He Koʼe ʼe Tonu Ke Tohi ʼi He Moʼi Pepa Te ʼu ʼApi ʼAē Neʼe Mole Maʼu Ai He Tahi?
1 Ko te taumatuʼa Fakamoʼoni neʼe nā ʼolo ʼo faka mafola ʼi te māfoatā. ʼI te fakaʼosiʼosi pe ʼo te ʼaho ʼaia, neʼe nā toe liliu ʼo fai te ʼu ʼapi ʼaē neʼe mole nā maʼu atu niʼihi ki ai ʼi te telituale. Neʼe fakaafe nāua e te tagata ki tona loto fale pea neʼe ina fakalogo fakalelei. Neʼe ina toʼo te tohi Mauli Heegata pea neʼe ina fehuʼi age peʼe nā toe ʼōmai anai. Neʼe mole heʼeki palalau ia mo he kau Fakamoʼoni ʼa Sehova ʼi muʼa atu pea neʼe ʼi ai tana ʼu tuʼuga fehuʼi neʼe ina fia maʼu hona ʼu tali kiai; ko te ako faka Tohi-Tapu neʼe kamata. Neʼe fiafia ʼaupito te taumatuʼa ʼaia ʼi tana maʼu he tahi ʼe hage ko te ōvi. ʼE koutou loto koa ke hoko he meʼa feiā kia koutou? Koutou tohi fakalelei ʼi he moʼi pepa te ʼu ʼapi ʼaē neʼe mole koutou maʼu tona ʼu hahaʼi pea mo koutou liliu fakavilivili kiai mo kapau ʼe fealagia ke koutou fai te faʼahi ʼaia.
2 ʼE uga tuʼumaʼu tatou ke tou tohi fakalelei te ʼu ʼapi ʼaē neʼe mole tou maʼu atu tona ʼu hahaʼi pea ke tou toe ʼolo ʼo ʼaʼahi fakavilivili te ʼu hahaʼi ʼaia. Ohage ko te meʼa ʼaē neʼe tou talanoa kiai ʼi te kamata, ko te tahi ʼaʼahi ʼi te ʼaho pe ʼaia ʼe feala ke maʼu ai ni ʼu fua lelei. Logope la tatatou fakatuʼutuʼu ʼaē ke tou fai katoa te telituale ʼaē neʼe hinoʼi mai, lagi ʼe mole tou tokaga fakalelei ʼo tohi ʼi he moʼi pepa te ʼu ʼapi ʼo nātou ʼaē neʼe mole tou maʼu ai he tahi. Ko ʼihi ʼe nātou ʼui fēnei: ‘ ʼE mātou gāueʼi liuliuga tamatou telituale ia vāhaʼa e lua peʼe tolu; ʼe mole he ʼuhiga ia ʼo te tohi ʼo he ʼu nota koteʼuhi ʼe vave pe anai tamatou toe liliu ʼo ʼaʼahi nātou.’ Kae ʼe ko te tupuʼaga la ʼaia ʼaē ʼe tonu ai ke tou tohi ʼi he moʼi pepa te ʼu ʼapi ʼo nātou ʼaē neʼe mole tou maʼu. ʼI te ʼu telituale ʼaē ʼe fai tuʼumaʼu ai te fai faka mafola, ʼe tokoni ʼaupito kia tatou te ʼu nota ʼaia, ke tou tokakaga ʼo toe fai te ʼu ʼapi ʼaē neʼe mole maʼu tona ʼu hahaʼi, ʼe faka fealagia ai kia tatou ke tou kumi fakalelei ia nātou ʼaē ʼe tau ke nātou maʼu te moʼoni. ʼO feafeaʼi?
3 ʼE lahi te ʼu koga meʼa, ko te 50 ki te teau peʼe laka age ʼo te hahaʼi, ʼe mole tou maʼu atu ʼi tonatou ʼu ʼapi ʼi te ʼaho katoa. Koia, ʼi tona fakahagatonu, ʼe lahi tatatou ʼu telituale mo kapau ʼe tou tokakaga tāfito ʼo fai te ʼu ʼapi ʼaē neʼe mole tou maʼu tona ʼu hahaʼi. Tatau aipe mo kapau ko te telituale e tahitahiga tona gāueʼi, ʼe feala ke tou hikihiki tona ʼu fua mokā ʼe tou faiga ke tou maʼu te hahaʼi fuli ʼi muʼa ʼo hatatou ʼui, kua ʼosi gāueʼi te telituale ʼaē neʼe hinoʼi mai.
4 Ko te toe fai ʼo te ʼu ʼapi ʼaē neʼe mole maʼu ai he tahi, ʼe feala pe ke fakatuʼutuʼu ki he tahi ʼaho, ʼe lelei age ʼi te lolotoga ʼo te vāhaʼa. Tokolahi ʼe nātou leleiʼia age hanatou toe liliu kiai ʼi he ʼaho pea mo he tahi age temi ʼi te ʼaho ʼaē neʼe nātou ʼuluaki fai ai. ʼE feala ke koutou fili te Moeaki peʼe ko te ʼAhotapu moʼo ʼaʼahi te ʼu ʼapi ʼaē neʼe mole koutou maʼu atu he tahi ʼi te lolotoga vāhaʼa. Pea ko te tahi age faʼahi ʼe feala ke koutou fai, e lahi te ʼu kokelekasio ʼe nātou fakatokagaʼi neʼe fua lelei tanatou ʼu ʼaʼahi ʼaia mokā nātou fai ʼi te afiafi. ʼE feala ke nātou maʼu atu ʼihi ʼu hahaʼi kio nātou.
5 ʼE tonu anai ke koutou tohi te ʼu ʼaʼahi ʼi takotou ʼu kiʼi pepa fai ʼaʼahi. Kapau ʼe mole feala ke koutou toe liliu ʼo ʼaʼahi nātou, ko takotou ʼu kiʼi moʼi pepa ʼaē ʼe tohi ai te ʼu higoa ʼo te hahaʼi ʼe tonu anai ke koutou foaki ki te tēhina ʼaē ʼe ina takitaki te gāue fai faka mafola, ke fakaʼaogaʼi e te kau fai faka mafola ʼaē ka nātou ʼolo ʼo fai te telituale.
6 Moʼo foaki he tokaga fakalelei ki te faʼahi ʼaia ʼo tatatou minisitelio, ʼe feala ke hikihiki te fua ʼo tatatou gāue ʼo toe feiā aipe mo tatatou fiafia. ʼE feala ke tou maʼu te lelei ʼaē ʼe haʼu mai te ʼu fua ʼo te ʼiloʼi ʼaē ʼe tou kumi fakalelei pea mo tokakaga ki te hahaʼi ʼaē ʼe hage ko ni ʼu ōvi.—Esk. 34:11-14.