Te Tali Ki ʼAkotou ʼu Fehuʼi

◼ ʼE tonu koa ki te kokelekasio ke ʼi ai he mape ʼo tona telituale ʼi te Fale ʼo Te Puleʼaga?

Ei, ʼe tonu anai ke fakapipiki he mape ʼo te telituale ki he moʼi papa pea mo fakapipiki ki he kaupā ʼo te Fale ʼo Te Puleʼaga. ʼE mole tonu anai ke fakatuʼu te mape ʼi te moʼi papa ʼaē ʼe fakatuʼu ai te ʼu polokalama ʼo te kokelekasio. ʼE fakaʼiloga anai ʼi te mape, te ʼu tuʼakoi fuli ʼo te telituale ʼa te kokelekasio pea mo te ʼu tuʼakoi ʼo te ʼu telituale fuli ʼaki honatou ʼu numelo. ʼE tonu anai ke fakaʼiloga te ʼu tuʼakoi ʼo te ʼu kokelekasio fuli ʼaē ʼe nātou fakaʼaogaʼi fakatahi te Fale ʼo Te Puleʼaga. ʼE tokoni anai te fakatuʼutuʼu ʼaia ki te kau fai faka mafola pea mo nātou ʼaē ʼe foʼofoʼou mai, ke nātou ʼiloʼi te ʼu tuʼakoi ʼo te telituale ʼo te kokelekasio ʼaē ʼe nātou kau ai. Tahi ʼaē meʼa, koutou fakahā ʼi te mape te ʼu faʼahi ʼaē ʼe fai ai te ʼu ako tohi, heʼe tokoni anai ki te kokelekasio ke nātou ʼiloʼi peʼe fai ʼifea tanatou ako tohi. ʼE tonu anai ke fakafoʼou tuʼumaʼu te mape mo kapau ʼe ʼi ai he ʼu fetogi ʼo te telituale.

Ko te fakatuʼu ʼo te mape, ʼe ina fakamanatuʼi anai ki te kau fai faka mafola fuli, mo kapau ʼe nātou fealagia, ʼe lelei ke nātou kole hanatou telituale ke nātou gāueʼi. ʼE ʼaoga te mape kia nātou ʼaē ʼe nātou fia gāueʼi he telituale ʼe ōvi age kiō nātou. ʼI ʼihi temi ko te taʼi fakatuʼutuʼu ʼaia, ʼe ina faka faigafua ke fakanounou te ʼu fono ʼaē ki te fai faka mafola, heʼe feala kia ia ʼaē ʼe ina takitaki ke vave tana vahevahe ʼo te ʼu kūtuga ke nātou ʼolo ki te ʼu kolo ʼaē neʼe hinoʼi age ke nātou gāueʼi.

Tahi ʼaē meʼa, kapau ʼe ʼi ai he mape, pea ʼe hā ʼaki ai ko te kokelekasio ʼe ina fai te ʼu fakatuʼutuʼu ʼo ʼuhiga mo te gāue fai faka mafola ʼo te logo ʼo te Puleʼaga, ʼi te ʼu potu fuli ʼo te telituale ʼaē neʼe hinoʼi kiai.​—⁠Luka 9⁠:⁠6.