Te Tali Ki ʼAkotou ʼu Fehuʼi

◼ Koteā te ʼu meʼa ʼaē ʼe tonu ke tou talanoa kiai ʼi te ʼu fono ki te fai faka mafola?

ʼE fakatuʼutuʼu te fono ʼaia moʼo tokoni kia tatou ke tou tokakaga ki te gāue ʼaē ka tou ʼolo ʼo fai—te minisitelio. Koia ʼe tonu ai ki te tēhina ʼaē ʼe ina takitaki, ke ina teuteuʼi lelei, pea mo ina vaevae he ʼu manatu fakaloto mālohi, ʼe mālama lelei kiai, pea mo ʼaoga. Kapau ko te koga tohi ʼo te ʼaho ʼe ʼalutahi mo te gāue faka mafola, pea ʼe feala ke lau pea mo fai he talanoa nounou kiai. Kae ʼe tonu ki te fono ʼaia ke talanoa tāfito ki te minisitelio, moʼo tokoni kia nātou fuli ʼaē ka ʼolo ʼo faka mafola, ke nātou teuteu lelei moʼo fakahoko te minisitelio ʼi te ʼaho ʼaia.—2 Tim. 4:5.

ʼE feala ke koutou palalau ki te ʼu puani ʼaoga ʼo Te Minisitelio ʼo Te Puleʼaga, ke ʼiloʼi fuli e te ʼu kaugā faka mafola te tufa pea mo te fakahāhā ʼo te tufa ʼaia. ʼI te ʼaho ʼo te ʼu nusipepa, ʼe feala ke fai he faʼifaʼitaki ʼo mulimuli ki te kiʼi talanoa “Koteā ʼAē ʼe Tou Lava ʼUi ʼo ʼUhiga Mo Te ʼu Nusipepa.” Ki te ʼu ʼaho ʼaē ʼe tufa ai he ʼu tohi, ʼe lava fakaʼaogaʼi he ʼu ʼuluaki palalau e tahi peʼe lua mai te tohi Te ʼu Tokoni Ki Te ʼu Fai Palalau Faka Tohi-Tapu ʼo mulimuli ki tokita telituale. ʼE feala hakita palalau ki he agaaga ʼo te minisitelio, peʼe kita fai he faʼifaʼitaki ki te faʼahi ʼaia, ohage la ko te fakaʼaogaʼi ʼo te Tohi-Tapu ʼi te ʼu ʼapi, te tali ki he ʼu faʼahiga fehuʼi ʼe lagaʼi mai, te fakaafe ʼa he tahi ke ina ako te Tohi-Tapu, peʼe feafeaʼi te fai ʼo te ʼu ʼaʼahi.

Ko te ʼu fono ki te faka mafola ʼe mole tonu ke fakalaka ia minuta e 10 peʼe 15, ʼaē ʼe kau kiai te vaevae ʼo te gāue, te tufa ʼo te telituale, pea mo te faikole. Ka ʼosi tufa te gāue, pea ʼe tonu ki te kau faka mafola fuli ke ʼi ai honatou hoa, pea mo nātou ʼiloʼi pe ko te telituale fea ʼaē ʼe nātou ʼolo kiai, pea ʼe tonu ke nātou foimo ʼolo ki te telituale ʼaia. ʼE nounou te fono ʼaia, koia ʼe maʼuhiga kia tatou fuli ke tou ʼōmai tautonu. Kapau ʼe fai he fono fai faka mafola ʼi te hili ʼo te fono ʼo te kokelekasio, ohage ko te ako ʼo Te Tule Leʼo, pea ʼe tonu ke fai fakanounou. ʼE mole maʼua ke lau te koga tohi ʼo te ʼaho, koteʼuhi neʼe kua fai te fai palalau ʼo ʼuhiga mo te Tohi-Tapu.

ʼE tonu ke hinoʼi fakatomuʼa he tagata ʼāfea peʼe ko he tēhina faifekau faka minisitelio moʼo fai te ʼu fono ʼaia ki te faka mafola. Kapau ʼe ʼi ai he ʼaho ʼe mole feala ai ki he tēhina ke ina fai te vaevae gāue ʼaia, pea ʼe lava hinoʼi e te ʼu tagata ʼāfea he tuagaʼane moʼo fai te faʼahi ʼaia. ʼE heka anai te tuagaʼane moʼo fai te fai palalau ʼo ʼuhiga mo te koga tohi ʼo te ʼaho, peʼe palalau ki he tahi ʼu puani ʼo ʼuhiga mo te gāue, kae ʼe nounou anai tana ʼu palalau. ʼE ina pūlouʼi anai tona ulu.

Ko te ʼu fono ki te gāue faka mafola, ʼe ko he ʼu faigamālie lelei ʼaia moʼo fakaloto mālohiʼi tatou, pea mo tou ʼiloʼi te ʼu meʼa ʼaē ka tou palalau kiai ʼi te minisitelio. Kapau ko te tēhina takitaki ʼe ina teuteuʼi lelei te fono ʼaia, pea ʼe ʼaoga ʼaupito anai ki te ʼu tēhina mo tuagaʼane fuli.