Tou Maʼu Te ʼu Lelei Fuli ʼo Te ʼu Fono Fai Faka Mafola
1. Koteā te ʼu ʼaoga ʼo te ʼu fono fai faka mafola kiā tātou?
1 Ko te ʼu fono ʼaē ʼe tokoni lelei ki te fai faka mafola, ʼe tou maʼu ai he fakaloto mālohi moʼoni pea mo he ʼu ako lelei ʼi muʼa ʼo tatatou ʼolo ki te minisitelio. ʼAki ia te ʼu fono ʼaia, ʼe feala ai hatatou fai fagonogono fakatahi, mo felagolagoʼaki pea mo feʼakoakoʼaki. (Taag. 27:17; Tnk. 4:9, 10) Koteā ʼaē ʼe tou lava fai ke tou maʼu ia te ʼu lelei fuli ʼo te taʼi ʼu fono ʼaia?
2. Ko te ʼu puani fea ʼaē ʼe lava vakaʼi e te ʼu tehina takitaki?
2 Ki Te ʼu Tehina Takitaki ʼo Te ʼu Fono ʼAia: ʼI te agamāhani, ʼe mole fakahā fakatomuʼa atu ia te ʼu manatu ʼaē ʼe tonu ke kotou vakaʼi ʼi te ʼu fono ʼaia. Koia ʼaē ʼe tonu ai ke kotou teuteuʼi fakalelei ia te fono ʼaia. ʼAua naʼa kotou vakaʼi tuʼumaʼu pe ia te koga tohi ʼo te ʼaho, gata pe mo kapau ʼe kotou sisio ʼe ʼaoga pea mo lagolago ki te minisitelio. Kotou fakakaukauʼi ia te ʼu faʼahi ʼaē kā ʼaoga moʼoni anai kiā nātou ʼaē kā fai faka mafola ʼi te ʼaho ʼaia. Ohage lā, ʼe lagi kotou fia vakavakaʼi anai he ʼu manatu ʼo ʼuhiga mo te tufa, peʼe kotou fai he faʼifaʼitaki. ʼE feala hakotou vakaʼi ia te ʼu manatu ʼaē ʼe tuʼu ʼi te kiʼi kaupepa Te ʼu Tokoni Ki Te ʼu Fai Palalau Faka Tohi-Tapu, peʼe ko te kaupepa Ke ʼAoga Kiā Koutou ia Te Ako Faka Teokalatike, peʼe ko he koga ʼo te Fono Gāue neʼe hoki vakaʼi age pe, peʼe kotou vakaʼi te faʼahiga fai puleʼaki ʼo ʼuhiga mo he fihifihia ʼe feala ke hoko ʼi tokotou telituale. Peʼe feala hakotou vakavakaʼi ia te ʼu faʼahiga fai ʼaē moʼo fakatupu ia te fia logo ʼa te hahaʼi pea mo kamata ʼo ni ʼu ako Tohi-Tapu, tāfito lā mo kapau ʼe tokolahi ia te ʼu tehina mo tuagaʼane ʼaē kā ʼolo anai ʼo fai he ʼu ʼaʼahi. Kā kotou vakaʼi he ʼu puani ʼi te ʼu puani ʼaenī, kotou fai ʼaki he loto fiafia pea mo ʼaki he fakaloto mālohi.
3. Ko minuta e fia ʼaē ʼe fakatuʼakoi ki te fono ʼo te fai faka mafola, pea koteā ʼaē ʼe tonu ke vakaʼi lolotoga te ʼu minuta ʼaia?
3 Kotou kamata te fono ʼaia ʼi tona temi totonu, tatau aipe peʼe kotou ʼiloʼi ʼe tauhala mai anai niʼihi. Kotou fakasiosio tonu mokā kotou hinoʼi he tahi ke kaugā hoa mo he tahi, pea mokā kotou vaevae ia te telituale kiā nātou ʼaē ʼe ʼaoga kiai. ʼE mole tonu anai ki te fono ʼaia ke fakalaka peʼe nounou age iā minuta e 10 peʼe 15. ʼI muʼa ʼo takotou fakaʼosi ia te fono, ʼe tonu ke tahi ʼiloʼi e te ʼu tehina mo tuagaʼane fuli peʼe ko ai tonatou hoa gāue pea mo te telituale ʼaē ʼe ʼolo kiai. Pea kotou fakaʼosi ia te fono ʼaia ʼaki he faikole.
4. Koteā ʼaē ʼe kotou lava fai moʼo tokoni ki te lelei ʼo te ʼu fono ʼo te fai faka mafola?
4 ʼE Kotou Lava Tokoni: Ohage pe ko tatatou faka maʼuhigaʼi ia te ʼu fono fuli ʼaē, ʼo toe feiā pe, ko te tautonu mai ki te fono ʼo te fai faka mafola ʼe ko he fakahā ʼaia ʼo tatatou fakaʼapaʼapa kiā Sehova pea mo totatou ʼu tehina mo tuagaʼane. Kotou fai he ʼu tali ʼi te fono ʼaia. ʼE feala hakotou tuku ki te tehina takitaki ke ina hinoʼi atu hokotou hoa, peʼe feala hakotou fakatuʼutuʼu fakatomuʼa hokotou hoa. Kapau ʼe kotou fia fakatuʼutuʼu gāue mo he tahi, pea kotou faiga ke kotou “faka fālahi” ia koutou, ko tona faka ʼuhiga, ke kotou fetogitogi tokotou ʼu hoa gāue, kae ʼaua naʼa kotou gāue tuʼumaʼu pe mo tokotou ʼu kaumeʼa lelei. (2 Ko. 6:11-13, MN ) ʼI te hili ʼo te fono, ʼaua naʼa kotou fetogi ia te ʼu fakatuʼutuʼu gāue, pea kotou foimo ʼolo ki te telituale.
5. Koteā ia te fakatuʼutuʼu ʼo te ʼu fono fai faka mafola?
5 ʼE tatau ia te fakatuʼutuʼu ʼo te ʼu fono fai faka mafola pea mo te ʼu fono fuli ʼo te kokelekasio. ʼE fai ia te ʼu fono ʼaia ke feala hatatou “fetokagaʼaki ke tou uga ia tātou ki te ʼofa pea mo te ʼu gāue matalelei.” (Hep. 10:24, 25, MN ) Kapau ʼe tou faiga mālohi ke tou maʼu ia te ʼu lelei fuli ʼo te ʼu fono ʼaia, pea ʼe tokoni mai anai ke tou fakahoko tatatou minisitelio, ʼaē ʼe ko he “gāue matalelei”!