Mo Koutou Foki ʼe Feala Ke Hoko Kia Koutou Ni ʼu Meʼa Lelei

Ko ʼihi kau fai faka mafola ʼe hage pe ʼe ʼi ai tuʼumaʼu ni ʼanatou ʼu meʼa maʼuhiga pea mo fakaloto mālohi neʼe hoko kia nātou ʼo ʼuhiga la mo he ʼaʼahi neʼe lelei peʼe ko he ʼaʼahi neʼe nātou maʼu ai he toe fiafia lahi. ʼI te agamāhani ko te ʼu meʼa lelei ʼe mole hoko fakafokifā. ʼE tautau hoko heʼe ko te fua ʼaia ʼo te tokaga pea mo te faiga hoholo pe. Ko te ʼu meʼa ʼe mole faka tuʼakoi pe ki te kau fai faka mafola ʼaē ʼe faigafua kia nātou he fai palalau peʼe ko nātou ʼaē ʼe faʼafai.

Koʼeni te ʼu faʼahiga meʼa neʼe fakatokagaʼi ʼo ʼuhiga mo nātou ʼaē ʼe fua lelei tanatou gāue: (1) ʼE nātou kau tuʼumaʼu ki te gāue fagonogono, ʼi te agamāhani ʼi te vāhaʼa fuli ʼe tuʼa lahi tanatou fai faka mafola, ko he faʼahi ʼe nātou maʼu ai te ʼu ʼaluʼaga lahi ke nātou felāveʼi mo te hahaʼi ʼaē ʼe fia fagono; (2) ʼe nātou taupau te manatu ʼe lelei ʼo ʼuhiga mo te hahaʼi ʼaē ʼe felāveʼi mo nātou, ʼo mole nātou ʼui fakatomuʼa ʼe mole fia fakalogo anai he tahi ki te ʼu meʼa ʼaē ʼe nātou fia palalau age kiai; (3) ʼe nātou aga fakakaumeʼa, ʼe nātou fakahā te tokaga ʼofa pea mo moʼoni kia nātou ʼaē ʼe fagono; (4) ʼe nātou faiga mālohi pea mo nātou faʼa kātaki ʼo fai te ʼu ʼaʼahi pea mo toe fai te ʼu ʼapi ʼaē neʼe mole nātou maʼu ai he tahi; pea (5) ʼe nātou fakatuʼutuʼu ke nātou kamata ni ʼu ako faka Tohi-Tapu.

ʼI takotou kua ʼosi sivisivi takotou gāue, e lagi ʼe feala ke koutou fakasiosio peʼe lava feafeaʼi hakotou fakaʼaogaʼi te ʼu tokoni lelei ʼaenī moʼo fakatuputupu takotou minisitelio pea mo lelei kia koutou.