ʼE Kotou Maʼu Feafeaʼi He ʼu Lelei Mai Takotou Kūtuga Fai Fakamafola?
1. Ko te ʼu lelei fea ʼo te Ako Tohi ʼo Te Kōkelekāsio ʼaē neʼe fai ʼi muʼa atu ʼe kei tou maʼu pē ʼi tatatou kūtuga fai fakamafola?
1 ʼE ʼi ai koa he ʼu faʼahi ʼo te Ako Tohi ʼo Te Kōkelekāsio ʼaē neʼe fai ʼi muʼa atu, neʼe kotou leleiʼia? Neʼe mole hahaʼi pea neʼe tou fīmālie age ai. Neʼe faigafua age te maʼu ʼo he ʼu kaumeʼa neʼe feala ke natou tokoni mai ke tou mālohi ʼi te tui. (Taag. 18:24) Ko te taupau ʼo te ako tohi neʼe ina ʼiloʼi lelei ʼotatou ʼaluʼaga pea neʼe feala ke ina fakalotomālohiʼi tātou takitokotahi. (Taag. 27:23; 1 Pet. 5:2, 3) Pea ko te ʼu lelei ʼaia ʼe kei tou maʼu pē ʼi tatatou kūtuga fai fakamafola.
2. ʼE feafeaʼi hakotou lava fakatuʼutuʼu ke kotou maʼu he ʼu kaumeʼa ʼi takotou kūtuga fai fakamafola ʼe feala ke tokoni atu ke kotou mālohi ʼi te tui?
2 Tou Fai He ʼu Fakatuʼutuʼu: ʼI te agamāhani ko te ʼu kūtuga fai fakamafola ʼe mole hahaʼi ohagē pē ko te ʼu ako tohi. ʼAki tatatou gāue fakatahi mo ʼihi ʼi te minisitelio, ʼe iku anai ia ki he ʼu fakakaumeʼa lelei. (Filp. 1:27) Ko te toko fia ʼaē neʼe kua kotou fai fakamafola mo ia ʼi takotou kūtuga fai fakamafola? ʼE feala koa hakotou “fakalaulahi . . . tokotou loto” ʼo ʼuhiga mo te faʼahi ʼaia? (2 Ko. 6:13) Pea tahi, ʼe feala ʼi ʼihi temi ke tou fakaafe mai he tahi ʼi tatatou kūtuga fai fakamafola ki tatatou Ako Fakafāmili ʼi te afiafi, peʼe ke tou kakai fakatahi. ʼI ʼihi kōkelekāsio, ko te ʼu kūtuga fai fakamafola ʼe natou takitahi pē mo tonatou ʼaho ia te fakaafe te tehina ʼo te tahi kōkelekāsio ʼaē neʼe haʼu ʼo fai te akonaki. Ko te vāhaʼa ʼaē neʼe kua hinoʼi kiai he kūtuga, ʼe natou fakatahitahi ke natou kakai mo fefakalotomālohiʼaki, māʼia mokā ʼe mole feala ke kau kiai te tehina.
3. ʼE tou lava maʼu feafeaʼi he fakalotomālohi mai he tagata ʼāfea ʼi tatatou kūtuga fai fakamafola?
3 Logolā kua tuʼa lua pē te fakatahi ʼa te kōkelekāsio ʼi te vāhaʼa, kae ʼe mole fakaʼuhiga leva kua veliveli te fakalotomālohi ʼa te kau tagata ʼāfea ki te kau fai fakamafola. ʼE hinoʼi te ʼu tehina taupau ki te ʼu kūtuga takitahi moʼo foaki ki te kau fai fakamafola takitokotahi he ʼu fakalotomālohi mo akoʼi nātou ki te fai fakamafola. Kapau neʼe heʼeki fakatuʼutuʼu e te tehina taupau ʼo takotou kūtuga ke fai fakamafola mo koutou, pea he koʼē ʼe mole kotou kole age ki ai ke kotou gāue fakatahi? Pea tahi, ko te taupau ki te gāue ʼe fai fakamafola mo te ʼu kūtuga takitahi ʼi he fakaʼosi vāhaʼa ʼi te māhina fuli. ʼI te ʼu kōkelekāsio veliveli ʼaē ʼe mole lahi ai he ʼu kūtuga fai fakamafola, ʼe lagi ina fakatuʼutuʼu ke ina ʼaʼahi tuʼa lua ʼi te taʼu te ʼu kūtuga takitahi. ʼE kotou fai koa he fakatuʼutuʼu ke kotou fai fakamafola ʼi te temi ʼaē ʼe ina ʼaʼahi ai takotou kūtuga?
4. (1) ʼE feafeaʼi te fakatuʼutuʼu ʼo te ʼu fono fai fakamafola? (2) He koʼē ʼe lelei ke tou vakavakaʼi pe feala ke fai te ʼu fono fai fakamafola ʼi totatou ʼapi?
4 ʼE fua lelei ki te ʼu kūtuga tanatou mole fakatahi ʼi he koga meʼa e tahi ki te fai fakamafola ʼi te ʼu fakaʼosi vāhaʼa. Ko te fai ʼo te fono fai fakamafola ʼi he ʼu koga meʼa kehekehe ʼi he hola ʼe teitei tatau, ʼe feala ai ke faigafua ki te kau fai fakamafola hanatou ʼolo ki te ʼu fono fai fakamafola ʼaia pea lagi mo te telituale. ʼE feala ke vave te fakatuʼutuʼu ʼa te kau fai fakamafola pea mo natou foimo ʼolo ai ki te telituale. Pea ʼe toe faigafua age kiā ia ʼaē ʼe taupau ki te kūtuga hana tokaga lelei kiā nātou ʼaē ʼe kau ʼi tana kūtuga. Kae ʼuhi ko ni ʼaluʼaga, ʼe lagi lelei anai ki he ʼu kūtuga e lua peʼe laka age ke natou fakatahi. Kapau ko te kōkelekāsio kātoa ʼe fakatahi ki te fai fakamafola ʼi te ʼuluaki Moeaki ʼo te māhina peʼe ʼi te hili ʼo te ako ʼo Te Tule Leʼo, pea ʼe lelei anai mokā ʼe heheka fakatahi te ʼu kūtuga takitahi pea mo tuku age ki te ʼu taupau ʼo te ʼu kūtuga ni minuta, ke feala hanatou fakatuʼutuʼu tanatou kūtuga ʼi muʼa ʼo te fakaʼosi ʼo te fono fai fakamafola ʼaki te faikole.—Vakaʼi te fakamatala ʼaē ʼe ʼātakai “ ʼE Feala Koa Ke Fai ʼi Tokotou ʼApi?”
5. Logolā ʼe mole kei fai te Ako Tohi ʼo Te Kōkelekāsio, kae koteā ʼaē ʼe tou lava falala kiai?
5 Logolā ʼe mole kei fai te Ako Tohi ʼo Te Kōkelekāsio, kae ʼe kei hoko atu pē te foaki mai e Sehova te ʼu meʼa fuli ʼaē ʼe ʼaoga ke tou fai ai tona finegalo. (Hep. 13:20, 21) ʼAki te tokaga ʼa Sehova kiā tātou ʼe mole tou hala ʼi he meʼa. (Pes. 23:1) ʼE lahi te ʼu lelei ʼe tou maʼu ʼi tatatou kūtuga fai fakamafola. Kapau ʼe tou fai he ʼu fakatuʼutuʼu ke tou “tō fakalahi” pea ʼe tou “toe utu fakalahi anai.”—2 Ko. 9:6, MN.
[Talanoa ʼo te pāsina 6]
ʼE Feala Koa Ke Fai ʼi Tokotou ʼApi?
ʼI ʼihi kōkelekāsio ʼe fakatahi he ʼu kūtuga fai fakamafola ʼi te fakaʼosi vāhaʼa, koteʼuhi ʼe mole feʼauga te ʼu ʼapi ʼaē ʼe feala ke fai ai te ʼu fono fai fakamafola. Ko te ʼu fono fai fakamafola ʼe pipiki ki te ʼu fakatuʼutuʼu ʼo te kōkelekāsio, koia kapau ʼe fai te ʼu fono ʼaia iō tātou pea ʼe ko he toe pilivilēsio ia. ʼE feala koa ke fai te ʼu fono ʼaia ʼi tokotou ʼapi? ʼAua takotou tuʼania naʼa mole faʼa lelei tokotou ʼapi. ʼE vakavakaʼi anai e te kau tagata ʼāfea te koga meʼa ʼaē ʼe kotou nonofo ai pea mo ʼihi atu faʼahi, ohagē pē ko tanatou filifili te ʼu koga meʼa ke fai ai te ako tohi. Kapau ʼe kotou loto ke fai te ʼu fono fai fakamafola ʼi tokotou ʼapi, pea kotou fakahā ki te taupau ʼo takotou kūtuga fai fakamafola.