Ko He ʼu Fono Ki Te Faifakamafola ʼe Fakatuʼutuʼu Lelei
1. He koʼe ʼe fai ia te ʼu fono ki te faifakamafola?
1 ʼI te tahi ʼaho, neʼe fakatahi ia Sesu mo ʼana tisipulo ʼe toko 70 ʼi muʼa ʼo tanatou olo ʼo faifakamafola. (Luka 10:1-11) Neʼe ina fakalotomalohiʼi natou ʼo ina ui age ʼe takitaki anai natou e Sehova, “te pule o te taukai.” Neʼe ina foaki age he ʼu fakatotonu ʼo ʼuhiga mo te gaue pea neʼe ina fakatuʼutuʼu natou “taki toko lua.” ʼO toe feia pe ia ʼaho nei, ʼe fai te ʼu fono ki te faifakamafola moʼo fakalotomalohiʼi tatou pea mo foaki mai he ʼu tokoni pea mo fakatuʼutuʼu tatatou gaue.
2. ʼE tonu ke minuta fia ia te loaloaga ʼo te fono faifakamafola?
2 ʼI te mahani, neʼe minuta 10 peʼe 15 ia te loaloaga ʼo te ʼu fono ki te faifakamafola. Neʼe fakatuʼutuʼu ai te kiʼi kutuga faifakamafola, mo tufa te ʼu telituale pea mo fai te kole. Kua fai nei ia te ʼu fetogi ʼo ʼuhiga mo te faʼahi ʼaia. ʼO kamata atu ʼi Apelili, ʼe tonu anai ke minuta nima peʼe fitu pe ia te loaloaga ʼo te ʼu fono ki te faifakamafola. Pea kapau ʼe fai te vahe gaue ʼi te hili ʼo te fono ʼo te kokelekasio, ʼe tonu ke toe nounou age, koteʼuhi neʼe kua natou maʼu he ʼu manatu fakafiafia ʼi te fono ʼaia. Kapau ʼe nounou ia te ʼu fono ki te faifakamafola, ʼe feala ai ke lahi age te temi ʼae ʼe tou faifakamafola ai. Pea tahi, kapau neʼe kua kamata faifakamafola he tahi ʼi muʼa ʼo te fai ʼo te vahe gaue, ʼe mole tuʼu fualoa anai tana faifakamafola.
3. ʼE feala ke fakatuʼutuʼu feafeaʼi ia te ʼu fono ki te faifakamafola?
3 ʼE tonu ke fai te ʼu fono ki te faifakamafola moʼo tokoni ki tanatou gaue. ʼE lahi te ʼu kokelekasio neʼe natou tokagaʼi ʼe lelei age te fai fakakutuga ia te ʼu fono ki te faifakamafola, ʼi te fai ʼae ʼo he fono maʼa te kokelekasio katoa ʼi he koga meʼa pe ʼe tahi. ʼE faigafua age tanatou olo ki te ʼu vahe gaue pea mo olo atu ki te telituale. ʼE feala ke vave ai te fakatuʼutuʼu ʼo te kiʼi kutuga faifakamafola, pea ke tokaga lelei te ʼu taupau ki ʼanatou kiʼi kutuga. ʼE tonu ke fakakaukauʼi lelei e te kolesi ʼa te kau tagata ʼafeā ia te aluʼaga ʼo te kokelekasio pea mo fai ia he ʼu fakatuʼutuʼu lelei. ʼI muʼa ʼo te fai ʼo te faikole, ʼe tonu ke tahi iloʼi e te kau faifakamafola pe ʼe natou hoa mo ai pea mo natou faifakamafola ʼifea.
4. He koʼe ʼe maʼuhiga ia te ʼu fono ki te faifakamafola?
4 ʼE Ko He Fono Maʼuhiga ʼo Te Kokelekasio: Neʼe fakatuʼutuʼu tafitō ia te ʼu fono ki te faifakamafola maʼa natou ʼae ʼe olo ki te faifakamafola. Koia ʼe lagi mole kau fuli anai ki ai ia te kokelekasio. Kaʼe ʼe mole fakaʼuhiga leva ʼe mole maʼuhiga age ia ʼi te ʼu fono ʼo te kokelekasio. Ohage pe ko ʼatatou fono fuli, neʼe fakatuʼutuʼu e Sehova te ʼu fono ki te faifakamafola ke tou feʼekenaki ki te ʼofa pea mo te ʼu gaue lelei. (Hep. 10:24, 25) Koia, ʼe tonu ki te tehina ʼae ʼe ina takitaki ia te vahe gaue, ke ina teuteuʼi lelei te faipalalau ke fakavikiviki ai ia Sehova pea mo fua lelei ki te kau faifakamafola. ʼE tonu ki te kau faifakamafola ke natou faigaʼi ke natou kau ki te ʼu vahe gaue ʼaia, ʼo mulimuli ki ʼonatou fealagia.
ʼE mole tonu ke tou manatu ʼe mole maʼuhiga age ia te ʼu fono ki te faifakamafola ʼi te ʼu fono ake ʼae ʼo te kokelekasio
5. (1) Kotea te ’u fakatuʼutuʼu ʼe feala ke fai e te taupau gaue ʼo ʼuhiga mo te ʼu fono ki te faifakamafola? (2) ʼE lava takitaki feafeaʼi e he tuagaʼane ia te fono ki te faifakamafola?
5 Te Tehina ʼe Ina Takitaki Te Fono Ki Te Faifakamafola: Ohage pe ko te ’u fono ʼi te kokelekasio, ke feala ke teuteuʼi lelei e he tehina tana akonaki, ʼe tonu ke ina iloʼi fakatomuʼa te ʼaho ʼae ka ina fai anai ia tana akonaki. ʼE toe tatau ʼosi pe ki te ʼu fono ki te faifakamafola. ʼE moʼoni, ʼe ko te ʼu taupau ʼo te ʼu kutuga peʼe ko ʼanatou faifekau fakaminisitelio ʼae ʼe natou takitaki ia te ʼu vahe gaue. Kaʼe ka fakatahi anai ia te kokelekasio ki te fono faifakamafola, ʼe feala ki te taupau gaue ke ina hinoʼi he tahi ke ina takitaki ia te fono ʼaia. Ko ʼihi taupau gaue ʼe natou tufa ia te polokalama kia natou fuli ʼae ka natou takitaki ia te ʼu vahe gaue peʼe ina fakapipiki te polokalama ʼi te laupapa ʼo te ʼu logo. ʼE tonu ke fakasiosio poto te taupau gaue moka ina filifili ia natou ʼae ka natou takitaki ia te ʼu vahe gaue. ʼE tonu ke ina manatuʼi ʼe fakalogo ia te lelei ʼo te ʼu fono ʼaia ki te ʼu akonaki pea mo te ʼu faʼahiga fakatuʼutuʼu ʼe fai ʼe natou ʼae ka natou takitaki ia te fono. Kapau ʼe mole ko he tagata ʼafeā, peʼe ko he faifekau fakaminisitelio, peʼe ko he tahi age tehina ke ina fai te vahe gaue ʼi he ʼu ʼaho, ʼe feala ke hinoʼi e te taupau gaue he tuagaʼane ke ina takitaki te vahe gaue.—Vakaʼi te alatike “Moka ʼe Tonu Ke Takitaki e He Tuagaʼane.”
6. He koʼe ʼe maʼuhiga ke teuteuʼi lelei e te tehina ʼae ka ina takitaki te fono ki te faifakamafola?
6 Ka tuku mai he akonaki ki te Ako Fakateokalatike peʼe ko te Fono Gaue, ʼe tou tokakaga ʼo teuteuʼi lelei. ʼE mole tou atali anai ki te temi ʼae ʼe tou olo ai ki te fono pea hoki tou fakakaukauʼi leva te ʼu palalau ʼae ka tou fai anai. ʼE tonu ke feia mo te fono ki te faifakamafola. Kua fakanounou te loaloaga ʼo te ʼu vahe gaue. Koia ʼe maʼuhiga ai ke tou teuteuʼi lelei te ʼu fono ʼaia ke ʼosi tautonu. ʼE tonu ke tou teuteuʼi fakatomuʼa mo te ʼu telituale.
7. Kotea te ʼu manatu ʼe feala ke palalau ki ai ia te tehina ʼae ka ina takitaki ia te fono ki te faifakamafola?
7 Kotea ʼAe Ka Palalau Ki Ai: Mai tona aluʼaga ʼae ʼe mole tatau te aluʼaga ʼo te ʼu telituale fuli, neʼe mole tuku mai e te tagata faifekau agatonu he ʼu palalau ke tou fai ʼi te ʼu vahe gaue fuli. Kotou vakaʼi ʼihi manatu ʼi te fakamatala ʼae ʼi te ʼa takai: “ʼE Feala Ke Kotou Vakaʼi Te ʼu Manatu ʼAeni Lolotoga Te ʼu Fono Ki Te Faifakamafola.” ʼI te agamahani, ko te fono ʼaia ʼe ko he faipalalau. ʼE feala pe ke fai he faʼifaʼitaki neʼe teuteuʼi lelei, peʼe ko he kiʼi ʼata viteo neʼe toʼo mai te jw.org ʼi te Neti. Ka teuteuʼi e he tehina te fono ki te faifakamafola, ʼe tonu ke ina fakakaukauʼi he ʼu fakalotomalohi pea mo he ʼu tokoni maʼa te kau faifakamafola.
Ka teuteuʼi e he tehina te fono vahe gaue, ʼe tonu ke ina fakakaukauʼi he ʼu fakalotomalohi pea mo he ʼu tokoni maʼa te kau faifakamafola
8. Kotea ʼae ʼe feala ke tou palalau ki ai ʼi te ʼu fono ki te faifakamafola ʼo te ʼu Moeaki pea mo te ʼu ʼAhotapu?
8 Ohage la ko te ʼu moeaki, tokolahi te kau faifakamafola ʼe natou tufa ia Te Tule Leʼo pea mo te Réveillez-vous ! Tokolahi ia natou ʼae ʼe faifakamafola ʼi te ʼu Moeaki, neʼe mole natou faifakamafola ʼi te lolotoga ʼo te vahaʼa. ʼE lagi mole kei natou manatuʼi ia te faʼahiga tufa ʼo te ʼu nusipepa ʼae neʼe natou vakaʼi ʼi tanatou Ako Fakafamili. Koia ʼe lelei ke toe fakamanatuʼi e te tehina ʼae ʼe ina takitaki te fono ia te ʼu ʼuluaki palalau ʼae ʼe tuʼu ʼi te pasina fakaʼosi ʼo Te Minisitelio ʼo Te Puleʼaga. ʼE feala ke palalau ʼo ʼuhiga mo he logo, peʼe ko he aluʼaga neʼe hoko ʼi te fenua, moʼo tufa he nusipepa, pea mo feafeaʼi ia tana toe ʼaʼahi he tahi. Kapau ʼe tonu ke tufa he nusipepa kua tou mahani ki ai, ʼe feala ke ina kole ki te kau faifakamafola ke natou fakaha he ʼu manatu peʼe ke natou fakamatala he ʼu aluʼaga fakalotomalohi neʼe hoko. ʼI te ʼu ʼAhotapu, ʼe feala ke palalau e te tehina ki te ʼu tohi ʼae ʼe tonu ke tufa ʼi te lolotoga ʼo te mahina. ʼE feala ke tufa ʼi te temi fuli pe ia te ʼu kaupepa lalahi ohage la ko te Logo Lelei pea mo te Fakalogo Ke Māʼuʼuli, pea mo te tohi Te Ako Mai Te Tohi-Tapu. Koia ʼe feala pe ke vakaʼi ʼi te vahe gaue pe ʼe lava tufa feafeaʼi ia te ʼu tohi ʼaia.
9. Kotea ʼe feala ke tou palalau ki ai ʼi te ʼu fakaʼosi vahaʼa moka fai ia te ʼu tufa makehe?
9 Kapau ʼe fakatuʼutuʼu e te kokelekasio he tufa makehe ʼi te fakaʼosi vahaʼa, ʼe feala ke fakaha e te tehina pe ʼe tou lava tufa feafeaʼi ia te ʼu nusipepa ʼo fakatahi mo te ʼu pepa fakaafe peʼe ko he ʼu pepa lotu. Pe ʼe ina fakaha pe kotea ʼe feala ke tou fai mo kapau ʼe fia mahino he tahi. Ko te tahi faʼahi ʼe feala ke ina fai, ko te fakamatala he ʼu aluʼaga neʼe hoko ʼe ha ai ia te maʼuhiga ʼo te tufa makehe ʼaia.
10, 11. He koʼe ʼe lelei ke teuteu fakatomuʼa ia te kau faifakamafola?
10 Teuteu ’a Te Kau Faifakamafola: ʼE ʼi ai te faʼahi ʼe tonu ke fai e te kau faifakamafola ke lava lelei te ʼu vahe gaue. ʼE lelei ke natou teuteu fakatomuʼa tanatou gaue faifakamafola. Ohage la ʼi tanatou Ako Fakafamili, ʼe feala ke natou vakaʼi pe kotea he ʼu manatu ʼe feala ke natou vaevae mo natou ʼae ʼe natou kaugā gaue ʼi te faifakamafola. ʼE tonu ke natou teuteuʼi te ʼu nusipepa peʼe ko te ʼu tohi ʼi muʼa ʼo tanatou ʼomai ki te vahe gaue. Kapau ʼe natou fai ia te faʼahi ʼaia ʼe mole tuai anai tanatou tau atu ki te telituale.
11 ʼE lelei ke tou tautonu atu ki te vahe gaue, ohage pe ko te ʼu fono fuli ʼo te kokelekasio. Kaʼe ʼe lahi age tatatou fakaleluʼi ia te kau faifakamafola mo kapau ʼe tou tauhala atu ki te vahe gaue. He kotea tona tupuʼaga? Koteʼuhi ʼe tonu ke fakatuʼutuʼu e te tehina ʼae ʼe takitaki, ia te kiʼi kutuga faifakamafola. Kapau ʼe toko siʼi ia te kau faifakamafola, ʼe feala ke fekauʼi natou ki he telituale neʼe heʼeki ʼosi tona gaueʼi. Kapau ʼe ʼi ai ʼihi ʼe mole hanatou motoka, ʼe feala ke ina fai he ʼu fakatuʼutuʼu ke natou kaugā olo mo natou ʼae ʼe maʼu motoka. Kapau ʼe tonu ke natou gaueʼi he telituale ʼe feala ke hoko ai he ʼu tuʼutamaki, ʼe feala ke ina hinoʼi he ʼu tehina ke natou gaue fakatahi peʼe ke natou gaue ovi age ki te ʼu tuagaʼane. Kapau ʼe ʼi ai ʼihi kau faifakamafola ʼe vaivavai, peʼe maʼimoa, ʼe feala ke fekauʼi natou ki he ʼu telituale ʼe maʼu ai he ʼu ʼapi ʼe mole hanatou mata tuʼuga. ʼE feala ke hinoʼi he faifakamafola kua faiva ʼi te gaue faifakamafola ke kaugā alu mo he tahi ʼe kei foʼofoʼou. Kaʼe kapau ʼe tauhala mai he tahi ʼe maʼua leva ke toe fetogi te ʼu fakatuʼutuʼu ʼuhi ko ia. Pea kapau leva ko hatatou agamahani tatatou tauhala mai ki te ʼu vahe gaue, ʼe feala pe ke tou feʼekeʼaki pe ʼe tou fakamaʼuhigaʼi koa te ʼu fono ʼaia, peʼe tonu ke tou teuteu fakatomuʼa.
12. Kapau ʼe kotou fai he ʼu fakatuʼutuʼu fakatomuʼa, kotea ʼae ʼe tonu ke kotou manatuʼi?
12 ʼE feala pe ke fai fakatomuʼa e te kau faifakamafola ia te ʼu fakatuʼutuʼu ki te faifakamafola. Kaʼe kapau ʼe kotou fai ia te faʼahi ʼaia, ʼe feala koa ke kotou ui e “koutou fakalaulahi foki tokotou loto,” ʼo kotou kauga gaue mo te kau faifakamafola fuli, kaʼe mole ko ʼokotou kaumeʼa pe? (2 Ko. 6:11-13) ʼE feala koa ʼi ʼihi temi, ke kotou fakatuʼutuʼu ke kotou gaue fakatahi mo he faifakamafola ʼe kei foʼofoʼou, moʼo tokoni ki ai ke tuputupu ʼi tana faʼahiga faifakamafola? (1 Ko. 10:24; 1 Tim. 4:13, 15) Fakalogo fakalelei ki te ʼu tokoni ʼae ʼe tuku atu, pea mo te koga meʼa ʼae ʼe tonu ke kotou kamata faifakamafola ai. Ka ʼosi te vahe gaue, ʼaua naʼa kotou fetogi te ʼu fakatuʼutuʼu pea mo kotou foimo olo ki te telituale.
13. ʼE feala ke fua lelei feafeaʼi kia tatou ia te ʼu fono vahe gaue mo kapau ʼe tou tahi fai ia te faʼahi ʼae ʼe kole mai?
13 Neʼe fakatuʼutuʼu e Sesu ʼana tisipulo ʼe toko 70 ki te gaue faifakamafola. Pea ʼi te hili ʼo tanatou faifakamafola, “nee toe liliu leva te toko fitugofulu i he fiafia.” (Luka 10:17) ʼE mahino ia neʼe lagi fua lelei kia natou ia te fono ʼae neʼe fai e Sesu ʼi muʼa ʼo tanatou olo ʼo faifakamafola. ʼE feala ke fua lelei feia te ʼu vahe gaue kia tatou ia ʼaho nei. Kapau ʼe tou fai fakalelei ia te ʼu faʼahi ʼae ʼe kole mai, ʼe feala ke tou maʼu mai te ʼu fono ki te faifakamafola ia he ʼu fakalotomalohi, mo he ʼu tokoni, mo he ʼu fakatuʼutuʼu ke tou fakahoko lelei tatatou maʼua ʼae ke tou foaki he “fakamooni ki te u puleaga fuli.”—Mat. 24:14.