Tou Tokoni Ki Te ʼu ʼOhoana ʼo Te Kau Kilisitiano ʼAē ʼe Mole ʼi Te Moʼoni
1 ʼE ko he meʼa fakafiafia lahi te tauhi fakatahi ʼa he taumatuʼa ki te tauhi moʼoni. Kae, ʼe lahi te ʼu famili ʼe ko te tokotahi pe ʼi te taumatuʼa ʼe ina tali te ala ʼo te moʼoni. ʼE lava feafeaʼi koa hatatou tokoni ki te ʼu ʼohoana ʼo te kau Kilisitiano ʼaē ʼe mole ʼi te moʼoni, pea mo fakaloto mālohiʼi ʼo nātou ke nātou fakatahi mo tatou ʼi te tauhi ʼaē kia Sehova?—1 Tim. 2:1-4.
2 Ke Tou Mahino Ki Tanatou ʼu Manatu: Tatau aipe peʼe fakafeagai te ʼu ʼohoana ʼo ʼihi ʼu Kilisitiano ʼaē ʼe mole ʼi te moʼoni, ʼe hoko tāfito te faʼahi ʼaia heʼe mole nātou fia logo ki te moʼoni peʼe nātou mahino hala kiai. ʼE lagi hage kia ia ʼaē ʼe mole ʼi te moʼoni, kua meʼa noaʼi ia ia peʼe lagi fuaʼā ki te fia ʼiloʼi e tona ʼohoana ia te moʼoni. ʼE manatuʼi fēnei e te tagata ʼohoana: “ ʼI taku nofo tokotahi ʼi toku ʼapi, neʼe hage kua līʼakina ʼau.” ʼE ʼui fēnei e te tahi: “Neʼe hage kia ʼau kua līaki ʼau e toku ʼohoana pea mo taku ʼu tamaliki.” Ko ʼihi tagata ʼe lagi nātou manatu kua faʼao tonatou famili e te lotu. (Vakaʼi Te Tule Leʼo, Fakafalani ʼo te ʼaho 15 ʼo ʼAukusito 1990, pasina 20 ki te 23.) Koia la ʼaē ʼe lelei ai, mo kapau ʼe feala, ke kau fakatahi te tagata pea mo tona ʼohoana ki te ako Tohi-Tapu talu mai te temi ʼaē ʼe kamata ai.
3 Ke Nā Gāue Fakatahi: Ko te taumatuʼa Fakamoʼoni ʼa Sehova neʼe nā gāue fakatahi moʼo tokoni ki te hahaʼi ʼohoana ke nātou hū ki te moʼoni. ʼI te ʼosi kamata e te tuagaʼane te ako ʼa te fafine, pea neʼe ʼaʼahi e te tēhina te ʼohoana ʼo te fafine ʼaia. Neʼe feala ke tautau kamata e te tēhina he ako Tohi-Tapu mo te ʼu tagata ʼohoana.
4 Ke Tou Aga Fakakāiga Pea Mo Tou Tali Kāiga: Ko te ʼu famili ʼo te kokelekasio ʼe feala ke nātou tokoni ki te faʼahi ʼaia, ʼo nātou tokakaga ki te ʼu famili ʼaē ʼe mole heʼeki kau fuli ki te tauhi moʼoni. Kapau ʼe tou fai he ʼu ʼaʼahi fakakāiga ki te ʼu ʼohoana ʼo te kau Fakamoʼoni ʼa Sehova ʼaē ʼe mole ʼi te moʼoni, pea ʼe feala anai ke nātou sisio ko te kau Fakamoʼoni ʼa Sehova ʼe ko he kau Kilisitiano ʼe aga fakakāiga pea ʼe nātou loto ke lelei te maʼuli ʼo te hahaʼi.
5 ʼI ʼihi temi, ʼe feala ke vakaʼi e te ʼu tagata ʼāfea te ʼu faiga ʼaē neʼe fai moʼo tokoni ki te ʼu ʼohoana ʼo te kau Fakamoʼoni ʼa Sehova ʼaē ʼe mole ʼi te moʼoni, pea mo vakaʼi pe koteā te meʼa ʼaē ʼe feala ke toe fai ke feala ai hanatou liliu ko he ʼu hahaʼi ʼe tauhi kia Sehova.—1 Pet. 3:1, te kiʼi nota ʼi te lalo pasina.