ʼI Muʼa ʼo Te Fai Fakamafola, ʼe ʼAoga Ke Tou Kumi Te Hahaʼi Aē ʼe Lea Fakaʼuvea

1. He koʼē ʼe vaevae te telituale ʼi te ʼu koga meʼa aē ʼe lahi ai te hahaʼi ʼe lea kehekehe ʼo mulimuli ki te lea?

¹ ʼI te Penikositē ʼo te taʼu 33 H.T.S.a ʼi tonatou kua fonu fuli ʼi te laumālie māʼoniʼoni, ko te kau tisipulo ʼa Sesu “nee natou kamata palalau leva i ihi age lea” kiā nātou ʼaē neʼe ʼomai mai te ʼu potu mamaʼo ʼo te kele. (Gaue 2:4) ʼUhi ko te faʼahi ʼaia, ko te teitei toko 3 000 hahaʼi ʼaē neʼe papitemaʼi. ʼE kotou tokagaʼi, neʼe hagē neʼe felōgoi te tokolahi ʼi te kau matāpule ʼi te lea e tahi, ʼe lagi ko te lea Fakahepeleo peʼe ko te lea Fakakeleka. Kae, neʼe loto e Sehova ke fakamafola kiā nātou ia te logo lelei ʼo te Puleʼaga ʼi tanatou lea. ʼE mahino papau ia, ʼe ko he puleʼaki ʼaia ke tali gafua e te hahaʼi ia te logo lelei ʼi tanatou lea. Koia lā ʼaē, iā ʼaho nei, ʼe vaevae te telituale ʼi te ʼu koga meʼa ʼaē ʼe lahi ai te hahaʼi ʼe lea kehekehe ʼo mulimuli ki te lea. (Km 2/07, p. 9, pal. 5 ki te p. 10 pal. 1.) ʼE mole foaki he telituale ki te ʼu kiʼi kūtuga lea kehekehe, kae ʼe natou fai fakamafola kiā nātou ʼaē ʼe palalau ʼi tanatou lea, ʼi te telituale ʼo te kōkelekāsio ʼaē ʼe tokaga ki tanatou kiʼi kūtuga pea mo te telituale ʼa ʼihi atu kōkelekāsio ʼe ovi mai.

2. (1) He koʼē ʼe ʼaoga ʼi ʼihi temi ke kumi te hahaʼi ʼo he lea? (2) ʼE feala ke fetokoniʼaki feafeaʼi ia te ʼu kōkelekāsio ʼi he telituale ʼe lea kehekehe? (3) Koteā ʼaē ʼe tonu ke tou fai mokā ʼe tou maʼu he tahi ʼe palalau ʼi he tahi lea ʼe fia logo?

² Kapau ʼe kotou māʼuʼuli ʼi he koga meʼa ʼe lea tahi te hahaʼi, pea ʼe feala pē ke kotou fai fakamafola ʼi te ʼu ʼapi fuli. Kae, ko te faʼahi ʼaia, ʼe feala ke fetogi mo kapau ʼe kotou māʼuʼuli ʼi he ʼu kolo ʼe lea kehekehe. ʼE feala ki he ʼu kōkelekāsio ʼo he tahi lea ke natou fai fakamafola ʼi te ʼu kolo ʼaia. Logopē lā ʼe feala ke foaki atu e te ʼu kōkelekāsio ia te ʼu higoa mo te ʼu tuʼasila ʼo nātou ʼaē ʼe lea Fakaʼuvea, kae ko te ʼuluaki maʼua ʼo te kōkelekāsio, peʼe ʼo te kiʼi kūtuga, ʼe ko te kumi ia te hahaʼi ʼaē ʼe tonu ke natou fakamafola ki ai. (Vakaʼi ia te fakamatala ʼaē ʼe ʼātakai “Tou Fetokoniʼaki.”) Koia lā ʼaē, ʼe ʼaoga ke kotou kau ki te kumi ʼo te nofoʼaga ʼo te hahaʼi ʼaē ʼe lea Fakaʼuvea. ʼE feala ke fakahoko feafeaʼi te fekumi ʼaia?

3. Koteā ʼaē ʼe fakalogo kiai ia te temi ʼaē kā fakaʼaogaʼi e te kōkelekāsio, peʼe ko te kiʼi kūtuga, ki te fekumi ʼaia?

³ Te Fakatuʼutuʼu ʼo Te Kumi ʼo Te Hahaʼi ʼAē ʼe Lea Fakaʼuvea: Ko te temi ʼaē ʼe fakaʼaogaʼi moʼo kumi ia te hahaʼi ʼaē ʼe Fakaʼuvea ʼi te ʼu kolo ʼaē ʼe lea kehekehe, ʼe fakalogo ki te ʼu ʼaluʼaga ʼo te ʼu kolo. Ohagē lā, ko te tokofia ʼe lea Fakaʼuvea ʼi te ʼu kolo? Ko fai fakamafola e fia ʼe nonofo ai? Ko ʼapi Uvea e fia kua maʼu e te kōkelekāsio peʼe ko te kiʼi kūtuga ʼi ai? ʼE mole fakamaʼua ki te kōkelekāsio ke ina kumi ʼi te ʼu kolo fuli, kae ʼe feala pē ke ina gāueʼi te ʼu kolo ʼaē ʼe natou kaugamālie ai, pea mo te ʼu kolo ʼaē ʼe mole faʼa mamaʼo, ʼi te ʼu tuʼakoi ʼo te telituale. Kae, ʼe maʼuhiga ke tou fai he fakatuʼutuʼu ʼe lelei ki te fekumi ʼaia, ke tou tuku ia te fealagia ki te tokolahi ke natou pāui ia te huafa ʼo Sehova.—Loma 10:13, 14.

4. (1) ʼE tonu ke fakatuʼutuʼu feafeaʼi ia te fekumi? (2) Ko te ʼu faʼahiga fakatuʼutuʼu fea ʼe feala ai ke tou maʼu ia te hahaʼi ʼaē ʼe palalau ʼi tatatou lea?

⁴ Ke māui mālie te gāue ʼi te ʼu kolo ʼaē ʼe ʼaoga kiai, ʼe tonu ke fai pea mo takitaki te kumi ʼo te hahaʼi ʼaē ʼe lea Fakaʼuvea e te kolesi ʼo te kau tagata ʼāfea, tāfito te taupau gāue. (1 Ko. 9:26) ʼE hinoʼi anai e te kolesi ʼo te kau tagata ʼāfea ʼo te kōkelekāsio ʼaē ʼe pipiki kiai ia he ʼu kiʼi kūtuga ʼi he tahi lea, ia he tehina ʼe faiva ke ina takitaki te kiʼi kūtuga ʼaia, kae ʼe lelei age mokā ko he tagata ʼāfea peʼe ko he tagata faifekau fakaminisitelio. ʼE lahi te ʼu kōkelekāsio pea mo te ʼu kiʼi kūtuga neʼe natou fakatuʼutuʼu ke natou ʼuluaki fai he ʼu fekumi. ʼE lagi ʼe natou fakaʼaogaʼi he tohi ʼe tuʼu ai te ʼu higoa mo te ʼu tuʼasila, peʼe ko te Neti, moʼo fakatahiʼi te ʼu higoa ʼo natou ʼaē ʼe palalau ia te lea. Pea, ʼe fai te fekumi ʼaki te telefoni peʼe ʼaki te ʼu ʼaʼahi ke ʼiloʼi ia te ʼu tuʼasila ʼaē ʼe tonu ke tou tohi ki te telituale. Kapau ʼe lelei te faʼahi ʼaia, ʼe feala ke fai e te kolesi ʼo te kau tagata ʼāfea ʼo te kōkelekāsio ʼaē ʼe lagolago ki he kiʼi kūtuga, ia te fakatuʼutuʼu ʼaē ke kau fuli ia te kōkelekāsio ki te fekumi ʼi ʼihi temi pē.—Vakaʼi ia te fakamatala ʼaē ʼe ʼātakai “ ʼE Tou Maʼu Feafeaʼi Ia Nātou ʼAē ʼe Fakaʼuvea.”

5. (1) Koteā te ʼu faʼahiga manatu ʼe ʼaoga ki te kau fai fakamafola mokā natou kumi ia te hahaʼi ʼe lea Fakaʼuvea? (2) Koteā ʼaē ʼe feala ke tou ʼui mokā tou kumi te hahaʼi ʼaē ʼe lea Fakaʼuvea?

⁵ ʼE tonu ke tou mahino lelei ki te fakatuʼutuʼu ʼo te fekumi ʼi te temi fuli ʼaē ʼe tou lagolago kiai. ʼE kau ia te gāue ʼaia ki te minisitelio, koia ʼe tonu ke tou teu ohagē ko te fai fakamafola māhani. Tokolahi ʼe natou ʼui kā natou ʼahiʼahi ʼanatou ʼuluaki palalau ʼi te lea lolotoga te fekumi, pea ʼe natou taupau maʼu ia te fiafia pea ʼe natou faiva age ʼi te lea. ʼE feala ke tou lau ia te temi ʼaē ʼe tou fakaʼaogaʼi ki te fekumi kae mole ko te temi ʼaē ʼe tou fakaʼaogaʼi moʼo teuteuʼi te ʼu telituale pea mo te ʼu lisi. Kapau ʼe tou maʼu he tahi ʼe palalau ʼi te lea, pea ʼe tonu ke tou faiga ke tou fakamafola age ia te logo lelei, pea ʼosi ʼaia ke tou foimo fakahā ki te taupau gāue, peʼe ko he tahi neʼe hinoʼi e ia, ke ina fakafoʼou ia te telituale. ʼE moʼoni te faʼahi ʼaia tatau aipē pe neʼe fia logo peʼe kailoa. Logolā ʼe maʼuhiga te fekumi, kae ʼe tonu ke tou fakapotopoto ʼo tou kau ki te ʼu faʼahi fuli ʼo te minisitelio.—Vakaʼi te fakamatala ʼaē ʼe ʼātakai “Te ʼu Palalau ʼAē ʼe Tou ʼUi ʼi Te Kumi ʼo Te Hahaʼi ʼAē ʼe Lea Fakaʼuvea.”

6. He koʼē ʼe ko he ʼaluʼaga makehe mokā ʼe tou tokoni ki te kau tuli?

⁶ Tou Tokoni Ki Te Kau Tuli: Ko te tokoni ki te kau tuli, ʼe ko he ʼaluʼaga makehe, pea ʼe ʼaoga kiai he ʼu faiga fakamālotoloto pea mo he faʼa kātaki. ʼE mole feala ke tou maʼu he tuli ʼaki pē tona higoa, peʼe ko tona agaaga, peʼe ko ʼana teu. Pea tahi ʼaē meʼa, ko tona fāmili peʼe ko ʼona kaumeʼa ʼe feala ke natou puipui te tuli ʼo mole natou fia foaki atu anai he ʼu fakamahino ʼo ʼuhiga mo ia. Ko te ʼu ʼaluʼaga ʼaē ʼe hoa mai moʼo tokoni ki te kau tuli, ʼe toe feala ke ʼaoga mokā ʼe tou kumi ia nātou ʼaē ʼe palalau ia te lea.

7. Koteā ʼaē ʼe feala ke tou fai mokā ʼe tou maʼu he tuli?

⁷ ʼI te fai fakamafola, ʼe feala ke tou maʼu he tuli peʼe ko he tahi ʼe lagi ʼi ai hona kāiga ʼe tuli. Kapau ʼe poto ʼi te lau tohi, ʼe feala ke tou tuku age he tohi. Pea ʼe tou fakahā anai ki te kōkelekāsio peʼe ko te kiʼi kūtuga lea fakatuli ke natou hoko atu ia te tokoni ki te tuli ʼaia.

8. He koʼē ko te kumi ʼo te hahaʼi ʼaē ʼe lea Fakaʼuvea ʼe ko he koga maʼuhiga ʼo te minisitelio?

⁸ Ko He Gāue Maʼuhiga: Ko te kumi ʼo te hahaʼi ʼaē ʼe palalau ʼi takotou lea ʼe feala ke liliu ko he gāue kinakina. Pea tahi ʼaē meʼa, ko te hahaʼi ʼi te ʼu kolo ʼe feala ke hiki ki he tahi koga meʼa, kae ʼe ʼomai ʼihi atu hahaʼi, koia ʼaē ʼe faigataʼa ia te fakafoʼou te ʼu telituale. Kae, ʼi te kua lahi ʼo te ʼu kolo, ko te kumi ʼo te hahaʼi ʼaē ʼe lea Fakaʼuvea ʼe ko he koga maʼuhiga ʼo te minisitelio. Ko Sehova, ʼe mole fakapalatahi, pea neʼe ina foaki mai ia te fakamaʼua ʼaē ke tou fai fakamafola. (Gaue 10:34) ʼE ina “loto ke fakamauli te tagata fuli, pea ke natou kaku ki te iloi katoa o te mooni.” (1 Tim. 2:3, 4) Koia, ʼe tou fakaʼamu ke tou lagolago fuli kiā Sehova ʼi te kumi ʼo te hahaʼi ʼaē ʼe “loto agatonu mo lelei” ʼi te ʼu lea kehekehe.—Luka 8:15.

[Nota]

[Talanoa ʼo te pāsina 5]

Tou Fetokoniʼaki

Kapau ko te kōkelekāsio peʼe ko te kiʼi kūtuga ʼe ʼaoga kiā nātou he tokoni moʼo maʼu te hahaʼi ʼi tanatou lea ʼaē ʼe feala ke natou fai fakamafola age, ko te taupau gāue ʼo te kōkelekāsio ʼe felōgoi anai mo te ʼu tagata ʼāfea ʼo te ʼu kōkelekāsio ʼi he tahi lea. ʼE lagi lelei age ke felōgoi pē mo te ʼu kōkelekāsio ʼaē ʼe mole faʼa mamaʼo peʼe ko te ʼu kōkelekāsio ʼaē ʼe lahi ia te hahaʼi ʼaē ʼe natou palalau ia te lea. ʼE feala ke fakahā e te ʼu kōkelekāsio, ʼaē neʼe kole tokoni ki ai, ki ʼanatou fai fakamafola ia te faʼahi ʼaia kapau ʼe natou maʼu he tahi ʼe palalau ia te lea ʼaia, ʼe tonu ke natou tohi ia te tuʼasila pea mo ʼavage ki tanatou taupau gāue ke ina foaki ki te kōkelekāsio peʼe ko te kiʼi kūtuga ʼaē neʼe kole tokoni. Ko te ʼu taupau gāue ʼo te ʼu kōkelekāsio ʼaē neʼe kau ki te gāue ʼaia, ʼe feala ke natou gāue fakatahi ʼaki he fakatuʼutuʼu ʼe ʼaoga kiā nātou fuli moʼo gāueʼi te telituale kātoa ʼaē ʼe lahi ai te ʼu lea pea mo taki ia nātou ʼaē ʼe fia logo ki te kōkelekāsio peʼe ko te kiʼi kūtuga ʼo tanatou lea.

Kapau ʼe maʼu e te kau fai fakamafola ia he tahi ʼi he tahi age lea kua fia logo moʼoni (peʼe ko he tuli), ʼe tonu ke natou foimo tohi ki te kiʼi pepa Veuillez suivre lʼintérêt (S-43) pea natou foaki ki te sīkalaipe ʼo te kōkelekāsio. ʼE feala anai kiā ia ʼaē ʼe fia logo ke ina maʼu fakavilivili he tokoni fakalaumālie.—Vakaʼi te km 5/11 p. 3.

[Talanoa ʼo te pāsina 6]

ʼE Tou Maʼu Feafeaʼi Ia Nātou ʼAē ʼe Fakaʼuvea

• Fakafehuʼi ki te kau ako Tohi-tapu, ʼonatou kāiga, mo te ʼu kaugā gāue, pea mo ʼihi atu.

• Fakaʼaogaʼi he tohi ʼo te ʼu nūmelo telefoni moʼo maʼu ai te ʼu higoa ʼo te kau Uvea. Ko he tahi age tohi ʼo te ʼu higoa mo te ʼu tuʼasila ʼe feala ke maʼu ʼi te Neti peʼe mai te fale telefoni.

• Kole fakaʼeteʼete ki te ʼu pilō ʼaē ʼe gāue ki te hahaʼi ohagē ko te ʼu tānakiʼaga tohi ʼo te kolo, te ʼu pilō ʼo te puleʼaga, pea mo te ʼu fale ako lalahi.

• Kotou vakaʼi ʼi te sulunale ia te ʼu faʼahiga gāue peʼe ko he ʼu gaoʼi neʼe fakatuʼutuʼu e te hahaʼi ʼo te lea.

• ʼAʼahi te ʼu koloa pea mo te ʼu fale gāue maʼa te hahaʼi ʼo te lea.

• ʼAki he fakagafua mai te kau takitaki, fakatuʼu he laupapa tufa tohi ʼi te ʼu fale gāue, ʼi te univelesitē, peʼe ko te taulaga kā ʼaē ʼe maʼu ai te hahaʼi ʼe palalau ia te lea.

• Kapau ʼe fakagafua e te lao ʼi tokotou fenua, totogi he tohi peʼe ko he polokalama ʼo te olotinatea ʼe fakafealagia ia te fekumi ʼi te Neti.

[Talanoa ʼo te pāsina 7]

Te ʼu Palalau ʼAē ʼe Tou ʼUi ʼi Te Kumi ʼo Te Hahaʼi ʼAē ʼe Lea Fakaʼuvea

Ko takotou agalelei pea mo takotou aga fakamālotoloto ʼe ina pulihi anai ia te mahalohalo. ʼI te agamāhani, ʼe lelei age ke fakahā fakatomuʼa he tohi ʼi te lea.

ʼI te ʼosi fai he fakamālo, ʼe feala ke kotou ʼui fēnei: “ ʼE matou kumi ia natou ʼaē ʼe lea Fakaʼuvea ke matou fakahā age ia te ʼamanaki ʼo te Tohi-Tapu. ʼE ke ʼiloʼi koa lā he tahi age ʼe feala ke au palalau ki ai?”