ʼE Koutou Fakalavelave Koa Peʼe ʼi Ai He Tahi Age ʼu Hahaʼi ʼe Fia Ako Tohi-Tapu?

Kapau ʼi te temi nei ʼe koutou lolotoga fai he ako Tohi-Tapu, he koʼe koa ʼe mole koutou fehuʼi age, peʼe mole ʼi ai hona ʼu kaumeʼa, hona ʼu kāiga, peʼe ko hona ʼu feʼilo ʼe fia logo ki te ʼu meʼa ʼaē ʼe akoʼi mai ʼi te Tohi-Tapu? ʼI te agamāhani, ʼe lahi te ʼu hahaʼi ʼaē ʼe tuku mai e te kau ako ke tou ʼolo ʼo ʼaʼahi. Kapau ʼe fakagafua atu ʼe ia ʼaē ʼe ako mo koutou, pea ʼe feala anai ke koutou fakahā tona higoa ki hona feʼilo mokā koutou ʼolo ʼo ʼaʼahi ia te ʼu hahaʼi ʼaia moʼo kole age ke fai hanatou ako Tohi-Tapu. ʼE lagi koutou ʼui age anai: ʼE au fai nei te ako Tohi-Tapu ʼa [fakahā age te higoa ʼo ia ʼaē ʼe ako], pea neʼe manatu ʼe lagi ke loto anai mo koe ke fai hau ako Tohi-Tapu.” ʼOsi ʼaia, ʼaki te tohi Te Ako Mai Te Tohi-Tapu, koutou fakahā ʼi he kiʼi temi nounou te faʼahiga fai ʼo te ako ʼaia.

Kapau ʼe tuputupu te ako Tohi-Tapu ʼaē ʼe koutou fai, koutou fakaloto mālohiʼi ke ina fakahāhā te faʼahiga fai ʼo tana ako, ki tona ʼu kaumeʼa pea mo tona ʼu kāiga ʼaē ʼe fia logo ki te moʼoni. ʼE feala hana fakaafe ke nātou ʼōmai ʼo logo ki tana ako. Pea kapau ʼe mole nātou lava mulimuli ki te ako, ʼe feala hanatou felāveʼi mo koutou ke fai hanatou ako. Ka koutou fai feiā, pea ʼe lotomālohi anai ia ia ʼaē ʼe ako, moʼo fakahā ki niʼihi te ʼu meʼa ʼaē kua mahino kiai ʼi te Tohi-Tapu.

ʼE lagi feiā mo nātou ʼaē ʼe koutou tatuʼu ʼo ʼaʼahi, ʼe feala ke nātou fakahā atu tonatou ʼu feʼilo ʼaē ʼe feala ke fai hanatou ako Tohi-Tapu, tatau aipe peʼe heʼeki fai he ako Tohi-Tapu ʼo takotou ʼu ʼaʼahi ʼaia. Ka koutou foaki age kiā nātou te tohi Te Ako Mai Te Tohi-Tapu, ʼe feala hakotou fehuʼi age: “ ʼE ke ʼiloʼi koa he tahi age ʼe fia fai anai ki hana tohi feiā?”

ʼI te kua nounou ʼo te temi, ʼe tou fia fakaʼaogaʼi te ʼu faigamālie fuli moʼo tokoni ki te hahaʼi ke nātou logo pea mo tali ia te logo lelei. ʼE koutou fakalavelave koa peʼe ʼi ai he tahi age ʼu hahaʼi ʼe fia ako Tohi-Tapu?