ʼE Tou Fiafia ʼi Tatatou Fai Faka Mafola Faka Kūtuga
1 ʼI tana fekauʼi te toko 70 kau tisipulo ke ʼolo ʼo fai faka mafola, neʼe akoʼi e Sesu kia nātou te ʼu meʼa ʼaē ka nātou palalau anai kiai, neʼe ina fakatuʼutuʼu ke nātou ʼolo taki toko lua, pea mo ina fakahā age kia nātou te telituale ʼaē ka nātou gāue ai. Neʼe nātou fiafia ai. (Luka 10:1-17) ʼO toe feiā ia ʼaho nei, ko te faka mafola faka kūtuga ʼe tokoni moʼo teuteuʼi, moʼo fakatuʼutuʼu te gāue, pea mo fakaloto mālohiʼi te hahaʼi ʼa te ʼAtua ki te fai faka mafola.
2 ʼE Takitaki e Te Kau Tagata ʼĀfea: ʼE maʼuhiga te gāue ʼa te kau tagata ʼāfea moʼo tokoni ki te ʼu kaugā fai faka mafola fuli ke nātou kau tuʼumaʼu ki te gāue fai faka mafola. Ko te tagata taupau ki te gāue ʼe ina takitaki ʼo ina fai he ʼu fakatuʼutuʼu ki te gāue fai faka mafola ʼi te ʼu ʼaho ʼo te vāhaʼa. ʼE tahi tokaga anai te ʼu tagata taupau ki te ako tohi ke nātou fakatuʼutuʼu te ʼu gāue ki tanatou ako tohi takitokotahi, tāfito ʼi te ʼu fakaʼosi vāhaʼa. ʼI te ʼu temi ʼaē ʼe fakatahi ai te kokelekasio katoa ki te fai faka mafola, ʼe tonu ke tahi tokaga te ʼu tagata taupau ʼo te ako tohi ke tahi maʼu e tana ako tohi hanatou gāue.
3 “I Te Fakapotopoto Pea Mo Te Fakatokatoka”: Ko ia ʼaē neʼe hinoʼi ke ina fai te fono ki te fai faka mafola, ʼe tonu anai ke ina kamata tautonu pea ke mole fakalaka ia minuta e 10 peʼe 15. ʼI muʼa ʼo tana fakaʼosi ʼaki te faikole, ʼe lelei ke ina fakahoahoa te gāue ʼo te kūtuga pea mo ina foaki age hanatou telituale (gata pe mo kapau ʼe ko te ʼu tagata taupau ʼo te ʼu ako tohi ʼaē ʼe nātou fakahoko ia te faʼahi ʼaia, ohage ko tatatou vakaʼi ʼi muʼa atu). ʼE mole ʼaoga ai ki te kau fai faka mafola ke nātou toe fakatahitahi ʼi te telituale, heʼe feala ke fakatupu kovi ki tatatou gāue. ʼE toe mulimuli ki te tokoni ʼaenī neʼe fai e Paulo: “Koutou fai ia meafuape i te fakapotopoto pea mo te fakatokatoka.” (1 Ko. 14:40) Ko nātou ʼaē ʼe kau ki te ʼu fono fai faka mafola ʼaia ʼe tonu ke nātou lagolago ki te fakaʼaluʼalu lelei ʼo te fakatuʼutuʼu ʼaia, ʼo nātou ʼōmai tautonu, mo tokoni ki te tēhina ʼaē ʼe ina takitaki, pea mo nātou foimo ʼolo ki te telituale ʼi te kua mavetevete ʼo te kūtuga.
4 Tou Fakatahi ʼi Te Logo Tahi: Ko te ʼu fakatuʼutuʼu ʼaē ko te fai faka mafola faka kūtuga ʼe ko he faigamālie lelei ʼaia ke tou feʼiloʼiʼaki ai mo ʼihi ʼo te kokelekasio. Logola ʼe mole kovi hatatou fakatuʼutuʼu fakatomuʼa ke tou gāue mo he tahi, kae ʼe feala ke toe fua lelei kia tatou hatatou kau ki te ʼu fono fai faka mafola mokā tou tuku ki te tēhina ke ina fili mai hotatou hoa. ʼE feala ke hinoʼi mai ke tou gāue fakatahi mo he tahi ʼe mole tou ʼiloʼi lelei, ʼo faka fealagia ai ke tou “faka fālahi” totatou ʼofa.—2 Ko. 6:11-13, MN.
5 Ko tatatou fai faka mafola faka kūtuga ʼe ina fakaloto mālohiʼi tatou pea mo fakatahiʼi tatou heʼe tou “kauga gaue i te mooni.” (3 Soane 8) ʼOfa pe ke lahi tatatou kau ki te gāue ʼaia!