Te Vahe Gaue Ki Te Faifakamafola

Neʼe fakatuʼutuʼu e Sehova ia te ʼu vahe gaue, ʼo feia mo te ʼu fono ʼo te kokelekasio, ke tou feugaʼaki ai ki te ʼofa pea mo te ʼu gaue lelei. (Hep 10:24, 25) ʼE tonu ke minuta 5 peʼe 7 tona loaloaga. ʼE tonu ke fai ai te ʼu fakatuʼutuʼu ki te gaue, mo tufa te ʼu telituale pea mo fai te kole. (Kae kapau ʼe fai te vahe gaue ʼi te hili ʼo te fono ʼo te kokelekasio, ʼe feala ke toe nounou age tona fai.) ʼE tonu ki te tehina ʼae ʼe ina takitaki te vahe gaue, ke ina teuteuʼi lelei he manatu ʼe aoga anai kia natou ʼae ka faifakamafola ʼi te aho ʼaia. Ohage la ʼi te Moeaki, tokolahi ia natou neʼe mole faifakamafola ʼi te vahaʼa. ʼE feala pe ke tou fakamanatu pe kotea ʼe feala ke tou ui ki te hahaʼi. Kotea la ʼihi manatu ʼe feala ke tou fakaʼaogaʼi ʼi te faifakamafola?

• Te ʼu ʼuluaki palalau ʼae ʼe tou maʼu ʼi te kaupepa Te Maʼuli Fakakilisitiano Mo Te Faifakamafola

• Ko he aluʼaga neʼe fakaha ʼi te tala logo

• Ko he palalau ʼe tau fai mai e te hahaʼi moka tou faifakamafola

• Ko he tali ʼe feala ke tou fai ki he tahi ʼe mole tui ki te ʼAtua, peʼe ko he tahi ʼe tui ki te Evolisio, peʼe ko he tahi ʼe lea matapule, peʼe ko he tahi ʼe kau ʼi he tahi lotu

• Te fakaʼaogaʼi ʼo tatatou pasina ʼi te Neti jw.org, peʼe ko te application JW Library, peʼe ko te Tohi-Tapu

• Te fakaʼaogaʼi ʼo te ʼu Meʼa Gaue Ki Te Faiako ʼi te application JW Library

• Te faifakamafola ʼi te telefoni, peʼe ko te faitohi, te faifagonogono faigamalie, te ʼu ʼaʼahi peʼe ko te ʼu ako Tohi-Tapu

• Te ʼu fakatokaga ʼo ʼuhiga mo te ʼu tuʼutamaki ʼe feala ke hoko, peʼe ko te aga fakaʼeteʼete, peʼe ko te aga fakaʼapaʼapa, peʼe ko he ʼu fakalotomalohi

• Ko he ʼata peʼe ko he manatu mai te kaupepa Fai Fakamalotoloto Tau Lautohi Pea Mo Tau Faiakonaki

• Pe feafeaʼi te fakalotomalohiʼi pea mo tokoni kia ia ʼae ʼe tou hoa mo ia

• He vaega Tohi-Tapu peʼe ko he fakamatala ʼo ʼuhiga mo te faifakamafola