Ko Faʼahiga Fai e Nima Ke Maʼu Ai He Ako Tohi-Tapu
1. Koteā ʼaē ʼe tonu ke tou fai mokā ʼe faigataʼa hatatou maʼu he ako Tohi-Tapu ʼi tatatou telituale, pea koteā tona tupuʼaga?
1 ʼE faigataʼa koa kiā koutou hakotou maʼu he ako Tohi-Tapu? ʼAua naʼa kotou tuku ʼakotou faiga. ʼE tapuakina e Sehova ia nātou ʼaē ʼe mole natou fiu ʼi te fai ʼo tona finegalo. (Kal. 6:9) Koʼenī te ʼu faʼahiga fai e nima kā tokoni atu anai.
2. ʼE lava feafeaʼi hatatou kole fakahagatonu ki he tahi pe fia ako?
2 Kole Fakahagatonu Age: Tokolahi ʼe natou ʼiloʼi ʼe tou tufa Te Tule Leʼo pea mo te Réveillez-vous !, kae ʼe lagi mole natou ʼiloʼi ʼe tou toe fakaafe te hahaʼi ke natou ako te Tohi-Tapu. He koʼē koa ʼe mole kotou kole fakahagatonu ki he tahi pe fia ako mokā kotou ʼolo ʼi te ʼu ʼapi? ʼE toe feala foki ke kotou kole age kiā nātou ʼaē ʼe kotou ʼaʼahi pe natou fia ako te Tohi-Tapu. Kapau ʼe natou fakafisi, pea kotou hoko atu pē takotou tuku age te ʼu tohi pea mo fakatuputupu tanatou fia ʼiloʼi. Neʼe ʼi ai te tehina neʼe ina ʼaʼahi te taumātuʼa lolotoga ni taʼu ʼo ina tuku age ʼanā nusipepa. ʼI tana ʼosi tuku age te ʼu nusipepa fakamuli, neʼe maliu ke ʼalu kae neʼe ina manatuʼi ʼo kole fēnei age kiā nāua: “ ʼE kolua lotolelei lā ke kolua ako te Tohi-Tapu?” Neʼe punamaʼuli he neʼe nā tali ke fai hanā ako. ʼI te temi nei kua nā papitema.
3. ʼE tonu koa ke tou manatu ko nātou ʼaē ʼe kau ki te ʼu fono kua natou ako te Tohi-Tapu mo he tahi? Kotou fakamahino.
3 Nātou ʼe Kau Ki Te ʼu Fono: ʼAua naʼa kotou manatu ko nātou ʼaē ʼe kotou sio ki ai ʼi te ʼu fono kua fai hanatou ako Tohi-Tapu. ʼE ʼui fēnei e te tehina: “ ʼAki taku fai palalau mo nātou ʼaē neʼe kau ki te ʼu fono neʼe lahi ai ʼaku ako neʼe au kamata.” Pea ko te tuagaʼane neʼe ina fakatuʼutuʼu ke ʼalu ʼo fai palalau mo he fafine ʼe umiuminoa pea ko ʼana taʼahine neʼe kua papitema ʼi te kōkelekāsio. Neʼe kau te fafine ʼaia ki te ʼu fono talu mai ni taʼu e 15 pea neʼe haʼu tuʼumaʼu ki te Fale ʼo Te Puleʼaga ʼi te kamata pē ʼo te fono pea neʼe mavae ʼi muʼa ʼo tona fakaʼosi. Neʼe ina tali ke fai hana ako pea ki muli age neʼe papitema. ʼE tohi fēnei te tuagaʼane: “Ko te meʼa pē ʼaē ʼe kovi ko taku talitali taʼu e 15 ʼi muʼa ʼo taku kole age peʼe fia ako.”
4. ʼE feafeaʼi hatatou maʼu he ako ʼaki hatatou fakalavelave pe ʼi ai he tahi ʼe fia ako Tohi-Tapu?
4 Fakalavelave: Neʼe faiga te tuagaʼane ke ʼalu mo ʼihi ki ʼanatou ako Tohi-Tapu. ʼAki te fakagafua age e ia ʼaē ʼe ina fai te ako, ʼi te hili ʼo te ako ʼe fakalavelave e te tuagaʼane kiā ia ʼe ako pe ina ʼiloʼi ʼihi ʼe natou fia ako mo nātou. ʼI te temi ʼaē ʼe kotou foaki te tohi Te Ako Mai Te Tohi-Tapu ki he tahi ʼe kotou ʼaʼahi, ʼe feala hakotou fakalavelave fēnei age: “ ʼE ke ʼiloʼi lā he tahi ʼe ina fia maʼu te tohi ʼaenī?” ʼI ʼihi temi, ʼe mole feala ki te kau fai fakamafola pea mo te kau pioniē hanatou fai te ako ʼa he tahi neʼe natou maʼu ʼi te telituale ʼuhi ko ni ʼaluʼaga. Koia kotou fakahā ʼe feala hakotou fai he ako Tohi-Tapu.
5. He koʼē ʼe lagi lelei ke tou kole ki te ʼu ʼohoana ʼaē ʼe mole tui ʼi te kōkelekāsio pe natou fia ako?
5 Te ʼu ʼOhoana ʼAē ʼe Mole Tui: ʼE ʼi ai koa he kau fai fakamafola ʼi tokotou kōkelekāsio ko ʼonatou ʼohoana ʼe mole tui? Ko ʼihi ʼaē ʼe mole tui ʼe mole natou fia fai palalau ki te Tohi-Tapu mo tonatou ʼohoana, kae ʼe lagi natou tali anai mokā fakaafe nātou e he tahi ʼi tuʼa atu ʼo te fāmili ke fai hanatou ako. Kae ʼe lelei age hakotou felōgoi muʼa mo ia ʼaē ʼe tui ke feala ai he ʼiloʼi pe ko te faʼahiga palalau fea ʼaē ʼe tonu ke fai.
6. He koʼē ʼe maʼuhiga te faikole mokā tou faiga ke tou maʼu hatatou ako?
6 Te Faikole: ʼAua naʼa kotou meʼa noaʼi te mālohi ʼo te faikole. (Sakp. 5:16) ʼE fakapapau e Sehova ʼe fagono ki ʼatatou kole mokā ʼe ʼalutahi mo tona finegalo. (1 Soa. 5:14) Ko te tehina neʼe lahi tona maʼumaʼua neʼe kamata faikole ke ina maʼu hana ako Tohi-Tapu. Neʼe feʼekeʼaki tona ʼohoana pe feala anai hana maʼu he temi moʼo tokaga kiā ia ʼaē kā ako mo ia, tāfito lā mokā tau mo ni fihifihia. Neʼe ina fakahā ai ʼana tuʼania ʼaia ʼi te temi ʼaē neʼe faikole ai kiā Sehova ke maʼu e tona ʼohoana hana ako. Neʼe tali ʼanā faikole hili kiai vāhaʼa ʼe lua, he neʼe maʼu e te pioniē ʼi te kōkelekāsio te tagata neʼe fia ako pea neʼe ina tuku age te ako ki te tehina. Neʼe tohi fēnei tona ʼohoana: “Kiā nātou ʼaē ʼe lagi manatu ʼe mole feala hanatou fai he ako Tohi-Tapu, ʼe au fai te tokoni ʼaenī: Kotou fakahā lelei te ʼu meʼa ʼaē ʼe kotou loto kiai ʼi ʼakotou faikole pea ʼaua naʼa kotou tuku takotou faikole kiai. Neʼe lahi ʼosi tamā fiafia.” Kapau ʼe kotou faʼa kātaki, pea ʼe feala mo koutou hakotou maʼu he ako Tohi-Tapu pea mo fiafia ʼi te tokoni ki he tahi ke haʼele ʼi “te ala ae e . . . taki ki te mauli.”—Mat. 7:13, 14.