liliu ko he kaugā fagona peʼe ko ia ʼaē mole kei fai faka mafola, ke faikole ke kau ki te minisitelio pea ke fua lelei te gāue ʼaē ʼe fakahoko ʼi te malamanei katoa.
16 Koutou Uga Ke Ina Fakakaukauʼi Te ʼAtu Faigamālie Ke Fai Faka Mafola: Koutou fakahā age ʼe feala ke fakatahi mo te kūtuga ʼo te ako tohi ke nātou fai faka mafola. Koutou ʼui age ke fai palalau mo tona ʼu kāiga pea mo te ʼu feʼilo, peʼe mo te ʼu kaugā gāue peʼe ko te ʼu kaugā ako ʼi te ʼu temi kai. Kapau ʼe tokaga ki te hahaʼi ʼaē ʼe ʼalu mo ia ʼi te kā, pea ʼe ina lava kamata he fai palalau mo nātou. Ka kamata te fai palalau, pea ʼe maʼu ai te faigamālie ke fai faka mafola. ʼE moʼoni, ʼe lahi te ʼu ʼaluʼaga ke tou fakahā ai totatou ʼamanaki ki te hahaʼi “ ʼi te ʼaho fuli pe.”—Pes. 96:2, 3.
17 ʼE lelei age anai, mo kapau ʼe koutou foimo fai faka mafola fakatahi mo te kaugā fagona foʼou. Kapau ʼe koutou fakatuʼutuʼu ke hikihiki takotou selevisi ʼi ʼApelili, pea koutou kole ki te tēhina ʼaē ʼe taupau ki te telituale peʼe ʼi ai he telituale. Kapau ʼe maʼu, pea ʼe ko te faigamālie ʼaia ke koutou gāueʼi fakalelei te telituale ʼaia. Ohage la, kapau kua ʼosi takotou fai faka mafola peʼe koutou ʼolo ʼo fono peʼe ko he tahi age koga meʼa, ʼe lagi koutou fakatokagaʼi kua ʼi ai he tahi ʼi te ʼapi ʼaē neʼe lāvaki, peʼe kua ʼi ai he tahi ʼi te ʼapi ʼaē neʼe fia logo. Kapau ʼe feala, pea koutou ʼaʼahi fakanounou te ʼapi ʼaia ʼi tona temi lelei. ʼAki te faʼahi ʼaia, ʼe fua lelei anai takotou minisitelio pea mo koutou fiafia anai.
18 Tou Teuteuʼi He Logo Fakafiafia: ʼE mole tatau te ʼui ʼaē ʼa he tahi ʼe fia kau ki te tala ʼo te logo ʼo te Puleʼaga, pea mo tana maʼu te falala mokā ina tala te logo ʼaia, tāfito la mo kapau ʼe ko he tahi ʼe foʼou peʼe ko he tahi neʼe kua fualoa tana mole kei faka mafola. ʼE maʼuhiga te temi ʼaē ʼe tou fakaʼaogaʼi moʼo tokoni kia nātou ʼaē ʼe foʼou pea mo nātou ʼaē neʼe mole kei fai faka mafola ke nātou teuteu ki te minisitelio. Ko te Fono Gāue pea mo te ʼu fono ki te fai faka mafola ʼe nā tuku mai he ʼu manatu lelei, kae ʼe mole nā fetogi te temi ʼaē ʼe tou fakaʼaogaʼi moʼo teuteuʼi tatatou minisitelio.
19 ʼE koutou lava tokoni feafeaʼi kia nātou ʼaē ʼe foʼofoʼou ke nātou teuteu ki te fai faka mafola? Koutou kamata ʼaki te fakahā ʼo he nusipepa, pea ke faigafua pea mo nounou! Koutou kole age ke nātou fakakaukauʼi he ʼu meʼa neʼe hā ʼi te ʼu tala logo ʼe fia logo anai kiai te hahaʼi ʼo te telituale, pea mo maʼu he manatu ʼi te nusipepa ʼe ʼalutahi mo te faʼahi ʼaia. Koutou fai fakatahi te faʼifaʼitaki, pea mo foimo fakaʼaogaʼi ʼi te minisitelio.
20 Tou Faiga Ke Hoko He Tuputupu ʼi Te Ka Haʼu: ʼI te taʼu ʼaenī kua hili, neʼe ko te toko 14,8 miliona hahaʼi tupu ʼaē neʼe nātou kau ki te Fakamanatu ʼi te malamanei katoa. Ko te ʼu kaugā fagona neʼe nātou toko ono miliona tupu. Ko tona faka ʼuhiga ko te teitei toko 8,8 miliona hahaʼi neʼe nātou fia logo, ʼo nātou ʼōmai ki te polokalama makehe ʼaia, ʼaē neʼe nātou logo ai ki te fakamahino ʼo te akonaki maʼuhiga tāfito ʼo te Tohi-Tapu. Neʼe nātou feʼiloʼiʼaki mo ʼihi ia tatou, pea neʼe nātou leleiʼia. Tokolahi ʼi te ʼu hahaʼi ʼaia ʼe nātou vikiʼi tatou, mo lagolago ki tatatou gāue ʼi te malamanei, pea mo nātou hāofaki tatou ia muʼa ʼo te hahaʼi. ʼAki te hahaʼi ʼaia ʼe hoko anai he tuputupu ʼi te ka haʼu. Koteā ʼaē ʼe feala ke tou fai moʼo tokoni kia nātou ke nātou haʼele ki muʼa?
21 Tokolahi ʼi te hahaʼi foʼou ʼaē neʼe kau ki te Fakamanatu, neʼe nātou ʼōmai he neʼe fakaafe e he tahi ia tatou. Ko tona faka ʼuhiga ʼe ʼi ai te tahi ʼe nātou feʼiloʼiʼaki mo ia ʼi te fono. Kapau ʼe haʼu he tahi ki te fono he neʼe tou fakaafe, ʼe ko totatou maʼua ke tou tali leleiʼi pea mo tokoni kia ia ke ina leleiʼia te polokalama. ʼE hahaʼi anai te fale, koia koutou tokoni kia ia ke ina maʼu hona hekaʼaga. Koutou ʼavage hana Tohi-Tapu, pea mo fakaafe ke hiva mo koutou. Koutou tali ki te ʼu fehuʼi fuli ʼaē ʼe feala ke ina fai atu. ʼE feala ke hoko atu tana fia logo ʼuhi ko takotou tokaga fakalelei kia ia. ʼE mahino ia, ʼe tou maʼu e tatou fuli te maʼua ʼaia—kapau ʼe ko tatatou hoki sio ki he tahi, pea tou tali fakaleleiʼi pea mo palalau fakanounou mo ia ke tou ʼiloʼi pe ko ai.
22 Ko te kau ʼa he tahi ki te Fakamanatu ʼe feala ke malave moʼoni ki tona fakakaukau. Ko tana haʼu ʼaia ki te fono ʼe lagi fakahā ai neʼe mole ina maʼu ʼi he tahi faʼahi te meʼa ʼaē ʼe ina kumi, pea ʼe tou foaki kia ia he meʼa ʼe tonu ke ina fakasiosio lelei. Ko te fakamahino ʼo te fakatuʼutuʼu fakaofoofo ʼo te totogi, ʼe lagi ko he meʼa foʼou ki he tahi neʼe mole mahino kia ia te ʼofa lahi ʼaupito ʼo Sehova. ʼE feala ke ina sio tonu ʼe tou kehe—ʼe tou loto moʼoni, mo aga fakakaumeʼa, mo ʼofa pea mo aga fakaʼapaʼapa. ʼE mole tatau totatou fale fono mo te ʼu meʼa ʼaē neʼe lagi sio kiai ʼi te ʼu ʼēkelesia, ʼe maʼu ai te ʼu paki pea mo fai ai he ʼu toʼotoʼoga faka lotu ʼe mole honatou ʼuhiga. ʼE tokagaʼi moʼoni e nātou foʼou ʼe kehekehe te ʼu ʼaluʼaga ʼa te hahaʼi ʼaē ʼi te ʼu fono, pea ʼe mole fai he tae falā. Ko te ʼu meʼa ʼaē ʼe nātou sio kiai ʼe feala ke ina uga mālohi nātou ke nātou toe ʼōmai.
23 Hili te Fakamanatu, ʼe tonu ke ʼi ai he tahi moʼo hoko atu te tokoni kia nātou foʼou ʼaē neʼe kau kiai. Kapau neʼe koutou fakaafe he ʼu hahaʼi foʼou, pea ʼe ko tokotou maʼua makehe ʼaia. ʼI muʼa ʼo tanatou ʼolo, koutou fakahā age te tahi ʼu fono ʼaē ʼe fai ʼi te Fale ʼo te Puleʼaga. Koutou fakahā age te kupu tāfito ʼo te akonaki ʼaē ka hoko mai. Koutou fakahā te potu pea mo te hola ʼaē ʼe fai ai te Ako Tohi ʼo te kokelekasio ʼaē ʼe ōvi kiō nātou. Ki muli age, koutou tuku age kia nātou te tohi ʼaē ʼe fai ai te ako, pea mo fakahā age te ʼu manatu ʼaē ka tou palalau kiai ʼi te vāhaʼa. Koutou fakamahino age pe koʼe ʼe fai e te kokelekasio katoa he ʼu fakatuʼutuʼu ke nātou kau ki te fakatahi faka tisitilike ʼaē ka fai.
24 Koutou fakatuʼutuʼu ke koutou ʼaʼahi nātou kiō nātou. Koutou vakaʼi peʼe nātou maʼu te kaupepa lahi Fakamaʼua pea mo te tohi Te ʼAtamai Mālama, ʼaē ʼe fakahā ai kia nātou te ʼu akonaki tāfito ʼo te Tohi-Tapu. Kapau ʼe mole heʼeki fai hanatou ako, pea koutou fakaafe ke nātou ako te Tohi-Tapu. Koutou ʼui age ke nātou lau te kaupepa lahi Te Kau Fakamoʼoni ʼa Sehova, ʼaē ʼe fakamahino lelei ai te ʼu gāue ʼi totatou kautahi. Fakaafe nātou ke nātou sioʼi tatatou ʼu foʼi fime viteo, ohage ko te foʼi fime Les Témoins de Jéhovah : un nom, une organisation. Koutou faigaʼi ke nātou feʼiloʼiʼaki mo ʼihi ʼi te kokelekasio. ʼI te ʼu māhina ka haʼu koutou ʼaʼahi ia nātou ʼaia; koutou fakaafe nātou ki te ʼu fono ʼi te ʼu ʼaʼahi ʼo te tēhina taupau faka silikosikilipisio peʼe ki te ʼu fakatahi faka silikosikilipisio peʼe ko he fakatahi makehe ʼaho tahi. Koutou foaki kia nātou te ʼu fealagia fuli ke nātou fakahā tanatou “lotolelei ki te maʼuli heʼegata”!—Gaue 13:48.
25 Te ʼu Meʼa ʼAē ʼe Feala Ke Fai e Te ʼu Tagata ʼĀfea: ʼE fakalogo tāfito ki te kau tagata ʼāfea te ʼu fua lelei ʼo te ʼu faiga ʼaē ka fai ʼi te minisitelio ʼo ʼApelili. Kapau ʼe koutou taki he ako tohi, pea koutou tohi te ʼu meʼa ʼaē ʼe feala ke koutou fai moʼo tokoni kia nātou fuli ʼo takotou ako tohi ke nātou kau ki te ʼu gāue makehe ʼo te māhina. ʼI takotou ako tohi, ʼe ʼi ai koa he kau tūpulaga, peʼe ko he hahaʼi foʼou, peʼe ko ʼihi ʼe tahitahiga tanatou kau ki te ako tohi, peʼe mole kei nātou fai faka mafola? Koutou vakaʼi peʼe feala ki te ʼu mātuʼa, te kau pionie peʼe ko he tahi ʼu kaugā fagona ke nātou tokoni kia nātou ʼaia. Koutou foaki mo koutou he tokoni. Ko te tuagaʼane neʼe tahitahiga tana kau ki te fai faka mafola lolotoga taʼu e lua, ʼi ʼApelili ʼo te taʼu kua hili neʼe ina fai tana ʼu hola e 50 tupu ʼi te minisitelio. He koʼe neʼe hoko te fetogi ʼaia? Neʼe ina ʼui neʼe hoko ʼuhi ko te ʼu ʼaʼahi faka tauhi ōvi fakaloto mālohi ʼa te kau tagata ʼāfea.
26 ʼE tonu ke felagolagoʼaki te kau tagata ʼāfea pea mo te ʼu tēhina faifekau faka minisitelio ke feʼauga te telituale, mo te ʼu nusipepa, pea mo te ʼu tohi ki te māhina ka haʼu. ʼE feala koa ke fakatuʼutuʼu he tahi ʼu fono ki te gāue fai faka mafola? Kapau ʼe feala, pea ke fakahā te ʼu fakatuʼutuʼu makehe ʼaia. Kae tāfito, ʼi takotou ʼu faikole ia muʼa ʼo te hahaʼi peʼe ka koutou faikole takitokotahi, koutou kole ke tapuakina e Sehova te māhina ʼaē ka lahi ai tatatou faka mafola te Puleʼaga.—Loma 15:30, 31; 2 Tes. 3:1.
27 ʼI ʼApelili ʼo te taʼu kua hili, ʼi te kokelekasio ʼo Caloline ʼo te Potu Noleto, neʼe fakaloto mālohiʼi moʼoni e te kau tagata ʼāfea ke tuputupu te gāue ʼi te minisitelio. ʼI te ʼu fono ʼo te vāhaʼa fuli, neʼe nātou fakaafe te ʼu kaugā fai faka mafola ke nātou fakakaukauʼi ʼi te faikole, peʼe mole feala ke nātou liliu ʼo pionie vaeluaʼi temi. ʼI te ʼu lakaga fuli pe, ko te ʼu tagata ʼāfea pea mo te ʼu tagata faifekau faka minisitelio fuli neʼe nātou ʼui fakafiafia ʼe tonu ke liliu te māhina ʼo ʼApelili ko he māhina lelei tokotahi. Koia, ko te toko 58 ʼi te teau ʼo te ʼu kaugā fagona, ʼo kau kiai te ʼu tagata ʼāfea pea mo te ʼu faifekau faka minisitelio fuli, neʼe nātou pionie ʼi te māhina ʼaia!
28 ʼE Nātou Fiafia ʼi Te Kau Lahi Kiai: Koteā te ʼu tapuakina ʼo takita “gāue mālohi pea mo faiga mālohi” ʼi te minisitelio? (1 Tim. 4:10, MN ) ʼO ʼuhiga mo te gāue lahi ʼo tanatou kokelekasio ʼi ʼApelili ʼo te taʼu kua hili, neʼe tohi fēnei e te ʼu tagata ʼāfea ʼaē neʼe tou talanoa kiai ʼi ʼoluga: “Ko te ʼu tēhina mo tuagaʼane ʼe nātou tau ʼui kua toe ʼāsili tanatou feʼofani pea mo tanatou fakatahi lelei, talu mai tanatou kamata gāue lahi ʼi te minisitelio.”
29 Ko te tēhina tūpulaga neʼe mole feala ke haʼele, neʼe fia kau ʼaupito ki te gāue makehe ʼaia ʼi ʼApelili ʼo te taʼu ʼaenī kua hili. ʼAki he polokalama neʼe ina fai fakalelei pea mo te tokoni ʼo tana faʼe pea mo tona ʼu tēhina mo tuagaʼane fakalaumālie, neʼe fua lelei kia ia te māhina ʼaē neʼe pionie vaeluaʼi temi ai. Koteā tana manatu ʼo ʼuhiga mo te faʼahi ʼaia? Neʼe ina ʼui fēnei: “Ko taku hoki logo ʼaē ʼi toku loto, ʼe ʼau hage ko he tagata mālohi.”
30 ʼE mahino ia ʼe tapuakina lahi e Sehova ia nātou ʼaē ʼe maʼuhiga ʼaupito kia nātou tanatou pilivilesio ʼaē ko te palalau ʼo ʼuhiga mo tona pule. (Pes. 145:11, 12) ʼI tatatou fakamanatu te mate ʼo totatou ʼAliki, ʼe tou mahino ai ko te ʼu tapuakina ʼo tatatou tauhi taputapu ʼe toe lahi anai ʼi te ka haʼu. Neʼe holi ʼaupito te ʼapositolo ko Paulo ki te fakapale ʼaē ko te maʼuli heʼegata. Kae neʼe ina ʼiloʼi ʼe mole ko he meʼa ʼe ina maʼu anai mo kapau ʼe hekaheka pe ʼo fakaʼamu kiai. Neʼe ina tohi fēnei: “Pea e au kakava mo fetau ki te mea aia o fai ki tana gaue ae e gaue malohi ia te au.” (Kol. 1:29) Ko Sehova, ʼaki ia Sesu, neʼe ina foaki kia Paulo te mālohi moʼo fakahoko te minisitelio ʼaē ʼe ina hāofaki te ʼu maʼuli, pea ʼe feala ke Ina toe fai te faʼahi ʼaia maʼa tatou ia ʼaho nei. ʼE koutou fai anai koa te faʼahi ʼaia ʼi te māhina ʼaenī ʼo ʼApelili?
Talanoa ʼo te pasina 3]
Ko Ai ʼAē ʼe Feala Ke Koutou Fakaloto Mālohiʼi Ke Fai Faka Mafola ʼi ʼApelili?
Takotou fānau?
He tahi ʼe ina ako te Tohi-Tapu?
He tahi ʼe mole kei kau ki te gāue?