ʼE ʼi Ai Koa Hokotou Telituale ʼe ʼĀteaina Pē Kiā Koutou?
1. Koteā te faka ʼuhiga ʼo he telituale ʼe ʼāteaina pē kiā koutou?
1 Ko he telituale ʼe ʼāteaina pē kiā koutou ʼe ko he telituale ʼe tuku atu ke kotou gāueʼi. ʼE lelei kiā koutou te tuʼulaga ʼo te telituale ʼaia, heʼe ōvi atu kiō koutou pea ʼe feala hakotou fai faka mafola tokotahi ai peʼe kotou kaugā fai mo hokotou kaugā fagona. Logolā ʼe lelei ke tou lagolago ki te ʼu fakatuʼutuʼu ʼa te kōkelekāsio ki te fai faka mafola, kae kapau ʼe ʼi ai hotatou telituale ʼe ʼāteaina pē kiā tātou ke tou gāue ai ʼi he tahi age ʼu lakaga, pea ʼe feala anai hatatou fai he fagonogono kātoa, tāfito lā ʼi te ʼu kōkelekāsio ʼaē ʼe lahi ʼaupitō ai te telituale.—Gaue 10:42.
2. Koteā he ʼu lelei ʼe feala ke tou maʼu mo kapau ʼe ʼi ai hotatou telituale ʼe ʼāteaina pē kiā tātou?
2 Te ʼu Lelei: Neʼe tokagaʼi e ʼihi te tahi ʼu lelei ʼo te fai faka mafola ʼi he telituale ʼe ʼāteaina pē kiā nātou, ʼe tuʼu ōvi age ki tonatou fale gāue. Ko ʼihi neʼe natou leleiʼia te gāue faka fāmili ʼi honatou telituale ʼe ōvi age kiō nātou, ʼi he hola kātoa peʼe ʼi muʼa ʼo te Ako Tohi. Ko te ʼu ʼaʼahi pea mo te ʼu ako Tohi-Tapu ʼaē neʼe maʼu ai, neʼe ōvi kiō nātou, ʼo mole puli lahi ai tonatou temi ki tanatou feʼoloʼaki, mo tonatou mālohi pea mo tanatou falā. ʼUhi ʼaē heʼe lahi te gāue ʼaē ʼe feala ke fai ʼi he kiʼi temi veliveli, ko te maʼu ʼo hokita telituale ʼe ʼāteaina kiā kita, ʼe ina faka fealagia anai ki niʼihi ke natou pionie vaeluaʼi temi ʼi ʼihi māhina peʼe natou pionie kātoa. Tahi ʼaē meʼa, ko te gāueʼi ʼo hokita telituale ʼe ʼāteaina pē kiā kita pea mo tou feʼiloʼiʼaki ai mo te hahaʼi ʼo te telituale, ʼe tupu ai anai hanatou falala mai kiā tātou pea mo tou faka ʼalutahi anai tatatou ʼu palalau mo te ʼu meʼa ʼaē ʼe natou tuʼania kiai, pea ʼe lelei age ai anai te fakahoko ʼo tatatou minisitelio.
3. Koteā ʼaē neʼe hoko ki te pionie neʼe ina kole hona telituale ʼe ʼāteaina pē kiā ia?
3 Ko te pionie neʼe fakaloto mālohiʼi e te tagata taupau feʼaluʼaki ke ina kole hona telituale ʼe ʼāteaina pē kiā ia, ʼe ina ʼui fēnei: “Neʼe au tali te tokoni ʼaia pea mole tuai, pea neʼe au feʼiloʼiʼaki lelei ai pea mo fakakaumeʼa mo te hahaʼi ʼo toku telituale. Neʼe au fetofetogi te ʼu hola ʼaē neʼe au fai ai taku ʼu ʼaʼahi, ʼo mulimuli ki tonatou ʼu fealagia. Koia, neʼe tuputupu taku ʼu ʼaʼahi e 35 ʼo liliu ko ʼaʼahi e 80 tupu ʼi te māhina, pea mo taku ʼu ako Tohi-Tapu e fitu.”
4. ʼE kotou lava maʼu feafeaʼi pea mo gāueʼi feafeaʼi he telituale ʼe ʼāteaina pē kiā koutou?
4 ʼE Maʼu Feafeaʼi Hokita Telituale Feiā: Kapau ʼe koutou fia kole hokotou telituale ʼe ʼāteaina pē kiā koutou, pea kole age ki te tehina ʼaē ʼe gāue ki te telituale. Kotou fakaafe he tahi kaugā fai faka mafola ke kotou kaugā gāue, pea mo kotou tohi te ʼu ʼapi ʼaē neʼe lāvaki. ʼE tonu ke kotou faiga ʼo gāueʼi te telituale kātoa ʼaia iā māhina e fā. Kapau ʼe faigataʼa kiā koutou, pea ʼe feala hakotou kole ki te tehina taupau ʼo te Ako Tohi peʼe ki niʼihi atu ke natou tokoni atu. ʼOsi māhina e fā, pea ʼe feala ke kotou toe liufaki te telituale kua ʼosi gāueʼi kātoa peʼe kotou kole ke kotou toe gāueʼi. ʼE mole tonu anai ke kotou taupau ʼo talu ai ia te telituale ʼaia, kae kotou toe liufaki ke feala ki niʼihi kehe ke natou gāueʼi. Kapau ʼe mole lahi te telituale ʼo tokotou kōkelekāsio pea mole feala ke kotou maʼu hokotou telituale ʼe ʼāteaina pē kiā koutou, pea ʼe lagi feala anai ke kotou kole he koga ʼo he telituale ki te tehina taupau ʼo takotou ako tohi.
5. Koteā ʼaē ʼe tonu ke fai ke lava fakahoko ai tatatou gāue fai faka mafola?
5 Ko te gāue ʼaē ke tou faka mafola “ ʼi te kele kātoa” ʼe ko he gāue fakatalakitupua. (Mat. 24:14, MN ) ʼE fakamaʼua kiai he ʼu fakatuʼutuʼu ʼe fai fakalelei. ʼO hilifaki ki te ʼu fono gāue ʼaē ki te fai faka mafola, ko te faka mafola ʼi he telituale ʼe ʼāteaina pē kiā tātou, ʼe ina faka fealagia anai ke tou fakahā ia te logo lelei ki he ʼu hahaʼi tokolahi.