Tou Fai Faka Mafola Pea Mo Fai He Fagonogono Katoa
1 Ko Sesu neʼe ko “te takitaki pea mo te pule,” koia neʼe ina akoako ai tana kau tisipulo ki te gāue fai faka mafola lahi ʼaē ka nātou fakahoko. (Isa. 55:4; Luka 10:1-12; Gaue 1:8) Neʼe fakamatala fēnei e te ʼapositolo ko Petelo te fakatotonu ʼaē neʼe foaki e Sesu kia nātou: “Neʼe ina fakatotonu mai ke mātou faka mafola ki te hahaʼi pea mo fai he fagonogono katoa, neʼe ko Ia ʼaē neʼe fakanofo e te ʼAtua ke ina fakamāuʼi te kau maʼuʼuli pea mo te kau mate.” (Gaue 10:42, MN ) Koteā ʼaē ʼe tonu ke tou fai moʼo fai he fagonogono katoa?
2 ʼE lahi te ʼu meʼa ʼe feala ke tou ako mokā tou vakaʼi te faʼifaʼitaki ʼa te ʼapositolo ko Paulo. ʼI tana felāveʼi mo te ʼu tagata matuʼa ʼo te kokelekasio ʼo Efeso, neʼe ina fakamanatuʼi fēnei age kia nātou: “Neʼe mole ʼau tātāʼofi ʼi te fakahā atu kia koutou te ʼu meʼa fuli ʼaē neʼe ʼaoga, peʼe ko he ako ʼo koutou ʼi muʼa ʼo te hahaʼi peʼe ʼi te ʼu ʼapi. Neʼe ʼau fai he fagonogono katoa ʼi muʼa ʼo te kau Sutea pea mo te kau Keleka ʼo ʼuhiga mo te fakahemala ki te ʼAtua pea mo te tui ki totatou ʼAliki ko Sesu.” Logola tana tau mo te ʼu faigataʼaʼia, kae neʼe gāue kinakina ia Paulo ke ina tala te logo lelei ki te tokolahi. Neʼe mole ina fakahā pe te ʼu moʼoni tāfito ki te hahaʼi ʼaē neʼe fakalogo kia ia, kae neʼe ina kumi ke ina fakahā age “te tokoni fuli ʼa te ʼAtua.” Moʼo fakahoko te faʼahi ʼaia, neʼe lotolelei ke ina faiga lahi pea mo fai he ʼu sakilifisio. Neʼe ina ʼui fēnei ki muli age: “Mole ʼau tokaga ki toku maʼuli ohage ia ko he meʼa ʼe maʼuhiga ʼaupito kia te ʼau, kehe pe ke ʼau fakaʼosi taku lele pea mo te minisitelio ʼaē neʼe foaki mai kia te ʼau e te ʼAliki ko Sesu, ʼaē ko te fagonogono katoa ki te logo lelei ʼo te ʼofa makehe ʼo te ʼAtua.”—Gaue 20:20, 21, 24, 27, MN.
3 ʼE tou lava mulimuli feafeaʼi ia ʼaho nei ki te faʼifaʼitaki ʼa Paulo? (1 Ko. 11:1) ʼE tonu ke tou kumi te ʼu hahaʼi ʼaē ʼe tau mo nātou, logope la tatatou tau mo he ʼu faigataʼaʼia, pea mo tou faiga ke tou fakahā te logo lelei ki te hahaʼi fuli ʼaē ʼe lanu kehekehe pea mo lea kehekehe, pea mo tou ʼaʼahi fakalelei te hahaʼi ʼaē neʼe fia logo. (Mat. 10:12, 13) ʼE fakamaʼua kiai totatou temi, totatou ʼu faiga pea mo tatatou ʼofa ki te hahaʼi.
4 ʼE Feala Koa Ke Koutou Pionie Vaeluaʼi Temi? ʼE ko he fealagia maʼa koutou ʼi te ʼu māhina ʼo Malesio pea mo ʼApelili ke koutou pionie vaeluaʼi temi, ke feala hakotou fai he fagonogono katoa. Neʼe ko he meʼa fakaloto mālohi ʼi te taʼu ʼaenī kua hili hatatou sio neʼe faiga tāfito ia te tokolahi ke nātou pionie vaeluaʼi temi!
5 Ko te tuagaʼane ʼe taʼu 80 pea ʼe mahamahaki, neʼe loto mālohi ʼaki te ʼu tokoni ʼaē neʼe foaki age e te kautahi ʼa Sehova. Neʼe ina tohi fēnei: “Neʼe toe fakatupu ia ʼau te meʼa ʼaē neʼe ʼau loto kiai talu mai fualoa, pea neʼe ʼau logoʼi ʼi toku loto ʼe tonu ke ʼau toe toʼo te selevisi pionie vaeluaʼi temi.” Neʼe ina fakatuʼutuʼu ke ina toʼo ʼi te māhina ʼo Malesio. Neʼe ina ʼui fēnei: “ ʼUluaki neʼe tonu muʼa ke ʼau heka pea mo vakaʼi peʼe ʼau lavaʼi anai. Neʼe ʼau palalau ki taku taʼahine ʼo ʼuhiga mo taku fakatuʼutuʼu he neʼe ʼau loto ke tokoni mai. Neʼe ʼau punamaʼuli ʼi tana tohi tana pepa ke toe pionie vaeluaʼi temi mo ia.” Lolotoga te māhina, ko te tuagaʼane finematuʼa ʼaia neʼe ina fai tana ʼu hola e 52 ʼi te minisitelio. “Neʼe ʼau faikole tuʼa lahi kia Sehova ke ina foaki mai te mālohi ʼi te temi ʼaē neʼe ʼau logo gaʼegaʼe ai. ʼI te fakaʼosi ʼo te māhina, neʼe ʼau fiafia ʼaupito, pea neʼe ʼau fakamālo tuʼa lahi kia Sehova ʼi tana tokoni mai. ʼE ʼau toe fia toʼo anai te selevisi.” Ko tana fiafia ʼe feala ke ina fakaloto mālohiʼi ʼihi ʼe nātou fia pionie vaeluaʼi temi logola tanatou ʼu mahaki.
6 Ko te tēhina neʼe fakamavae fakafokifā ʼi tana gāue, neʼe ina fakaʼaogaʼi te ʼaluʼaga ʼaia moʼo toʼo te selevisi pionie vaeluaʼi temi. ʼI tana māhina pionie, neʼe faʼafai lahi ʼi te gāue fai faka mafola, pea ʼi te fakaʼosi ʼo te māhina, neʼe ina kamata te ako Tohi-Tapu foʼou. ʼI tana fakakaukauʼi ki te faʼahi ʼaia, neʼe ina ʼui fēnei: “ ʼI māhina fakafiafia lahi leva!” Neʼe fiafia lahi he neʼe ina maʼu te takitaki pea mo te tokoni ʼa Sehova. ʼE moʼoni, ko Sehova neʼe ina huaʼi te ʼu tapuakina lahi kia ia ʼuhi ko te ʼu faiga lahi ʼa te tēhina ʼi te minisitelio, pea ʼe ina toe fai anai te faʼahi ʼaia maʼa koutou.—Mala. 3:10.
7 ʼE mole faigafua ki ʼihi ke nātou pionie vaeluaʼi temi. Kae logola te ʼu maʼua faka mālama pea mo faka famili pea mo te ʼu faigataʼaʼia ʼo tatou takitokotahi, tokolahi te ʼu tēhina mo tuagaʼane neʼe feala ke nātou toʼo te selevisi. Ko te fai fagonogono katoa ʼi te agamāhani ʼe faka ʼuhiga ke kita sakilifisio tokita temi pea mo tokita mālohi, kae ʼe mole feala ia ke fakatatau mo te ʼu tapuakina lahi ʼaē ka tou maʼu.—Taag. 10:22.
8 ʼE lelei te ʼu māhina ʼo Malesio pea mo ʼApelili ke tou pionie vaeluaʼi temi ai. Ko vāhaʼa e nima ʼi Malesio. Ko te fakaʼaogaʼi lelei ʼo te ʼu vāhaʼa ʼaia pea mo te ʼu afiafi ʼe feala ai kia nātou ʼaē ʼe gāue ʼaho katoa ke nātou pionie vaeluaʼi temi. Tahi ʼaē meʼa, ʼe feala ke koutou fakaʼaogaʼi lelei te ʼu ʼaho mālōlō ʼi te māhina ʼo ʼApelili. ʼE maʼu e ʼihi tanatou ʼu ʼaho mālōlō ʼi te faleako pea mo te fale gāue, ʼe feala ke tokoni ai kia nātou ke nātou maʼu te ʼu hola e 50 ʼaē ʼe tonu ke fai. Moʼo fakatuʼutuʼu te ʼu hola e 50 ʼi te minisitelio lolotoga te māhina ʼo Malesio peʼe ko ʼApelili, ʼe feala koa ke koutou fakaʼaogaʼi te ʼu polokalama faigafua ki te pionie vaeluaʼi temi ʼaē ʼe fakatahi mo te alatike ʼaenī? Koutou palalau ki ʼihi ʼo ʼuhiga mo takotou polokalama; pea ʼe mahino ia ʼe fakaloto mālohiʼi anai ʼihi ke nātou kau mo koutou ki te minisitelio. Kapau ʼe mole feala ke koutou pionie vaeluaʼi temi, pea koutou fai he ʼu fakatuʼutuʼu makehe ki te ʼu māhina ʼaia, pea mo koutou lagolago kia nātou ʼaē ʼe pionie. Koutou fakatuʼutuʼu ʼi te temi nei ke lahi age takotou fai faka mafola ʼi Malesio pea mo ʼApelili.
9 Koutou Fakahā Takotou Fakafetaʼi Ki Te ʼAho Fakamanatu: ʼI te taʼu fuli lolotoga te māhina ʼo te ʼAho Fakamanatu, ko te loto fakafetaʼi ʼa te tokolahi ki te totogi ʼe ina uga nātou ke nātou “fakaʼaoga lelei te temi-nei” ke nātou pionie vaeluaʼi temi. (Ef. 5:15, 16) ʼI Niu-Kaletonia ʼi te taʼu ʼaenī kua hili, neʼe ko pionie vaeluaʼi temi e toko 258 ʼi Malesio pea neʼe toko 119 ʼi ʼApelili. Ko tona fakafuafua ko te teitei 188 ʼi te ʼu māhina takitahi ʼaia e lua. Koutou fakatatau age muʼa mo te teitei 46 kau pionie vaeluaʼi temi ʼi te ʼu māhina ki muʼa atu ʼo te taʼu gāue. ʼI Uvea mo Futuna ko te toko 7 neʼe pionie vaeluaʼi temi ʼi Malesio pea mo ʼApelili, kae neʼe mole he pionie ʼi te ʼu māhina ki muʼa atu ʼo te taʼu gāue. Ko te temi ʼaenī ʼo te ʼAho Fakamanatu ʼe ko he tahi faigamālie ʼaia ke tou fakahā ai totatou loto fakafetaʼi moʼoni ki te sakilifisio faitotogi ʼa Kilisito, ʼo fakatuputupu tatatou kau ki te fai faka mafola.
10 ʼI te ōvi mai ʼo te ʼaho 16 ʼo ʼApelili, koutou metitasio ki te faka ʼuhiga ʼo te ʼAho Fakamanatu kia koutou. Koutou fakakaukauʼi te ʼu meʼa ʼaē neʼe hoko pea neʼe iku ki te mate ʼo Kilisito pea mo te ʼu manatu ʼaē neʼe tuʼania lahi kiai. Koutou toe metitasio foki ki te fiafia ʼaē neʼe tuku kia muʼa ʼo Sesu, pea neʼe tokoni feafeaʼi te faʼahi ʼaia ke ina kātakiʼi tona gaohi koviʼi feiā. Koutou fakakaukauʼi te tuʼulaga ʼaē kua ina maʼu ʼi te temi nei, ko te Pule ʼo te kokelekasio, ʼe ina leʼoleʼo te gāue fai faka mafola pea mo te fai ʼo he ʼu tisipulo. (1 Ko. 11:3; Hep. 12:2; Apk. 14:14-16) Pea koutou fakahā takotou loto fakafetaʼi ki te ʼu meʼa fuli neʼe fai e Kilisito, ʼo koutou kau lahi ki te gāue fai faka mafola ʼo mulimuli ki takotou ʼu fealagia.
11 Koutou Fakaloto Mālohi ʼIhi Ke Nātou Fagonogono Katoa: Kapau ʼe pionie vaeluaʼi temi te kau tagata ʼāfea pea mo te ʼu tēhina faifekau faka minisitelio, pea ʼe feala ai ke nātou fakaloto mālohi ʼihi. Ka nātou gāue mo he ʼu kaugā fai faka mafola pea mo nātou fai te ʼu ʼaʼahi faka tauhi ōvi, ʼe ko he ʼu faigamālie lelei ʼaia ke nātou tokoni takitokotahi ki ʼihi ke nātou kau lahi ki te gāue makehe ʼaia. ʼOfa pe ke tou faikole fuli ʼo ʼuhiga mo te gāue ʼaia ʼi Malesio mo ʼApelili, ke mālohi ai tatatou ʼu faiga fakatahi moʼo fai he fagonogono lahi.
12 Logope la ʼe ko te ʼu tagata ʼāfea fuli pea mo te ʼu tēhina faifekau faka minisitelio ʼaē ʼe nātou lagolago anai ki te ʼu fakatuʼutuʼu ʼo te kokelekasio ke lahi age te gāue ʼi te ʼu māhina ʼo Malesio pea mo ʼApelili, kae ko te tagata taupau ki te gāue ʼaē ʼe tonu tāfito ke ina fai he ʼu fakatuʼutuʼu lelei ki te gāue fai faka mafola. ʼE tonu ke ina fakatuʼutuʼu he ʼu koga meʼa ke fai ai te ʼu fono ki te fai faka mafola, te ʼaho pea mo te hola ʼaē ʼe lelei maʼa te tokolahi ʼo te ʼu kaugā fagona pea mo ina fakatuʼutuʼu ke tala tuʼumaʼu ʼi te ʼu Fono Gaue. ʼE feala ke ina fakatuʼutuʼu he ʼu fono fai faka mafola ʼi te ʼu hola kehekehe ʼi te ʼaho, ke feala ai kia nātou fuli ʼo te kokelekasio ke nātou kau ki he ʼu faʼahiga fai faka mafola kehekehe. ʼE feala ke fai faka mafola ʼi te ʼu matani gāue, ʼi te ala, ʼi te ʼu ʼapi, peʼe ko te fai ʼo te ʼu ʼaʼahi, pea mo te fai faka mafola ʼaki te telefoni. Tahi ʼaē meʼa, ʼe tonu ke ina fakatuʼutuʼu ke lahi age te ʼu tohi, mo te ʼu nusipepa pea mo te telituale ʼaē ʼe feala ke tou maʼu ʼi te ʼu māhina ʼaia.
13 ʼE tou tufa anai ʼi Malesio te tohi Te ʼAtamai Mālama, ʼo tou fakatuʼutuʼu ke tou kamata he ʼu ako Tohi-Tapu. ʼI te pepa ʼaē ʼe ʼalutahi mo Te Minisitelio ʼo Te Puleʼaga ʼo Sanualio 2002, ʼe koutou maʼu ai anai he ʼu tokoni lelei moʼo fakahā te tohi Te ʼAtamai Mālama. ʼE tou tufa anai ʼi ʼApelili Te Tule Leʼo pea mo te Réveillez-vous ! Koutou faiga ke koutou fakaʼaogaʼi te alatike “He ʼu Manatu ʼo ʼUhiga Mo Te ʼu Nusipepa.” ʼE tonu ke tou teuteu lelei fuli moʼo fai he fagonogono katoa.
14 Ko he meʼa fakafiafia ʼe tou maʼu ʼi te gāue ʼo mulimuli ki te takitaki ʼo te Pule ʼo te kokelekasio, ia Kilisito Sesu, pea mo te pilivilesio ke tou vaevae te logo lelei mo te hahaʼi! ʼI te fakaōvi mai ʼo te ʼu māhina ʼo Malesio pea mo ʼApelili, tou toe faiga ke lelei ʼaupito tatatou gāue ʼi te ʼu māhina ʼaia, ʼo tou fakalogo ai ki te fakatotonu ʼa Kilisito ke tou fai faka mafola pea mo fai he fagonogono katoa.
[Talanoa ʼo te pasina 4]
He ʼu Polokalama Kehekehe Ke Kita Pionie Vaeluaʼi Temi ʼi Malesio pea mo ʼApelili 2003
ʼAho Hola
Mōnite 1 2 — — 2 —
Feliatolu 1 — 3 — — —
Feliafā 1 2 — 5 — —
Felianima 1 — 3 — — —
Feliaono 1 2 — — — —
Moeaki 5 4 3 5 6 7
ʼAhotapu 2 2 3 2 2 3
Malesio 56 56 54 55 50 50
ʼApelili 50 50 51 53 — —
ʼE ʼi ai koa he polokalama ʼi te ʼu polokalama ʼaenī ʼe lelei kia koutou?