Koutou Faikole Kia Sehova Ke Tokoni Atu Kia Koutou
1 Neʼe fakahā lelei e Sesu ki tana kau tisipulo ʼe ʼaoga kia nātou ke tapuakina e Sehova tanatou minisitelio. (Mat. 9:37, 38) ʼE tou fakahā anai ʼe tou falala katoa ki te tokoni mai ʼa Sehova, mo kapau ʼe tou faikole ʼaki he ʼu fakavikiviki kia te ia, mo he ʼu fakafetaʼi, ʼaki he ʼu faikole fakamalotoloto pea mo he ʼu kolekole mamahi. (Filp. 4:6, 7) ʼE fakaloto mālohiʼi mai e te Tohi-Tapu ke tou haga faikole “aki ia faahiga faikole pea mo kole fuape,” pea ʼe toe pipiki kiai tatatou ʼu faikole ʼo ʼuhiga mo te minisitelio.—Ef. 6:18.
2 ʼI tatatou ʼu faikole ʼe tou fakavikiviki kia Sehova ʼo ʼuhiga mo tona ʼu kalitate taulekaleka pea mo te ʼu meʼa fakaofoofo ʼaē neʼe ina fai. ʼE tou toe fakavikiviki kia te ia heʼe ko ia ʼaē ʼe Ina foaki mai te logo lelei ʼaē ʼe tou faka mafola. ʼE tau mo feʼauga ke tou vikiʼi ia ia he ko ia tokotahi ʼaē ʼe ina tapuakina totatou minisitelio.—Pes. 127:1.
3 ʼI tatatou ʼu kole fakafetaʼi ʼe tou fakahā ai tatatou leleiʼia te fealagia ʼaē neʼe foaki mai e Sehova ke tou mahino ki tona finegalo pea mo tana fakatuʼutuʼu. ʼE mole ko he pilivilesio koa la hatatou fakahā ki te hahaʼi te ʼu moʼoni ʼo te Puleʼaga? ʼE tou fakamālo kia Sehova ʼo ʼuhiga mo te ʼu meʼa fuli ʼaē ʼe feala ke tou fai ʼi te minisitelio.—Pes. 107:8; Ef. 5:20.
4 ʼE tau mo feʼauga ke tou faikole kia Sehova ke tokoni mai kia tatou ke tou maʼu he ʼu hahaʼi ʼe nātou tali anai ke nātou ako te Tohi-Tapu, pea ke tou faka malave te moʼoni ki tonatou loto. Ko te ʼu kole ʼaia ʼe nātou fakamoʼoni ʼe tou ʼiloʼi ʼe ko te ʼAtua tokotahi pe ʼaē ʼe ina tapuakina tatatou minisitelio.—1 Ko. 3:5-7.
5 Ko te tuagaʼane neʼe ʼalu tuʼumaʼu ʼo ʼave Te Tule Leʼo pea mo te Réveillez-vous! ki he fafine, neʼe ina manatu ʼe mole ina lau te ʼu nusipepa. Koia ʼi tana mole loto ke pulinoa te ʼu nusipepa maʼuhiga ʼaia, neʼe ina kole kia Sehova ke mole tali e te fafine te ʼu nusipepa mo kapau ʼe mole ina lau. ʼI te tahi ʼaʼahi ʼo te tuagaʼane, neʼe ʼui fēnei age ki ai e te ʼohoana ʼo te fafine ʼaia: “ ʼE ʼau fia fakamālo atu ki tau haʼu tuʼumaʼu ʼo ʼaumai te ʼu nusipepa ʼaia. ʼE ʼau lau tuʼumaʼu pea ʼe ʼau leleiʼia ʼaupito tona lau.”
6 ʼAki he agavaivai pea mo he aga fakamalotoloto, ʼe feala ke tou kole mamahi kia Sehova ke tokoni mai ke tou kātakiʼi te mole fia fakalogo ʼa te hahaʼi pea mo tanatou vāʼi tatou, pea mo tatatou tuʼania ki te tagata, kae ke tou haga fai faka mafola ki te hahaʼi ʼaki he lototoʼa. (Gaue 4:31) Kapau ʼe tou haga faikole “aki ia faahiga faikole pea mo kole fuape,” pea mo tou fakahoko agatonu tatatou gāue taputapu, pea ʼe feala ke tou falala ko Sehova ʼe tokoni mai anai kia tatou.—1 Soane 3:22.