Tou Faʼafai ʼi Te Meʼa ʼe Lelei!

¹ ʼI te temi ʼo te ʼAho Fakamanatu ʼo te taʼu 2003, ʼe lahi te ʼu tupuʼaga ke tou “faʼafai ʼi te meʼa ʼaē ʼe lelei.” (1 Pet. 3:13, MN ) Ko te tupuʼaga tāfito ʼe ko te sakilifisio faitotogi ʼa Sesu Kilisito. (Mat. 20:28; Soa. 3:16) ʼO ʼuhiga mo te faʼahi ʼaia, neʼe tohi fēnei e te ʼapositolo ko Petelo: “ ʼE koutou ʼiloʼi neʼe mole faka ʼāteaina koutou ʼaki he ʼu meʼa popo, he siliva pe ko he aulo, mai takotou faʼahiga aga vaʼiganoa. . . . Kae neʼe fai ʼaki he taʼataʼa maʼuhiga, ohage ko ʼaē ʼo he akeno ʼe haohaoa pea mo heʼe ʼuli, ko te taʼataʼa ʼo Kilisito.” (1 Pet. 1:18, 19, MN ) Ko te fakafetaʼi ki te fakahā ʼaia ʼo te ʼofa ʼe ina uga tatou ke tou maʼumaʼua ʼi te fai ʼo te meʼa ʼaē ʼe lelei, heʼe tou fakamoʼoni ko Sesu “nee ina tukuʼage iaʼia o uhiga mo tatou, koteuhi ke ina haofaki tatou mai te agahala fuape, pea mo fakamaʼa he hahai maʼana, e natou faʼafai i te u gaue lelei.”—Tito 2:14; 2 Ko. 5:14, 15.

² Ka tou fai te meʼa ʼaē ʼe lelei kia mata ʼo te ʼAtua, pea ʼe tou felogoi lelei ai mo ia pea ʼe tokaga kia tatou ʼaki te ʼofa. Neʼe ʼui e Petelo ki muli age: “Ko ae e fia ofa ki te mauli pea mo mamata ki he u aho manuia, . . . ke fakamamao ia mai te kovi pea mo fai te lelei, ke ina fekumi te tokalelei pea mo tulikaki ia. Koteuhi, ko fofoga o te Aliki e nofo i te hahai agatonu, pea e ava ona taliga ki anatou faikole.” (1 Pet. 3:10-12) ʼI te ʼu temi fakamataku ʼaenī, ʼe ko he tapuakina hatatou ʼiloʼi ko Sehova ʼe leʼoleʼo kia tatou pea ʼe tokoni mai anai kia tatou, ʼo “hāofaki [tatou] ohage ko tona kanoʼi mata.”—Teu. 32:10; 2 Fkma. 16:9.

³ Logola tanatou tau mo he ʼu faigataʼaʼia, kae ko te ʼu ʼuluaki Kilisitiano ʼaē neʼe faitohi ki ai ia Petelo neʼe nātou fonu ʼi te faʼafai, pea neʼe nātou fagonogono te logo lelei ʼi hona ʼaluʼaga ʼe lahi ʼaupito. (1 Pet. 1:6; 4:12) ʼE toe moʼoni te faʼahi ʼaia ʼi te hahaʼi ʼa te ʼAtua ia ʼaho nei. Logola tatatou maʼuʼuli ʼi “te ʼu temi maʼuhiga ʼaupito mo faigataʼa,” kae ko totatou loto fakafetaʼi ki te agalelei ʼa Sehova ʼe ina uga tatou ke tou faʼafai ʼi te fakahoko ʼo te finegalo ʼo te ʼAtua. (2 Tim. 3:1, MN; Pes. 145:7) Tou vakaʼi he ʼu gāue lelei ʼe feala ke tou maʼumaʼua ai ʼi te temi ʼaenī ʼo te ʼAho Fakamanatu.

⁴ Tou Fakaafe Te Hahaʼi Ki Te ʼAho Fakamanatu: ʼE feala ke tou fakahā totatou loto fakafetaʼi ki te meʼa ʼofa lahi ʼaē ko te totogi, mokā tou kau ki te fakamanatu ʼo te mate ʼo Sesu ʼaē ʼe fai ʼi te taʼu fuli, pea ʼe fai anai ʼi te taʼu ʼaenī ʼi te Feliafā ʼaho 16 ʼo ʼApelili, ʼi te ʼosi tō ʼo te laʼā. (Luka 22:19, 20) ʼI te taʼu ʼaenī kua hili, ʼi te ʼu kokelekasio e 94 600 ʼi te malamanei katoa, neʼe ko hahaʼi e toko 15 597 746 ʼaē neʼe nātou kau kiai. Neʼe fakalaka ʼi te toko 220 000 tupu ʼi te taʼu ki muʼa atu.

⁵ Ko te tokofia ʼaē ka kau anai kiai ʼi te taʼu ʼaenī? ʼE fakalogo tāfito ki tatatou ʼu faiga lahi moʼo fakaloto mālohiʼi te hahaʼi ke nātou fakatahi mo tatou. Koutou kamata tohi he lisi ʼo nātou fuli ʼaē ʼe koutou fia fakaafe. ʼI te lisi ʼaia ʼe tonu ke koutou ʼuluaki tohi muʼa tokotou famili. Kapau ʼe mole tui tokotou ʼohoana, koutou fakahā age tokotou loto ʼaē ke kau fakatahi mo koutou. Neʼe ʼui e te tagata ʼohoana, neʼe kau ki te ʼAho Fakamanatu ʼo te taʼu kua hili he neʼe mahino kia ia neʼe maʼuhiga te faʼahi ʼaia maʼa tona ʼohoana. Pea ʼe feala leva ke koutou tohi tokotou ʼu kāiga, tokotou vāhaʼa fale, tokotou ʼu kaugā gāue, peʼe ko tokotou ʼu kaugā ako. ʼAua naʼa galo ke koutou fakaafe takotou ʼu ako Tohi-Tapu.

⁶ ʼI takotou ʼosi tohi takotou lisi, koutou fakatuʼutuʼu he temi ke koutou fai ai te ʼu fakaafe ʼaia kia nātou takitokotahi. Koutou fakaʼaogaʼi te ʼu pepa fakaafe ki te ʼAho Fakamanatu. Moʼo tokoni ki te hahaʼi ke nātou manatuʼi te ʼaho pea mo te koga meʼa ʼaē ka fai ai anai te fono, koutou tohi fakalelei te hola pea mo te koga meʼa ʼaē ka fai ai te ʼAho Fakamanatu ʼi ʼoluga ʼo te pepa fakaafe. Ka ōvi mai te ʼaho 16 ʼo ʼApelili, koutou fakamanatuʼi age kia nātou ʼaē ʼe tuʼu ʼi takotou lisi, ʼo koutou ʼolo kia nātou peʼe koutou telefoni. Tou tokoni ke hahaʼi nātou ʼaē ka kau ki te fakatahi taputapu ʼaupito ʼaia.

⁷ Tou Tokoni Kia Nātou ʼAē ʼe Kau Ki Te ʼAho Fakamanatu: Ko te po ʼo te ʼAho Fakamanatu ʼe fakafiafia tuʼumaʼu. ʼE tou maʼu te fealagia ke tou fai he fakatalitali lelei kia nātou ʼaē ʼe mole māhani ʼi te kau ki tatatou ʼu fono. Tou fakatuʼutuʼu ke tou ʼōmai fakatomuʼa pea mo tou nonofo fualoa ʼi te fakaʼosi, mokā feala. Tou feʼiloʼiʼaki mo nātou ʼaē ʼe foʼofoʼou. Tou agalelei pea mo tali kāiga.—Loma 12:13.

⁸ ʼE feala koa ke tou tokoni ki ʼihi neʼe kau ki te ʼAho Fakamanatu ke nātou tuputupu ʼi te faʼahi fakalaumālie ʼo fai hanatou ako Tohi-Tapu? Tou faiga ke tou ʼiloʼi te higoa pea mo te tuʼasila ʼo nātou ʼaē ʼe foʼofoʼou ʼaē mole heʼeki ʼaʼahi nātou ke feala ai hatatou tokoni kia nātou. ʼAki he tokoni ʼofa, ʼe lagi tuputupu anai ʼihi ʼo nātou liliu ko he ʼu kau fagona mole heʼeki papitema, ʼi muʼa ʼo te hoko mai ʼo te tahi ʼAho Fakamanatu. Ka tou ʼaʼahi lelei ia nātou ʼaē neʼe kau ki te ʼAho Fakamanatu, pea ʼe feala ke tou fakaafe nātou ki te akonaki makehe ʼaē ka fai ʼi te ʼaho 27 ʼo ʼApelili.

⁹ ʼE Feala Koa Ke Tou Pionie Vaeluaʼi Temi ʼi Te Temi ʼAenī? ʼI te taʼu fuli ko tatatou faʼafai maʼa Sehova ʼe ina uga tatou ke tou gāue lahi ʼi te minisitelio ʼi te ʼu māhina ʼaē ʼe hoko ai he ʼu gāue faka teokalatike makehe. ʼI Uvea pea mo Futuna, ʼi te ʼu māhina ʼo Malesio pea mo ʼApelili ʼo te taʼu ʼaenī kua hili, neʼe ko pionie vaeluaʼi temi e toko 9 ʼi Malesio pea mo toko 6 ʼi ʼApelili. Neʼe ko nusipepa e 1 202 neʼe tufa ʼi Malesio, neʼe ko te tupu foʼou ʼaia. ʼI Niu Kaletonia neʼe ko pionie e toko 258 ʼi Malesio pea mo te toko 119 ʼi ʼApelili. Ko te ʼu tupu foʼou neʼe maʼu, ʼi te ʼu hola e 34 075, mo nusipepa e 20 022 pea mo te ʼu ʼaʼahi e 12 532 ʼi Malesio. Ko te ʼu faiga fakatahi ʼa te kokelekasio katoa ke ina faka mafola te logo lelei ʼaki he faʼafai ʼi te temi ʼo te ʼAho Fakamanatu ʼe feala ke maʼu ai he ʼu fua ʼe lelei.

¹⁰ Ko te kokelekasio mo te ʼu kaugā fai faka mafola e toko 107 pea mo te ʼu pionie katoa e toko 9 neʼe nātou ʼui ko ʼApelili neʼe ko te “māhina fakaofoofo” ʼo te taʼu ʼaenī kua hili, he neʼe ko pionie vaeluaʼi temi e toko 53, neʼe kau ai te kau tagata ʼāfea pea mo te ʼu tēhina faifekau faka minisitelio fuli. Neʼe lagalagaʼi feafeaʼi e te kau tagata ʼāfea ia te fiafia ki te selevisi pionie vaeluaʼi temi ʼi te māhina ʼaia? Neʼe nātou uga fakatomuʼa, ʼo nātou fakaloto mālohi te tokolahi ke nātou pionie. Neʼe fai te ʼu fono ki te fai faka mafola ʼi te ʼu hola kehekehe ʼi te ʼaho ke lelei ai maʼa nātou fuli ʼo te kokelekasio. Neʼe faka maʼuhigaʼi tāfito te fai faka mafola ʼaki te telefoni, tāfito maʼa nātou ʼaē neʼe mole feala ke feʼoloʼaki.

¹¹ Ko te tuagaʼane ʼe taʼu 86, neʼe mole feala ke haʼele he neʼe mahaki, neʼe ina tohi tana pepa ke pionie vaeluaʼi temi. ʼI te uhu, neʼe kamata fai faka mafola ia hola e lua ʼaki te telefoni ʼi te laupapa ʼo te fale kuka, pea neʼe mālōlō ʼi ni ʼu hola, pea toe haʼu ʼo toe hoko atu tana fai faka mafola ʼaia. Neʼe fai palalau mo te fafine neʼe mate tona ʼohoana pea mo tana ʼu tama e lua kua hili kiai taʼu e lua, pea neʼe mole mahino kia ia pe koʼe ʼe fakagafua e te ʼAtua ke hoko he ʼu meʼa fakalialia feiā. Neʼe fai faka mafola kia ia, pea neʼe kamata te ako Tohi-Tapu. Ko te fai faka mafola ʼaki te telefoni ʼi te ʼu afiafi pea ʼi te tahi atu temi, ʼe ko he faʼahiga fai ʼe lelei ke tou fai palalau ai mo te hahaʼi ʼaē ʼe nonofo ʼi te ʼu falefata peʼe ko te ʼu koga meʼa ʼaē ʼe mole feala ke tou hū kiai. ʼE toe feala ai foki ke maʼu e te ʼu kaugā fai mafola te hahaʼi ʼaē ʼe pupuli ʼi te ʼaho katoa.

¹² ʼE fakaʼosi fēnei e te kau tagata ʼāfea tanatou fakamatala: “Neʼe ko he temi fakafiafia ʼaupito ʼaia pea mātou fakafetaʼi ki te ʼu pilivilesio pea mo te ʼu tapuakina neʼe foaki mai e Sehova kia mātou takitokotahi.” Kapau ʼe koutou fai he ʼu fakatuʼutuʼu lelei, pea ʼe feala ke maʼu e takotou kokelekasio he ʼu tapuakina feiā.

¹³ Tou Faiga Ke Tou Kau Katoa Ki Te Minisitelio: Ko totatou ʼofa ki te ʼAtua pea mo totatou kāiga ʼe ina uga tatou ke tou fakatuʼutuʼu he temi ʼi te māhina fuli ke tou vaevae te logo lelei ki te hahaʼi. (Mat. 22:37-39) Ko te ʼu tagata taupau ʼo te ʼu Ako Tohi pea mo te ʼu tēhina ʼaē ʼe lagolago kia nātou ʼe tonu ke nātou faiga ke nātou tokoni ki tanatou ako tohi ke nātou kau ki te minisitelio ʼi te māhina fuli. Moʼo fakahoko ʼo te faʼahi ʼaia, ʼe lelei ke fai he ʼu fakatuʼutuʼu fakatomuʼa ke koutou gāue mo nātou takitokotahi ʼo te ako tohi. ʼAua naʼa koutou atalitali ki te fakaʼosi ʼo te māhina kae koutou kamata tautonu. ʼE lahi ai anai te ʼu faigamālie ke koutou tokoni kia nātou ʼaki te ʼofa.

¹⁴ ʼE ʼi ai koa ʼihi ʼi takotou ako tohi ʼe mole feala ke nātou haʼele pea faigataʼa ai kia nātou hanatou kau ki te minisitelio? Kapau ʼe nofo ʼihi ʼi he ʼu fale taupau peʼe tonu ke nonofo ʼi tonatou ʼapi, pea ʼe mahino kia tatou ʼe mole feala ke lahi anai tanatou kau ki te minisitelio. Kae kapau ʼe nātou fakaʼaogaʼi lelei tonatou tuʼakoi ʼaia moʼo fakagigila tanatou mālama, pea ʼe feala ke nātou uga ia nātou ʼaē ʼe sio ki tanatou ʼu gāue lelei, ke nātou fia ʼiloʼi te moʼoni. (Mat. 5:16) ʼE tonu ke vakaʼi e te ʼu tagata taupau ʼo te ako tohi peʼe ʼiloʼi e nātou ʼaia ʼe feala ke nātou tohi ʼi tanatou pepa tānaki gāue te ʼu minuta e 15 ʼaē neʼe lagi nātou fai. Ko tanatou lava tohi tonatou temi fai faka mafola ʼaia ʼe fakaloto mālohiʼi ai te ʼu kaugā fai faka mafola agatonu ʼaia, pea ʼe nātou fiafia ai. ʼE toe tokoni foki ke totonu te tānaki ʼo te gāue ʼaē neʼe fai e te hahaʼi ʼa te ʼAtua ʼi te malamanei katoa.

¹⁵ Ko Te Kau Tūpulaga ʼAē ʼe Lahi Tanatou Gāue ʼe Nātou Fai Te Meʼa ʼAē ʼe Lelei! ʼE ko he meʼa fakafiafia te sio ʼaē ʼe fakaʼaogaʼi e te kau tūpulaga tonatou mālohi moʼo tauhi kia Sehova! (Taag. 20:29) Kapau ʼe kei koutou tūpulaga, ʼe koutou lava fakahā feafeaʼi takotou faʼafai maʼa Sehova ʼi te ʼu gāue makehe ʼo te ʼu māhina ʼaenī?

¹⁶ Kapau mole heʼeki koutou kau ʼi te ʼu kaugā fagona mole heʼeki papitema, pea ʼe mole feala koa ke koutou fakahoko te pilivilesio ʼaia? Koutou fai te ʼu fehuʼi ʼaenī kia koutou: ‘ ʼE ʼau maʼu koa te ʼatamai mālama tāfito ʼo te moʼoni ʼo te Tohi-Tapu? ʼE ʼau fia kau koa ki te gāue ʼo te Puleʼaga? ʼE ʼau tuku koa he faʼifaʼitaki lelei ʼi taku aga? ʼE feala koa ke ʼau fakahā taku tui ʼo ʼau palalau ki te hahaʼi ʼo ʼuhiga mo te logo lelei? ʼE uga koa ʼau e toku loto ke ʼau fai te faʼahi ʼaia?’ Kapau ʼe koutou iō ki te ʼu fehuʼi ʼaia, pea koutou palalau ki takotou ʼu mātuʼa ʼo ʼuhiga mo takotou fia liliu ko he kaugā fagona. ʼE feala ke fakaōvi e takotou ʼu mātuʼa ki te tagata ʼāfea ʼaē ʼe tokaga ki te gāue.

¹⁷ Kapau kua koutou faka mafola te logo lelei, ʼe feala koa ke koutou fakaʼaogaʼi te ʼu temi mālōlō ʼo te ako ke lahi age takotou kau ki te minisitelio? ʼAki he polokalama lelei pea mo te tokoni ʼa te ʼu mātuʼa pea mo ʼihi, neʼe feala ki te kau tūpulaga kua papitema ke nātou toʼo te selevisi pionie vaeluaʼi temi. Kapau ʼe mole feala, koutou faiga mālohi ke tuputupu takotou kau ki te minisitelio. Koutou fai hakotou fakatuʼutuʼu. ʼO hilifaki ki te ʼu hola ʼaē ʼe koutou fakatuʼutuʼu ke koutou fai ʼi te minisitelio, koutou toe fakatuʼutuʼu ke hikihiki takotou faʼahiga fai ʼo takotou minisitelio. ʼE lagi feala ke koutou faiga ke koutou lau he vaega faka Tohi-Tapu ʼi te ʼu matapā fuli, peʼe hikihiki takotou fai te ʼu ʼaʼahi, peʼe ke koutou kamata he ako Tohi-Tapu, peʼe fakalahi takotou minisitelio ʼo koutou fai faka mafola ʼaki te telefoni peʼe ko te tahi ʼu agaaga ʼo te selevisi. He koʼe ʼe mole koutou fakatuʼutuʼu ke koutou fakaafe he tahi ʼi takotou vāhaʼa fale, ʼi te faleako, peʼe ko hokotou kāiga ke kaugā ʼolo mo koutou ki te ʼAho Fakamanatu ʼi te taʼu ʼaenī? Ko takotou kau katoa ki te ʼu gāue faka teokalatike ʼe lahi ai anai te ʼu lelei ka koutou maʼu pea ʼe fakaloto mālohi moʼoni anai ʼihi ʼi te kokelekasio.—1 Tes. 5:11.

¹⁸ Tou Tokoni Ke Tuputupu Ia Nātou ʼAē ʼe Foʼofoʼou: ʼI te taʼu gāue ʼaenī kua hili, neʼe fakafuafua ko ako Tohi-Tapu e 81 neʼe fai ʼi te māhina fuli ʼi Uvea mo Futuna pea ko ako Tohi-Tapu e 1 432 ʼi Niu Kaletonia. ʼAki te temi, tokolahi ʼo te kau ako ʼaia ʼe nātou tuputupu anai ʼo nātou foaki tonatou maʼuli pea mo papitema. Kae ʼi muʼa ʼo tanatou aʼu kiai, ʼe tonu ke tou tokoni kia nātou ke feala hanatou liliu ko he ʼu kaugā fai faka mafola ʼo te logo lelei. ʼE ko he faʼahi maʼuhiga ʼaia ʼi te akoʼi ʼo te hahaʼi foʼou ke nātou liliu ko he ʼu tisipulo ʼa Sesu Kilisito. (Mat. 9:9; Luka 6:40) ʼE ʼi ai koa he tahi ʼe ako mo koutou kua feala hana fakahoko te faʼahi ʼaia?

¹⁹ Kapau ʼe mole koutou ʼiloʼi papau peʼe kua tuputupu ia ia ʼe ako mo koutou, koutou kumi te tokoni ʼa te tagata ʼaē ʼe taupau ki takotou ako tohi peʼe ki te tagata taupau selevisi. ʼE lagi feala ke koutou fakaafe ia ia ke kau ki te ako. Kua māhani te ʼu tēhina ʼaia ʼo feala ai ke nātou fakafuafua pe kua tuputupu ia ia ʼe ako ʼi te faʼahi fakalaumālie. ʼE lagi feala ke nātou fai he ʼu tokoni ke feala ai kia ia ʼe ako ke hoko atu tana tuputupu ʼi te faʼahi fakalaumālie.

²⁰ Ka fakahā atu e ia ʼe ako kua fia liliu ko he kaugā fagona pea mo koutou manatu ʼe kua feala, pea koutou palalau ki te tagata taupau pelesita. ʼE ina fakatuʼutuʼu anai ke vakaʼi e he ʼu tagata ʼāfea e toko lua mo koutou pea mo ia ʼe ako peʼe kua feala ke fai faka mafola, ʼo fakaʼaogaʼi te ʼu manatu ʼi te pasina 98 ki te 100 ʼo te tohi Notre ministère. (Vakaʼi Te Tule Leʼo ʼo te ʼaho 15 ʼo Novepeli 1988, ʼi te pasina 17) Kapau ʼe tali ke liliu ia ia ʼe ako ko he kaugā fagona, pea ʼe feala ke koutou kamata atu aipe ʼo akoako ia ia. Ka ina foaki hana pepa tānaki gāue, pea ʼe feala anai ke fakahā ki te kokelekasio ko ia ʼe ako ʼe ko he kaugā fagona mole heʼeki papitema. Ko te meʼa ʼaē ʼe tou fakaʼamu kiai ke fakahoko e te ʼu lauʼi afe ʼu kaugā fagona foʼou, tūpulaga pea mo matuʼa, te fakatuʼutuʼu fakalaumālie maʼuhiga ʼaia ʼi te ʼu māhina ʼaenī ʼo te gāue makehe.

²¹ Ko Te Fai ʼo He ʼu Fakatuʼutuʼu ʼe Tokoni Ke Lahi Te Fai ʼo Te Meʼa ʼAē ʼe Lelei: Ko te fai ʼo he ʼu fakatuʼutuʼu fakatomuʼa ʼe tokoni anai ke fua lelei te ʼu gāue faka teokalatike ʼi te temi ʼo te ʼAho Fakamanatu. (Taag. 21:5) ʼE lahi te ʼu faʼahi ʼe tonu ke tokakaga kiai te kau tagata ʼāfea.

²² Moʼo tokoni ki te kokelekasio ke lahi tanatou fai faka mafola, ʼe tonu ke fakatuʼutuʼu lelei e te ʼu tagata ʼāfea he ʼu fono ki te fai faka mafola ʼi te vāhaʼa pea ʼi te fakaʼosi vāhaʼa. ʼE tonu ke fai e te tagata taupau ki te gāue te ʼu fakatuʼutuʼu ʼaia. ʼE feala koa ke fai he tahi ʼu fono ki te fai faka mafola ʼi te kei hegihegi, peʼe ʼi te hili hoʼatā, peʼe ʼi te afiafi? ʼE tonu ke fakahā ki te kokelekasio te ʼu fakatuʼutuʼu ka fai. ʼE lelei mo kapau ʼe fakatuʼu te polokalama ʼi muli.

²³ ʼE tonu ke ʼiloʼi papau e te kau tagata ʼāfea peʼe kua tokalelei te ʼu fakatuʼutuʼu ki te ʼAho Fakamanatu ʼi muʼa ʼo te ʼaho 16 ʼo ʼApelili. ʼE kau kiai te vakaʼi ʼo te fakaʼaogaʼi ʼo te Fale ʼo Te Puleʼaga mo te tahi ʼu kokelekasio ʼaē ʼe fakatahi ki ai, mo te fakamaʼa ʼo te Fale ʼo Te Puleʼaga, mo te hinoʼi ʼo te ʼu tēhina ʼaē ka nātou talitali te hahaʼi pea mo feʼāveʼaki te pane pea mo te vino, pea mo te toʼo ʼo te pane pea mo te vino. ʼE tonu ke fakahā ki te kokelekasio te hola pea mo te koga meʼa ʼaē ka fai ai te ʼAho Fakamanatu pea mo te ʼu fetogi ʼi te polokalama ʼo te fono ʼaē ʼe feala ke hoko ʼi te vāhaʼa. Ko te tokaga fakalelei ki te ʼu meʼa ʼaia ʼe feala anai ke fakahoko te fakatahi “i te fakapotopoto mo te fakatokatoka.”—1 Ko. 14:40.

²⁴ ʼE loto anai e te ʼu pule famili ke nātou palalau lolotoga tanatou ako faka famili ki te ʼu meʼa ʼe feala ke nātou fai moʼo fakatuputupu tanatou gāue ʼi te temi ʼo te ʼAho Fakamanatu. ʼE feala koa ke pionie te famili katoa? Peʼe feala koa ke lagolago te famili ki he tokotahi peʼe ki he tokolahi ʼo te famili ʼaē ka pionie? Kapau ʼe mole feala, koutou fakatuʼutuʼu ke lahi te temi ʼaē ka kau ai te famili ki te minisitelio. ʼE ʼi ai koa he tūpulaga ʼi te famili ʼe feala, ʼaki he fakaloto mālohi pea mo he tokoni, ke liliu ko he kaugā fagona mole heʼeki papitema? Ko te tokofia ʼaē ʼe feala ke fakaafe e takotou famili ki te ʼAho Fakamanatu ʼo te taʼu ʼaenī? Kapau ʼe koutou fai he fakatuʼutuʼu lelei pea ʼe maʼu anai e takotou famili he ʼu tapuakina pea mo he ʼu fiafia lahi.

²⁵ Tou Fakaʼaogaʼi Lelei Te Temi ʼAē Kei Toe: ʼI tana faitohi ki te ʼu Kilisitiano ʼo te ʼuluaki sēkulō, neʼe fakamanatuʼi age kia nātou e te ʼapositolo ko Petelo te maʼuhiga ʼo te ʼu temi, he neʼe kua vave hoko te fakaʼosi ʼo te tuʼu faka Sutea. (1 Pet. 4:7) Ia ʼaho nei, ko te ʼu fakamoʼoni fuli ʼe nātou fakahā kua ōvi mai te fakaʼosi ʼo te tuʼu katoa ʼaenī. ʼI te ʼaho fuli, ʼe tonu ke hā ʼi totatou maʼuli tatatou tui papau ki te faʼahi ʼaia. ʼUhi ko tatou ko te ʼu kaugana faʼafai ʼa Sehova, ʼe tonu ke tou tokakaga tāfito ki te gāue maʼuhiga ʼaē ko te tala ʼo te logo lelei.—Tito 2:13, 14.

²⁶ ʼE ko te temi ʼaenī ke tou faʼafai pea mo fai he ʼu gāue! Koutou metitasio ki te ʼu meʼa ʼaē neʼe fai e Sehova maʼa koutou, mo tokotou famili, pea mo te kokelekasio. Logola ʼe mole feala ke tou toe liufaki kia te ia te ʼu tapuakina lahi ʼaē neʼe ina foaki mai, kae ʼe feala ke tou tauhi kia Sehova ʼaki totatou nefesi katoa. (Pes. 116:12-14) ʼE fakapale anai tatatou ʼu faiga lahi ʼaki te ʼu tapuakina mai ia Sehova. (Taag. 10:22) ʼOfa pe ke tou “faʼafai [fuli] ʼi te meʼa ʼaē ʼe lelei” lolotoga te temi makehe ʼaenī ʼo te gāue lahi, “ke fakakololiaʼi te Atua i te meafuape ia Sesu Kilisito.”—1 Pet. 3:13, MN; 4:11.

[Talanoa ʼo te pasina 3]

Te Hahaʼi ʼAē Neʼe Kau Ki Te ʼAho Fakamanatu ʼi Te Malamanei Katoa

1999 14 088 751

2000 14 872 086

2001 15 374 986

2002 15 597 746

[Talanoa ʼo te pasina 4]

Ko Ai ʼAē Ka Koutou Fakaafe Anai?

□✔ Te famili pea mo te ʼu kāiga

□✔ Te ʼu vāhaʼa fale pea mo te ʼu feʼilo

□✔ Te ʼu kaugā gāue pea mo te ʼu kaugā ako

□✔ Te ʼu ʼaʼahi pea mo te kau ako Tohi-Tapu

[Talanoa ʼo te pasina 5]

Tou Tokoni Kia Nātou ʼAē ʼe Kau Ki Te ʼAho Fakamanatu

□✔ Tou fakatalitali lelei nātou

□✔ Tou ʼaʼahi fakalelei ia nātou

□✔ Tou fakaafe nātou ke fai hanatou ako Tohi-Tapu

□✔ Tou fakaafe nātou ki te akonaki makehe

[Talanoa ʼo te pasina 6]

Koteā Takotou ʼu Fakatuʼutuʼu Ki Te Temi ʼo Te ʼAho Fakamanatu?

□✔ Ke koutou fakaafe he tahi ki te ʼAho Fakamanatu

□✔ Ke koutou liliu ko he kaugā fagona ʼo te logo lelei

□✔ Ke koutou fakatuʼutuʼu he ʼu hola ke koutou kau ai ki te minisitelio

□✔ Ke koutou hikihiki he faʼahi ʼo te minisitelio

□✔ Ke koutou toʼo te selevisi pionie vaeluaʼi temi