Koutou Faiva ʼi Tokotou Minisitelio

¹ Kua fakapōʼuli te lagi, pea ʼe fakahaʼuhaʼu ʼo mālohi te logoaʼa faikehe. ʼE hifo ifo he ʼao ʼe hage ko te kohu mātolu. Koteā koa ʼaē ʼe hoko? ʼE ko te ʼu heʼe ʼe lauʼi miliona ʼe nātou ʼōmai ʼo maumauʼi te fenua katoa! Ko te meʼa ʼaia ʼaē neʼe fakamatala e te polofeta ko Soele, ʼe toe hoko foki ia ʼaho nei ʼaki te fai faka mafola ʼa te ʼu kaugana fakanofo ʼa te ʼAtua pea mo tanatou ʼu kaugā gāue ʼaē ko te toe hahaʼi tokolahi.

² Ko Te Tule Leʼo ʼo te ʼaho 1 ʼo Maio 1998, ʼi te pasina 11, mo te palakalafe 19, neʼe ʼui fēnei ai: “Ia ʼaho nei, ko te ʼu heʼe ʼa te ʼAtua ʼe nātou fakahoko he faka mafola lahi ʼi ‘te kolo’ ʼo te Keletiate. (Soele 2⁠:⁠9) . . . ʼE kei nātou mālo ʼi te ʼu ʼahiʼahi kehekehe, ʼo nātou hū ki te ʼu lauʼi miliona ʼapi, mo palalau ki te hahaʼi ʼi te ʼu ala, mo fai palalau mo nātou ʼi te telefoni, pea mo fakafetaulaki mo nātou ʼi he ʼu faʼahiga ʼaluʼaga kehekehe ʼi tanatou tala te logo lelei ʼa Sehova.” ʼE mole ko he pilivilesio lahi koa la tatatou kau ki te gāue ʼaia ʼaē neʼe fakatotonu mai e te ʼAtua ke tou fai?

³ Ko tatou kau kaugana ʼa Sehova, ʼe mole tou hage ko te ʼu heʼe ʼaē ʼe nātou faiga pe ke nātou fafaga ia nātou totonu, kae ʼe tou tokaga ki te maʼuli ʼo nātou ʼaē ʼe tou fai faka mafola ki ai. ʼE tou fia tokoni ki te hahaʼi ke nātou ʼiloʼi te ʼu moʼoni taulekaleka ʼaē ʼe maʼu ʼi te Folafola ʼa te ʼAtua, pea mo uga nātou ke nātou fai he ʼu fakatuʼutuʼu ke nātou maʼu te maʼuli heʼegata. (Soane 17:3; 1 Tim. 4:​16) Koia, ʼe tou fia faiva ʼi tatatou fakahoko totatou minisitelio. Tatau aipe pe koteā te faʼahiga palalau ʼaē ʼe tou fai ki te hahaʼi ʼi te faka mafola, kae ʼe tonu ke tou vakaʼi peʼe tou fakahoko feafeaʼi te gāue ʼaia pea mo te ʼu lakaga ʼaē ʼe tou gāue ai, ke feala ke ʼi ai he ʼu fua lelei ʼo totatou minisitelio. Mai tona ʼuhiga ʼaē “ko te ʼaluʼaga ʼo te mālama ʼaenī ʼe fetogi,” koia ʼe lelei ke tou vakavakaʼi pe koteā te ʼu fakatuʼutuʼu ʼaē ʼe tou fai ʼi te fai faka mafola ke ʼi ai hona ʼu fua lelei.​—1 Ko. 7:​31.

⁴ Tatau aipe peʼe tou loto ke tou fakaʼaogaʼi he ʼu puleʼaki kehekehe ke tou felāveʼi mo te hahaʼi, kae ko te gāue tāfito ʼaē ʼe tonu ke tou fakahoko ʼe ko te fai faka mafola ʼi te ʼu ʼapi. Ka koutou ʼolo ʼi te ʼu ʼapi, ʼe lahi koa te ʼu ʼapi ʼaē ʼe lāvaki peʼe koutou maʼu atu ʼe kei momoe te hahaʼi? ʼE ko he meʼa faigataʼa kia tatou, heʼe mole feala ke tou fakahā te logo lelei kia nātou! ʼE lava feafeaʼi hakotou fakatokatoka te fihifihia ʼaia?

⁵ Koutou Aga Fakapotopoto ʼo Koutou Fetogi Takotou ʼu Agamāhani: ʼI Iselaele ʼi te ʼuluaki sēkulō, neʼe gelu te hahaʼi tagata ʼi te pōʼuli. Koteā tona tupuʼaga? Logope la neʼe mole ko te temi ʼaē neʼe nātou leleiʼia tāfito, kae neʼe ko te temi neʼe lelei tāfito ai moʼo puke he tuʼuga ika. Neʼe ko te temi ʼaia ʼaē neʼe lahi tāfito ai te maʼu ika. ʼI tana talanoa ki te gelu ʼaia, neʼe ʼui fēnei e Te Tule Leʼo ʼo te ʼaho 15 ʼo Sūnio 1992: “ ʼE feiā pe mo tatou, ʼe tonu ke tou ʼiloʼi tatatou telituale, ke tou gelu ʼi te ʼu temi ʼaē ʼe tou maʼu atu te tokolahi pea mo nātou tali lelei tatou.” Neʼe sivisivi fakalelei te ʼu agamāhani ʼa te hahaʼi, pea ʼe hā mai ko te tokolahi ʼo nātou ʼe nātou nonofo ʼi tonatou ʼu ʼapi ʼi te Moeaki uhu pea mo te ʼAhotapu uhu, kae ʼe mole lagi nātou tali leleiʼi anai tatou ʼi te ʼu temi ʼaia. Kapau ʼe feiā ʼi takotou telituale, ʼe feala koa ke koutou ʼaʼahi nātou ʼi he tahi age temi, ʼe tali lelei age ai koutou? ʼE ko he puleʼaki lelei ʼaia ke tou hikihiki te lelei ʼo totatou minisitelio, pea ke tou fakahā te ʼofa ki totatou ʼu vāhaʼa fale, pea ʼe ko he fakamoʼoni ʼaia ʼo totatou ʼofa faka Kilisitiano moʼoni.​—Mateo 7:​12.

⁶ Ia Filipe 4:5, ʼe fakamanatuʼi mai e te ʼapositolo ko Paulo, ʼe tonu ke ‘ ʼiloʼi e te hahaʼi fuli tatatou aga fakapotopoto.’ ʼO mulimuli ki te fakatotonu fakaʼatua ʼaia, koia ʼe tou fia aga fakapotopoto anai mokā tou fakahoko tatatou gāue fai faka mafola ʼaki he loto fakamalotoloto pea mo he loto fiafia. ʼE tou fia ‘faiakonaki ia muʼa ʼo te hahaʼi pea ʼi te ʼu ʼapi,’ kae ʼe tou fia fakahoko totatou minisitelio ʼi he ʼu temi ʼe fakapotopoto pea ʼe lahi ai te ʼu fua lelei ʼaē ʼe tou maʼu. (Gāue 20:20) Ohage ko te ʼu tagata gelu ʼi Iselaele ʼo te ʼuluaki sēkulō, ʼe tou fakatuʼutuʼu ke tou ‘gelu’ ʼi te ʼu temi ʼaē ʼe feala ke tou maʼu ai he ʼu fua lelei, ka mole tou fakatuʼutuʼu ke tou gāue ʼi te ʼu temi ʼaē ʼe tou leleiʼia.

⁷ Koteā te ʼu fetogi ʼaē ʼe feala ke tou fai? ʼI te agamāhani, ʼe fai te ʼu fono ki te fai faka mafola ʼi te hola valu peʼe ko te hola hiva ʼi te Moeaki pea mo te ʼAhotapu, ʼosi ʼaia pea ʼolo atu aipe te kau fai faka mafola ki te ʼu ʼapi ʼo te telituale. Kae neʼe fakatuʼutuʼu e ʼihi tagata ʼāfea, ke ʼolo te kau fai faka mafola ʼo fakahoko te tahi faʼahiga gāue, ohage la ko te fagonogono faigamālie, peʼe ke nātou fai tanatou ʼu ʼaʼahi, ʼi muʼa ʼo tanatou ʼolo ʼi te ʼu ʼapi ʼo te telituale. ʼI ʼihi kokelekasio, neʼe fakatuʼutuʼu ke fai te ʼu fono ki te fai faka mafola ʼi te hola fitu peʼe ko te hola valu uhu. ʼI te ʼosi fai ʼo te fono, pea ʼolo fakahagatonu te kau fai faka mafola ki te ʼu ʼapi ʼo te telituale, pea nātou hoko atu tanatou gāue ʼaki te ʼu ʼaʼahi pea mo te ʼu ako ʼo aʼu ki te lotomalie ʼo te hoʼatā. ʼI ʼihi telituale, ko te temi ʼaē ʼe lelei ai ki te fakatuʼutuʼu ʼo te fai faka mafola ʼe ko te hili hoʼatā. Kapau ʼe tou fai he ʼu fetogi feiā, pea ʼe lagi hikihiki anai te lelei ʼo te fai faka mafola ʼi te ʼu ʼapi.

⁸ Tou Fakasiosio Tonu Pea Mo Fakapotopoto: Ka tou felāveʼi mo te hahaʼi ʼi tonatou ʼapi, ʼe lahi te ʼu tali kehekehe ʼaē ʼe fai mai kia tatou ʼo ʼuhiga mo te logo lelei. ʼE tali e ʼihi te logo lelei, ko ʼihi ʼe mole nātou tokagaʼi te meʼa ʼaē ʼe tou ʼui age kia nātou, pea ko ʼihi ʼe nātou ʼitaʼita peʼe fakatupu kē kia tatou. Kapau koia ʼaia, pea ʼe fakamanatuʼi mai e te tohi Comment raisonner ʼi te pasina 7, ʼe mole tou faiga ke tou “tauʼi te ʼu fakakaukau ʼo te hahaʼi ʼaē ʼe mole nātou fakaʼapaʼapa ki te moʼoni.” Kapau ʼe mole tali leleiʼi tatou e te pule ʼo te ʼapi, pea ʼe lelei age hatatou mavae. ʼE mole tonu ke tou fakatupu ʼita ki te hahaʼi koteʼuhi ʼe tou fia fakalotoʼi nātou ke nātou fai palalau mo tatou peʼe ke nātou tali tatatou faʼahiga manatu. ʼE mole tou fakakinau te hahaʼi ke nātou tali te logo ʼaē ʼe tou fakahā. ʼE mole ko he aga fakapotopoto ʼaia, pea ʼe feala ke tupu ai he ʼu fihifihia ki te tahi kau Fakamoʼoni ʼa Sehova pea ki te gāue fai faka mafola katoa.

⁹ ʼI muʼa ʼo tatatou kamata gāueʼi he telituale, ʼe lelei ke tou vakaʼi te kiʼi kate ʼo te telituale ke tou ʼiloʼi ai pe ko ai ʼaē ʼe mole loto ke ʼaʼahi. Kapau ʼe ʼi ai he ʼu ʼapi feiā, pea ʼe tonu ke fakahā ki te kau fai faka mafola ke mole nātou ʼolo kiai. ʼE mole tonu anai ke fakatuʼutuʼu e he tahi ke ina fai te ʼu ʼapi ʼaia, ka neʼe mole fakatotonu age e te tēhina taupau ki te gāue.

¹⁰ ʼE feala ke tou hikihiki te lelei ʼo totatou faka mafola ʼi te ʼu ʼapi, mokā tou fakasiosio poto. Koutou fakasiosio lelei te ʼu ʼapi. ʼE māpunu koa te ʼu matapā pea mo te ʼu lito? ʼE koutou logo koa ki he ʼu hahaʼi ʼe fai palalau ʼi loto? Kapau ʼe mole koutou logo ki he meʼa, pea ʼe lagi kei momoe te hahaʼi. Koia, ʼe lelei age anai tatatou fai palalau mo te pule ʼo te ʼapi mo kapau e tou toe liliu mai. ʼE lagi lelei age anai ke tou hiki ki he tahi ʼapi, ʼo tou tohi te numelo ʼo te ʼapi ʼaē neʼe lāvaki. ʼE feala ke tou toe fai te ʼapi ʼaia ʼi muʼa ʼo tatatou mavae ʼi te telituale, peʼe ke tou tohi ke tou ʼaʼahi ki muli age.

¹¹ Kapau ʼe mole tou tokaga, pea ʼe feala pe ke tou fakaʼala he tahi peʼe tou fakalelu kia ia ʼi tana gāue, logola neʼe mole tou loto kiai, pea ʼe lagi ʼita anai. Koteā ʼaē ʼe feala ke tou fai? ʼE tuku mai te tokoni ʼaenī ia Tāʼaga Lea 17:27: “Ko he tagata ʼe fakasiosio tonu ʼe fīmālie tona ʼatamai.” Logope la ʼe mole tou faifakalelei ʼo ʼuhiga mo tatatou minisitelio, kae ʼe feala ke tou faifakalelei mokā tou ʼaʼahi he ʼapi ʼi he temi ʼe mole ina leleiʼia. ʼE feala ke tou kole fakalelei age peʼe feala ke tou toe liliu mai ʼi he tahi ʼaho. (Tāʼaga Lea 15:1) Kapau ʼe ʼui mai e he tahi ʼe gāue pōʼuli, pea ʼe feala ke tou tohi ki te telituale ke ʼaʼahi ia ia e te kau fai faka mafola ʼi he temi ʼe ina leleiʼia.

¹² ʼE toe ʼaoga foki te fakasiosio tonu mokā tou faiga ke tou gāueʼi fakalelei te telituale. ʼE tokolahi te hahaʼi ʼaē ʼe mole tou maʼu atu ʼi tonatou ʼapi ʼi tatatou ʼuluaki ʼaʼahi, pea ʼe tonu ke tou faiga mālohi ke tou maʼu ia nātou moʼo fakahā age te logo ʼo te fakamaʼuli. (Loma 10:13) ʼE hā mai ʼi te ʼu tānaki ʼaē neʼe fai, ʼe ʼi ai te kau fai faka mafola ʼe nātou toe liliu tuʼa lahi ʼi te ʼaho e tahi, ʼo nātou faiga ke nātou maʼu te hahaʼi ʼi tonatou ʼapi. Kae ʼe tokagaʼi e te ʼu vāhaʼa fale te faʼahi ʼaia. ʼE lagi tupu anai te ʼui ʼa te hahaʼi, ko te kau Fakamoʼoni ʼa Sehova ʼe nātou ‘ ʼaʼahi tuʼumaʼu pe’ te hahaʼi ʼo tonatou kolo. Koteā te puleʼaki ki te faʼahi ʼaia?

¹³ Koutou fakasiosio poto. Ka koutou toe liliu ki he ʼapi neʼe mole koutou maʼu ai te hahaʼi, ʼe ʼi ai koa he ʼu faʼahi ʼe feala hakotou ʼiloʼi ai, kua toe liliu mai te hahaʼi? Kapau ʼe koutou fakatokagaʼi, ʼe mole he tahi ʼi te ʼapi, pea ʼe mole hona ʼaoga ke koutou fisifisi te matapā ʼi te temi ʼaia. Kapau ʼe koutou ʼaʼahi liuliuga te ʼapi ʼi te ʼu lakaga kehekehe ʼo te ʼaho, ka mole koutou maʼu he tahi, pea ʼe feala ke koutou tuku ai he kiʼi pepa lotu ʼi te lalo matapā, tāfito la mo kapau ʼe tou fai putuputu te telituale ʼaia. ʼE lagi maʼu anai te hahaʼi ʼo te ʼapi ʼaia mokā toe fai te telituale ʼaia.

¹⁴ ʼE mole tonu ke tou fai palalau fualoa mo te hahaʼi ʼi tuʼa mokā ʼe tuʼu kovi. Ka fakaafe koutou ki fale, koutou tokakaga naʼa ʼulihi te sima. Koutou aga fakapotopoto mokā kō te ʼu kuli kia koutou. Ka koutou fai faka mafola ʼi he falefata, ʼaua naʼa koutou palalau leʼo lahi pea mo logoaʼa, naʼa fakalelu ki te hahaʼi ʼo te falefata, ʼo nātou ʼiloʼi fakatomuʼa ai ʼe koutou ʼolo age ʼo ʼaʼahi nātou.

¹⁵ Tou Aga Fakatokatoka Pea Mo Fakaʼapaʼapa: Kapau ʼe tou fai he ʼu fakatuʼutuʼu lelei, pea ʼe tou tokaga anai ke mole tou fakapupu ʼi he telituale, naʼa tokagaʼi fau tatou e te hahaʼi. ʼE lagi matataku anai te hahaʼi ʼi te ʼu ʼapi ʼi tanatou sio ʼaē ki he tuʼuga motokā ʼe ʼōmai ki tonatou muʼa ʼapi ʼo hifo mai ai te kau fai faka mafola ʼe kaugamālie. ʼE mole tou loto ke manatu te hahaʼi, ʼe tou “ ʼohofiʼi” tonatou telituale. ʼE lelei age ke fai te ʼu fakatuʼutuʼu ʼaia ʼi te fono faka mafola. Ko he ʼu kiʼi kūtuga veliveli, ohage ko he foʼi famili, ʼe mole ko he meʼa fakatupu tuʼania ki te hahaʼi, pea ʼe faigafua tonatou fakatuʼutuʼu ʼi te telituale.

¹⁶ Ko te ʼu mātuʼa ʼaē ʼe aga fakatokatoka, ʼe maʼua ke nātou leʼoleʼo fakalelei tanatou fānau mokā nātou fai faka mafola ʼi te telituale. ʼE tonu ke agalelei te ʼu tamaliki mokā nātou ʼolo fakatahi mo te hahaʼi lalahi ʼi te ʼu ʼapi. ʼE mole tonu ke tou tuku te ʼu tamaliki ke nātou gaoʼi peʼe hoko feʼoloʼaki, ʼo tokagaʼi e te hahaʼi’ ʼo te ʼapi pe ko nātou ʼaē ʼe fakalaka ʼi te ala.

¹⁷ ʼE toe ʼaoga foki kia tatou te aga fakapotopoto mokā tou ʼolo ʼo kakai ʼi he fale kafe. Ko Te Minisitelio ʼo Te Puleʼaga ʼo Sūnio 1995, ʼi te pasina 7, ʼe ina ʼui fēnei: “Ka tou ʼolo ʼo fai faka mafola, ʼe feala ke puli hotatou temi lahi ʼi te ʼu fale kafe. Kae ka tuʼu kovi, ko he kiʼi tuʼu ʼe tokoni mai anai ke tou hoko atu te gāue. Kae ʼe tokolahi ia nātou ʼaē ʼe nātou leleiʼia ke nātou fakaʼaogaʼi tonatou temi ki te fai faka mafola, ʼo mole nātou kau ʼi te fakatahi ʼa te ʼu tēhina mo tuagaʼane ʼi te fale kafe lolotoga ʼo te temi ʼaē neʼe fakatuʼutuʼu ki te fai faka mafola.” Logope la ko te ʼai ʼo he kiʼi tuʼu moʼo toʼo hakita meʼa ʼinu ʼe ko he meʼa ʼe fakalogo kia kita totonu, kae neʼe fakatokagaʼi ʼi ʼihi temi, ʼe fakatahitahi te ʼatu tēhina mo tuagaʼane ʼi he fale kafe peʼe ko he fale kai. ʼO hilifaki ki te temi lahi ʼaē ʼe ʼaoga kia nātou ke nātou kakai peʼe ʼiʼinu, ko tonatou kaugamālie ʼe feala ke fakatupu tuʼania ki te patolo ʼo te fale. ʼI ʼihi temi, ko te ʼu kaugā fagona ʼe nātou fakamatala leʼo lahi te ʼu meʼa neʼe hoko ʼi te uhu, ʼo feala ai ke valokiʼi totatou minisitelio pea mo fakatupu kovi ki tona ʼu fua lelei. ʼAki he aga fakapotopoto, ʼe faiga anai te kau fai faka mafola ke ʼaua naʼa nātou hahaʼi fau ʼi he fale kafe, naʼa nātou maumauʼi te temi lahi ʼaē neʼe tonu ke fakaʼaogaʼi ki te fai faka mafola.

¹⁸ Tokolahi neʼe nātou maʼu he ʼu fua lelei ʼi tanatou fai palalau mo te hahaʼi ʼi te ʼu faʼahi fuli ʼaē neʼe nātou maʼu ai nātou​—ʼi te ʼu ala, ʼi te ʼu taulaga motokā, pea mo te tahi ʼu potu ʼaē ʼe kaugamālie ai te hahaʼi. ʼO toe feiā pe ʼi te ʼu potu ʼaia, ʼe tou loto ke lelei tatatou aga, ʼo mole tou fai ʼaki pe tatatou ʼu palalau, kae ʼaki tatatou aga fakapotopoto. Ko te kau fai faka mafola ʼo te ʼu kokelekasio, ʼe tonu ke nātou mulimuli lelei ki te ʼu tuʼakoi ʼo tonatou telituale, ke ʼaua naʼa hahaʼi fau te kau fai faka mafola ʼaē ʼe nātou palalau ki te hahaʼi ʼaē ʼe taka ʼi te ʼu koloā, ʼi te ʼu taulaga kā, peʼe ki te hahaʼi gāue, ohage ko te ʼu ʼutuʼaga penisini ʼaē ʼe ava tuʼumaʼu. Ke feala hatatou fakahoko totatou minisitelio ʼi he ʼaluʼaga ʼe lelei pea mo fakatokatoka, ʼe tou gāueʼi pe anai totatou telituale, gata pe mo kapau neʼe fai e te Komite Gāue ʼo he tahi kokelekasio, he ʼu fakatuʼutuʼu makehe ke tokoni age kia nātou ʼi tonatou telituale.​—Vakaʼi ia 2 Kolonito 10:13-​15.

¹⁹ Ko te ʼu kokelekasio ʼaē ʼe lahi ai te ʼu koga meʼa ʼaē ʼe feala ke fai ai te fagonogono faigamālie, neʼe nātou fakatuʼutuʼu te ʼu koga meʼa ʼaia ko he ʼu telituale kehekehe. ʼE nātou fakaʼaogaʼi te kiʼi mape ʼe tohi ai te telituale, pea ʼe nātou foaki ki he kaugā fagona peʼe ki he kūtuga kau fai faka mafola. ʼAki te faʼahi ʼaia, ʼe gāueʼi lelei age te ʼu telituale, pea ʼe mole hahaʼi fau te kau fai faka mafola ʼaē ʼe nātou gāue ʼi he telituale ʼi te moʼi temi pe e tahi, ʼo mulimuli ki te pelesepeto ʼaē ʼe tou maʼu ia 1 Kolonito 14:40: “Ke fai ia meʼa fuli ʼi he ʼaluʼaga ʼe lelei pea ʼi te fakatokatoka.”

²⁰ ʼE tonu ke lelei tuʼumaʼu tatatou teu pea ke tau mo feʼauga mo totatou ʼuhiga minisi ʼa Sehova ʼAtua. Ko te faʼahi ʼaia ʼe toe moʼoni foki ʼo ʼuhiga mo te ʼu meʼa gāue ʼaē ʼe tou fakaʼaogaʼi. ʼE fakatupu kovi anai ki te logo ʼo te Puleʼaga, mo kapau kua maumau tatatou kato, pea kua ʼuli tatatou Tohi-Tapu. Neʼe ʼui ʼo ʼuhiga mo te teu, “ ʼe ko he faʼahi ʼe ina fakagafua te faka felogoi mo te hahaʼi, heʼe ina foaki kia nātou he ʼu naunau ʼo ʼuhiga mo totatou ʼuhiga moʼoni pea mo tatatou gāue.” Koia, ʼe mole tonu ke faikehe tatatou faʼahiga teu, peʼe ke gigila fau, kae ʼe tonu ke “tau mo feʼauga mo te logo lelei.”​—Filp. 1⁠:27; vakaʼi ia 1 Tim. 2⁠:​9, 10.

²¹ Ia 1 Kolonito 9:​26, ʼe ʼui fēnei e te ʼapositolo ko Paulo: “ ʼE mole ʼau hoko lele pe, kae ko ʼau ʼe ʼau fakahaga taku ʼu tā, ke mole ʼau tā ʼi te ʼaele.” Ohage ko Paulo, ʼe tou fia faiva ʼi te minisitelio, pea ʼe tou loto ke fua lelei. ʼI tatatou lagolago ki te gāue fai faka mafola ʼi tatatou kau ki te “tuʼuga heʼe” ʼa Sehova ia ʼaho nei, ʼofa pe ke tou aga fakapotopoto pea mo fakasiosio tonu mokā tou ʼave te logo ʼo te hāofaki ki te hahaʼi ʼo te telituale.