Koutou Fakaʼaogaʼi Fakalelei Tokotou Maʼuli
1 Ko tatou fuli, ʼe tatau totatou temi ʼaē ʼe tuku mai ʼi te vāhaʼa fuli. ʼE maʼuhiga ʼaupito te temi ʼaē ʼe tou fakaʼaogaʼi moʼo faka mafola te logo lelei, koteʼuhi ʼe ko he temi ʼe tou fakaʼaogaʼi moʼo hāofaki te hahaʼi. (Loma 1:16) ʼE tou fakahā anai tatatou mahino ki te faʼahi maʼuhiga ʼaia, mo kapau ʼe tou teuteuʼi lelei tatatou gāue fai faka mafola, mo tou ʼolo vave ki te telituale. ʼE lelei hatatou foimo ʼolo ki te telituale, ʼi hatatou fualoa fau ʼi te fono ki te fai faka mafola. Mai tona ʼuhiga ʼaē neʼe akoʼi mai e Sehova kia tatou, “ko meʼa fuli ʼe ʼi ai tona temi kua fakakatofa,” koia ʼe tonu ai ke tou fakaʼaogaʼi fakalelei totatou temi ʼaē neʼe tou fakatuʼutuʼu ki te minisitelio.—Tnk. 3:1.
2 Koutou Fai He Polokalama Lelei: ʼE lahi tatatou ʼu tapuakina mokā tou mulimuli lelei ki te fakatuʼutuʼu ʼaē ke tou kau tuʼumaʼu ʼi te minisitelio. Kua mahino kia tatou, ko te ʼu fua lelei ʼaē ʼe tou maʼu ʼi te minisitelio, ʼe fakalogo ki te temi lahi ʼaē ʼe tou fakaʼaogaʼi ki te gāue ʼaia. ʼE feala koa ke tou vakaʼi peʼe tou lava fai he ʼu kiʼi fetogi ʼi tatatou ʼu gāue māhani, ke toe lahi age te temi ʼaē ʼe tou fakaʼaogaʼi ki te fai faka mafola? Ohage la ʼi tatatou ʼosi tufa te ʼu nusipepa ʼi te Moeaki, ʼe feala koa ke tou fakatuʼutuʼu he temi moʼo hoko atu tatatou gāue, moʼo fai he ʼu ʼaʼahi? ʼI tatatou ʼosi fai faka mafola ʼi te ʼAhotapu, ʼe feala koa ke tou fakaʼaogaʼi he temi moʼo fai he ʼu ʼaʼahi, peʼe tou fai he ako Tohi-Tapu? ʼO hilifaki ki tatatou fai faka mafola ʼi te ʼu ʼapi, ʼe feala koa ke tou fai faka mafola ʼi te ala? Kapau ʼe tou fai feiā, pea ʼe feala anai ke tou fakalahi tatatou fai faka mafola.
3 Ka tou fai faka mafola, pea ʼe feala ke puli hotatou temi maʼuhiga mo kapau ʼe mole tou nofo tokaga. ʼE mahino ia, kapau ʼe vevela fau, pea ʼe lelei ke tou ʼai hatatou kiʼi tuʼu ke tou ʼiʼinu, ke feala ai hatatou hoko atu te gāue. Kae ʼe tonu ke tou fakapotopoto, heʼe mole maʼua tuʼumaʼu ke ʼai he kiʼi tuʼu ʼo tatatou gāue.
4 ʼI te ʼu taʼu ʼaenī, kau ʼāsili faigataʼa te maʼu ʼo te hahaʼi iō nātou. Moʼo tali ki te ʼaluʼaga ʼaia, ko te tokolahi ʼo te kau fai faka mafola, ʼe nātou fai faka mafola ʼi te ʼu temi kehekehe. He koʼe koa ʼe mole koutou ʼahiʼahi te fai faka mafola ʼi te ʼosi hili hoʼatā peʼe ʼi te kamata afiafi?
5 ʼE lelei age mo kapau ʼe mole fakapupu te kau fai faka mafola ʼi tanatou fagonogono ʼi te ala. Kae ʼe tonu ke nātou tutuʼu fakavaha, ke feala hanatou fakaōvi ki te hahaʼi pea mo fai palalau mo nātou. Kapau ʼe nātou fai feiā, pea ʼe nātou fakaʼaogaʼi fakalelei anai tonatou temi, pea ʼe toe lahi anai mo tonatou fiafia ʼi te gāue ʼaia.
6 Koutou Fakaʼaogaʼi Te ʼu Temi Faigamālie Moʼo Faka Mafola: Neʼe faka mafola te tuagaʼane ki te fafine neʼe ina ʼui age ʼe mole fia fai ki te faʼahi ʼaia. Pea neʼe fehuʼi age e te tuagaʼane peʼe feala hana palalau mo he tahi kehe ʼi te ʼapi. Pea neʼe fai palalau ai mo te tagata ʼo te ʼapi, ʼaē kua mahaki talu mai ni ʼu taʼu, pea kua nofo pe ia ʼi tona palepale. ʼAki te ʼamanaki ʼaē ʼe talanoa kiai te Folafola ʼa te ʼAtua, neʼe toe tuputupu tana fia maʼuli. Mole tuai pea mavae ʼi tona palepale, pea ʼalu ʼo kau ki te ʼu fono ʼaē ʼe fai ʼi te Fale ʼo Te Puleʼaga, pea ina faka mafola ki te hahaʼi tana ʼamanaki foʼou!
7 Ko te kiʼi tuagaʼane kei finemui, neʼe mulimuli ki te tokoni ʼaē ke kita faka mafola ʼi te hola ʼi muʼa ʼo te Ako Tohi. ʼI te ʼuluaki matapā, neʼe felāveʼi mo te kiʼi taʼahine ʼe taʼu 13, pea neʼe fakalogo lelei te kiʼi taʼahine ʼaia pea ina toʼo tana tohi. ʼI te ʼapogipogi ake ʼi te faleako, neʼe toe felāveʼi te kiʼi tuagaʼane ʼaia mo te kiʼi taʼahine, pea ina fehuʼi age peʼe ina fia ako te Tohi-Tapu, pea neʼe tali e te kiʼi taʼahine ʼaia.
8 Koutou Hikihiki Te Lelei ʼo Tokotou Temi Fai Faka Mafola: Kapau ʼe tou kau tuʼumaʼu ki te fai faka mafola, pea ʼe tuputupu anai tatatou faiva ʼi te fakahā ʼo te logo lelei. ʼE feala koa ke faigafua age takotou kamata he fai palalau ʼi te ʼu ʼapi, ʼo koutou fakaʼaogaʼi he ʼu ʼuluaki palalau ʼe lelei age? ʼE feala koa ke koutou hikihiki takotou fai ako mokā koutou fai he ako Tohi-Tapu? Kapau ʼe koutou fai feiā, pea ʼe feala anai ke koutou fakaʼaogaʼi fakalelei tokotou temi ʼi te fai faka mafola, pea ke lahi age te ʼu fua lelei ʼo tokotou minisitelio.—1 Tim. 4:16.
9 Mai tona ʼuhiga ʼaē “kua nounou te temi ʼaē ʼe kei toe,” koia ʼe tonu ai ke lahi te ʼu gāue faka Kilisitiano ʼaē ʼe tou fai ʼi totatou maʼuli. (1 Ko. 7:29, MN) ʼE tonu ke tou fakamuʼamuʼa tāfito te temi ʼaē kua tou fakatuʼutuʼu ki te fai faka mafola. Tou kau mālohi ki te minisitelio. Ko te temi ʼe ko he faigamālie taulekaleka neʼe foaki mai e Sehova kia tatou. Koia, tou fakaʼaogaʼi lelei tuʼumaʼu pea mo tou fakaʼaogaʼi ʼaki he aga fakapotopoto.
[Talanoa ʼo te pasina 4]
Koʼeni Te ʼu Tokoni:
◼ Koutou ʼōmai tautonu ki te ʼu fono fai faka mafola.
◼ ʼAua naʼa koutou fakapupu mokā koutou fai faka mafola.
◼ ʼAua naʼa koutou ʼolo tauhala ki te telituale.
◼ Koutou ʼolo ki te telituale ʼi te ʼu hola ʼaē ʼe koutou maʼu ai te hahaʼi iō nātou.
◼ ʼI ʼihi temi koutou faka mafola tokotahi mo kapau ʼe mole ko he koga meʼa ʼe feala ke kita tuʼutāmaki ai.
◼ Koutou fai he ʼu ʼaʼahi ʼi te ʼu faʼahi ʼaē ʼe feōvi ai mo te telituale ʼaē ʼe koutou fai faka mafola ai.
◼ Koutou hoko atu takotou fai faka mafola mokā tuai mai te ʼu tēhina mo tuagaʼane ʼaē neʼe koutou ʼolo fakatahi ki te telituale.
◼ Kapau ʼe feala, ʼo mulimuli ki te ʼu ʼaluʼaga, pea koutou faiga ke laka takotou fai faka mafola ʼi te hola katoa.