Kā Pupuli Te Hahaʼi ʼi Tonatou ʼApi
1. Koteā ʼaē kua faigataʼa mokā tou fai faka mafola ʼi te ʼu ʼapi?
1 ʼE lahi te ʼu koga meʼa kua liliu ʼo faigataʼa te maʼu ʼo te hahaʼi ʼi tonatou ʼapi. ʼI te ʼu “temi faigataa” ʼaenī, tokolahi kua tonu ke natou gāue ʼi ni ʼu hola moʼo maʼu te ʼu meʼa ʼaē ʼe ʼaoga ki tonatou maʼuli. (2 Tim. 3:1) Ko ʼihi ʼe lagi pupuli ʼi tonatou ʼapi ʼuhi he neʼe natou ʼolo ʼo fai fakatau, pē neʼe ʼolo ʼo mālōlō. ʼE tou lava fakahā feafeaʼi kiā nātou ʼaia te logo lelei?
2. ʼE feafeaʼi hatatou ʼiloʼi papau ʼe fai anai te ʼu ʼapi ʼaē neʼe lāvaki?
2 Tohi Fakalelei Te ʼu Nota: ʼUluaki, ʼe tonu ke kita tohi ia nātou ʼaē ʼe pupuli ʼi tonatou ʼapi. ʼE maʼuhiga tāfito te faʼahi ʼaia mo kapau ʼe kotou gāueʼi tuʼumaʼu takotou telituale. ʼE kotou tohi koa te higoa ʼo te ala, te nūmelo ʼo te telituale, tokotou higoa, pea mo te ʼaho ʼaē neʼe kotou fai faka mafola ai? ʼE feala ke kotou tuku he faʼahi moʼo tohi kiai he tahi ʼu nota mokā kotou toe liliu peʼe mokā ko he tahi age kaugā fagona ʼaē kā ʼalu ʼo fai ia te ʼu ʼapi ʼaē neʼe lāvaki. ʼI takotou ʼosi fai faka mafola, kotou manatuʼi ʼo ʼavage te pepa ʼaia kiā ia ʼaē ʼe nofo mo te telituale, gata pē mokā ʼe ina tuku atu ke kotou fai te ʼu ʼapi ʼaē neʼe lāvaki. Kotou fakaʼaogaʼi he tahi moʼi pepa moʼo tohi kiai te higoa ʼo te hahaʼi ʼaē neʼe fia logo pea ʼe kotou toe ʼaʼahi anai.
3. Koteā ʼaē ʼe feala ke fai moʼo maʼu ia nātou ʼaē ʼe pupuli ʼi tonatou ʼapi?
3 Fai Faka Mafola ʼi He Tahi Age Temi: Ko nātou ʼaē ʼe lagi pupuli ʼi tonatou ʼapi heʼe natou gāue, ʼe lagi natou nonofo ʼi tonatou ʼapi ʼi te ʼu afiafi peʼe ko te ʼu fakaʼosi vāhaʼa. ʼE feala koa ke kotou fakatuʼutuʼu ke kotou toe liliu ʼi he tahi age temi faigamālie? (1 Ko. 10:24) Kapau ʼe mole feala hakotou toe liliu ʼo fai te ʼu ʼapi ʼaē neʼe lāvaki, pea ʼe lagi lelei hakotou tuku age takotou ʼu nota ki he kaugā fagona ʼe feala anai ke toe liliu ʼi he tahi age hola ʼo fai ia te ʼu ʼapi ʼaia. Tahi ʼaē meʼa, ʼe feala ke kotou faitohi kiā nātou ʼaē ʼe pupuli ʼi tonatou ʼapi peʼe kotou faiga ke kotou maʼu nātou ʼi te telefoni. Ko te kau fai faka mafola ʼaē ʼe māhahaki pea ʼaki te ʼu fihifihia ʼe mole feala ke natou gāue lahi ki te fai faka mafola ʼi te ʼu ʼapi, ʼe lagi natou fiafia anai ʼi hanatou tokoni atu moʼo fai ia te faʼahi ʼaia.
4. Koteā te ʼaluʼaga neʼe hoko ʼe fakahā ai te maʼuhiga ʼo te toe fai ʼo te ʼu ʼapi ʼaē neʼe lāvaki?
4 Koʼenī te ʼaluʼaga neʼe hoko, ʼe fakahā ai te maʼuhiga ʼaē ke tou faiga ke tou maʼu ia nātou ʼaē ʼe pupuli ʼi tonatou ʼapi. Hili taʼu e tolu ʼo te ʼolo putuputu ʼa te kau fai faka mafola ki he ʼapi, neʼe maʼu leva te fafine ʼo te ʼapi ʼaia. Neʼe ʼatalitali ia lolotoga te temi ʼaia ke ʼalu age he Fakamoʼoni ʼo toe fai hana ako Tohi-Tapu, he neʼe kua ako ia ʼi muʼa ʼo tana mavae ʼo haʼu ki te koga meʼa ʼaia.
5. Ko te temi fea ʼaē ʼe feala ke ʼui ai kua ʼosi fai kātoa te telituale?
5 Fai Te Telituale Ke ʼOsi: Ko te temi fea ʼaē ʼe ʼui ai kua ʼosi te fai ʼo te telituale? ʼI te agamāhani, ʼe ʼosi ʼi te temi ʼaē kua tou ʼosi faiga lahi ai ke tou maʼu te ʼu ʼapi fuli. ʼE lagi lelei ke tou tuku he kiʼi pepa lotu peʼe ko he nusipepa ʼāfea ʼi te ʼu ʼapi ʼaē neʼe lāvaki, ʼo tou tōkakaga ke mole ʼasi ki te hahaʼi ʼaē ʼe fakalaka, pea tāfito ʼe tou fai fēia anai ʼi te ʼu telituale ʼaē ʼe mole gāueʼi tuʼumaʼu. ʼE tonu ke fai kātoa ia te telituale iā māhina e fā. Pea ʼe tonu ki te tehina ʼaē ʼe taupau ki te telituale ke ina tohi ke ʼiloʼi ia te telituale ʼaē kua ʼosi ʼi te fai.
6. He koʼē ʼe tonu ke tou faiga ke logo te hahaʼi fuli ʼi totatou telituale ki te logo lelei?
6 ʼE tou loto ke maʼu e te hahaʼi fuli ia te faigamālie ʼaē ke natou ako ke natou tapuhā te huafa ʼo Sehova pea ke haofaki nātou. (Loma 10:13, 14) ʼE kau ai mo nātou ʼaē ʼe pupuli ʼi tonatou ʼapi mokā tou fai faka mafola. Ohagē ko te ʼapositolo ko Paulo, ʼe kotou loto ke kotou “fakamoʼoni ʼaki te loto kātoa ki te logo lelei ʼo te ʼofa makehe ʼo te ʼAtua.”—Gāue 20:24.