ʼE Lahi Koa Te Telituale ʼo Tokotou Kokelekasio?
1 Mai te ʼu kolo lalahi ʼo Sutea ʼo aʼu ki te ʼu kiʼi kolo liliki ʼo Kalilea, neʼe fai e Sesu te fagonogono lahi ʼi te foʼi telituale lahi ʼo te Iselaele ʼāfea. (Mko. 1:38, 39; Luka 23:5) ʼO toe feiā mo tatou, ʼe tonu ke tou faiga mālohi ke tou fakaaʼu te logo lelei ki te tokolahi. (Mko. 13:10) Kae ʼe mole ko he meʼa faigafua. Koteā tona tupuʼaga?
2 ʼE lahi te ʼu kokelekasio ʼi te Pasifika, ohage ko Uvea mo Futuna, ʼe lahi ai te ʼu kiʼi kolo liliki ʼi tonatou telituale. Ko te ʼu tēhina Uvea mo Futuna ʼo Niu-Kaletonia ʼe nātou faka mafola ʼi te ʼu kolo ʼe tokolahi ʼaupito ai te hahaʼi, moʼo kumi te hahaʼi ʼaē ʼe nātou lea Fakaʼuvea, pea ʼi te tahi faʼahi, ʼe ʼi ai te ʼu kiʼi kolo liliki ʼe tonu ke nātou faka mafola ai. Koteā ʼaē ʼe feala ke tou fai moʼo tokoni ki te hahaʼi ʼaē ʼe nonofo ʼi te ʼu telituale feiā, ke nātou ʼiloʼi te moʼoni ʼo ʼuhiga mo Sehova, mo Sesu pea mo te Puleʼaga?
3 Koutou Fakatuʼutuʼu Lelei: ʼE tonu ki te tagata taupau ki te gāue pea mo te tēhina ʼaē ʼe gāue ki te ʼu telituale, ke nā fakatuʼutuʼu lelei te ʼu gāue ʼaē ʼe feala ke fai e te kokelekasio. ʼE lagi feala anai ke fakatuʼutuʼu he ʼu Moeaki makehe, mo kapau ʼe feala ki te tokolahi ke nātou gāue ʼaho katoa ʼi te faka mafola. Kapau ʼe tonu ke gāueʼi he ʼu telituale ʼi te vao, koutou fakatuʼutuʼu ke fai he ʼu ʼaho loaloaga ʼi te telituale mo kapau ʼe feala, pea mo koutou kakai ai ʼi te fetapā. ʼE lagi tonu anai ke koutou fakatahitahi ʼi te kei uhuuhu moʼo vahevahe te gāue, ke maʼu hokotou temi ke koutou ʼolo ai ki te telituale, peʼe koutou ʼolo ki te telituale ʼo vahevahe ai te gāue. ʼAua naʼa kaugamālie fau te hahaʼi ʼaē ʼe hake, ke feʼauga te gāue ʼaē ka fai.
4 ʼE lelei ke tohi fakalelei te ʼu pepa ʼo te telituale, peʼe tuʼu ʼifea te ʼu ʼapi Uvea mo Futuna, ke mole puli he temi ʼi tona fekumiʼaki. Koutou faigaʼi ke mahino lelei te telituale, pea ke maʼu gafua te ʼu ʼapi ʼaia.
5 Koutou vakaʼi ke feʼauga te ʼu tohi pea mo te ʼu nusipepa ʼaē ʼe koutou ʼave ki te gāue. Kapau ʼe tahitahiga te gāueʼi ʼo te telituale, pea ʼe lagi lelei ke koutou tuku he kiʼi pepa lotu peʼe ko he nusipepa ʼāfea ki te ʼu ʼapi ʼaē ʼe lāvaki. Kapau ʼe koutou maʼu te kiʼi pepa lotu Aimeriez-vous en savoir plus sur la Bible?, pea koutou tufa ki te hahaʼi Uvea mo Futuna, pea mo koutou tuku ʼi te ʼu ʼapi ʼaē ʼe lāvaki.
6 Koutou Lagolago Fuli: Moʼo gāueʼi he telituale lahi, ʼe maʼua ke lagolago kiai te kokelekasio katoa. Kapau ʼe tou ʼolo ki he ʼu koga meʼa mamaʼo, pea ʼe feala kia nātou ʼaē e nātou motokā tahi, ke nātou fetokoniʼaki ki te penisini. ʼE tonu ke koutou fakasiosio poto, mo kapau ʼe koutou maʼu he ʼu hahaʼi ʼe nātou fia fai palalau fualoa mo koutou. Koutou manatuʼi ʼe tonu ke koutou fai te ʼu hahaʼi fuli ʼo te telituale, pea mo koutou manatuʼi ʼe ʼi ai ʼihi ʼe nātou talitali atu ʼi te motokā ʼaē neʼe koutou hake fakatahi ai. Kapau ʼe koutou fia hoko fualoa atu te fai palalau mo he tahi ʼe fia logo, pea koutou faka felogoi mo nātou ʼaē neʼe koutou hake fakatahi, ke nātou hoko atu te gāue ʼi te telituale.
7 Koutou fai he ʼu fakatuʼutuʼu lelei ke feala hakotou ʼaʼahi ia nātou fuli ʼaē neʼe fia logo. Koutou kole age te tuʼasila mo te numelo telefoni ʼo ia ʼaē ʼe fia logo, ke feala hakotou fai faka mafola ki ai ʼi te telefoni. Kapau ʼe mole he ʼu higoa ʼo te ʼu ala, peʼe mole ʼi ai he ʼu numelo ʼo te ʼapi, koutou tohi fakalelei ki he moʼi pepa peʼe feafeaʼi te koga meʼa ke feala ke maʼu te ʼaʼahi.
8 ʼE ko he pilivilesio lahi kia tatou te fakahoko ʼo te fakatotonu ʼa Sesu: “ ʼI he kolo lahi, pe ko he kolo veliveli ʼe koutou hū kiai, koutou kumi pe ko ai ʼaē ʼe tāu mo ia”! (Mat. 10:11, MN ) ʼE mahino papau ia, ʼe tapuakina anai e Sehova takotou ʼu faiga, heʼe koutou faiga fakamalotoloto ke koutou fai te gāue maʼuhiga ʼaia!