ʼE Fua Lelei Anai Koa Kia Koutou He Telituale ʼe ʼAteaina Pe Kia Koutou?
1. Kapau ʼe lahi te ʼu telituale ʼi takotou kokelekasio, kotea ʼae ʼe feala ke kotou fai?
1 Kapau ʼe lahi te ʼu telituale ʼi takotou kokelekasio, kotea ʼae ʼe feala ke kotou fai? ʼE feala ke kita kole he telituale ʼa kita totonu, lagi ovi ki tokita ʼapi. ʼE fakamahino fenei ʼi te Minisitelio ʼo Te Puleʼaga ʼo Fepualio 2007, ʼi te pasina 7: “Kapau ko te telituale ʼaē neʼe hinoʼi atu ʼe ovi ki tou ʼapi, ʼe feala anai ke ke fakaʼaogaʼi lelei tou temi ki te gāue fai faka mafola. ʼE toe feala pē foki ke ke fakaafe niʼihi ke natou kaugā fai faka mafola mo koe ʼi te telituale ʼaia.”
2. ʼE lava feafeaʼi hakotou lagolago ki te faifakamafola mo te kutuga ʼo te kokelekasio logope kua kotou maʼu he telituale ʼe ʼateaina pe kia koutou?
2 Tou Toe Lagolago Ki Te Faifakamafola Mo Te Kutuga ʼo Te Kokelekasio: Kapau ʼe kotou maʼu he telituale ʼe ovi ki tokotou fale gaue, pea ʼe feala hakotou faifakamafola ʼi ai lagi mo he kauga fagona ʼe gaue ovi ki tokotou fale gaue, ʼi te temi kai pe ʼi muʼa ʼo takotou toe liliu ki tokotou ʼapi. Kapau ko he telituale ʼe ovi ki tokotou ʼapi, pea ʼe faigafua kia koutou mo tokotou famili hakotou faifakamafola ʼi ai ʼi te afiafi. ʼE mahino ia, kapau ʼe mole kotou kau ki he fono faifakamafola, pea ʼe lelei ke kotou kole te takitaki ʼa Sehova ʼi te faikole ʼi muʼa ʼo takotou kamata faifakamafola. (Filp. 4:6) Pea ʼe tonu ke kotou fakafuafua lelei te temi ʼae ʼe kotou gaue ai ʼi te telituale ʼae ʼe ʼateaina pe kia koutou pea mo te temi ʼae ʼe kotou lagolago ai ki te kutuga faifakamafola ʼo te kokekelasio. Tafitō ʼi te ʼu fakaʼosi vahaʼa, ʼae ʼe hahaʼi ai te ʼu fono faifakamafola, ʼi te agamahani ʼe lelei ke tou lagolago ki takotou kutuga faifakamafola.
3. Kotea te ʼu fua lelei mo kapau ʼe kotou maʼu he telituale ʼe ʼateaina pe kia koutou?
3 Te ʼu Fua Lelei: Kapau ʼe ʼi ai hakotou telituale ʼe ʼateaina pe kia koutou, pea ʼe feala anai hakotou faifakamafola ʼi ai ʼi he temi pe ʼe kotou ava ai. ʼE lahi age anai te ʼu hola ʼae ʼe kotou faifakamafola ai ʼi hakotou feʼoloʼaki. ʼAki te ʼu faigamalie ʼaia, neʼe liliu ai ʼihi ʼo pionie vaelua ʼi temi pe pionie katoa. ʼE faigafua anai hakotou fai te ʼu ʼaʼahi pea mo te ʼu ako Tohi-Tapu he ko te hahaʼi ʼae neʼe fia logo ʼe natou nonofo ʼi he koga meʼa pe e tahi. ʼI te manatu ʼa te tokolahi, ko te faifakamafola ʼi he telituale ʼe ʼateaina pe kia natou, ʼe liliu ai te hahaʼi ʼo falala kia natou he kua natou feʼiloʼiʼaki, tafitō moka neʼe gaueʼi tuʼa lahi te telituale, ʼi muʼa ʼo tona toe fakaliliu ke feala ki ʼihi age ke natou maʼu te telituale ʼaia. Ko takotou faifakamafola ʼi he telituale ʼe ʼateaina pe kia koutou, ʼe tokoni anai koa kia koutou mo tokotou famili ke lahi age takotou gaue ʼi te minisitelio?—2 Tim. 4:5.