Te ʼu Fono Fai Fakamafola
1. He koʼē ʼe ʼi ai totatou pikipikiga mo te ʼu fakatuʼutuʼu ʼo te gāue fai fakamafola?
1 Neʼe tuku e Sesu ia te faʼifaʼitaki ʼo te fakahoko ʼo he gāue fai fakamafola ʼo te Puleʼaga ʼe fakatuʼutuʼu lelei pea mo ʼaoga. ʼO toe fēia iā ʼaho nei, ko nātou ʼaē ʼe tōkakaga ki te gāue fai fakamafola fakamālamanei ʼo te Puleʼaga, ʼe natou loto moʼoni ke toe fēia ia te fakahoko ʼo te gāue ʼaia. Koia, moʼo fakahoko ia te faʼahi ʼaia, ko te ʼu kōkelekāsio ʼi te mālamanei kātoa ʼe natou fakaʼaogaʼi ia te ʼu fono fai fakamafola moʼo fakatuʼutuʼu fakakūtuga ia te gāue fai fakamafola ʼo te Puleʼaga.—Mat. 24:45-47; 25:21; Luka 10:1-7.
2. He koʼē neʼe fakatuʼutuʼu he ʼu fono fai fakamafola?
2 Ko He Fakatuʼutuʼu Lelei: Neʼe fakatuʼutuʼu ia te ʼu fono fai fakamafola moʼo fakalotomālohiʼi, moʼo akoʼi ia te fai ʼo te gāue, pea moʼo takitaki ia nātou ʼaē ʼe ʼolo ʼo fai fakamafola. ʼE feala ke vakaʼi fakanounou ia te koga tohi ʼo te ʼaho mokā ʼalutahi mo te gāue fai fakamafola. ʼI ʼihi temi, ʼe feala ke palalau ki te ʼu fakamanatu ʼaē ʼe tuʼu ʼi Te Minisitelio ʼo Te Puleʼaga, peʼe ko te tohi Comment raisonner, peʼe ko te tohi École du ministère moʼo teuteu ia nātou fuli ʼaē ʼe kau ki te gāue ʼo te ʼaho ʼaia. ʼE feala ke toe fai mo he kiʼi faʼifaʼitaki ʼo ʼuhiga mo te tufa. ʼI muʼa ʼo te fai ʼo te faikole fakaʼosi, ʼe tonu ke tahi ʼiloʼi e te kau fai fakamafola pe ko ai ʼaē ʼe kaugā fai fakamafola mo ia ʼi te minisitelio pea mo te faʼahi ʼaē ʼe tuʼu ai te telituale, ʼaē kā natou ʼolo ʼo fai fakamafola ai. ʼE minuta 15 te kiʼi fono ʼaia pea kā ʼosi pē, ʼe tonu ke natou foimo ʼolo ki ʼanatou telituale.
3. Ko ai ʼaē ʼe tonu ke tokaga ki te fakatuʼutuʼu ʼo te ʼu fono fai fakamafola?
3 ʼE Feafeaʼi Ia Te Fakatuʼutuʼu ʼo Te ʼu Fono ʼAia? Ko te tehina taupau ki te gāue, ʼaē ʼe ina takitaki, ʼe tokaga ki te fakatuʼutuʼu ʼo te ʼu fono fai fakamafola. Ko te ʼu taupau ki te kūtuga peʼe ko te ʼu tehina ʼaē ʼe tokoni kiā nātou, ʼe ko tonatou maʼua ke natou gāue fakatahi mo te kūtuga fai fakamafola ʼaē neʼe hinoʼi nātou ki ai ʼi te ʼu fakaʼosi vāhaʼa. ʼE lagi feala ki ʼihi taupau peʼe ko ʼihi tagata faifekau fakaminisitelio ke natou gāue fakatahi mo tanatou kūtuga fai fakamafola ʼi te lolotoga vāhaʼa. Ko te ʼu taupau ki te kūtuga, ʼe natou felōgoi mo te taupau ki te gāue ke feʼauga tanatou telituale ki te gāue fai fakamafola ʼi te ʼu ʼapi ʼi te fakaʼosi vāhaʼa. Lolotoga te vāhaʼa, ko te taupau ki te gāue ʼe ina fai anai he ʼu fakatuʼutuʼu ʼo ʼuhiga mo nātou ʼaē kā natou takitaki anai ia te ʼu kūtuga ki te fai fakamafola.
4-6. (a) Koteā te fakatuʼutuʼu ʼo te ʼu fono fai fakamafola ʼo ʼuhiga mo te telituale ʼo te kōkelekāsio? (b) Koteā ʼaē ʼe feala ke vakaʼi ke ʼiloʼi ai, peʼe ʼaoga he ʼu fono fai fakamafola?
4 Ko Te Koga Meʼa Fea Pea Ko Te Temi Fea ʼAē ʼe Tonu Ke Fai Ai Ia Te ʼu Fono? Ke mole fakatahitahi ia te kōkelekāsio kātoa ʼi he koga meʼa e tahi, ʼe lelei age ke fai ia te ʼu fono ʼaia ʼi he ʼu koga meʼa ʼe lelei, ʼi te agamāhani ʼi he ʼu loto fale ʼe tuʼu ʼi te telituale, ʼaki te fakatuʼutuʼu ʼaē ke gāueʼi fakalelei ia te telituale ʼo te kōkelekāsio. ʼE feala ke toe fakaʼaoga mo te ʼu Fale ʼo Te Puleʼaga ki te faʼahi ʼaia. ʼE lahi te ʼu kōkelekāsio ʼe natou fakaʼaogaʼi ia te Fale ʼo Te Puleʼaga moʼo fai kiai ia te fono fai fakamafola, ʼi te ʼAhotapu, ʼi te ʼosi pē ʼo te akonaki ki te kaugamālie pea mo te Ako ʼo Te Tule Leʼo. ʼE tonu ke mole mamaʼo fau ia te ʼolo ʼaē ki te telituale. Koia, ʼi ʼihi temi, ʼe tonu ke toe vakaʼi ia te ʼu fakatuʼutuʼu ʼaē neʼe fai, peʼe kei ʼaoga ke fai ia te ʼu fono ki te ʼu koga meʼa ʼaē ʼe fai māhani kiai, ke hoko atu aipē ia te gāueʼi fakalelei pea mo kātoa ʼo te telituale.
5 Ko te ʼu hola ʼaē lelei ke fai ai ia te ʼu fono ʼaia, pea ko fono e fia ʼe tonu ke fai ʼi te vāhaʼa ʼe mulimuli pē anai ki te agaaga ʼo te telituale. ʼE feala ki te ʼu fehuʼi ʼaē kā hoa mai ke tokoni atu ki te ʼiloʼi ʼaē ʼo te ʼu koga meʼa pea mo te hola ʼaē ʼe ʼaoga ai moʼo fai ia te ʼu fono fai fakamafola.
6 Ko te telituale fea ʼaē ʼe tonu ke gāueʼi tāfito? Ko te lakaga fea ʼo te ʼaho, ʼaē ʼe lelei ai ki te fai fakamafola ʼi te ʼu ʼapi? ʼE tonu koa ke fakatuʼutuʼu ia he temi ʼi te afiafi ki te fai fakamafola ʼi te ʼu ʼapi peʼe ko te fai ʼo te ʼu ʼaʼahi? Ko te ʼu fakatuʼutuʼu fuli ki te gāue fai fakamafola ʼe tonu ke fakatuʼu ʼi te papa ʼaē ʼe tuʼu ʼi muli ʼo te fale fono. Ko te kau fai fakamafola fuli ʼo te Puleʼaga, ʼe natou loto ke natou gāueʼi kātoa ia tanatou telituale, ke feala ai hatatou ʼui ohagē ko te ʼapositolo ko Paulo: “ ʼE mole he telituale neʼe heʼeki au gāueʼi.”—Loma 15:23.
7. Koteā ʼaē ʼe tonu ke fai e ia ʼaē neʼe hinoʼi ke tokaga ki te kūtuga fai fakamafola?
7 Te Takitaki ʼo Te ʼu Fono Fai Fakamafola: Ko ʼaē neʼe hinoʼi ke ina takitaki ia te fono ʼaia, ʼe fakaʼapaʼapa anai ki te fakatuʼutuʼu Fakateokalatike ʼaia, ʼo teuteu lelei kiai. ʼE tonu ke kamata te ʼu fono ʼaia ʼi tona hola totonu pea ke ʼaoga mo nounou, pea ke minuta 10 peʼe 15 tona fai. ʼI muʼa ʼo te kamata ʼo te fono, ʼe tonu ke maʼu e te tehina takitaki ia te ʼu telituale ʼaē kā gāue ai te kūtuga. Logolā ʼe mole ʼaoga ke fakatalitali ʼi te ʼosi ʼo te fono gāue kiā nātou ʼaē ʼe tauhala mai, kae ʼe feala pē ke tuku he pepa ʼe tohi ai te faʼahi ʼaē kā gāue ai anai te kūtuga ʼaia. ʼI te ʼosi pē ʼo te fono, ʼe tonu ki te kau fai fakamafola ke natou tahi ʼolo ki tana telituale. Kapau ko he fono fai fakamafola ʼe fakatuʼutuʼu lelei pea mo ʼaoga, ʼe mahino ia ʼe tokoni anai kiā nātou fuli ʼaē ʼe kau kiai ke natou fakahoko tanatou minisitelio ʼi te ʼaho ʼaia.—Taag. 11:14.
8. ʼE lava lagolago feafeaʼi ia nātou ʼaē ʼe kau ki te ʼu fono fai fakamafola kiā nātou ʼaē ʼe natou takitaki?
8 Te Kau Ki Te ʼu Fono Fai Fakamafola: ʼE maʼuhiga ke tou lagolago ki te ʼu fakatuʼutuʼu kua fai. (Hep. 13:17) Kā ʼe feala, ko ia ʼaē ʼe ina fakatuʼutuʼu te gāue ʼo te kūtuga ʼe tokoni anai ki he tahi ʼe ʼaoga ki ai hona hoa. ʼE lelei ki te kau fai fakamafola ʼaē kua māhani ke natou kau ki te ʼu fono, ke feala hanatou tokoni ki te kau fai fakamafola foʼofoʼou pea mo nātou ʼaē ʼe mole heʼeki māhani. Ko nātou ʼaē ʼe natou lotolelei ke natou gāue mo he tahi neʼe hinoʼi ke gāue mo ia, ʼi ʼihi temi, ʼe feala ke lahi te gāue lelei ʼe natou fai. (Taag. 27:17; Loma 15:1, 2) ʼE tonu ke tou faiga fuli ke mole tou tauhala ki te ʼu fono ʼaia. Ko tatatou fakaʼapaʼapa ki te fakatuʼutuʼu Fakateokalatike ʼaia pea mo totatou ʼu tehina, ʼe ina uga anai tātou ke tou fai ia te ʼu fetogi ʼaē ʼe ʼaoga ʼi te faʼahi ʼaia.—2 Ko. 6:3, 4; Filp. 2:4.
9. ʼE lava lagolago feafeaʼi ia te kau pioniē ki te fakatuʼutuʼu ʼaia?
9 Te Lagolago ʼa Te Kau Pioniē: Ko te lagolago ʼa te kau pioniē ki te ʼu fono fai fakamafola ʼaia ʼe maʼuhiga pea mo fakalotomālohi kiā tātou fuli. ʼE mahino ia ʼe lahi te ʼu maʼua ʼo te kau pioniē. ʼE mole gata pē ʼi tanatou ʼu ako Tohi-Tapu pea mo te ʼu ʼaʼahi ʼaē ʼe tonu ke natou fai, ʼe toe ʼi ai pē foki mo tonatou ʼu maʼua fakafāmili pea mo tanatou gāue fakamālama. Koia, ʼe mole tonu ke manatu ia te kau pioniē ʼe ko honatou maʼua ke natou lagolago ki te ʼu fono fai fakamafola fuli ʼaē ʼe fakatuʼutuʼu e te kōkelekāsio, tāfito lā mo kapau ʼe fai ia te ʼu fono gāue ʼaia ʼi te ʼaho fuli. Kae ʼe lagi feala anai ki te kau pioniē ke natou lagolago ki ʼihi fono gāue ʼi te vāhaʼa fuli. ʼE feala pē ke ʼui, ko te ʼu fono fai fakamafola ʼaia ʼe ina foaki ia he ako ki te kōkelekāsio, pea ko te ʼatamai mālama ʼo ʼuhiga mo te Tohi-Tapu ʼaē ʼe maʼu e te kau pioniē pea mo tanatou kua māhani ʼi te fai fakamafola, ʼe feala ke tokoni ʼaupitō kiā nātou ʼaē ʼe kau kiai. Kua natou māhani ʼi te minisitelio ʼuhi ko tanatou kau tuʼumaʼu ki te fai fakamafola. ʼE feala ke natou vaevae ia te faʼahi ʼaia. Ko tanatou faʼafai ʼaē ʼi te minisitelio pea mo te ʼu fono fai fakamafola, ʼe tonu ke faʼifaʼitakiʼi. Pea ʼe tou fakafetaʼi ʼaupitō ki tanatou kau ki te ʼu fono fai fakamafola ʼaia.
10. He koʼē ʼe lelei ke lagolago te kau fai fakamafola fuli ʼo te Puleʼaga ʼaki tonatou loto kātoa ki te fakatuʼutuʼu ʼaia?
10 Ohagē ko Sesu pea mo tana ʼu tisipulo, ʼe fai tāfito ia tatatou gāue fai fakamafola ʼo te Puleʼaga ki te ʼu ʼapi. Ko te tupuʼaga ʼo te ʼu fono fai fakamafola ke tou fefakalotomālohiʼaki pea mo fua lelei tatatou kau ki te gāue ʼaia. Ko te kau fai fakamafola fuli ʼo te logo lelei ʼe tonu ke natou lagolago ki te ʼu fakatuʼutuʼu Fakateokalatike, ʼo tahi mulimuli pē ki tona fealagia. (Gāue 5:42; 20:20) ʼOfa pē ke tou lagolago fuli ʼaki totatou loto kātoa ki te ʼu fono fai fakamafola. ʼI tatatou fai fēia, ʼe feala ke tou tui papau ki te tapuakina lahi ʼa Sehova pea mo tou lava fakafiafia ia te loto ʼo totatou Takitaki, ia Sesu Kilisito, ʼi tatatou fakamafola ia te logo lelei ʼo te Puleʼaga ʼo te ʼAtua.—Mat. 25:34-40; 28:19, 20.